༢༠༡༤ ཟླ་ ༣ ཚེས་ ༡༩ རེས་གཟའ་ལྷག་པ།
༄༅། །འདི་གའི་ཆེད་གཉེར་གསར་འགོད་པ་ཡི་ཤེས་ཀུན་གྲགས་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༣ ཟླ་ ༣ ཚེས་ ༡༨ ཉིན་གྱི་སྔ་དྲོའི་ཆུ་ཚོད་ ༡༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཧི་མཱ་ཅལ་མངའ་སྡེའི་རྒྱལ་ས་སིམ་ལར་རྟེན་གཞི་བྱས་པའི་དཔལ་ལྡན་རྒྱལ་བ་ཇོ་ནང་མ་དགོན་རྟག་བརྟན་ཕུན་ཚོགས་གླིང་དུ་༸ཞབས་སོར་འཁོད་སྐབས་ཇོ་ནང་བའི་མ་དགོན་རྟག་བརྟན་ཕུན་ཚོགས་ཆོས་གླིང་གི་མཁན་པོ་ཀུན་དགའ་རིན་ཆེན་མཆོག་དང་། དགོན་པའི་བླ་སྤྲུལ་དང་གྲྭ་དམངས་བཅས་ཀྱིས་ལག་ཏུ་དཀར་གཙང་མཇལ་དར་སོགས་ཐོགས་ཏེ་སེར་སྦྲེངས་དང་། སིམ་ལ་དབྱངས་ཅན་དགའ་ཚལ་གླིང་གི་ས་གནས་འགོ་འཛིན། ས་གནས་འཐུས་ཚོགས་ཀྱི་ཚོགས་གཙོ། ཚོགས་པ་ཁག་གི་ལས་སྣེ་རྣམ་པ། གཞིས་མི་དང་ཆོས་ཞུ་བ་མི་མང་བཅས་ཀྱིས་བདུག་སྤོས་དང་མེ་ཏོག དཀར་གཙང་མཇལ་དར་ཐོགས་ཏེ་ཕེབས་བསུ་གཟབ་རྒྱས་ཞུས་ཡོད།
དེ་ནས་མགོན་པོ་གང་ཉིད་མཆོག་གིས་ཁལ་ཁ་རྗེ་བཙུན་དམ་པའི་གཟིམ་ཆུང་ལ་གནས་གཟིགས་དང་སྐུ་ངལ་ཕྲན་བུ་གསོས་རྗེས་དགོན་པའི་འདུ་ཁང་ནང་ཆིབས་སྒྱུར་བསྐྱངས་ཏེ་བཀའ་སློབ་སྩལ་དོན། ངོས་རང་སྔོན་མ་ཐེངས་གཅིག་འདིར་ཡོང་སྐབས་ཁལ་ཁ་རྗེ་བཙུན་དམ་པ་ཡོད། ཇོ་ནང་ཁྲིད་བརྒྱ་བཏོན་པ་རེད། ད་ཆ་རིན་པོ་ཆེ་ཞིང་ལ་ཕེབས་ཚར་བ་རེད། དེ་རིང་སིམ་ལར་འབྱོར་སྐབས་འདིར་ཁྱུག་ཙམ་བཅར་འདོད་བྱུང་། ཁལ་ཁ་རིན་པོ་ཆེ་དང་ངོས་གཉིས་ཆུང་དུས་ནས་ཆོས་གྲོགས་རེད། རྩ་བའི་ཇོ་ནང་གི་ཆོས་བརྒྱུད་འདི་བོད་གངས་ཅན་ལྗོངས་ཀྱི་ཆོས་བརྒྱུད་ཅིག་ཆགས་ཡོད། ཆོས་བརྒྱུད་གལ་ཆེ་ཞིག་ཕལ་ཆེར་རེད། གཙོ་བོ་དཔལ་དུས་ཀྱི་འཁོར་ལོ་སྦྱོར་དྲུག་གི་སྐོར་ཇོ་ནང་གི་ཐུན་མོང་མ་ཡིན་པཞིག་ཆགས་ཡོད། སྦྱོར་དྲུག་གི་ཉམས་ལེན་མཐོང་བ་གྱུར་བར