༢༠༡༤ ཟླ་ ༣ ཚེས་ ༢༠ རེས་གཟའ་ཕུར་བུ།
༄༅། །འདི་གར་ཆེད་གཉེར་གསར་འགོད་པ་ཡེ་ཤེས་ཀུན་གྲགས་ལགས་ཀྱིས་ས་གནས་ནས་བཏང་གནས་ནང་འཁོད་དོན། 
ཕྱི་ལོ་ ༢༠༡༤ ཟླ་ ༣ ཚེས་ ༡༩ རེས་གཟའ་ལྷག་པའི་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་སྔ་དྲོ་ཆུ་ཚོད་ ༩ ཙམ་ལ་སིམ་ལའི་ཧི་མཱ་ཅལ་གཙུག་ལག་སློབ་གྲྭར་ཆིབས་སྒྱུར་བསྐྱངས་ཏེ་བསླབ་པ་མཐར་གསོན་གྱི་མཛད་སྒོ་ཐེངས་ ༢༡ པའི་ཐོག་བཀའ་སློབ་སྩལ་ཡོད། དེ་ཡང་ཐོག་མར་༸གོང་ས་མཆོག་གཙུག་ལག་སློབ་གྲྭར་༸ཞབས་སོར་འཁོད་སྐབས་ཧི་མཱ་ཅལ་མངའ་སྡེའི་སྲིད་སྐྱོང་དང་གཙུག་ལག་སློབ་གྲྭའི་རིགས་བདག་གཅིག་ལྕོག་ཡིན་པ་ལྕམ་སྐུ་ཨུར་མི་ལ་སིངསག་མཆོག་དང་། ཧི་མཱ་ཅལ་གཙུག་ལག་སློབ་གྲྭའི་ཉེ་བའི་རིགས་བདག་སྐུ་ཞབས་ཨེ་ཌི་བྷ་ཇི་པ་ཡི་ (Acharya A. D Bajpai) མཆོག་སོགས་ཀྱིས་གཙོས་འབྲེལ་ཡོད་ལས་བྱེད་སོགས་ཀྱིས་ཕེབས་བསུ་གཟབ་རྒྱས་ཞུས་ཡོད།
དེ་རྗེས་ཐོག་མར་རྒྱ་གར་རྒྱལ་གླུ་དབྱངས་སུ་གྱེར་རྗེས་༸གོང་ས་མཆོག་དང་མངའ་སྡེའི་སྲིད་སྐྱོང་དང་གཙུག་ལག་སློབ་གྲྭའི་རིགས་བདག་གཅིག་ལྕོག་ལྕམ་སྐུ་ཨུར་མི་ལ་སིངྒ་མཆོག 
ཉེ་བའི་རིགས་བདག་མཆོག་བཅས་ཀྱིས་སྣང་གསལ་ཞལ་ཕྱེ་མཛད་པ་དང་སྦྲགས། སློབ་ཕྲུག་ཁག་གཅིག་གིས་ཤིས་བརྗོད་དང་གཙུག་ལག་སློབ་གྲྭའི་རིགས་ཀྱི་གླུ་དབྱངས་སུ་ལེན། དེ་ནས་༸གོང་ས་མཆོག་ལ་མངའ་སྡེའི་སྲིད་སྐྱོང་དང་གཙུག་ལག་སློབ་གྲྭའི་རིགས་བདག་གཅིག་ལྕོག་ལྕམ་སྐུ་ཨུར་མི་ལ་སིངྒ་ (Governor Urmila Singh) མཆོག་གིས་ཆེ་བསྟོད་ཀྱི་དབུ་ཞྭ་དང་གོས་གཟན་(Shawl) འབུལ་ལམ་ཞུས་པ་དང་བསྟུན། གཙུག་ལག་སློབ་གྲྭའི་བསླབ་པ་མཐར་སོན་གྱི་དགའ་སྟོན་མཛད་སྒོ་དངོས་གཞི་དབུ་འཛུགས་ཀྱིས་ཐོག་མར་ཉེ་བའི་རིགས་བདག་མཆོག་གིས་༸གོང་ས་མཆོག་ལ་མཁས་དབང་གི་ཕྱག་འཁྱེར་ (Doctor of Letters (D.Litt)འབུལ་ལམ་ཞུས།
དེ་ནས་མངའ་སྡེའི་སྲིད་སྐྱོང་མཆོག་གིས་གཙུག་ལག་སློབ་གྲྭའི་ཤེས་ཡོན་ཚན་པ་འདྲ་མིན་གྱི་ཐོག་གཟེངས་བསྟོད་བྱ་དགའ་གསོལ་རས་གནང་རྗེས་ཕྱི་ལོ་ ༢༠༡༣ ལོའི་གཙུག་ལག་སློབ་གྲྭའི་ཚན་རིག་དང་དབྱིན་སྐད། ལེགས་སྦྱར་སྐད་ཡིག སྒྱུ་རྩལ་སོགས་སློབ་མཚན་འདྲ་མིན་ཐོག་གཟེངས་སུ་ཐོན་པའི་སློབ་ཕྲུག་བཞི་བཅུ་ལྷག་ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་གིས་གསེར་གྱི་རྟགས་མ་གསོལ་རས་སྩལ།
