༢༠༡༤ ཟླ་ ༣ ཚེས་ ༣༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༣ ཚེས་ ༣༡ ཉིན་གྱི་སྔ་དྲོ་ཆུ་ཚོད་ ༨།༣༠ 
ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་དད་ལྡན་མི་དམངས་ ༦༠༠༠ བརྒལ་བར་སངས་རྒྱས་སྨན་བླའི་རྗེས་གནང་དང་བཀའ་སློབ་སྩལ་ཡོད། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ཚེས་ ༣༠ རེས་གཟའ་ཉི་མའི་སྔ་དྲོ་འབའ་བ་ཕུན་ཚོགས་དབང་རྒྱལ་ལགས་རྒྱ་ནག་གི་རྒྱལ་ས་པེ་ཅིང་སྨན་ཁང་ཞིག་ཏུ་འདས་གྲོངས་སུ་གྱུར་བའི་ཐོག་བཀའ་སློབ་སྩལ་དོན།
འབའ་བ་ཕུན་ཚོགས་དབང་རྒྱལ་གྲོངས་ནས་ཁ་སེང་ངོས་ལ་ལན་ཞིག་འབྱོར་བྱུང་། ཁོང་ལ་ཆ་མཚོན་ན་ཕྱི་ལོ་ ༡༩༥༡།༥༢ ནས་ངོ་ཤེས་ཀྱི་ཡོད། དངོས་གནས་དྲང་གནས་མི་རིགས་ཀྱི་དཔའ་བོ་རེད། གང་ལྟར་ཡུན་རིང་པོ་གཤིབས་པ་རེད། ཁོང་ལྟ་གྲུབ་ཐོག་ནས་མར་ཁེ་སིའི་ལྟ་གྲུབ་འཛིན་མཁན་རེད། དེ་དང་ཆབས་ཅིག་བོད་མི་རིགས་ཀྱི་རིག་གཞུང་དང་ལར་ཞེན་ཧ་ལས་པ་རེད། བོད་མི་རིགས་ཀྱི་ལར་ཞེན་ཆེ་དྲགས་པའི་རྐྱེན་གྱིས་ཕྱིས་སུ་བཙོན་དུ་འགྲོ་དགོས་བྱུང་ཡོད། གང་ལྟར་ཕུན་ཚོགས་དབང་རྒྱལ་གྱིས་མཚོན་གུང་ཁྲན་ཏང་ཡོན་ངོས་ཀྱིས་ངོ་ཤེས་པ་མང་པོ་ཞིག་ཡོད། ཁོང་ཚོ་མང་ཆེ་བ་ཕྱི་ལོ་ ༡༩༥༧ ནས་འགོ་བཙུགས་ཏེ་ལས་ཁུངས་ནས་གནས་དབྱུང་གཏོང་རྒྱུ་དང་། ཁ་ཤས་བཟང་བཙོན་དུ་བཞག་པ་དེ་འདྲ་བྱུང་ཡོད། ཕུན་ཚོགས་དབང་རྒྱལ་ལགས་རྣམ་དཔྱོད་དང་སྙིང་སྟོབས། དེ་བཞིན་མི་རིགས་ཀྱི་ཞེན་ཁོག་དང་ལྷག་བསམ་རྩེ་གཅིག་པ་དེ་འདྲ་རེད། ཆོས་ལ་དད་པ་མེད་ཀྱང་བོད་མི་རིགས་ཀྱི་བག་ཆགས་དང་གོམས་གཤིས་ཧ་ཅང་ཤུགས་ཆེན་པོ་ཡོད་པ་ཞིག་རེད་འདུག ངོས་ཀྱིས་དཔེ་མཚོན་ཞིག་ཞུས་ན། ཉིན་གཅིག་ངེད་གཉིས་པེ་ཅིང་དུ་ཡོད་སྐབས་མའོ་ཙེ་ཏུང་ཚར་མང་པོ་མཇལ་བ་རེད། དཔོན་རིགས་གཞན་མང་པོ་ཞིག་དང་ངོས་ཀྱིས་ཐུག་པ་རེད།
