༢༠༡༣ ཟླ་ ༣ ཚེས་ ༡༢ རེས་གཟའ་ལྷག་པ།
༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༣ ཟླ་ ༣ ཚེས་ ༡༢ ཉིན་གྱི་སྔ་དྲོ་ཆུ་ཚོད་ ༩ ཐོག་ཝཱཎ་དབུས་བོད་ཀྱི་གཙུག་ལག་སློབ་གཉེར་ཁང་གི་མགོན་མེད་ཟས་སྦྱིན་གྱི་ཚོགས་ཁང་ནང་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་དང་། ཝཱཎ་དབུས་བོད་ཀྱི་གཙུག་ལག་སློབ་གཉེར་ཁང་ནས། བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་ཆོས་སྡེ་ཁག་ནས་ཕེབས་པའི་གཞུང་ཆེན་རིགས་གཅིག་རྐང་འཛིན་པ་དགེ་འདུན་པ་ཞལ་གྲངས་ ༡༦ ལ་ཕྱི་ལོ་ ༢༠༡༤ ཟླ་ ༣ ཚེས་ ༡༢ ནས་ ༡༧ བར་ཉམས་ཞིབ་རིག་པའི་ཟབ་སྦྱོང་སྤྲོད་འགོ་ཚུགས་ཡོད།
དེ་ཡང་ཉིན་དང་པོར་ཟབ་སྦྱོང་མཛད་སྒོའི་ཐོག་སྐུ་མགྲོན་གཙོ་བོ་ཝཱཎ་གཙུག་ལག་སློབ་ཁང་གི་སློབ་དཔོན་ཆེན་པོ་དགེ་བཤེས་ཡེ་ཤེས་ཐབས་མཁས་མཆོག་དང་། ཚོགས་འདུའི་ཁྲི་པ་ཝཱཎ་སློབ་ཁང་གི་རིགས་བདག་སློབ་དཔོན་དགེ་བཤེས་ངག་དབང་བསམ་གཏན་མཆོག་གིས་དབུ་འབྱེད་མར་མེ་ཞལ་ཕྱེ་དང་ལམ་སྟོན་གསུང་བཤད་གནང་བ་དང་། ཆོས་རིག་སྐུ་ཚབ་དྲུང་གཞོན་ཐུབ་བསྟན་ཚེ་རིང་ལགས་ཀྱིས་ཕེབས་བསུའི་འཚམས་འདྲི་དང་། ཆོས་རིག་ལས་ཁུངས་ནས་གཞུང་ཆེན་རིགས་གཅིག་རྐང་འཛིན་གྱི་ལས་རིམ་ཕྱག་བསྟར་ཞུ་ཕྱོགས་སྐོར་ངོ་སྤྲོད་གནང་། དེ་རྗེས་འབྲེལ་མཐུད་པ་རྒན་བློ་བཟང་ནོར་བུ་ཤཱསཏྲཱི་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་།
ཟབ་སྦྱོང་དེ་ནི་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས་ཕྱི་ལོ་ ༢༠༡༣ ལོར་གསར་གཏོད་ཀྱིས་ཕྱག་བསྟར་གནང་བཞིན་པའི་གཞུང་ཆེན་རིགས་གཅིག་རྐང་འཛིན་ལས་རིམ་གྱི་ཡ་གྱལ་ལས་དོན་ཞིག་ཡིན། ལས་རིམ་དེ་ཡང་ཁམས་གསུམ་ཆོས་ཀྱི་རྒྱལ་པོ་སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གིས་ཕྱི་ལོ་ ༢༠༡༡ ལོར་<བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་ཆོས་ཚོགས་ཐེངས་བཅུ་གཅིག་>པའི་ཐོག་སྩལ་བའི་བཀའ་སློབ་དགོངས་དོན་ཕྱག་བསྟར་ཞུས་པ་ཞིག་སྟེ། ལས་རིམ་འདི་བཞིན་མུ་མཐུད་རྒྱུན་འཁྱོངས་ཐོག་ལོ་བཞིའི་མཚམས་ནས་གཞུང་ཆེན་རིགས་གཅིག་རྐང་འཛིན་པ་བསྟུད་མར་ཐོན་ཐབས་སུ། བོད་བརྒྱུད་ནང་བསྟན་ཆོས་བརྒྱུད་ཁག་ནས་ལོ་ལྟར་དགེ་འདུན་པ་ཞལ་གྲངས་ ༥༥ འཛུལ་ཞུགས་ཆོག་པའི་ས་མིག་བསྐྲུན་པ་དང་། དེའི་ནང་ནས་ཞལ་གྲངས་ ༡༡ ལ་ཉམས་ཞིབ་གནང་ཡུན་རིང་ཆོས་རིག་ལས་ཁུངས་ནས་སློབ་ཡོན་གནང་གི་ཡོད་འདུག
