༢༠༡༤ ཟླ་ ༣ ཚེས་ ༢༧ རེས་གཟའ་ཕུར་བུ།

༄༅། །རྒྱ་ནག་གི་སྲིད་འཛིན་ཕ་རན་སིར་མ་འབྱོར་སྔོན་ཙམ་དུ་ཡུལ་དེའི་གྲོས་ཚོགས་འཐུས་མི་སྐུ་ཞབས་ཇིན་པེ་ཊིག་གྷི་ལེ་ Jean- Patrick Gille མཆོག་དང་ནོཡིལ་མ་མ་རེ་ Noel Mamère མཆོག་གཉིས་ཀྱིས་གསར་འགོད་གསལ་བསྒྲགས་ཤིག་སྤེལ་ཏེ་བོད་ནང་གི་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ཐོག་སེམས་འཚབ་ཀྱི་རྣམ་པ་ཤུགས་ཆེ་སྟོན་པ་དང་སྦྲགས། ཡུལ་དེའི་སྲིད་འཛིན་ཕ་རན་ཀོ་ཡི་སི་ཨོ་ལན་ཌི་ Francois Hollande མཆོག་གིས་ཐེངས་འདིར་རྒྱ་ནག་གི་སྲིད་འཛིན་ཞི་ཅིང་ཕིང་ Mr. Xi Jinping དང་མཇལ་འཕྲད་སྐབས་བོད་ཀྱི་གནད་དོན་གླེང་དགོས་པའི་རེ་འདུན་བཏོན་པའི་ནང་འཁོད་དོན། ཚོང་འབྲེལ་ལས་དོན་ཆེད་བོད་དང་འགྲོ་བ་མིའི་ཐོབ་ཐང་གི་གནད་དོན་བློས་གཏོང་མ་གནང་རོགས། རྒྱ་ནག་དང་ཚོང་གི་འབྲེལ་ལམ་ཡར་རྒྱས་གཏོང་སྐབས། འགྲོ་བ་མིའི་ཐོབ་ཐང་བློས་གཏོང་བྱས་ན་ནམ་ཡང་འགྲིག་ཐབས་མེད། ང་ཚོས་ཐེངས་འདིར་སྲིད་འཛིན་རྣམ་གཉིས་མཇལ་འཕྲད་སྐབས་བོད་ནང་གི་རྒྱ་ནག་དཔོན་རིགས་ཚོས་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ཐོག་དམ་བསྒྲགས་བྱེད་བཞིན་པའི་སྐོར་གླེང་རྒྱུའི་རེ་བ་ཞུ་བཞིན་ཡོད། ཉེ་ལམ་གཞུང་འབྲེལ་མིན་པའི་ཚོགས་པ་ཁག་གིས་འོས་བསྡུ་བྱེད་སྐབས་ཕ་རན་སིའི་མང་ཚོགས་བརྒྱ་ཆ་ ༧༨ ནས་ཡུལ་དེའི་སྲིད་འཛིན་མཆོག་གིས་རྒྱ་ནག་གི་སྲིད་འཛིན་དང་མཇལ་འཕྲད་སྐབས་བོད་ནང་གི་གནས་སྟངས་ཐོག་ཕ་རན་སིའི་གཞུང་ལ་སེམས་འཚབ་ཡོད་སྐོར་གསལ་སྟོན་གནང་དགོས་པའི་རེ་འདུན་བཏོན་ཡོད། ང་ཚོར་བོད་ནང་དུ་བོད་མི་ཚོས་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་ཞི་རྒོལ་ཆེད་རང་ལུས་མེར་སྲེག་གཏོང་བཞིན་པའི་ཛ་དྲག་གི་གནས་སྟངས་ཐོག་ཧ་ཅང་སེམས་འཚབ་ཡོད། བོད་མི་ཚོས་རྒྱ་ནག་གཞུང་གི་སྲིད་བྱུས་ལ་ངོ་རྒོལ་གྱི་རྣམ་པ་འདོན་ཆེད་འཚེ་མེད་ཞི་བའི་ཐབས་ལམ་ཐོག་ནས་བློས་གཏོང་བྱས་དང་བྱེད་བཞིན་པ་དེ་ནི་ཡ་ང་བ་ཞིག་ཡིན། གནས་ཚུལ་དེ་རིགས་དེང་སྐབས་ཡང་ཡང་ཡོང་བཞིན་ཡོད་པ་ཀུན་གྱིས་ཤེས་གསལ་རེད། ཨ་རིའི་སྲིད་འཛིན་སྐུ་ཞབས་བྷ་རཀ་ཨོ་བྷ་མ་ Barack Obama མཆོག་གིས་བདུན་ཕྲག་འགའ་ཤས་སྔོན་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་མཇལ་འཕྲད་གནང་བ་ལྟར། སྲིད་འཛིན་མཆོག་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་རྒྱལ་སྤྱིའི་ཆོས་ལུགས་དང་རིག་གཞུང་གི་དབུ་ཁྲིད་གྲགས་ཅན་ཞིག་ལ་ངོས་འཛིན་ཞུ་ཐོག་གཞུང་འབྲེལ་གདན་ཞུ་གནང་དགོས། ཞེས་འཁོད་ཡོད།

དེ་ཡང་ཕྱི་ལོ་ ༢༠༡༣ ཟླ་ ༡༢ ཚེས་ ༡༧ ཉིན་ཕ་རན་སིའི་རྒྱལ་ཡོངས་གྲོས་ཚོགས་ French National Assembly ནང་བོད་དོན་རྒྱབ་སྐྱོར་ཚོགས་པས་རྒྱབ་སྐྱོར་འོག་བོད་དོན་རྒྱབ་སྐྱོར་གྱི་བསམ་འཆར་བཏོན་པའི་ནང་རྒྱ་ནག་གཞུང་གི་སྐུ་ཚབ་དང་བོད་མིའི་སྐུ་ཚབ་དབར་གྲོས་མོལ་གནང་བ་བརྒྱུད་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་འོག་བོད་མི་ཚོར་མིང་དོན་མཚུངས་པའི་རང་སྲིད་རང་སྐྱོང་གི་ཐོབ་ཐང་སྤྲོད་དགོས་པའི་རེ་འདུན་བཏོན་པ་མ་ཟད། རྒྱབ་སྐྱོར་གྱི་བསམ་འཆར་དེའི་ནང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཡོངས་ཁྱབ་བསྒྲགས་གཏམ་གྱི་དོན་ཚན་ ༡༨ དང་། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དོན་མཚན་ ༣༦ ནང་གསལ་ལྟར་བོད་མི་ཚོར་རང་དབང་སྤྲོད་དགོས་པ་དང་། དེང་སྐབས་རྒྱ་ནག་གཞུང་གིས་བོད་མིའི་ཆོས་དང་སྐད་ཡིག ཐུན་མིན་རིག་གཞུང་དང་ཁོར་ཡུག་སོགས་ལ་རྩིས་མེད་རྡོག་རོལ་གཏོང་བཞིན་པའི་སྲིད་བྱུས་དེར་སྐྱོན་བརྗོད་བྱས་པ་ནི་གོང་འཁོད་རྩ་ཁྲིམས་ཀྱི་སྒྲིག་གཞིའི་དགོངས་དོན་དང་ཡོངས་སུ་འགལ་བ་ཞིག་ཡིན་སྐོར་འཁོད་ཡོད། ཕྱོགས་མཚུངས་བསམ་འཆར་དེའི་ནང་༸གོང་ས་མཆོག་གིས་འདོན་གནང་མཛད་པའི་དབུ་མའི་ལམ་གྱི་སྲིད་བྱུས་དེར་རྒྱབ་སྐྱོར་ཞུས་པ་དང་སྦྲགས། ཕ་རན་སི་དང་ཡུ་རོབ་སྤྱི་མཐུན་རྒྱལ་ཁབ་ཀྱིས་རྒྱ་ནག་གཞུང་དང་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དབར་གྲོས་མོལ་བསྐྱར་མཐུད་ཡོང་རྒྱུར་རྒྱབ་སྐྱོར་གནང་དགོས་པ་མ་ཟད། ཡུ་རོབ་བོད་དོན་དམིགས་བསལ་འབྲེལ་མཐུད་པ་ European Special Coordinator for Tibetan Affairs བསྐོ་གཞག་གནང་དགོས་པའི་རེ་འདུན་ཡང་བཏོན་ཡོད།