སྐབས་དེར་སྐད་བསྒྱུར་རྐང་ཕུན་ཚོགས་དབང་རྒྱལ་གྱིས་བྱེད་ཀྱི་ཡོད། ཉིན་གཅིག་ངེད་གཉིས་སྐད་ཆ་བྱུང་། ཕུན་ཚོགས་དབང་རྒྱལ་གྱིས་ངོས་ལ་བལྟས་ནས་སྐུ་མདུན་ཁྱེད་རང་སྔ་མོ་ཆུང་ཆུང་སྐབས་ནོར་བུ་གླིང་ཁར་ཐེངས་གཅིག་མཇལ་བྱུང་། སྐབས་དེར་བཞུགས་ཁྲིའི་སྟེང་ཆུང་ཆུང་ཞིག་འདུག ད་ལྟ་འདི་འདྲ་ཞིག་གནང་བཞུགས་ཡོད། ཅེས་བརྗོད་མ་ཐག་སྐད་ཤུགས་ཆེན་པོས་ངུས་སོང་། ངོས་རང་འཚེར་པོ་བྱུང་། ཏོག་ཙམ་རིང་ཁུ་སིམ་མེར་བསྡད་པ་ཡིན། སེམས་ཀྱི་གཏིང་ལ་མི་རིགས་ཀྱི་ཞེན་ཁོག་དང་། དད་པ་སོགས་འདྲེས་ཡོད་པ་ཕལ་ཆེར་རེད། གང་ལྟར་ཚེ་སྟོད་གུང་ཁྲན་ཏང་ཡོན་བྱས་ནས་ཆོས་ལ་དད་པ་མེད་མཁན་ཞིག་རེད། དད་པ་མེད་མཁན་ཞིག་ཡིན་པའི་དབང་དུ་བཏང་བ་ཡིན་ནའང་། ན་ནིང་གཞེས་ནིང་སྐབས་ཡིན་པ་ཡོད། ཁོང་གིས་པེ་ཅིང་ནས་ངོས་ལ། ཁོང་རང་གི་དཔར་ལག་པར་ཁ་བཏགས་བཟུང་ནས་དེ་ཐོད་པར་གཏུགས་ཏེ་སྨོན་ལམ་ཤུགས་དྲག་བརྒྱབ་པ་ཞིག་བསྐུར་བྱུང་། གུང་ཁྲན་རྒས་ནས་ནང་པ་ཆགས་པ་རེད། ཅེས་ཞལ་ཤོབ་མཛད། མ་གཞི་རྒྱ་རིགས་གུང་ཁྲན་ཏང་ཡོན་སེམས་གཏིང་ནས་ནང་པ་དང་ནང་པར་ཧ་ཅང་དགའ་པོ་ཡོད་མཁན་མང་པོ་འདུག སྐབས་རེ་ངོས་རང་རྒྱ་རིགས་མང་པོ་ཐུག་བཞིན་ཡོད། དམག་དཔོན་ཟུར་པ་དེ་འདྲས་ནང་པ་ཡིན་རྗོད་བཞིན་འདུག ཕྱི་རྟག་ཏུ་གུང་ཁྲན་ཏང་ཡོན་བྱས་ནས་རྣམ་པར་དག་པ་ཞིག་ཡིན་ཁུལ་བྱེད་ཀྱི་འདུག ཕྱི་ལོ་ ༡༩༧༩ ལོར་ངོས་རང་སོག་ཡུལ་དུ་ཕྱིན་པ་ཡིན། དེ་དུས་སོག་པོ་དམར་ཤོག་རེད།
སྐབས་དེར་སོག་པོའི་དཔོན་པོ་དང་དམག་མི་རྣམས་གཅིག་པུར་ཐུག་སྐབས་ཞྭ་མོ་ཕུད་ནས་ཕྱག་དབང་ཞུས་ཏེ་བྱིན་རྟེན་སློང་གི་འདུག འོན་ཀྱང་རོགས་པ་གཞན་ཡོད་ན་ཧ་ཅང་སྒམ་པོ་བྱས་ནས་སྡོད་ཀྱི་འདུག མིའི་འཇིགས་སྣང་འོག་བསྡད་ཚེ་གཡོ་སྒྱུ་དང་སྐྱག་རྫུན་སླེབས་ཀྱི་ཡོད། དེར་བརྟེན་འཇིགས་སྣང་བསྐུལ་ནས་རྒྱ་ནག་གུང་ཁྲན་ཏང་གིས་འགོ་ཁྲིད་པ་རེད། གུང་ཁྲན་ཏང་གིས་འགོ་ཁྲིད་པ་ཡིན་ཡང་གང་ལྟར་ནོར་བ་རེད། ལེ་ཉིན་གྱིས་ནོར་བ་རེད། དེ་ནས་སི་ཏ་ལིང་རེད། མའོ་ཙེ་ཏུང་འགོ་སྟོད་དུ་ཕལ་ཆེར་ལྷག་བསམ་རྣམ་དག་ཡོད། དེ་བཞིན་ཀྲུའི་ཏའེ་དང་ལིའུ་ཧྲའོ་ཅི། དེ་བཞིན་ཕང་ཏཱ་ཧེ་བཅས་ཁོང་རྣམས་སྒེར་སེམས་བྲལ་ཏེ་སྤྱི་པ་ཁོ་ན་བསམ་མཁན་ཧ་ཅང་ཡག་པོ་ཡོད། རིམ་བཞིན་དབང་ཆས་ཆང་གིས་བཟི་བ་ལྟར་བཟི་ནས་འཕྲོ་བརླག་ཕྱིན་པ་རེད། ཕུན་ཚོགས་དབང་རྒྱལ་ཡང་དེ་འདྲ་ཞིག་རེད། ཆབ་སྲིད་ཀྱི་ཐོག་ལ་ཆ་བཞག་ནའང་ཕུན་ཚོགས་དབང་རྒྱལ་གྱིས་མཚོན་འབའ་བ་མང་པོ་ཡོད། སོ་སོའི་མི་རིགས་ཀྱི་དོན་དུ་དཀའ་ལས་རྒྱག་མཁན་ཞེ་དྲག་ཡག་པོ་རེད། དེ་བཞིན་ཨ་མདོ་ཁུལ་ནས་འགའ་ཤས་ཡོད། ཕྱིས་སུ་ཨ་མདོ་མདོ་སྨད་ལ་བསྡད་པ་རེད། སྐྱེས་ས་ཕལ་ཆེར་དཀར་མཛེས་རེད། བཀྲ་ཤིས་ཀྲུའུ་ཞི་ཁོང་ངོ་ཤེས་ཀྱི་ཡོད། ད་ཆ་གྲོངས་ཚར་བ་རེད། མི་རིགས་ཀྱི་ལྟ་བ་ཧ་ཅང་ཡག་པོ་ཡོད། འབའ་བ་ཡང་གླིང་རྡོ་རྗེ་ད་ལྟ་བསྡད་ཡོད། ཕུན་ཚོགས་དབང་རྒྱལ་ཚར་གཅིག་ཐུག་མི་འོང་ངམ་བསམ་པའི་རེ་བ་བྱུང་། སྐབས་ཤིག་ཕུན་ཚོགས་དབང་རྒྱལ་ཕྱི་རྒྱལ་ལ་སླེབས་སྐབས་ཤིག་ལ་ངོས་ཀྱིས་ཁ་པར་ཞིག་བཏང་བ་ཡིན། ངོས་ཀྱི་སྐད་ལམ་གསེང་ངོ་ཤེས་སོང་།
སྐབས་དེར་ངོས་ཀྱིས་ཕུན་ཚོགས་དབང་རྒྱལ་ལ་བརྙས་བསྐོས་ནས་ད་ཆ་སྤྱི་ཚོགས་རིང་ལུགས་ག་འདྲ་བྱས་སོང་ཞེས་དྲིས་པ་ཡིན། ཁོང་གིས་གད་མོ་བགད་ནས་བསྡད་པ་ལས་ལན་རྒྱག་རྒྱུ་གང་ཡང་མི་འདུག གང་ལྟར་འདས་པོ་ཁོང་གི་ཆེད་ང་ཚོ་ཚང་མས་སྨོན་ལམ་རྒྱག་རོགས་ཞེས་ཞུ་རྒྱུ་ཡིན། ལྷག་པར་བོད་ནང་དུ་སངས་རྒྱས་ཀྱི་བསྟན་པ་དང་། མི་རིགས་ཀྱི་ཐོབ་ཐང་ཆེད་དཀའ་ལས་བརྒྱབ་ནས་རང་ལུས་མེར་སྲེག་གཏོང་མཁན་གྱིས་མཚོན་འདས་གྲོངས་སུ་ཕྱིན་པ་ཧ་ཅང་མང་པོ་བྱུང་ཡོད། དེ་བཞིན་ད་ལྟ་གསོན་པོར་གནས་བཞིན་པའི་ནང་ནད་གཅོང་དཀའ་ངལ་འཕྲད་མཁན་མང་པོ་ཞིག་ཡོད། ཁོང་ཚོ་ཚང་མའི་ཆེད་སྨོན་ལམ་ཡག་པོ་ཞིག་རྒྱག་རྒྱུ་མ་གཏོགས་གཞན་ང་ཚོར་བྱ་རྒྱུ་གང་ཡང་མེད། ཅེས་བཀའ་སློབ་སྩལ་རྗེས་མ་ཎི་ཕྲེང་སྐོར་གཅིག་དྲངས་ཡོད་པ་བཅས། །
