༢༠༡༤ ཟླ་ ༣ ཚེས་ ༡ རེས་གཟའ་སྤེན་པ།
༄༅། ཕྱི་ལོ་ ༢༠༡༤ ཟླ་ ༢ ཚེས་ ༢༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉིན་དེའི་སྔ་དྲོར་ལོ་སི་ཨན་ཇེ་ལི་སི་ཁུལ་གྱི་ས་གནས་བོད་རིགས་སྤྱི་མཐུན་ཚོགས་པའི་རྒྱུན་ལས་དང་བདེ་སྲུང་མི་སྣ་བཅས་ལ་མཇལ་ཁ་སྩལ་རྗེས་༸གོང་ས་མཆོག་ཚོགས་ཁང་དུ་༸ཞབས་སོར་མཁོད་བསྟུན་ས་གནས་བོད་རིགས་སྤྱི་མཐུན་
ཚོགས་པའི་ཁོངས་སུ་ཡོད་པའི་བོད་ཡིག་འཛིན་གྲྭའི་སློབ་མ་རྣམས་ཀྱིས་ཕེབས་བསུའི་དགའ་སྟོན་གླུ་དབྱངས་འབུལ་ལམ་ཞུས་ཡོད། ལྷོ་ཁལ་ལི་ཕོར་ནི་ཡའི་གྲོང་ཁྱེར་ལོ་སི་ཨན་ཇེ་ལི་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་བསྟན་འཛིན་རྡོ་རྗེ་ལགས་ནས་༸གོང་ས་སྐྱབས་མགོན་ཆེན་པོ་མཆོག་ལ་ཆེ་བསྟོད་ཀྱི་ཕེབས་བསུ་གཟབ་རྒྱས་ཞུས་རྗེས་༸གོང་ས་མཆོག་གིས་བཀའ་སློབ་སྩལ་དོན། ཁྱེད་རང་ཚོ་ཚང་མས་ཤེས་གསལ་རེད། ངོས་ཀྱི་ལོ་མང་པོ་ནས་ངོ་ཤེས་པའི་གྲོགས་པོ་དེ་ཚོ་ཐུགས་རྒྱུའི་གོ་སྐབས་བྱུང་བར་དགའ་བོ་བྱུང་། ཁྱེད་རང་ཚོ་མང་པོ་ཞིག་རྒད་པོ་རྒད་མོ་ཆགས་ཏེ་མི་ཚེ་མང་བ་རྫོགས་ཟིན་པ་ལྟ་བུ་རེད། ངོས་ལ་ཆ་བཞག་ན། ཐོག་མར་བཙན་བྱོལ་དུ་འབྱོར་སྐབས་ལོ་ཉི་ཤུ་རྩ་བཞི་རེད། ད་ལོ་ ༧༩ འགྲོ་བཞིན་ཡོད། ང་ཚོ་ཚང་མ་རྒས་འགྲོ་ཡི་ཡོད། བོད་མིགས་ཀྱི་མི་རབས་འདི་བོད་ཀྱི་ལོ་རྒྱུས་ནང་གཉེན་འཕྲང་ཆེ་བའི་དུས་སྐབས་འདིར་ཞབས་འདེགས་གང་ཙམ་སྒྲུབ་ཡོད། འོན་ཀྱང་གཞིས་ལུས་རྒྱ་ཆེའི་མི་མང་མི་རབས་བརྗེ་འགྲོ་གི་ཡོད་ནའང་། བོད་མི་རིགས་ཀྱི་ལ་ཞེན་གྱིས་གཙོས་སེམས་ཤུགས་དང་། ཆོས་དང་སྐད་ཡིག དེ་བཞིན་སོ་སོའི་རིག་གཞུང་ལ་གཅེས་ཞེན་བྱེད་རྒྱུ་འགྱུར་བ་མེད་པར་མི་རབས་ནས་མི་རབས་མར་རྒྱུན་འཛིན་བྱེད་བཞིན་པ་ཧ་ལས་པ་རེད་འདུག