་མ་ཉམས་པར་ཡོད་པ་དེ་ཕལ་ཆེར་ཇོ་ནང་ཁོ་ན་མི་ནམ་སྙམ། དེར་བརྟེན་བསྟན་པ་སྤྱི་དང་ལྷག་པར་དཔལ་དུས་ཀྱི་འཁོར་ལོའི་བསྟན་པ་འཛིན་སྐྱོང་སྤེལ་གསུམ་བྱེད་མཁན་གྱི་རྟེན་གནས་ཤིག་ཆགས་ཡོད་པར་བརྟེན་གནད་འགག་ཧ་ཅང་ཆེན་པོ་རེད། ཤེར་ཕྱིན་གྱི་གཞུང་ལྟ་སྐབས་རང་སྟོང་དང་གཞན་སྟོང་ཞེས་རྩོད་པ་མང་པོ་ཡོད། དོན་དམ་གཞན་སྟོང་ཀུན་རྫོབ་རང་སྟོང་ཞེས་ཡོད། གཞན་སྟོང་གོ་བ་ལེན་ཕྱོགས་འདྲ་མིནཡོད། དཔེར་ན། གསང་བ་བསྡུས་པའི་ནང་སྟོང་པ་བཞིའི་རྣམ་གཞག་གསུང་གི་ཡོད་པ་དེ་གཞན་སྟོང་ཆགས་ཀྱི་ཡོད། གཉུག་མ་ལྷན་ཅིག་སྐྱེས་པ་དེ་གློ་བུ་བའི་ཆོས་ཀྱི་སྟོང་པ་རེད།
དེར་བརྟེན་གཞན་སྟོང་གི་གོ་བ་ཡོད། སྔོན་གྱི་མཁས་པ་སོ་སོའི་ཉམས་མྱོང་དང་། དེ་ལྟ་བུའི་ཐོག་ནས་གསུང་སྟངས་མི་འདྲ་བ་ཡོང་གི་ཡོད། ངོས་ཀྱིས་འདི་ལྟར་མཐོང་བཞིན་ཡོད། དོན་དམ་བདེན་པ་སྟོང་ཉིད་རང་སྟོང་མིན་ཞེས་གསུང་གི་ཡོད། ད་ལྟ་སྐབས་སུ་བབས་པ་ཇོ་ནང་གི་བཞེད་པ་ཁྱེད་རང་ཚོ་དེ་དག་གིས་སློབ་སྦྱོང་བྱེད་ཀྱི་ཡོད། ངོས་ཀྱིས་ནམ་རྒྱུན་བོད་གངས་ཅན་ལྗོངས་ལ་སྐྱེས་ཆེན་དམ་པ་མང་པོ་ཞིག་གིས་རིས་མེད་གནང་གི་ཡོད། དེར་བརྟེན་རྙིང་མ་དང་། བཀའ་བརྒྱུད། ས་སྐྱ། དགེ་ལྡན་རྣམས་བློ་ཐག་ཉེ་པོ་བྱས་ཏེ་ས་དགེ་བཀའ་རྙིང་རིས་སུ་མ་ཆད་པའི་མཁས་པ་ཚོའི་གསུང་ཆ་ཚང་བལྟས་ཏེ་རྒྱུས་ཡོད་པ་ཞིག་བྱུང་ན་ཡག་པོ་ཡོད། ཅེས་ཤོད་བཞིན་ཡོད། ངོས་རང་ཆ་བཞག་ནའང་ཇོ་ནང་གི་ཆོ་ག་ཟུར་དུ་མེད་ཀྱང་། ཇོ་ནང་ཁྲིད་རྒྱུན་ཐོབ་ཡོད། ངོས་ཀྱིས་གླིང་རིན་པོ་ཆེ་སྐུ་མདུན་ནས་ཇོ་ནང་ཁྲིད་རྒྱུན་ཞུས་པ་རེད། གླིང་རིན་པོ་ཆེས་སྐྱབས་རྗེ་ཕ་བོང་ཁ་རིན་པོ་ཆེའི་སྐུ་མདུན་ནས་གསན་པ་རེད། དེར་བརྟེན་ས་དགེ་བཀའ་རྙིང་གི་སྐྱེས་ཆེན་དམ་པ་དེ་དག་གིས་མཛད་པ་རྣམས་ལ་རྗེས་སུ་ཡི་རང་དང་། མཁས་པ་སོ་སོས་