༢༠༡༤ ཟླ་ ༣ ཚེས་ ༢༥ རེས་གཟའ་མིག་དམར།
༄༅། །ཕྱི་ལོ་ ༢༠༡༤ ཟླ་ ༣ ཚེས་ ༢༤ 
ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ལྡི་ལི་ཚོང་ལས་རིག་པའི་མཐོ་རིམ་སློབ་གྲྭ་ (Shri Ram College of Commerce) ཤྲི་རམ་དབུ་བརྙེས་ནས་ལོ་ངོ་ ༨༨ འཁོར་བའི་མཛད་སྒོའི་སྐུ་མགྲོན་དུ་དབུ་བཞུགས་ཀྱི་བཀའ་སློབ་སྩལ་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་མཐོ་རིམ་སློབ་གྲྭའི་འགན་འཛིན་ལྷན་ཚོགས་དང་སློབ་སྤྱི་རྣམ་པས་ཕེབས་བསུ་གཟབ་
རྒྱས་ཐོག་མཛད་སྒོར་གདན་ཞུ་དང་འབྲེལ་མགོན་པོ་གང་ཉིད་མཆོག་གིས་མཛད་སྒོའི་ཐོག་མར་སྣང་གསལ་ཞལ་འབྱེད་མཛད་ཡོད། དེ་ནས་མཐོ་སློབ་ཀྱི་འགན་འཛིན་ལྷན་ཚོགས་ཀྱི་ཚོགས་གཙོ་(Ajay Shri Ram)ཨ་ཇེ་ཤྲི་རཱམ་ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་མཛད་འཕྲིན་ཁག་ལ་བསྔགས་བརྗོད་དང་འབྲེལ་མཐོ་རིམ་སློབ་གྲྭའི་སྐོར་ངོ་སྤྲོད་སྙིང་བསྡུས་དང་། དེ་བཞིན་(Max Hospital)མེཀ་སི་སྨན་ཁང་གི་འགན་འཛིན་ཨ་ནལ་ཇིཏ་སིངྒ་(Shri Analjit Singh)ལགས་ཀྱིས་༸གོང་ས་མཆོག་གི་རླབས་ཆེན་དགོངས་གཞི་ཁག་ངོ་སྤྲོད་སྙིང་བསྡུས་ཞུས་ཡོད།
དེ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེར་འདུས་མཐོ་རིམ་སློབ་གྲྭའི་དགེ་སློབ་ ༡༠༠༠ བརྒལ་བར་ལམ་སྟོན་བཀའ་སློབ་སྩལ་དོན། དེ་རིང་ངོས་རང་མཐོ་སློབ་འདི་ནས་མགྲོན་འབོད་ལྟར་བཅར་ཏེ་ཁྱེད་རང་ཚོ་དགེ་སློབ་རྣམས་ཐུག་རྒྱུ་བྱུང་བར་ཧ་ཅང་དགའ་པོ་བྱུང། ཐོག་མར་ངོས་ཀྱིས་ཁྱེད་རང་ཚོ་ཚང་མར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། 
སྤྱིར་བཏང་ང་ཚོས་ཤེས་ཡོན་སློབ་སྦྱོང་བྱེད་རྒྱུ་ཧ་ཅང་གལ་ཆེན་པོ་ཆགས་ཡོད། ལྷག་པར་རྒྱ་གར་ལ་གནའ་སྔ་མོ་ནས་དར་འཕེལ་བྱུང་བའི་གྲངས་ཅན་པ་དང་གཅེར་བུ་བ། དེ་བཞིན་ནང་པའི་མཚན་ཉིད་རིག་པ་སོགས་ཀྱིས་བདེན་དོན་དང་སེམས་ཀྱི་རྣམ་གཞག་སྐོར་ལ་འགྲེལ་བཤད་མང་དག་ཅིག་བརྒྱབ་ཡོད་པ་རྣམས་ཧ་ཅང་རིན་ཐང་ཆེན་པོ་ཡིན། དེར་བརྟེན་སློབ་ཕྲུག་ཚོས་རྒྱ་གར་གྱི་གནའ་བོའི་རིག་གཞུང་ལ་སྔར་ལྷག་དོ་སྣང་བྱེད་དགོས། ཁྱེད་རང་ཚོས་དུས་རབས་ཉེར་གཅིག་པ་འདི་བཞིན་ཞི་བདེའི་དུས་རབས་ཤིག་ཡོང་དགོས་ན། ཐོག་མར་ནང་སེམས་ཀྱི་ཞི་བདེ་བསྐྲུན་ཐབས་བྱེད་དགོས་པ་རེད་མ་གཏོགས་སྨོན་ལམ་བརྒྱབ་པ་ཁོ་ནས་ཡོང་ཐབས་མེད།
དེར་བརྟེན་ནང་སེམས་ལ་གཞན་སྡུག་བསྔལ་བྲལ་འདོད་དང་བདེ་བ་འཕྲད་འདོད་ཀྱི་བྱམས་སྙིང་རྗེའི་བློ་སྐྱེས་ནས་ལག་བསྟར་བྱེད་ཐུབ་ན། རང་བཞིན་གྱིས་ཞི་བདེ་ཡོང་གི་ཡོད་པ་ལྟར། ང་ཚོས་ཚང་མས་ཕྱར་གྲུ་མཉམ་འདེགས་བྱས་ན་འཛམ་གླིང་ཞི་བདེ་བསྐྲུན་ཐུབ་ཀྱི་རེད། ཕྱོགས་མཚུངས་སློབ་ཕྲུག་ཚོས་དེང་རབས་ཀྱི་ཤེས་ཡོན་སྦྱངས་པ་དང་ཆབས་ཅིག་རྒྱ་གར་ལ་གནའ་སྔ་མོ་ནས་དར་བའི་སེམས་ཀྱི་རྣམ་གཞག་སྐོར་ལ་དོ་སྣང་བྱེད་རྒྱུ་ཧ་ཅང་གལ་ཆེན་པོ་ཆགས་ཡོད། དེ་བཞིན་ཆོས་ལུགས་དང་མ་འདྲེས་པའི་སྒོ་ནས་འགྲོ་བ་མི་ཀུན་ལ་ཁྱབ་པའི་བཟང་སྤྱོད་སྐོར་ལ་བསམ་བློ་གཏོང་དགོས། མདོར་ན་ང་ཚོས་ཆོས་ཁས་མི་ལེན་མཁན་གྱི་མི་ཞིག་ཡིན་རུང་གུས་ཞབས་བྱེད་རྒྱུ་གལ་ཆེན་པོ་རེད། དེ་རིང་ཁྱེད་རང་ཚོ་བྱ་དགའ་ལེན་མཁན་ཚོར་བསྔགས་བརྗོད་ཡོད། ལྷག་པར་བུད་མེད་སློབ་ཕྲུག་བྱ་དགའ་ཐོབ་མཁན་ཚོས་སྤྱི་ཚོགས་ཁྲོད་བྱམས་བརྩེ་བསྐྲུན་རྒྱུའི་འགན་ཁུར་ཤུགས་ཆེ་ཙམ་ལེན་དགོས། བྱམས་སྙིང་རྗེ་ལྡན་པའི་ཞི་བདེའི་སྤྱི་ཚོགས་ཤིག་བསྐྲུན་རྒྱུར་ང་ཚོས་ཚང་མས་འབད་བརྩོན་བྱེད་དགོས། ཞེས་སོགས་ཀྱི་བཀའ་སློབ་དང་སློབ་ཕྲུག་ཚོའི་དྲི་བར་བཀའ་ལན་སྩལ་ཡོད།
