༢༠༡༤ ཟླ་ ༣ ཚེས་ ༢༡ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༣ ཚེས་ ༢༠ རེས་གཟའ་ཕུར་བུའི་ཉིན་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་མཛེ་ནད་ལྟ་སྐྱོང་ཁང་ལ་ཆིབས་སྒྱུར་བསྐྱངས་ཏེ་ཧིན་སྒོར་འབུམ་བཅུ་གསོལ་རས་སྩལ་རྒྱུའི་ཞལ་བཞེས་མཛད་པ་མ་ཟད། འབྱུང་འགྱུར་ལོ་ལྔའི་རིང་མགོན་པོ་གང་ཉིད་མཆོག་གིས་ལྗགས་རྩོམ་མཛད་པའི་ཕྱག་དེབ་ཀྱི་ཡོན་འབབ་ royalties རྣམས་གསོལ་རས་སྩལ་རྒྱུའི་ཞལ་བཞེས་ཀྱང་མཛད་ཡོད། དེ་ཡང་༸གོང་ས་མཆོག་གིས་ཏ་ཧིར་པུར་རྫས་ལྟ་སྐྱོང་ཁང་ Kasturba Gram Kusht Ashram, Tahirpur Leprosy Complex དུ་མཛེ་ནད་ཕོག་པ་རྣམས་ལ་ཐུགས་བརྩེ་ཆེན་པོས་བཀའ་སློབ་སྩལ་དོན། མཛེ་ནད་ཕོག་མཁན་ཚོའི་དཀའ་ངལ་དེ་ཡང་སྤྱིར་བཏང་སྤྱི་ཚོགས་ནང་འཕྲད་བཞིན་པའི་ལུས་ནད་ཀྱི་དཀའ་ངལ་ཅི་འདྲ་ཅི་མཚུངས་ཤིག་ལ་ངོས་འཛིན་བྱེད་དགོས་པ་ལས་ཁོང་ཚོར་དབྱེ་འབྱེད་དང་ཁྱད་གསོད་སོགས་ནམ་ཡང་བྱེད་མི་རུང་།

ང་ཚོ་ཚང་མ་འགྲོ་བ་མི་ཡིན་པ་གཅིག་མཚུངས་ཆགས་ཡོད། རིགས་རུས་དང་ཆོས་ལུགས་སོགས་ལ་གཞི་བཅོལ་ནས་མི་ཕན་ཚུན་དབར་དབྱེ་འབྱེད་དང་མཐོང་ཆུང་ཁྱད་གསོད་བྱས་པ་ནི་སྡིག་པའི་རྒྱུ་ཡིན། དངུལ་ཡོད་མཁན་ཕྱུག་བདག་ཚོས་རྒྱས་སྤྲོས་ཚོད་མེད་ཐོག་དངུལ་གྲོན་འཕང་མེད་བཏང་བ་ནི་ཀླན་རྟགས་རེད། དེའི་ཚབ་ཏུ་དངུལ་དེ་དག་དགོས་ངེས་ཉམ་ཐག་མི་མང་ཚོར་རོགས་རམ་བྱེད་དགོས། གལ་ཏེ་ཁྱེད་ཚོས་དཀོན་མཆོག་ལ་ཡིད་ཆེས་བྱས་པའམ་ཡང་ན་ནང་པ་སངས་རྒྱས་པ་ཞིག་ཡིན་ན་མི་སྐྱོ་བོ་ཚོར་རོགས་རམ་བྱེད་དགོས། དེ་ལྟར་བྱས་ཚེ་ལས་དགེ་བ་གསོག་རྒྱུ་ཡིན། འཛུམ་དམུལ་དམུལ་ངང་སྡོད་མཁན་མི་དེ་དཔལ་འབྱོར་ལྡན་པ་ཚོ་ལས་ཡག་པ་ཡོད། གང་ཡིན་བརྗོད་ན་མི་དེར་མི་ཚེའི་བདེ་སྐྱིད་ངང་བསྐྱལ་རྒྱུའི་གདེང་སྤོབས་ཡོད། མིའི་ཡན་ལག་ནང་གལ་ཆེ་ཤོས་ཀླད་པ་ཆགས་ཡོད། ཀླད་པའི་བྱེད་ལས་ཡོད་པ་དེ་སྲིད་དུ་ཡན་ལག་གཞན་ཚོ་དེ་ཙམ་གནད་འགག་མེད། གང་ཡིན་བརྗོད་ན། དཀའ་ངལ་སེལ་རྒྱུའི་ལས་ཀ་གཙོ་བོ་ཀླད་པས་བྱེད་བཞིན་ཡོད། དཀའ་ངལ་དེ་དག་སེལ་བ་བརྒྱུད་ནས་མི་ཚེའི་ནང་ལས་དོན་མང་པོ་བསྒྲུབ་ཐུབ། དེར་བརྟེན་ཁྱེད་ཚོའི་ཀླད་པས་ལས་ཀ་བྱེད་ཀྱི་ཡོད་ན་དེས་འགྲིག་པ་རེད། དེར་བརྟེན་སེམས་འཁྲལ་བྱེད་དགོས་དོན་གང་ཡང་མེད་པར་འཛུམ་མདངས་དང་ལྡན་པའི་ཐོག་ནས་སྡོད་དགོས། ཞེས་སོགས་ཀྱི་བཀའ་སློབ་སྩལ།