༢༠༡༤ ཟླ་ ༣ ཚེས་ ༡༢ རེས་གཟའ་ལྷག་པ།

༄༅། །ཕྱི་ལོ་ ༢༠༡༤ ཟླ་ ༣ ཚེས་ ༡༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡུ་རོབ་སྤྱི་མཐུན་ཚོགས་པའི་དཔལ་འབྱོར་དང་སྤྱི་ཚོགས་ཡར་རྒྱས་ལྷན་ཁང་གི་འགན་འཛིན་སྐུ་ཞབས་ཧེན་རི་མ་ལོ་སི་ Henri Malosse མཆོག་གིས་དབུ་འཁྲིད་པའི་སྐུ་ཚབ་འཐུས་མི་དྲུག་ལ་གཟིམ་ཆུང་དུ་མཇལ་ཁ་སྩལ། སྐབས་དེར་༸གོང་ས་མཆོག་གིས་ཁོང་རྣམ་པར་བཀའ་སློབ་སྩལ་དོན། བོད་མིའི་སྒྲིག་འཛུགས་ཀྱིས་དབུ་མའི་ལམ་གྱི་སྲིད་བྱུས་འོག་རྒྱ་ནག་གཞུང་དང་གྲོས་མོལ་གྱི་ལམ་ནས་བོད་མི་ཚོར་མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་རག་ཐབས་བྱེད་བཞིན་ཡོད་པ་ལས་རྒྱ་ནག་དང་ཁ་བྲལ་གྱི་རང་བཙན་རྩོད་ཀྱི་མེད། རྒྱ་ནག་དང་མཉམ་གནས་བྱས་ཚེ་བོད་མིའི་དཔལ་འབྱོར་ཡར་རྒྱས་འགྲོ་རྒྱུར་ཁེ་ཕན་ཡོད། དེར་བརྟེན་བོད་མིའི་དཔལ་འབྱོར་འཛུགས་སྐྲུན་དང་བདེ་འཇགས་ཀྱི་གནད་དོན་ཐོག་རྒྱ་ནག་དབུས་གཞུང་གིས་སྟངས་འཛིན་བྱ་རྒྱུ་ལས་གཞན་བོད་མིའི་ཤེས་ཡོན་དང་ཁོར་ཡུག ཆོས་དད་བཅས་ཀྱི་གནད་དོན་ཐོག་བོད་པ་རང་ཉིད་ཀྱིས་འགན་འཁུར་བྱེད་ཐུབ་པ་བྱ་རྒྱུ་ཧ་ཅང་གལ་ཆེན་པོ་ཆགས་ཡོད། ཅེས་བཀའ་སློབ་སྩལ་བ་མ་ཟད། ལྐོག་ཟ་རུལ་སུངས་ལ་གདོང་ལེན་བྱེད་དགོས་པ་དང་མགོན་པོ་གང་ཉིད་མཆོག་གིས་ལྐོག་ཟའི་དཀའ་ངལ་དེ་འཚེ་བའི་བྱ་སྤྱོད་ཙམ་མ་ཟད། འགྲོ་བ་མིའི་སྤྱི་ཚོགས་ཕུང་མཁན་གྱི་སྐྲན་ནད་ལྟ་བུར་ངོས་འཛིན་མཛད་བཞིན་ཡོད་པར་བརྟེན་རྒྱ་ནག་གི་སྲིད་འཛིན་ཞི་ཅིང་ཕིང་ President Xi Jinping གིས་རྒྱ་ནག་ནང་དུ་ལྐོག་ཟའི་དཀའ་ངལ་ལ་དམ་བསྒྲགས་ཤུགས་ཆེ་བྱེད་བཞིན་པ་དེར་རྒྱབ་སྐྱོར་མཛད་བཞིན་ཡོད་སྐོར་བཀའ་སློབ་སྩལ། དེ་ནས་༸གོང་ས་མཆོག་གིས་སྐབས་དེར་མཇལ་བཅར་བ་ཡུ་རོབ་སྤྱི་མཐུན་ཚོགས་པའི་དཔལ་འབྱོར་དང་སྤྱི་ཚོགས་ཡར་རྒྱས་ལྷན་ཁང་གི་འགན་འཛིན་སྐུ་ཞབས་ཧེན་རི་མ་ལོ་སི་མཆོག་ལ་རིང་མིན་རྒྱ་ནག་གི་སྲིད་འཛིན་ཞི་ཅིང་ཕིང་སྦར་སེལ་དུ་གཞུང་འབྲེལ་འཚམས་གཟིགས་སྐབས་ཁོང་དང་མཇལ་ནས་བོད་ཀྱི་གནད་དོན་སེལ་ཆེད་ཞི་བའི་བརྡ་ལན་ཞིག་གནང་དགོས་པ་བཀོད་མངགས་མཛད་སྐབས་སྐུ་ཞབས་ཧེན་རི་མ་ལོ་སི་མཆོག་གིས་སྐབས་དེར། ཁོང་རང་ཉིད་ཀྱི་ལངས་ཕྱོགས་ནི་ཡུ་རོབ་སྤྱི་མཐུན་ཚོགས་པས་གཞི་རྩའི་རིན་ཐང་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་སོགས་ཀྱི་གནད་དོན་ཐོག་རྒྱ་ནག་དང་ནམ་ཡང་འགྲིག་འཇགས་བྱ་རྒྱུ་མེད་སྐོར་སྙན་སྒྲོན་ཞུས། དེ་ཡང་མཇལ་བཅར་སྐབས་སྐུ་ཞབས་ཧེན་རི་མཆོག་དང་ལྷན་མ་དི་ཤར་མ་ལགས། Madi Sharma ཐོ་མ་སི་ཇ་སི་ཀི་ལགས། Tomasz  Jasiński ཨན་ནི་མ་རི་ཡ་སིག་མུན་ལགས། AnneMarie  Sigmund ཝིན་སེན་མི་ཊན་ལགས་ Vincent  Metten བཅས་ཡོད།།