༢༠༡༤ ཟླ་ ༣ ཚེས་ ༧ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༣ ཚེས་ ༦ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་གྲོས་ཚོགས་གོང་མས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་ཟབ་མོ་ཐོབ་སྟེ་མགོན་པོ་གང་ཉིད་མཆོག་གིས་ཨ་རིའི་གྲོས་ཚོགས་གོང་མའི་ཚོགས་ཁང་ནང་ཆིབས་སྒྱུར་བསྐྱངས་ཏེ་གྲོས་ཚོགས་ཀྱི་ཚོགས་འདུ་དབུ་འབྱེད་དང་འབྲེལ་ཐུགས་སྨོན་མཛད་འདུག དེ་ཡང་ཐོག་མར་གྲོས་ཚོགས་གོང་མའི་གྲངས་མང་ཆབ་སྲིད་ཚོགས་པའི་འགོ་ཁྲིད་སྐུ་ཞབས་ཧེ་རི་རེ་ཌི་་Harry Reidམཆོག་ནས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་གྲོས་ཚོགས་ཀྱི་ཚོགས་དུས་དབུ་འབྱེད་དང་ཐུགས་སྨོན་མཛད་སྐྱོང་ཡོང་བའི་གསོལ་འདེབས་ཞུས་རྗེས་མགོན་པོ་གང་ཉིད་མཆོག་གིས་ཐོག་མར་ངོས་ཀྱིས་རྒྱུན་དུ་དུ་རྗོད་བཞིན་ཡོད་པ་ལྟར། ངོས་རང་ནི་ནང་པའི་དགེ་སློང་དཀྱུས་མ་ཞིག་ཡིན། ངོས་ནས་སངས་རྒྱས་དང་དཀོན་མཆོག་གཞན་ཚོར་གསོལ་འདེབས་སྨོན་ལམ་ཞུ་རྒྱུ་ཡིན་ཞེས་ཐུགས་སྨོན་མཛད་དོན།
གང་གིས་ཐུགས་བརྩེས་ཉེར་བཟུང་ནས། །ལྟ་བ་ཐམས་ཅད་སྤང་པའི་ཕྱིར། །དམ་པའི་ཆོས་ནི་སྟོན་མཛད་པ། །གོོ་ཏམ་དེ་ལ་ཕྱག་འཚལ་ལོ། ། ཞེས་རྩ་བ་ཤེས་རབ་ཀྱི་ཚིག་བཅད་གསུང་འདོན་མཛད་རྗེས་མུ་མཐུད་ནས་སྨོན་ལམ་གསུང་འདོན་མཛད་དོན། ཆོས་རྣམས་ཡིད་ཀྱི་རང་བཞིན་ཏེ། །ཡིད་ནི་གཙོ་ཞིང་སྔོན་ལ་འགྲོ། །གལ་ཏེ་ཡིད་ནི་རབ་དང་བས། །སྨྲས་སམ་ཡང་ན་བྱས་ཀྱང་རུང་། །དེ་ལ་དེ་ཡི་བདེ་བ་འཐོབ། །གྲིབ་མ་ཡོལ་བར་མི་འགྱུར་བཞིན། ། ཞེས་དང་ཡང་༸གོང་ས་མཆོག་གིས་འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཕྱུགས་འཕེལ་བ། །དགེ་ལེགས་ཐམས་ཅད་འབྱུང་བའི་གནས། །ཡིད་ལ་འདོད་པ་ཀུན་འགྲུབ་ཤོག །ཇི་སྲིད་ནམ་མཁའ་གནས་པ་དང། །འགྲོ་བ་དེ་སྲིད་གནས་གྱུར་པ། །དེ་སྲིད་བདག་ནི་གནས་གྱུར་ནས། །འགྲོ་བའི་སྡུག་བསྔལ་སེལ་བར་ཤོག
བརྙན་འཕྲིན་གཟིགས་ཆེད་འདིར་གནོན།
