༢༠༡༤ ཟླ་ ༣ ཚེས་ ༢༢ རེས་གཟའ་སྤེན་པ།
༄༅། །བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པ་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་ཀྱི་གྲོས་ཚོགས་ཀྱི་ཚོགས་ཁང་གསར་པའི་ནང་ཕྱི་ལོ་ ༢༠༡༤ ཟླ་ ༣ ཚེས་ ༡༡ ནས་འགོ་འཛུགས་ཀྱིས་ཚེས་ ༢༢ ཉིན་རྒྱལ་ཁའི་ངང་ནས་ལེགས་གྲུབ་བྱུང་ཡོད་ཅིང་། ཚོགས་དུས་མཐའ་མའི་ཉིན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་མཇུག་བསྡོམས་གསུང་བཤད་གནང་དོན། བོད་སྤྱི་པའི་རྩ་དོན་ཐོག་ང་ཚོ་བཙན་བྱོལ་དུ་ཡོད་མཁན་ཚོ་ཡིན་རུང་གང་ཐུབ་ཅི་ཐུབ་ཀྱིས་འཛིན་སྐྱོང་བཀའ་ཤག་གིས་གཙོས་མི་དམངས་སྤྱི་འཐུས་ལྷན་ཚོགས་དང་། གཞུང་འབྲེལ་མ་ཡིན་པའི་ཚོགས་པ་སོགས་ནས་ལས་དོན་སྒྲུབ་བཞིན་ཡོད།
དེ་བཞིན་བོད་ཀྱི་ས་ཁུལ་ཁག་གཅིག་ནས་རང་ལུས་མེར་སྲེག་གི་གནས་ཚུལ་འཐོན་གྱི་ཡོད། དེ་ཚོ་དང་འབྲེལ་བ་ཡོད་པའི་འགན་ཡོད་མཁན་ཚོར་བོད་མིའི་སྒྲིག་འཛུགས་ངོས་ནས་ཆེ་མཐོང་སྤྲོད་དགོས་རྒྱུ་གལ་ཆེན་པོ་རེད། ཁོང་རྣམ་པ་ཚོ་ལས་དོན་གྱི་ཐོག་འགའ་ཤས་ནང་བཞག་ཐུབ་ན། དེ་དག་གྲས་དེ་གནད་འགག་ཆེན་པོ་ཡོད་པ་རེད་སྙམ་བཞིན་ཡོད། དེ་ང་ཚོ་བཙན་བྱོལ་དུ་ཡོད་མཁན་འགན་ཁྱེར་མཁན་ཚོ་གཅིག་པུའི་ཆེད་དུ་མ་རེད། བོད་ནང་ཡོད་པའི་བོད་མི་མང་དག་ཅིག་གི་སེམས་ནང་ཁྱད་པར་ཤུགས་ཆེན་པོ་ཞིག་བཟོ་གི་རེད་བསམ་བཞིན་ཡོད། དེའི་ཐོག་འཛིན་སྐྱོང་ནས་དགོངས་པ་བཞེས་རོགས་གནང་ཞེས་གྲོས་ཚོགས་འདི་བརྒྱུད་ནས་ཞུ་འདོད་བྱུང། བོད་ནང་གི་གནས་སྟངས་བཟང་ཕྱོགས་ཀྱི་འགྱུར་བ་ཞིག་མ་ཕྱིན་བར་དུ་ང་ཚོ་འདི་ནས་ལས་འགུལ་སྤེལ་དགོས་ཀྱི་ཡོད། དེ་རིང་གྲོས་ཚོགས་འདིའི་ནང་ལས་དོན་གལ་ཆེ་བ་གཅིག་དོལ་རྒྱལ་རྗེས་འབྲང་པའི་གནས་སྟངས་དང་འབྲེལ་བའི་ཐོག་ནས་གཞུང་འབྲེལ་གྲོས་ཆོད་ཅིག་བཞག་ཐུབ་ཡོད། རྒྱ་ནག་གི་སྲིད་བྱུས་ཐོག་ནས་དོལ་རྒྱལ་གྱི་གནས་ཚུལ་མུ་མཐུད་ནས་འཇོག་དགོས་རྒྱུར་དངུལ་སོགས་རྒྱབ་གཉེར་བྱེད་ཀྱི་ཡོད། མ་འོངས་པར་ཡིན་རུང་ད་ལྟའི་དུས་ཚོད་འདིར་དཀའ་ངལ་དེ་སེལ་མ་ཐུབ་པ་ཡིན། བོད་ལ་ལོག་རྒྱུའི་གོ་སྐབས་བྱུང་ཡང་དེའི་སྐབས་ལ་གནས་ཚུལ་དེ་དག་བོད་པའི་སྤྱི་ཚོགས་ནང་རྙོག་གྲ་བཟོ་གཞིའི་རྒྱུ་ཆེན་པོ་ཞིག་བཟོ་གི་ཡོད་པ་ཁ་སང་བཀུར་འོས་སྤྱི་འཐུས་རྣམ་པས་གསུངས་པ་ལྟར་དེ་རིང་ཚོགས་གཙོས་བསྐྱར་ནན་ཐོག་བརྗོད་རྒྱུ་ཡིན། འདས་པའི་ལོ་འགའ་ཤས་ནང་བོད་ནང་གུ་རུ་རིན་པོ་ཆེའི་སྐུ་གཏོར་རྒྱུའི་ལས་གཞི་དེ་འདྲ་བརྩམས་ཡོད།
ཐེངས་འདིའི་གྲོས་ཚོགས་ནི་སྔོན་རྩིས་ཀྱི་གྲོས་ཚོགས་ཆགས་ཡོད་པར་བརྟེན་དུས་ཚོད་མང་ཆེ་བ་སྔོན་རྩིས་ཐོག་བཏང་ཡོད། སྔོན་རྩིས་ཐོག་འཛིན་སྐྱོང་གིས་གཙོས་ང་ཚོས་ལོ་མང་པོ་ཞིག་ཉམས་མྱོང་བསགས་ཡོད། ལྷག་པར་གོང་དུ་སྲིད་སྐྱོང་མཆོག་གིས་བོད་ཀྱི་གནས་སྟངས་སྤྱི་ཡོངས་ལ་འགྲེལ་བརྗོད་གནང་ཡོད། གྲོས་ཚོགས་འདིའི་ངོས་ནས་རེ་བ་ག་རེ་ཞུ་བཞིན་ཡོད་ཅེ་ན། འཛིན་སྐྱོང་ངོས་ནས་སྔར་ལྷག་བོད་རྒྱ་འབྲེལ་མོལ་ཡོང་ཐབས་ལ་འབད་བརྩོན་གནང་དགོས་རྒྱུ་གལ་ཆེན་པོ་ཆགས་འདུག ཅེས་ཞུ་འདོད་བྱུང། སྤྱིར་བཏང་འབད་བརྩོན་མ་གནང་བ་དེ་འདྲ་གང་ཡང་མ་རེད། ཅེས་སོགས་ཀྱི་གསུང་བཤད་གནང་སྟེ་གྲོས་ཚོགས་ཚོགས་དུས་བདུན་པ་གྲོལ་བ་ཡོད་པ་བཅས། །
