༢༠༡༤ ཟླ་ ༣ ཚེས་ ༢༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༣ ཚེས་ ༢༢ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་རྒྱལ་ས་ལྡི་ལིའི་ནང་རྒྱ་གར་གྱི་སློབ་གྲྭ་སི་ཊེབ་བྷ་ཡི་སི་ཊེབ་ Step by Step School དང་མོན་ཊི་ཨ་བྷུ་ Mount Abu School སལ་ཝན་སློབ་གྲྭ་ Salwan Public School རྡོ་ལ་ཀོན་ལ་ཡོད་པའི་སི་པི་རིང་ཌེལ་སློབ་གྲྭ་ Springdales School – Daula Kuanཔུ་ས་རོཌ་ལ་ཡོད་པའི་སི་པི་རིང་ཌེལ་སློབ་གྲྭ་ Springdales School – Pusa Road ཨིན་ཌི་ཡ་ཧེ་བྷི་ཊེ་ཌི་ཤེས་ཡོན་སྟི་གནས་ཁང་ India Habitat Learning Centre རོ་ཧི་ནིར་ཡོད་པའི་བྷལ་བྷཱ་ར་ཏི་སློབ་གྲྭ་ Bal Bharati School – Rohini པི་ཏམ་པུ་རར་ཡོད་པའི་བྷལ་བྷཱ་ར་ཏི་སློབ་གྲྭ་ Bal Bharati School – Pitampura ཨ་མན་བྷི་ར་དྷཱ་རི་སློབ་གྲྭ་ Aman Biradari Homes ཝ་སནྟ་ཝེ་ལི་སློབ་གྲྭ་Vasant Valley School ཇེ་ཌི་གྷོ་ཡིན་ཀ སློབ་གྲྭ་ཁག་མི་འདྲ་བ་བཅུ་གསུམ་གྱི་དགེ་སློབ་གྲངས་ ༢༦༠ དང་སློབ་སྤྱི་གྲངས་ ༤༠ བཅས་ལ། གཞོན་སྐྱེས་ཚོར་བྱམས་བརྩེ་དང་བཟང་སྤྱོད་གལ་ཆེ་ཚུལ། ཞེས་པའི་བརྗོད་གཞིའི་ཐོག་བཀའ་སློབ་སྩལ་ཡོད།
དེ་ཡང་མཛད་སྒོའི་ཐོག་མར་གཞོན་སྐྱེས་ཕོ་མོ་གཉིས་ཀྱིས་༸གོང་ས་མཆོག་ལ་མཇལ་དར་འབུལ་ལམ་ཞུས་པ་བརྒྱུད་ངོ་སྤྲོད་གནང་རྗེས་༸གོང་ས་མཆོག་གིས་བཀའ་སློབ་སྩལ་དོན། ངོས་རང་དེ་རིང་འདིར་གཞོན་སྐྱེས་ཕོ་མོ་ཁྱེད་ཚོ་དང་ཐུག་རྒྱུའི་གོ་སྐབས་ཐོབ་པར་ཧ་ཅང་དགའ་པོ་བྱུང་། འཛམ་གླིང་འདི་འགྲོ་བ་མི་རིགས་སྤྱི་ཡོངས་ལ་བདག་པ་ཞིག་ཡིན། མིའི་རྣམ་དཔྱོད་ལ་བརྟེན་ནས་འཛམ་གླིང་ནང་འཕེལ་རྒྱས་ཧ་ཅང་ཕྱིན་ཡོད་ཀྱང་དཀའ་ངལ་བཟོ་མཁན་ཡང་མི་ཆགས་ཡོད། དཔེར་ན། དམག་ལ་མཚོན་ན་ཁྲིམས་མཐུན་ཡིན་ནའང་དོན་དངོས་འཚེ་བའི་ལས་འབའ་ཞིག་ཡིན། དམག་འཁྲུག་དེ་མིའི་བྱ་སྤྱོད་ཁོ་ནར་བརྟེན་ནས་ཡོང་བཞིན་ཡོད། དུས་རབས་ ༢༠ ནང་དམག་འཐབ་ཧ་ཅང་མང་པོ་བརྒྱབ་པར་བརྟེན་མི་གྲངས་ས་ཡ་ཉིས་བརྒྱ་དམར་གསོད་བཏང་ཡོད་ཁོངས་ནས་མང་པོ་ཞིག་ནོར་འཁྲུལ་གང་ཡང་མེད་མཁན་གྱི་མི་སེར་དཀྱུས་མ་དང་། དེ་བཞིན་བུད་མེད་དང་ཕྲུ་གུ རྒན་འཁོགས་སོགས་ཆགས་ཡོད། དམག་འཁྲུག་གི་སྐབས་དེར་རྡུལ་ཕྲན་མཚོན་ཆ་བེད་སྤྱོད་བྱས་ཡོད། ངོས་ཀྱིས་རྡུལ་ཕྲན་མཚོན་ཆ་དངོས་སུ་མྱོང་མཁན་ཧི་རོ་ཤི་མར་འཚོ་གནས་བྱེད་བཞིན་པའི་མི་དང་ཐུག་སྟེ་ཁོང་ཚོའི་ཉམས་མྱོང་རྣམས་ཉན་པ་ཡིན། གནས་ཚུལ་དེ་རིགས་ནམ་ཡང་མ་དགོས་པ་ཞིག་ཆགས་ཡོད། ང་ཚོས་གཞན་གྱི་བདེ་སྡུག་ལ་བསམ་ཤེས་བྱས་ཚེ་མཐུན་ལམ་ཡོང་རྒྱུ་དང་། དེ་ལས་ལྡོག་སྟེ་གཞན་ལ་ཁོང་ཁྲོ་དང་སྡང་འཛིན་བྱེད་རྒྱུ་དེ་སྤྱི་ཚོགས་འཐོར་གཞིའི་རྒྱུ་ཆགས་ཀྱི་ཡོད། མི་སྒེར་ལྟ་བུར་མཚོན་ནའང་བྱམས་བརྩེ་ཡོད་ན་ལུས་བདེ་པོ་ཡོང་རྒྱུ་ཡིན་པ་ཚན་རིག་པས་ར་སྤྲོད་བྱས་ཡོད་པ་མ་ཟད། བྱམས་བརྩེའི་བསམ་བློ་གོང་འཕེལ་གྱི་ཟབ་སྦྱོང་སྤྲོད་སྐབས་སུའང་ལུས་ཀྱི་ཁྲག་ཤད་ཆག་པ་དང་སེམས་ངལ་བརླག་པ་སོགས་བརྒྱུད་ནས་སེམས་སྐྱིད་པ་ཡོང་བཞིན་ཡོད་པ་བརྒྱུད་ནས་མི་ཚེ་བདེ་སྐྱིད་ལྡན་པ་ཡོང་བཞིན་ཡོད། མི་ཚེ་སྐྱིད་པོ་ཡོད་ན་མི་གཞན་དང་མཐུན་ལམ་བཟང་བ་ཡོང་ཐུབ། ཅེས་སོགས་ཀྱི་བཀའ་སློབ་དང་དྲི་བ་རྣམས་ལ་བཀའ་ལན་སྩལ།
ཕྱེད་ཡོལ་༸གོང་ས་མཆོག་གིས་རྒྱ་གར་གྱི་རྩོམ་པ་པོ་ནིར་ཇ་མ་ཌོ་ Neerja Madhav ལགས་ཀྱིས་རྩོམ་སྒྲིག་གནང་བའི་དཔེ་དེབ་དབུ་འབྱེད་མཛད་གྲུབ་མཚམས་ལག་ལེན་སོ་བདུན་མ་དང་བློ་སྦྱོང་ཚིགས་བརྒྱད་མའི་ཆོས་འབྲེལ་འཕྲོ་སྐྱོང་མཛད། ཆོས་འབྲེལ་ལེགས་པར་གྲུབ་རྗེས་རྒྱ་གར་སྒྱུ་རྩལ་བ་སྐུ་ཞབས་ཨ་ཤོཀ་ཅོབ་ར་ལགས་ཀྱིས་པིར་གྱི་བྲིས་པའི་༸གོང་ས་མཆོག་གི་སྐུ་པར་དབུ་འབྱེད་མཛད།