མཛད་པའི་གཞུང་དེ་དག་ངོས་ཀྱིས་མཇལ་གྱི་ཡོད། དངོས་གནས་མཁས་པ་སོ་སོའི་རྣམ་་དཔྱོད་ཀྱི་རྩལ་ལས་ཐོན་པའི་ལེགས་བཤད་ཡོད། ཁྱེད་རང་ཚོ་ཇོ་ནང་མ་དགོན་ཆ་བཞག་ན་གཞུང་དེ་དག་བལྟ་ཐུབ་པ་བྱུང་ན་ཡག་པོ་ཡོད། དེ་བཞིན་རྗེ་རིན་པོ་ཆེའི་སེར་ཕྲེང་དེ་དག་ཁྱེད་ཚོས་བལྟ་ཐུབ་ན་ཡག་པོ་ཡོད། དེ་བཞིན་དབུ་མའི་སྐོར་ཆ་བཞག་ན་རྗེ་རིན་པོ་ཆེས་རྩ་འཇུག་གི་རྣམ་བཤད་གཉིས་པོ་དེ་ཁྱེད་ཚོས་རྒྱུས་ཡོད་ཆེད་བལྟ་ཐུབ་ན་ཡག་པོ་ཡོད། རྣམ་འདྲེན་ཆ་ཚང་མེད་ནའང་རྣམ་འདྲེན་ལེའུ་གཉིས་པ་བལྟ་དགོས་རེད། རྣམ་འདྲེན་ལེའུ་གཉིས་པ་དེ་ཚད་མ་ཀུན་བཏུས་ཀྱི་ཆོས་བརྗོད་ཀྱི་འགྲེལ་བ་དེ་ཧ་ཅང་གལ་ཆེན་པོ་རེད། ཅེས་སོགས་ཀྱི་བཀའ་སློབ་སྩལ་ཡོད།
དེ་ནས་ PETER HOF མགྲོན་ཁང་དུ་ཆིབས་ཞལ་བསྒྱུར་ནས་ཉིན་དགུང་ལྗགས་སྨིན་མཛད། དེ་རྗེས་ཕྱེད་ཡོལ་ཆུ་ཚོད་ ༡ ཐོག་མགོན་པོ་གང་ཉིད་མཆོག་སིམ་ལ་གཏན་སློབ་ཏུ་ཆིབས་སྒྱུར་བསྐྱངས་སྐབས། སློབ་གྲྭའི་རྒྱལ་སྒོར་ཤེས་རིག་དྲུང་ཆེ་སྟོབས་རྒྱལ་ཚེ་རིང་ལགས་དང་། ཇོ་ནང་རྟག་བརྟན་ཕུན་ཚོགས་ཆོས་གླིང་དགོན་གྱི་བླ་སྤྲུལ་མཁན་པོ་རྣམས་ནས་སེར་ཕྲེང་བསྒྲིགས་ཏེ་ཕེབས་བསུ་གཟབ་རྒྱས་ཞུས་རྗེས་༧གོང་ས་མཆོག་བཞུགས་ཁྲིར་༧ཞབས་སོར་འཁོད་བསྟུན། སིམ་ལའི་ཧིན་བོད་མཛའ་འབྲེལ་ཚོགས་པའི་ཚོགས་གཙོ་དང་། ཧི་མ་ཅལ་གཙུག་ལག་སློབ་གྲྭ་ཆེན་མོའི་ནང་ཆོས་སྡེ་ཚན་གྱི་སློབ་དཔོན་ཝི་ཨེས་ནེ་གི་ལགས་ནས་བརྩམས་པའི་ཁུ་ནུ་དགེ་བཤེས་དཔལ་ལྡན་སེང་གེའི་མཛད་རྣམ་ཕྱག་དེབ་དབུ་འབྱེད་མཛད། དེ་རྗེས་མགོན་པོ་གང་ཉིད་མཆོག་གིས་སིམ་ལ་གཏན་སློབ་ཀྱི་དགེ་ལས་སློབ་ཕྲུག་རྣམས་དང་། དགེ་འདུན་པ། གཞིས་མི། ཧི་མ་ལ་ཡའི་རི་རྒྱུད་ཀྱི་ཆོས་ཞུ་བ་བཅས་མི་གྲངས་ཅིག་སྟོང་ལྷག་ཙམ་ལ་སྐྱབས་འགྲོ་སེམས་བསྐྱེད་ཀྱི་ཆོས་འབྲེལ་་སྩལ་ཡོད་པ་བཅས།།
