༢༠༡༤ ཟླ་ ༣ ཚེས་ ༡༩ རེས་གཟའ་ལྷག་པ།
༄༅། །ཕྱི་ལོ་ ༢༠༡༤ ཟླ་ ༣ ཚེས་ ༡༨ ཉིན་གངས་སྐྱིད་མེས་དབོན་གཙུག་ལག་དཔེ་སྟོན་སློབ་གྲྭར་དཔེ་སྟོན་སློབ་གྲྭའི་འཛིན་རིམ་བཅུ་པའི་སློབ་ཐོན་དང་པོའི་བསླབ་པ་མཐར་གསོན་གྱི་ཉིན་མོ་སྲུང་བརྩིའི་མཛད་སྒོ་ཚོགས་སོང་། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཡོལ་ཙམ་ལ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་གཙོས་ཤེས་རིག་དྲུང་ཆེ་དངོས་གྲུབ་ཚེ་རིང་ལགས་དང་། སམ་བྷོ་ཊ་བོད་སློབ་སྤྱི་ཁྱབ་འགན་འཛིན་ཀརྨ་ཆུང་བདག་ལགས། དཔེ་སྟོན་སློབ་གྲྭའི་སློབ་སྤྱི་བསྟན་འཛིན་རྡོ་རྗེ་ལགས། དགེ་ཆེ་རྡོ་རྗེ་སྒྲོལ་མ་ལགས། ཤེས་རབ་དགའ་ཚལ་སློབ་གླིང་གི་འགན་འཛིན་དང་སློབ་སྤྱི་རྣམ་གཉིས། གཞན་ཡང་ཕ་མའི་ཚོགས་ཆུང་གི་ཚོགས་གཞོན་གྱིས་གཙོས་འཐུས་མི་རྣམ་པ། དཔེ་སྟོན་སློབ་གྲྭའི་དགེ་ལས་རྣམ་པ། སློབ་ཕྲུག ཕ་མ་རྣམ་པ། གསར་འགོད་པ་བཅས་ཚང་འཛོམས་ཀྱིས་ཐོག་མར། དཔེ་སྟོན་སློབ་གྲྭའི་སློབ་སྤྱིས་མཛད་སྒོ་དང་འབྲེལ་བའི་ངོ་སྤྲོད་གསུང་བཤད་གནང་གྲུབ་མཚམས། དཔེ་སྟོན་སློབ་གྲྭའི་འཛིན་རིམ་བཅུ་པའི་སློབ་ཐོན་དང་པོའི་སློབ་ཕྲུག་ཚོར་དཔལ་ལྡན་སྲིད་སྐྱོང་མཆོག་དང་། ཤེས་རིག་ལས་ཁུངས། དཔེ་སྟོན་སློབ་གྲྭའི་སློབ་སྤྱི། ཕ་མའི་ཚོགས་ཆུང་། འཛིན་གྲྭ་དགུ་པའི་སློབ་ཕྲུག་བཅས་ཀྱིས་མཇལ་དར་གཡོགས་ཡོད། དེ་རྗེས་དཔེ་སྟོན་སློབ་གྲྭའི་སློབ་ཐོན་དང་པོའི་སློབ་ཕྲུག་གཉིས་ཀྱིས་སློབ་ཐོན་པ་ཡོངས་ཀྱི་ཚབ་ཞུས་ཏེ་འདས་པའི་མྱོང་ཚོར་དང་བཀའ་དྲིན་རྗེས་དྲན་གྱི་གཏམ་བཤད་བོད་དབྱིན་གཉིས་ཐོག་གནང་།