ཆོས་ཚོགས་ཁག་ཡོད་པ་དེ་དག་གི་ཧུར་ཐག་བྱེད་ཀྱི་ཡོད། ཐུགས་རྗེ་ཆེ་ཟེར་གྱི་ཡིན། གཟབ་གཟབ་དང་སྤུས་དག་པོ་བྱེད་རྒྱུ་གལ་ཆེན་པོ་རེད། ཆོས་ཚོགས་ཀྱི་མིང་འཁྱེར་ནས་དངུལ་བསྡུ་གསོག་རྒྱག་རྒྱུ་འདྲ་པོ་བྱས་པ་ཡིན་ན་ཡག་པོ་མེད། ད་ལྟ་ངོས་ཀྱི་བཤད་མ་ཐག་པ་བཞིན་ཆོས་ཚོགས་ཚོ་སངས་རྒྱས་ཀྱི་གཞུང་ནང་འཛམ་གླིང་སྤྱི་ལ་ཕན་པའི་སེམས་ཁམས་རིག་པའི་སྐོར་ཕྱུག་པོ་ཞེ་དྲག་ཡོད་པ་དེ་དག་ཆོས་ཚོགས་གང་དུ་ཡོད་ནའང་འདོན་པ་བཏོན་རྒྱུ་དང་། སྒོམ་རྒྱག་རྒྱུ་ཙམ་མིན་པར་ཆོས་པས་སངས་རྒྱས་ཀྱི་ཆོས་ངོ་སྤྲོད་བྱ་རྒྱུ་དང་འབྲེལ་བའི་སྒོམ་རྒྱག་རྒྱུ་སོགས་བྱས་ན་འགྲིག་པ་རེད། ཆོས་ཆོགས་དེ་ཚོས་མི་སྤྱི་ལ་ཕན་ཐོགས་ཡོང་རྒྱུ་དང་། སངས་རྒྱས་པའི་གཞུང་ནང་ནས་སེམས་ཁམས་རིགས་པའི་སྐོར་ཡོད་པ་དེ་དག་ཕར་ཚུར་བགྲོ་གླེང་བྱེད་རྒྱུ་སོགས་འཛིན་གྲྭའི་རྣམ་པ་འདྲ་བོ་བྱས་ཏེ་འཚོགས་ནས་ཤེས་ཡོན་གྱི་བསྟི་གནས་ཀྱི་རྣམ་འགྱུར་ཐོན་ཐུབ་པ་བྱ་རྒྱུ་ཧ་ཅང་གལ་ཆེན་པོ་རེད། དེ་ལ་བོད་པའི་བསྟི་གནས་ Centre གཅིག་ཡོད་རེད་ཟེར་ནས་སྨོན་ལམ་རྒྱག་མཁན་ཚོ་ཕྱིན་ནས་དགེ་འདུན་པ་ཚོའི་མཉམ་དུ་ཆུ་ཚོད་བཅུ་གཉིས་བར་བསྡད་པ་ཙམ་མིན་པར་ཆོས་དད་ཡོད་མཁན་ཚོ་ལ་དགོས་མཁོ་གྲུབ་སྟངས་དང་། དམིགས་བསལ་ཆོས་དད་མེད་ནའང་སེམས་ཁམས་རིག་པའི་སྐོར་དོ་སྣང་ཡོད་མཁན་ཚོར་དེ་དང་འབྲེལ་བའི་ཤེས་ཡོན་རང་གི་འདུ་ཤེས་ཐོག་ནས་བགྲོ་གླེང་དང་གོ་བསྡུར་བྱེད་རྒྱུའི་ཆ་རྐྱེན་དང་ངོ་བོ་ཡོད་པ་འདྲ་བོ་རེད། དེ་ངེས་པར་དུ་ཁྱེད་རང་ཚོའི་དགོངས་པར་འཇགས། མཁྱེན་སོང་ངམ། འདི་གཅིག་ལབ་འདོད་བྱུང་།
རྒྱ་མི་རིགས་དགྲ་བཟོ་པ་ལས་གཉེན་དུ་བཀུག་ཐུབ་པ་བྱུང་ན་ཡག་གི་རེད། ད་བར་ང་ཚོས་དབུ་མའི་ལམ་དུ་ཕྱིན་པའི་དབང་གི་རྒྱ་རིགས་ནང་པ་ཚོ་ལྟ་ཅི་སྨོས། ཤེས་ཡོན་ཅན། རིག་རྩལ་བ། དེ་བཞིན་ལས་བྱེད་རྒས་ཡོལ་ཐོན་པ་མང་པོ་ཞིག་གི་རྒྱ་ནག་གཞུང་གི་ནོར་གྱི་འདུག བོད་པས་ཐོག་ནས་བསམ་བློ་དེ་གཉིས་ཕན་ཅན་གྱི་བསམ་བློ་རེད་འདུག་ཟེར་ནས་རྒྱབ་སྐྱོར་བྱེད་མཁན་མང་པོ་ཡོང་གིའདུག