༢༠༡༤ ཟླ་ ༣ ཚེས་ ༣༡ རེས་གཟའ་ཟླ་བ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བོད་ཀྱི་གསོ་བ་རིག་པའི་སྨན་པའི་ལྷན་ཚོགས་ནས་སངས་རྒྱས་སྨན་བླའི་བཀའ་དབང་སྩལ་སྐྱོང་ཡོང་བའི་ཇི་ལྟར་གསོལ་འདེབས་ཞུས་དོན་ལྟར། 
བཀའ་བཞེས་ཟབ་མོ་ཐོབ་སྟེ་ཕྱི་ལོ་ ༢༠༡༤ ཟླ་ ༣ ཟླ་ ༣༡ ཉིན་མགོན་པོ་གང་ཉིད་མཆོག་གིས་སྒྲུབ་ཞག་སྔོན་དུ་མཛད་པའི་ཐོག་ནས་བོད་ཀྱི་སྨན་རྩིས་ཁང་དང་ཕྱོགས་མཐའ་ཁག་ནས་བཅར་བའི་སྨན་པ་རྣམས་ཀྱིས་གཙོས་དད་ལྡན་མི་དམངས་ ༦༠༠༠ བརྒལ་བར་སངས་རྒྱས་སྨན་བླའི་རྗེས་གནང་དང་བཀའ་སློབ་སྩལ་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨ ཐོག་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་ཕོ་བྲང་ནས་༸སྐུའི་བླ་སྨན་ཞབས་ཞུ་བ་ཚེ་དབང་
རྟ་མགྲིན་ལགས་ཀྱིས་གཙོས་གསོ་བ་རིག་པའི་སྨན་པའི་ལྷན་ཚོགས་ཀྱི་ཚོགས་གཙོ་སྨན་པ་ངག་དབང་བཟོད་པ་ལགས་དང་ཚོགས་གཞོན་སྨན་པ་ཐོགས་མེད་ལགས་བཅས་ཀྱིས་སྤོས་སྣེས་སྔོན་བསུས་ཏེ་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་བཞུགས་ཁྲིར་༸ཞབས་སོར་འཁོད་གྲུབ་མཚམས་ཞལ་འདོན་གསུང་བསྐུལ་དང་འབྲེལ་སྨན་བླའི་གཟུངས་སྔགས་གསོག་གྲུབ་རྗེས་མགོན་པོ་གང་ཉིད་མཆོག་གིས་དེར་འདུས་མི་དམངས་རྣམས་ལ་སྨན་བླའི་རྗེས་གནང་སྔོན་བཀའ་སློབ་སྩལ་དོན། དེ་རིང་ཁྱེད་རང་ཚོ་སྨན་པའི་ལྷན་ཚོགས་ནས་སྨན་བླའི་རྗེས་གནང་བྱེད་རྒྱུའི་རེ་འདུན་གནང་བ་རེད། ཁྱེད་རང་ཚོས་ལོ་མང་རིང་སློབ་སྦྱོང་བྱས་ཏེ་སྨན་བཅོས་བྱེད་རྒྱུར་ནུས་པ་ཆེ་ཙམ་བྱུང་ན་བསམས་དྲན་གྱི་ཡོད། སྨན་བླའི་གཟུངས་སྔགས་འདྲེན་པ་ཙམ་གྱིས་འགྲིག་གི་ཡོད་ན་སྨན་པའི་སློབ་སྦྱོང་བྱེད་དགོས་དོན་མེད། སྨན་པ་རང་གི་ཤེས་ཚད་གཞི་ལ་བཞག་སྟེ་ཉམས་མྱོང་ཕྱོགས་བསྡོམས་བྱེད་དགོས་པ་ཞིག་རེད། ང་ཚོ་རང་དབང་ལུང་པའི་ནང་དམིགས་བསལ་གྱི་གོ་སྐབས་ཤིག་ཡོད་པར་བརྟེན། གསོ་བ་རིག་པའི་མི་སྣ་འདྲ་མིན་མཉམ་དུ་ཐུག་སྟེ་གོ་བསྡུར་བྱས་ནས་ཉམས་མྱོང་སྤེལ་རེས་བྱེད་རྒྱུ་གོ་སྐབས་ཤིག་ཡོད་པ་དེ་དམ་འཛིན་བྱེད་རྒྱུ་ཧ་ཅང་གལ་ཆེན་པོ་རེད། རྩ་བའི་ང་ཚོ་བོད་པའི་གསོ་བ་རིག་པའི་རིག་གཞུང་གསོ་རིག་ནང་ནས་སྤུས་དག་ཤོས་ཤིག་ཆགས་ཀྱི་ཡོད།
དེ་སྔ་བོད་དུ་ཡོད་མུས་ཀྱི་གསོ་བ་རིག་པའི་རིག་གནས་དེ་ཆོས་རྒྱལ་ཁྲི་སྲོང་ལྡེ་བཙན་གྱི་སྐབས་ལ་དེའི་ཚེ་དེའི་དུས་གསོ་བ་རིག་པའི་རིག་གནས་འདྲ་མིན་ཡོད་པ་རྣམས་ཆོས་རྒྱལ་ཁྲི་སྲོང་ལྡེ་བཙན་དབུ་བཞུགས་ཐོག་ཚོགས་འདུ་ཚོགས་ཏེ་གསོ་བ་རིག་པའི་རིག་གནས་ཕྱོགས་བསྡུས་བྱས་པ་རྣམས་ཁྱེད་རང་ཚོས་ནམ་རྒྱུན་ཤོད་ཀྱི་འདུག ང་ཚོ་དུས་རབས་ཉེར་གཅིག་ནང་བསླེབས་ཡོད། ད་དུང་རིག་གནས་འདྲ་མིན་ཡོད་པའི་དེ་ང་ཚོ་ཕན་ཚུན་ཉམས་མྱོང་སྤེལ་རེས་བྱས་ཏེ་མུ་མཐུད་ནས་ཡར་རྒྱས་གཏོང་རྒྱུ་ཏན་ཏན་གོ་སྐབས་ཡོད་པར་བརྟེན་དམ་འཛིན་བྱེད་རྒྱུ་ཧ་ཅང་གལ་ཆེན་པོ་རེད། ནམ་རྒྱུན་དབང་དང་རྗེས་གནང་ཆོས་འབྲེལ་གང་ཞིག་བྱས་ཀྱང་འགོར་སྟོན་པའི་བདག་པོ་སྟོན་པ་བཅོམ་ལྡན་འདས་ལ་བསྟོད་ཕྱག་འབུལ་གྱི་ཡོད། ངོས་ལ་སྨན་བླའི་རྗེས་གནང་ཐོབ་ཡོད་པར་བརྟེན་སྨན་བླའི་གཟུངས་སྔགས་རྟག་ཏུ་འདྲེན་གྱི་ཡོད། བྱིན་རླབས་ཀྱིས་ཕན་ཐོགས་ཡོད་ཀྱང་དབང་དང་བྱིན་རླབས་ཐོག་ནས་ན་ཚད་དྲག་སྐྱེད་ཡོང་གི་རེད། ཅེས་ན་དངོས་ཡོད་གནས་ཚུལ་དང་མི་མཐུན་པ་རེད། དེ་བཞིན་བོད་པའི་ཡ་རབས་སྤྱོད་བཟང་བརླག་ན་བོད་པའི་བླ་སྲོག་མེད་པ་ཆགས་པ་རེད། རང་ཉིད་སྒེར་ལ་ཡིན་རུང་སྐྱིད་པ་གང་ཡང་ཡོང་རྒྱུ་མེད། སྤྱི་པར་ཆ་བཞག་ན་བོད་པའི་མཚན་ཤས་རེད། ཕར་ཕྱོགས་དེར་རྒྱ་མི་གུང་ཁྲན་གྱིས་བོད་ཀྱི་ཆོས་དང་རིག་གཞུང་བཙན་པོ་དབང་ཡོད་ཐོག་ནས་མེད་པ་བཟོ་གི་ཡོད། ང་ཚོ་རང་དབང་ལུང་པའི་ནང་དང་བླང་ཐོག་རང་ཉིད་ཀྱི་བླ་སྲོག་ལྟ་བུའི་རིག་གཞུང་ལ་དོ་སྣང་མེད་པར་དངོས་པོ་ཡར་རྒྱས་ཁོ་ནའི་ཐོག་ཆགས་སྡང་ཕྱོགས་ལྷུང་ཕྱིན་ན་བསྟན་བཤིག་ངོ་མ་དེ་རེད། དེར་བརྟེན་བསམ་བློ་ནན་ཏན་གཏོང་དགོས། རྒྱ་གུང་ཁྲན་གྱིས་གླགས་མི་འཁྱེར་བ་དེ་ང་ཚོས་འདི་ནས་བོད་པ་རང་ཉིད་ཀྱིས་དེའི་བྲོ་བ་དང་ཁྱད་ཆོས་མ་ཤེས་པར་མཐོང་ཆུང་བྱས་ནས་ཕྱིན་ན་ཧ་ཅང་ཐབས་སྐྱོ་པོ་རེད། ཅེས་བཀའ་སློབ་ཕེབས་ཡོད་པ་མ་ཟད། མི་དམངས་ལ་ནང་ཆོས་ངོ་སྤྲོད་དང་འབྲེལ་གང་ཉིད་མཆོག་གི་སྐུའི་མཛད་ཁུར་གསུམ་གྱི་ངོ་སྤྲོད་མཛད་གྲུབ་མཚམས་སངས་རྒྱས་སྨན་བླའི་རྗེས་གནང་སྩལ་ཡོད།