དེ་ནས་སམ་བྷོ་ཊ་བོད་སློབ་སྤྱི་ཁྱབ་འགན་འཛིན་གྱིས་བསླབ་པ་མཐར་སོན་པའི་སློབ་ཕྲུག་རྣམས་སློབ་གྲྭའི་ནང་འཚར་ལོངས་བྱས་པའི་བརྒྱུད་རིམ་ཁྲོད་རང་ཉིད་ལ་སེམས་ཚོར་གང་བྱུང་ཡོད་མེད་དང་། དེ་བཞིན་ཤེས་ཡོན་སྲིད་བྱུས་ཀྱི་ཕན་ནུས་གང་བྱུང་ཡོད་མེད། སློབ་ཕྲུག་རྣམས་ནས་མི་ཚེ་དོན་དང་ལྡན་པ་ཞིག་སྐྱེལ་དགོས་ཚུལ་སོགས་ཀྱི་སྐོར་གསུང་བཤད་གནང་། དེ་ནས་སྲིད་སྐྱོང་མཆོག་གིས་མཛད་སྒོའི་ཐོག་མཉམ་ཞུགས་གནང་མཁན་ཡོངས་ལ་བཀའ་ཤག་གི་ཚབ་ཞུས་ཏེ་འཚམས་འདྲི་ཞུས་པ་དང་ཆབས་ཅིག་གསུང་བཤད་གནང་དོན། ཕྱི་ལོ་ ༢༠༠༥ ཟླ་ ༡༠ ཚེས་ ༡༠ ཉིན་དཔེ་སྟོན་སློབ་གྲྭ་འདི་བཞིན་ཤེས་ཡོན་སྲིད་བྱུས་ཀྱི་དགོངས་དོན་ལྟར་དབུ་འཛུགས་གནང་ཡོད། སྐབས་དེ་དུས་ནས་ད་ལྟ་བར་སློབ་ཕྲུག་ ༢༣ ཁོང་ཚོས་སློབ་སྦྱོང་མཐར་འཁྱོལ་ཐུབ་པ་བྱུང་བ་དེ་མིག་དཔེ་ཡག་པོ་རེད་བསམས་ཀྱི་འདུག དེར་བརྟེན་ཕ་མ་དང་དགེ་རྒན། སློབ་ཕྲུག་ཚང་མས་འགན་འཁྱེར་ནས་སློབ་སྦྱོང་ལ་ཧུར་བརྩོན་གནང་སྟེ་འཛིན་རིམ་བཅུ་པ་མཐར་འཁྱོལ་ཐུབ་བྱུང་བར་བསྔགས་བརྗོད་ཞུ་རྒྱུ་ཡིན། འཛིན་རིམ་བཅུ་པ་སློབ་ཐོན་གྱི་སློབ་མ་རྣམས་སློབ་གྲྭ་འདི་ནས་སློབ་གྲྭ་གཞན་ལ་བསྐྱོད་དགོས་སྟབས་ཧ་ཅང་སེམས་འཚབ་ཡོད་ངེས་རེད། ཁྱེད་ཚོ་མོན་གྷོ་དང་། ཀ་སྦུག། མ་སུ་རི། སྤོན་ཊ་གཏན་སློ་བཅས་གང་དུ་ཕེབས་ཀྱང་བྱ་བ་ལམ་ལྷོང་ཡོང་བ་དང་། དེ་བཞིན་ད་བར་སློབ་སྦྱོང་ལ་ཧུར་བརྩོན་གནང་བ་བཞིན་མུ་མཐུད་སློབ་སྦྱོང་ཐོག་ཧུར་བརྩོན་གནང་དགོས་པའི་རེ་སྐུལ་ནན་ཏན་གྱིས་ཞུ་འདོད་བྱུང་། དཔེ་སྟོན་སློབ་གྲྭ་ནས་འཛིན་རིམ་བཅུ་པ་ཐོན་པའི་སློབ་ཕྲུག་རྣམས་སློབ་གྲྭ་གང་དུ་བསྐྱོད་ཀྱང་། དཔེ་སྟོན་སློབ་གྲྭའི་སློབ་ཕྲུག་ཡོད། ཅེས་དམིགས་བསལ་དོ་སྣང་བྱེད་ཀྱི་རེད། དཔེར་ན། ཁོང་ཚོའི་བོད་ཡིག་གི་གནས་ཚད་གང་འདྲ་ཡོད་མེད་དང་སྤྱི་ཡོངས་ཀྱི་སློབ་སྦྱོང་གི་ཚད་གཞི་གཞན་དང་མ་འདྲ་བ་ཡོད་མེད་ཐོག་དམིགས་བསལ་དོ་སྣང་བྱེད་ཀྱི་རེད། ད་ལྟ་སློབ་ཐོན་དང་པོའི་སློབ་ཕྲུག་གི་སྐུ་ཚབ་གཉིས་ཀས་སློབ་གྲྭ་འདི་རང་གི་ཁྱིམ་གཉིས་པ་ལྟ་བུ་མྱོང་ཚོར་བྱུང་ཡོད་པ་དང་། དགེ་ལས་ངོས་ནས་ཐུགས་བརྩེ་བ་ཆེན་པོས་སློབ་ཁྲིད་དང་ལམ་སྟོན་གནང་བྱུང་།
འདི་ལྟ་བུའི་བཀའ་དྲིན་ནམ་ཡང་བརྗེད་ཀྱི་མིན། ཞེས་གསུངས་པ་ལྟར། ཁྱེད་རང་ཚོ་སློབ་གྲྭ་གང་དུ་བསྐྱོད་ཀྱང་ང་ཚོས་འདི་ནས་དོ་སྣང་བྱེད་ཐུབ་མིན་ལ་མ་ལྟོས་པར། སློབ་གྲྭ་དེ་ག་རང་གི་དགེ་ལས་སླབ་ཕྲུག་གིས་ཏན་ཏན་དོ་སྣང་བྱེད་ཀྱི་རེད། ཡང་ན་ལོ་གཉིས་ཀྱི་ནང་དཔེ་སྟོན་སློབ་གྲྭའི་སློབ་ཕྲུག་འདི་དག་དེ་འདྲ་ཞིག་རེད་འདུག་དང་། དེ་མིན་ན། དཔེ་སྟོན་སློབ་གྲྭའི་སློབ་ཕྲུག་རྣམས་དངོས་གནས་ཤེས་ཡོན་སྲིད་བྱུས་དགོངས་དོན་སློབ་ཁྲིད་གནང་བ་བཞིན། སྲོལ་རྒྱུན་ཐོག་དེང་དུས་ཀྱི་ཤེས་ཡོན་གཉིས་ཀ་ཚད་དང་ལྡན་པ་ཞིག་ཡོད་པའི་སློབ་ཕྲུག་ཤིག་རེད་འདུག་ཅེས་པ་རང་བཞིན་གྱི་གསལ་པོ་ཆགས་ཀྱི་རེད། སྐབས་དེར་རྣམ་པ་ཚོ་ས་ཐག་རིང་པོ་གང་དུ་ཡོད་ཀྱང་ཤེས་རིག་ལས་ཁུངས་སུ་འཛིན་རིམ་བཅུ་གཉིས་ཀྱི་ཡིག་རྒྱུགས་གྲུབ་འབྲས་འབྱོར་གྱི་རེད། དེར་བརྟེན་ཁྱེད་རང་ཚོ་དངོས་སུ་མ་ཐུག་ཀྱང་རང་བཞིན་གྱི་ང་ཚོས་རྣམ་པ་ཚོས་གང་འདྲ་ཞིག་བྱས་ཡོད་མེད་ཤེས་རྟོགས་ཡོང་གི་རེད། དེར་བརྟེན་དཔེ་སྟོན་སློབ་གྲྭའི་ངོས་ནས་ད་བར་འབད་བརྩོན་གནང་བའི་གྲུབ་འབྲས་འདིའི་ཐོག་གནས་ཀྱི་ཡོད་སྟབས། རྣམ་པ་ཚོར་དམིགས་བསལ་གྱི་འགན་ཡོད་པ་དུས་ནམ་ཡང་བརྗེད་རྒྱུ་མེད། ཅེས་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་། དེ་ནས་དགེ་ཆེ་རྡོ་རྗེ་སྒྲོལ་མ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་ཡོད་པ་བཅས།།