ཅེས་གསུང་འདོན་མཛད་གྲུབ་མཚམས་དབྱིན་སྐད་ཐོག་བསྒྱུར་གནང་མཛད་པའི་ཡི་གེ་ལྗགས་ཀློག་མཛད་མཚམས་བཀའ་སློབ་སྩལ་དོན། འདི་ནི་ངོས་ཀྱིས་དུས་རྒྱུན་དུ་འདོན་རྒྱུའི་གསོལ་འདེབས་སྨོན་ལམ་ཞིག་ཡིན་ལ་སྨོན་ལམ་འདིས་འགྲོ་བ་མིའི་རིགས་ལ་ཞབས་འདེགས་ཞུ་རྒྱུར་ངོས་ཀྱི་སེམས་ལ་སྟོབས་ཤུགས་སྦྱིན་བཞིན་འདུག ཅེས་བཀའ་སློབ་ཕེབས་ཡོད། དེ་ནས་གྲོས་ཚོགས་གོང་མའི་ཚོགས་གཙོ་སྐུ་ཞབས་པི་ཊིག་ལི་ཧཱ་མཆོག་གིས་གསུང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་སྐུ་ཉིད་ནི་ནང་པའི་དགེ་སློང་དཀྱུས་ཤིག་ཡིན་སྐོར་ངོ་སྤྲོད་མཛད་བཞིན་ཡོད། འོན་ཀྱང་དངོས་ཡོད་གནས་སྟངས་ཐོག་ནས་ཞུས་ན། ༸གོང་ས་ཏཱ་ལའི་བླ་མ་མཆོག་ནི་བོད་མི་ཙམ་མ་ཟད། འཛམ་གླིང་སྤྱི་ཡོངས་ལ་བྱམས་བརྩེ་དང་ཞི་བདེ་ཁྱབ་སྤེལ་མཛད་མཁན་གྱི་སྐྱེས་ཆེན་ཞིག་ཏུ་ངོས་འཛིན་གྱིས་གུས་བཀུར་ཞུ་ཡུལ་ཞིག་ཡིན། ཐེངས་འདིའི་ཚོགས་འདུ་འདིར་༸གོང་ས་ཏཱ་ལའི་བླ་མ་མཆོག་ཆིབས་སྒྱུར་བསྐྱངས་ཏེ་བྱིན་གྱིས་བརླབས་པར་ངས་གྲོས་ཚོགས་ཀྱི་འཐུས་མི་ཚང་མའི་ཚབ་ཞུས་ཏེ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ཞེས་ཞུས་ཡོད། དེ་རྗེས་ལོ་མང་རིང་བོད་དོན་ལ་རྒྱབ་སྐྱོར་གནང་མཁན་གྲོས་ཚོགས་ཀྱི་འཐུས་མི་ཞིག་གིས་གསུང་དོན། ང་རང་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་ཡུན་རིང་ནས་འདྲིས་འབྲེལ་ཆེན་པོ་ཡོད། ༸གོང་ས་ཏཱ་ལའི་བླ་མ་མཆོག་གིས་འགྲོ་བ་ཡོངས་ལ་ཕན་ཐོགས་ཡོང་ཆེད་འཛམ་གླིང་ཞི་བདེ་དང་བྱམས་སྙིང་རྗེ་སོགས་ཀྱི་མཛད་འཕྲིན་བསྐྱངས་དང་སྐྱོང་མུས་ལ་སྐྱེ་འགྲོ་ཀུན་གྱིས་གུས་བཀུར་ཞུ་བཞིན་ཡོད། དེ་བཞིན་བོད་ནང་གི་བོད་མིས་རང་ཉིད་ཀྱི་མངོན་འདོད་སྒྲུབ་ཆེད་སྐུ་ཉིད་མཆོག་ལ་རེ་འདུན་ཆེན་པོ་བཅང་གི་ཡོད། ཅེས་སོགས་ཞུས་འདུག དེ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་གྲོས་ཚོགས་ཀྱི་གྲོས་འཆར་ཁག་འགོ་མ་བཙུགས་བར་གཟིགས་ཞིབ་མཛད་ཡོད། དེ་བཞིན་གྲོས་ཚོགས་ཀྱི་འཐུས་མི་ཚོས་མགོན་པོ་གང་ཉིད་མཆོག་ལ་འཚམས་འདྲི་དང་ཆེ་བསྟོད་མཚོན་ཆེད་ཚོགས་འདུ་བར་གསེང་བཞག་འདུག་པ་བཅས། །
