༢༠༡༤ ཟླ་ ༣ ཚེས་ ༣༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༣ ཚེས་ ༣༠ རེས་གཟའ་ཉི་མའི་སྔ་དྲོ་འབའ་བ་ཕུན་ཚོགས་དབང་རྒྱལ་རྒྱ་ནག་རྒྱལ་ས་པེ་ཅིང་སྨན་ཁང་ཞིག་ཏུ་འདས་གྲོངས་སུ་གྱུར་བར་༸གོང་ས་༸སྐྱབས་མགོན་ཆེན་པོ་མཆོག་གིས་སེམས་གསོའི་གསུང་འཕྲིན་སྩལ་བའི་ནང་འཁོད་དོན། འབའ་བ་ཕུན་ཚོགས་དབང་རྒྱལ་རྒྱ་ནག་པེ་ཅིང་སྨན་ཁང་ཞིག་ཏུ་འདས་གྲོངས་སུ་གྱུར་བའི་གནས་ཚུལ་ཤེས་རྟོགས་བྱུང་བར་ངོས་རང་ཧ་ཅང་བློ་ཕམ་བྱུང་། ཁོང་ནི་བོད་མིའི་ཁེ་ཕན་བསྒྲུབ་ཆེད་ལྷག་བསམ་བཟང་པོས་བསྐུལ་བའི་གུང་ཁྲན་ཏང་མི་ངོ་མ་ཞིག་ཡིན། ཁོང་འདས་གྲོངས་སུ་གྱུར་བ་དེས་ང་ཚོར་གྲོགས་པོ་བློས་ཐུབ་གཅིག་མེད་པ་ཆགས་ཡོད།
ཕྱི་ལོ་ ༡༩༥༡ ལོར་ཁོང་གིས་སྣེ་འཁྲིད་ནས་རྒྱ་མིའི་ལས་བྱེད་ལྷ་སར་འབྱོར་སྐབས་ངོས་དང་ཐོག་མར་ཐུག་བྱུང་། སྐབས་དེར་ཁོང་ལ་ཕུན་དབང་ཞེས་འབོད་བཞིན་ཡོད། དེ་རྗེས་ཕྱི་ལོ་ ༡༩༥༤།༡༩༥༥ ལོར་ངོས་རང་རྒྱ་ནག་གི་རྒྱལ་ས་པེ་ཅིང་གིས་གཙོས་གྲོང་ཁྱེར་ཁག་ཏུ་བསྐྱོད་སྐབས་ངོས་ཀྱི་སྐད་བསྒྱུར་བྱས་ཡོད་ཅིང་རིམ་བཞིན་ངོས་གཉིས་གྲོགས་པོ་ཡག་པོ་ཞིག་ཆགས་པ་རེད། ལྷག་པར་དུ་གཙོ་འཛིན་མའོ་ཙེ་ཏུང་དང་ངོས་གཉིས་མཇལ་འཕྲད་ཐེངས་མང་སྐབས་ཁོ་པས་ངོས་ཀྱི་སྐད་བསྒྱུར་བྱས་ཏེ་ཕན་ཐོགས་ཧ་ཅང་ཆེན་པོ་བྱུང་། དམ་པ་ཁོང་ནི་མར་ཁེ་སིའི་རིང་ལུགས་ཐོག་ཤེས་མྱོང་ཆེན་པོ་ཡོད་པ་དང་། ངོས་ཀྱིས་མར་ཁེ་སིའི་རིང་ལུགས་སྐོར་གང་ཤེས་པ་དེ་དག་ཁོ་པའི་མདུན་ནས་ཤེས་བྱུང་། སྐབས་དེར་བོད་ཀྱི་ཆབ་སྲིད་དང་སྤྱི་ཚོགས་ཀྱི་གནས་སྟངས་རྗེས་ལུས་ཡིན་པར་བརྟེན་དེར་སྐྱོན་ཆ་ཡོད་པར་གཟིགས་ཏེ་གུང་ཁྲན་རིང་ལུགས་ཐོག་ནས་བསྒྱུར་བཅོས་གཏོང་ཐུབ་རྒྱུའི་ཡིད་ཆེས་བརྙེད་པའི་བོད་མིའི་གྲས་སུ་གཅིག་ཕུན་དབང་ཆགས་ཡོད། ཕུན་དབང་ལགས་ཀྱིས་རང་ཉིད་གུང་ཁྲན་ཏང་མི་ངོ་མ་ཞིག་ཡིན་པ་མ་ཟད། བོད་པ་ཞིག་ཡིན་པའི་འདུ་ཤེས་ནམ་ཡང་མ་དོར་བར་བོད་མི་རིགས་ཀྱི་ཐུན་མིན་རིག་གཞུང་ལ་དགའ་སྤོབས་བྱས་ཡོད་པ་དེས་མིག་དཔེ་བཟང་པོ་ཞིག་བཞག་ཡོད། ངོས་དང་ཐོག་མར་ཐུག་སྐབས་ཁོང་ནི་རྒྱ་མིའི་སྐུ་ཚབ་ལྷན་དུ་ཡོད་ཀྱང་ངོས་ལ་ཕྱག་འཚལ་བྱུང་བར་ཧང་སངས་དགོས་པ་བྱུང་།
ཕྱོགས་མཚུངས་སྐབས་དེར་རྒྱ་མིའི་སྐུ་ཚབ་རྣམས་མའོ་ཡི་སྒྲིག་ཆས་གྱོན་ཡོད་ཀྱང་། ཕུན་དབང་ལགས་ཀྱིས་བོད་ཀྱི་ཕྱུ་པ་གྱོན་འདུག་པར་ངོས་ཀྱིས་འདྲི་སྐབས་ཁོང་གིས་གུང་ཁྲན་ཏང་མི་དང་གསར་བརྗེ་ཟེར་བ་ཆ་ལུགས་གཙོ་བཟུང་བྱས་ན་ནོར་འཁྲུལ་ཡིན་པ་དང་། གཙོ་བོ་བསམ་བློའི་གསར་བརྗེ་དགོས་པ་བརྗོད་བྱུང་། དེར་བརྟེན་བོད་མི་གུང་ཁྲན་རིང་ལུགས་པ་ཞིག་བྱེད་དགོས་ན་བོད་ཀྱི་རིག་གཞུང་དོར་དགོས་བསམ་པའི་བསམ་བློ་དམ་པ་ཁོང་ལ་ནམ་ཡང་མེད་པ་དེ་ངོས་ཀྱིས་གསལ་རྟོགས་ཐུབ་བྱུང་།
དམ་པ་ཁོང་གིས་ལྷག་བསམ་རྣམ་དག་ཐོག་ནས་གུང་ཁྲན་ཏང་ཡང་དག་པ་ཞིག་བྱས་ཡོད་ཀྱང་བོད་མི་རིགས་ཀྱི་འདུ་ཤེས་གཙིགས་ཆེར་འཛིན་པ་དེས་རྒྱ་ནག་འགོ་ཁྲིད་ཚོར་མཐོང་ཕྱོགས་ཤིག་བྱུང་ཡོད་པར་བརྟེན་མི་ལོ་ ༡༨ རིང་བཙོན་འཇུག་བྱས་ཏེ་དཀའ་སྡུག་མྱངས་དགོས་བྱུང་ཡོད་ཀྱང་སྙིང་སྟོབས་ནམ་ཡང་ཞུམ་མེད། བགྲེས་ཡོལ་དུ་ཕེབས་རྗེས་སུའང་བོད་མིའི་ཐོབ་ཐང་དང་བདེ་དོན་ཆེད་བློ་འཚབ་ཧ་ཅང་གནང་བ་མ་ཟད། གོ་སྐབས་ནམ་བྱུང་ལ་རྒྱ་ནག་དཔོན་རིགས་ཚོར་ཞུ་སྐུལ་གནང་བཞིན་ཡོད། ཕུན་དབང་ཁོང་ལྷག་བསམ་རྣམ་དག་དང་དྲང་པོ་དྲང་ཤག་ཤིག་ཡིན་པར་བརྟེན་ངོས་རང་ཁོང་དང་ཐུག་རྒྱུར་དགའ་པ་ཡོད། ངོས་ཀྱིས་ཁོང་དང་སླར་ཡང་ཐུག་རྒྱུའི་རེ་བ་འཆང་བཞིན་ཡོད་ཀྱང་དེ་ལྟར་བྱུང་མེད། ངོས་ཀྱིས་དམ་པ་ཁོང་བདེ་འགྲོའི་རྟེན་བཟང་ཞིག་ཐོབ་པའི་སྨོན་ལམ་རྒྱག་རྒྱུ་དང་ཤུལ་ལུས་བཟའ་ཟླ་དང་བུ་ཕྲུག་རྣམས་ལ་སེམས་གསོ་ཞུ་རྒྱུ་ཡིན། གསུང་འཕྲིན་ངོ་མ་དབྱིན་ཡིག་ནང་ཡོད་པ་ནས་འདི་ག་ཕྱི་དྲིལ་བོད་ཡིག་ཚན་པས་ཕབ་བསྒྱུར་ཞུས་པས་ཚིག་དོན་ལ་ཧེ་བག་ཡོད་ཚེ་དབྱིན་ཡིག་ལ་རྩ་འཛིན་ཡོང་བ་ཞུ།
