༢༠༡༤ ཟླ་ ༣ ཚེས་ ༢ རེས་གཟའ་ཉི་མ།
༄༅། །སྲིད་སྐྱོང་མཆོག་ཨ་རིའི་རྒྱལ་ས་ཝ་ཤིང་ཊོན་ Washington ནས་ཕྱི་ལོ་ ༢༠༡༤ ཟླ་ ༢ ཚེས་ ༢༥ ཉིན་ཨ་རིའི་གྲོང་ཁྱེེར་སན་ཕེ་རན་སི་སི་ཁོར་ཆེད་ཕེབས་ཀྱིས་ཁུལ་དེར་རྒྱལ་སྤྱིའི་འགོ་ཁྲིད་གསོ་སྐྱོང་ཚན་པའི་ Global Leadership Incubator (GLI) ལྷན་ཚོགས་སུ་ཕེབས་ཏེ་ཚོང་ལས་མི་སྣ་གྲགས་ཅན་དང་སློབ་གྲྭའི་འགོ་ཁྲིད་མི་སྣ་ ༨༠ ཙམ་དང་ཐུག་འཕྲད་གནང་ཡོད། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་དང་སྲིད་སྐྱོང་མཆོག་ནས་བཀའ་སློབ་སྩལ་ཡོད། སྲིད་སྐྱོང་མཆོག་ཕྱི་ཚེས་ ༢༥།༢༦ ཉིན་གཉིས་རིང་ཁེ་ན་ཌའི་གྲོང་ཁྱེར་ཝན་ཁུ་ཝར་ Vancouver ཕེབས་ཏེ་ཁུལ་དེར་གནས་སྡོད་བོད་རིགས་རྣམས་ལ་གསུང་བཤད་གནང་ཡོད།
སྐབས་དེར་སྲིད་སྐྱོང་མཆོག་གིས་བོད་ནང་གི་ད་སྐབས་ཛ་དྲག་གི་གནས་སྟངས་སྤྱི་དང་ལྷག་པར་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་ཐོག་ནས་བོད་རྒྱ་མི་རིགས་གཉིས་སྨན་གྱི་ཐབས་ལམ་འཚོལ་ཐབས་བྱེད་བཞིན་པ་དེར་ཤེས་ཡོན་ཧ་ཅང་གལ་ཆེན་པོ་ཆགས་ཡོད་སྐོར་སོགས་གསུངས། ཉིན་གཉིས་པར་སྲིད་སྐྱོང་མཆོག་གིས་ཁུལ་དེར་གོ་ལོབ་ཨེན་མེལ་ Globe & Mail ཞེས་པའི་གསར་འགྱུར་བརྒྱུད་ལམ་ཚན་པའི་གསར་འགོད་པའི་དྲི་བར་ལན་འདེབས་གནང་ཡོད། དེ་རྗེས་སྲིད་སྐྱོང་མཆོག་གིས་བྷི་རི་ཊི་ཤི་ཀོལ་ལམ་བྷི་ཡའི་གཙུག་ལག་སློབ་གྲྭ་ British Columbia ཆེན་མོའི་ནང་ཁྲིམས་ཀྱི་སློབ་ཕྲུག་གཙོ་བོར་གྱུར་བའི་དོན་གཉེར་བ་ཁག་གཅིག་ལ་བོད་ནང་གི་ད་ལྟའི་ཛ་དྲག་གི་གནས་སྟངས་སྤྱི་དང་ལྷག་པར་དུ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་འགོ་ཁྲིད་དང་ལྷན་བོད་ཀྱི་གནད་དོན་སེལ་ཆེད་ཞི་མོལ་གནང་རྒྱུ་སོགས་ཀྱི་གནད་དོན་ཐོག་གསུང་བཤད་གནང་ཡོད། ཕྱོགས་མཚུངས་སྲིད་སྐྱོང་མཆོག་གིས་ཉེ་ལམ་རྒྱ་གར་བྱང་ཤར་ཨ་རུ་ནྰ་ཅལ་ཁུལ་གྱི་བསྟན་འཛིན་སྒང་བོད་མིའི་གཞིས་ཆགས་ནས་ཁེ་ན་ཌར་གནསསྤོ་གནང་མཁན་རྣམས་དང་ཐུག་འཕྲད་གནང་ཡོད། དེ་རྗེས་སྲིད་སྐྱོང་མཆོག་ཕྱི་ཚེས་ ༢༧ ཉིན་ཁེ་ན་ཌའི་གྲོང་ཁྱེར་ཀལ་གྷ་རིར་ Calgary གནས་སྡོད་བོད་མི་རྣམས་ལ་ཤེས་ཡོན་སྐོར་དང་ཉེ་ལམ་༸གོང་ས་མཆོག་ཨ་རིའི་རྒྱལ་ས་ཝ་ཤིང་ཊོན་ཁུལ་དུ་མཛད་འཕྲིན་ཁག དེ་བཞིན་བོད་མིའི་སྒྲིག་འཛུགས་ཀྱིས་བཙན་བྱོལ་བོད་མིའི་གནས་སྟངས་ཡར་རྒྱས་གཏོང་ཆེད་འབད་བརྩོན་གནང་ཕྱོགས།
བོད་ཀྱི་གནད་དོན་སེལ་ཆེད་དབུ་མའི་ལམ་གྱི་ཐབས་ལམ་ཐོག་འབད་བརྩོན་མུ་མཐུད་བྱེད་བཞིན་པ་སོགས་ཀྱི་སྐོར་གསུང་བཤད་གནང་བསྟུན། དྲི་བ་རྣམས་ལ་ལན་འདེབས་གནང་ཡོད། སྐབས་དེར་ཁེ་ན་ཌའི་གྲོས་ཚོགས་འཐུས་མི་སྐུ་ཞབས་རོབ་ཨེན་ཌར་སི་ Mr Rob Anders མཆོག་ཀྱང་ལྷན་བཞུགས་གནང་ནས་བོད་མི་ཚོར་ཤེས་ཡོན་གལ་ཆེ་ཡིན་སྐོར་ཐོག་གསུང་བཤད་དང་། བོད་མི་ཚོས་འཚེ་མེད་ཞི་བའི་ལམ་ནས་ཐོབ་ཐང་རྩོད་བཞིན་པ་དེར་བསྔགས་བརྗོད་ཀྱང་གནང་ཡོད། ཕྱི་ཚེས་ ༢༨ ཉིན་སྲིད་སྐྱོང་མཆོག་ཨ་རིའི་གྲོང་ཁྱེར་ཀོ་ལོ་རེ་ཌོར་ཕེབས། སྲིད་སྐྱོང་མཆོག་ཕྱི་ལོ་ ༢༠༡༤ ཟླ་ ༣ ཚེས་ ༢ ཉིན་ཨ་རིའི་མངའ་སྡེ་མི་ནེ་སོ་ཊར་ ་Minnesota ཕེབས་ཏེ་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་བོད་ཀྱི་ལོ་གསར་དུས་སྟོན་གྱི་མཛད་སྒོར་ཆེད་བཅར་ཞུ་རྒྱུ་ཡིན་འདུག ཕྱི་ཟླ་ ༣ ཚེས་ ༤།༦ བཅས་ཉིན་གཉིས་རིང་སྲིད་སྐྱོང་མཆོག་རྒྱལ་ས་ཝ་ཤིང་ཊོན་དུ་སླར་ཡར་ཕེབས་རྒྱུ་ཡིན་འདུག ཐེངས་འདིར་སྲིད་སྐྱོང་མཆོག་དང་ལྷན་སྐུ་སྒེར་དྲུང་ཆེ་འཇིག་མེད་རྣམ་རྒྱལ་ལགས་དང་ཨ་རིའི་སྐུ་ཚབ་དོན་ཁང་གི་དྲུང་ཆེ་ངག་དབང་ཡོན་བསྟན་ལགས་བཅས་ཕེབས་ཡོད།
