༢༠༡༤ ཟླ་ ༣ ཚེས་ ༢༠ རེས་གཟའ་ཕུར་བུ།
༄༅། །འདས་པའི་ལོ་ངོ་ ༥༠ ལྷག་ནས་བཟུང་བཙན་བྱོལ་བོད་མིའི་སྤྱི་ཚོགས་ཁྲོད་གློ་ནད་ (TB)ནད་གཞི་འདི་བཞིན་སྤྱི་ཚོགས་འཕྲོད་བསྟེན་ཐོག་འཕྲད་བཞིན་པའི་དཀའ་ངལ་ཆེན་པོ་ཞིག་ཆགས་ཡོད། དེ་ཡང་བཙན་བྱོལ་བོད་མིའི་སྤྱི་ཚོགས་ནང་གློ་ནད་ནད་གཞིའི་གྲངས་ཚད་མཐོ་བོ་ཡོང་དགོས་དོན་ནི། ས་གནས་གཅིག་ཏུ་མི་མང་པོ་མཉམ་སྡོད་བྱེད་བཞིན་ཡོད་པ་མ་ཟད། ས་གནས་གཅིག་ནས་གཅིག་ཏུ་ཕར་འགྲོ་ཚུར་འོང་ཧ་ཅང་མང་པོ་བྱེད་བཞིན་ཡོད་པར་བརྟེན། འགོས་སླ་བའི་གློ་ནད་ནད་པའི་གྲངས་ཚད་མཐོ་བོ་ཆགས་བཞིན་ཡོད། རྒྱུ་མཚན་གཞན་ཞིག་ནི་ནད་པས་སྨན་བཅོས་ལྷོད་གཡེང་གཏོང་བ་དང་། མང་ཚོགས་ཁྲོད་གློ་ནད་ནད་གཞིའི་སྔོན་འགོག་ཐོག་གོ་རྟོགས་ཞན་པོ་ཡོད་པ་སོགས་ལ་བརྟེན་ཡིན། སྤྱི་ཚོགས་ཁྲོད་གློ་ནད་ནད་གཞི་འདིའི་སྔོན་འགོག་སྐོར་སྤྱི་དང་། ལྷག་པར་གློ་ནད་རིམ་པ་གསུམ་པ་ MDR TB ཞེས་པ་འདིའི་སྐོར་གཞོན་སྐྱེས་ཚོ་དང་དེ་བཞིན་དགོན་པ་གྲྭ་ཚང་ཁག ཕྱོགས་མཚུངས་སློབ་གྲྭ་བཅས་ཀྱི་ནང་གོ་རྟོགས་མང་ཙམ་སྤེལ་དགོས།
འདི་ལོའི་འཛམ་གླིང་གློ་ནད་ཉིན་མོ་སྲུང་བརྩི་ཞུ་ཆེད་དང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་གློ་ནད་སྔོན་འགོག་གི་ལས་གཞིའི་ནུས་ཤུགས་ཆེ་རུ་གཏོང་ཆེད། འཕྲོད་བསྟེན་ལས་ཁུངས་དང་། བདེ་ལེགས་སྨན་ཁང་། བོད་མིའི་རྒྱལ་ཡོངས་ལུས་རྩལ་མཐུན་ཚོགས་བཅས་མཉམ་རུབ་ཐོག ཕྱི་ལོ་ ༢༠༡༤ ཟླ་ ༣ ཚེས་ ༢༣ རེས་གཟའ་ཉི་མའི་ཉིན་༼གློ་ནད་ཊི་བྷི་རྒྱང་རྒྱུག་འགྲན་བསྡུར།༽ ཞིག་མེག་གྷན་བོད་ཁྱིམ་ཉིན་སློབ་ཏུ་གོ་སྒྲིག་ཞུ་རྒྱུ་ཡིན་འདུག རྒྱང་རྒྱུག་འགྲན་བསྡུར་འདིའི་ནང་མི་སུས་ཀྱང་མཉམ་ཞུགས་བྱེད་ཆོག རྒྱང་རྒྱུག་འགྲན་བསྡུར་འདི་གོ་སྒྲིག་ཞུ་དགོས་པའི་དམིགས་ཡུལ་གཙོ་བོ་ནི་འདས་པའི་ལོ་ངོ་ ༥༠ ལྷག་ནས་བཟུང་གློ་ནད་ནད་གཞིའི་རྐྱེན་པས་བོད་མི་མང་པོ་ཞིག་འདས་གྲོངས་སུ་གྱུར་ཡོད་པར་བརྟེན། བོད་པའི་སྤྱི་ཚོགས་ཁྲོད་གློ་ནད་ནད་གཞིའི་སྐོར་གོ་རྟོགས་རྒྱ་ཆེ་སྤེལ་ཆེད་ཡིན་འདུག
གོང་ཚེས་ཉིན་གྱི་སྔ་དྲོ་ཆུ་ཚོད་ ༨།༣༠ ཐོག་མེག་གྷན་བོད་ཁྱིམ་ཉིན་སློབ་ཏུ་རྒྱང་རྒྱུག་འགྲན་བསྡུར་འདིའི་ནང་མཉམ་ཞུགས་གནང་མཁན་རྣམས་ཀྱི་ཐོ་འགོད་བྱེད་རྒྱུ་ཡིན་འདུག རྒྱང་རྒྱུགས་འདི་བཞིན་མེག་གྷན་བོད་ཁྱིམ་ཉིན་སློབ་ནས་འགོ་འཛུགས་ཀྱིས་མེག་གྷན་ཁྲོམ་གཞུང་དང་། རྡ་སྟེང་བོད་ཁྱིམ་གཞུང་ལམ་གྱི་ཟུར་དུ་ཆགས་པའི་བོད་ཁྱིམ་བཟོ་གྲྭའི་མཚམས་ནས་སླར་ཡང་ཕུར་ས་ཏི་གྷན་ཇིའི་ཉེན་རྟོག་ལས་ཁུངས་ Forsyth Ganj Police Station སར་རྒྱུག་ནས་ཡི་ཤུའི་ལྷ་ཁང་དང་། དེ་ནས་མེག་གྷན་བོད་ཁྱིམ་ཉིན་སློབ་ཏུ་རྒྱུག་ནས་མཇུག་བསྒྲིལ་རྒྱུ་དང་། ལས་གཞི་འདི་བཞིན་ཨ་རིའི་པི་ཨར་ཨེམ་ (PRM,USA) རོགས་ཚོགས་ཀྱིས་དཔལ་འབྱོར་མཐུན་འགྱུར་གནང་བ་ཞིག་ཡིན་འདུག