དེ་ནས་གཙུག་ལག་སློབ་གྲྭའི་རིགས་བདག་དང་མངའ་སྡེའི་སྲིད་སྐྱོང་མཆོག་གིས་གསུང་བཤད་གནང་། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་མཛད་སྒོ་དང་འབྲེལ་བའི་བཀའ་སློབ་སྩལ་དོན། གཞོན་ནུའི་ཆ་ལུགས་འཆང་བ་པོ། ཤེས་རབ་སྒྲོན་མེ་རབ་གསལ་བ། འཇིག་རྟེན་གསུམ་གྱི་མུན་སེལ་བ། འཇམ་དཔལ་དབྱངས་ལ་ཕྱག་འཚལ་ལོ། ཤེས་རབ་ཀྱི་ལྷ་ལ་བསྟོད་པ་སྔོན་དུ་བཏང་ནས། ཧི་མ་ཅལ་མངའ་སྡེའི་གཙུག་ལག་སློབ་གྲྭ་བྱས་རྗེས་ངེས་ཅན་བཞག་གནང་མཁན་གྱི་མཐོ་སློབ་འདིའི་ནང་གི་སློབ་ཕྲུག་ཚོའི་མཐའ་མའི་ཡིག་རྒྱུགས་ཀྱི་བྱ་དགའ་བཞེས་སར་ངོས་རང་བཅར་ཐུབ་པ་ཧ་ཅང་དགའ་པོ་བྱུང་།
གཙུག་ལག་སློབ་གྲྭའི་གཙོ་འཛིན་མཆོག་གིས་ངོས་ལ་འདི་གར་སྐད་བཏང་བར་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་མངའ་སྡེའི་སྲིད་སྐྱོང་འདིར་ཕེབས་པ་ཐུགས་རྗེ་ཆེ་ཞུ་རྒྱུ་ཡིན། རྒྱ་གར་ནི་རིག་གཞུང་ཧ་ཅང་ཕྱུག་པའི་གནའ་རབས་ལོ་རྒྱུས་ལྡན་པའི་རྒྱལ་ཁབ་གཅིག་ཡིན། དེར་བརྟེན་དེང་སྐབས་ང་ཚོས་རྒྱ་གར་གྱི་སྲོལ་རྒྱུན་ནས་དར་བའི་རིག་གཞུང་ཕྱུག་པོ་དེ་དག་ལ་སློབ་སྦྱོང་བྱས་ནས་ཉིན་རེའི་འཚོ་བའི་ནང་བེད་སྤྱོད་ཐུབ་པ་བྱེད་དགོས་པ་མ་ཟད། ལྷག་པར་གཞོན་སྐྱེས་ཚོའི་དེང་དུས་ཤེས་ཡོན་དང་འབྲེལ་ནས་གནའ་རབས་ཀྱི་རིག་གཞུང་དེ་དག་ལ་ངེས་པར་དུ་སློབ་གཉེར་བྱེད་དགོས། ངོས་ལ་མཚོན་ན་རྒྱ་གར་གནའ་རབས་ཀྱི་རིག་གཞུང་ལ་སློབ་གཉེར་བྱས་ནས་ཉིན་རེའི་འཚོ་བའི་ནང་ཉམས་ལེན་བྱས་པ་བརྒྱུད་རང་ཉིད་ལ་མི་ཚེའི་ནང་དཀའ་ངལ་འཕྲད་སྐབས་ཕན་ཐོགས་ཧ་ཅང་ཡོང་བཞིན་འདུག དེར་བརྟེན་རྒྱ་གར་ནི་ང་ཚོའི་བླ་མ་དང་ང་ཚོ་ནི་རྒྱ་གར་གྱི་སློབ་མར་ངོས་འཛིན་ཞུ་བཞིན་ཡོད། ཕྱོགས་མཚུངས་རྒྱ་གར་ནི་མང་གཙོ་ཚད་མཐོ་ཡོད་པའི་རྒྱལ་ཁབ་གཅིག་ཆགས་ཡོད།
དེར་བརྟེན་རྒྱ་གར་གྱིས་འཛམ་གླིང་ཁྱོན་ཡོངས་ལ་ཞི་བདེ་དང་ཡར་རྒྱས། བརྟན་ལྷིང་གི་སྤྱི་ཚོགས་བསྐྲུན་རྒྱུར་མིག་དཔེ་འཇོག་ཐུབ་པ་བྱུང་ཡོད། ཅེས་སོགས་ཀྱི་བཀའ་སློབ་སྩལ་རྗེས་གཙུག་ལག་སློབ་གྲྭའི་ཉེ་བའི་རིགས་སྐུ་ཞབས་ཨེ་ཌི་བྷ་ཇི་པ་ཡི་མཆོག་གིས་ཐུགས་རྗེ་ཆེ་ཞུའི་གསུང་བཤད་གནང་བསྟུན་མཛད་སྒོ་ལེགས་པར་གྲུབ་མཚམས་༸གོང་ས་མཆོག་གིས་གཙུག་ལག་སློབ་གྲྭའི་ཚོགས་ཁང་ཞིག་ཏུ་གསར་འགོད་པ་ ༡༥ བརྒལ་བའི་དྲི་བར་བཀའ་ལན་སྩལ།