འདས་པའི་ལོ་གཉིས་གསུམ་གྱི་ནང་རྒྱ་ཡིག་ནང་བོད་ཀྱི་གནས་ཚུལ་རྩོམ་ཡིག་བྲིས་པ་སྟོང་ཕྲག་གཅིག་ལྷག་ཡོད། དེ་དག་ཚང་མས་ང་ཚོའི་དབུ་མའི་ལམ་ལ་རྒྱབ་སྐྱོར་བྱེད་ཀྱི་འདུག རྒྱ་ནག་གཞུང་གིས་མི་རིགས་སྲིད་བྱུས་སྤྱི་དང་། ལྷག་པར་བོད་ཀྱི་ཐོག་འཛིན་པའི་སྲིད་བྱུས་ལ་རྩོམ་ཡིག་སྟོང་ཕྲག་གཅིག་ཙམ་ཡོད་པ་ཚང་མས་སྐྱོན་བརྗོད་བྱས་ཡོད། དེ་དག་བྲིས་མཁན་རྒྱ་རིགས་རེད། རྒྱ་ནག་ནང་ནས་བྲིས་མཁན་མང་པོ་བྱུང་འདུག་ལ་ཕྱིར་སྡོད་རྒྱ་མི་ནང་ནས་བྲིས་མཁན་མང་པོ་བྱུང་འདུག དེ་དག་གཉིས་ཕན་ཞེས་པའི་ལམ་དེའི་ཐོག་ནས་སྒྲུབ་འབྲས་ཐོན་ཡོང་གི་ཡོད་རེད། རྒྱ་ནག་འགོ་ཁྲིད་ཚོའི་ནང་ནས་དངོས་ཐོག་བདེན་འཚོལ་ཞེས་པའི་ལམ་དེའི་ཐོག་བསམ་བློ་གཏོང་མཁན་དེ་ཚོས་ང་ཚོའི་འགྲོ་སྟངས་དེའི་ཐོག་གུ་ཡངས་ཤིག་མ་བྱས་ན་འགྲིག་རྒྱུ་མེད་པའི་གནས་ཚུལ་ཡོང་གིཡོད། ཚོད་ཐིག་པོའི་ཐོག་ནས་ལམ་སེང་འགྱུར་བ་དེ་འདྲ་ཡོང་གི་རེད་ཅེས་ཤོད་རྒྱུ་ཧ་ཅང་ཁག་པོ་རེད། ཡིན་ནའང་རིམ་པས་འགྱུར་བ་ཅིག་གཙོ་ཆེ་ཤོས་མི་མང་ནང་ནས་ང་ཚོར་རྒྱབ་སྐྱོར་དང་། གདུང་སེམས་མཉམ་སྐྱེ། ཤ་ཚ་བྱེད་མཁན་མང་པོ་ཞིག་ཐོན་ཡོང་དུས་ཤུགས་རྐྱེན་ཞིག་ཐེབས་ཀྱི་རེད། དེ་གལ་ཆེན་པོ་རེད་འདུག
དེ་ནས་ཁྱེད་ཚོ་ཀྱང་བོད་སྤྱི་པའི་དོན་དག་མ་བརྗེད་པ་བྱེད་དགོས། གཞོན་སྐྱེས་ཚོས་ཤེས་ཡོན་ཐོག་དོ་སྣང་བྱེད་རྒྱུ་ཧ་ཅང་གལ་ཆེན་པོ་རེད། འདི་གར་ཚོང་ལས་བྱེད་མཁན་ཚོས་ག་ལེར་ millioner ཆུང་ཆུང་དེ་འདྲ་བྱེད་ཐུབ་ཀྱི་འདུག་ན་ཡིན་གཅིག་མིན་གཅིག་བཟོ་དགོས། མཁྱེན་སོང་ངམ། Billioner བཟོ་ཐུབ་རྒྱུ་ཁག་པོ་ཞེ་དྲག་རེད། དེ་སྔ་བོད་ནང་ར་དཔོན་ཚ་གསུམ་ཟེར་ནས་རྭ་སྒྲེང། དཔོན་ཟླ་ཚང། ཚ་རོང་བྱས་ནས་ཕྱིས་སུ་ས་འདུ་ཚང། ཁོ་ཚོ་ཞིང་པ་ཙམ་མིན་པར་ཚོང་གི་ལས་ཀའི་ཐོག་ནས་འབྱོར་ལྡན་བྱུང་པ་རེད། ང་ཚོར་དཔལ་འབྱོར་དགོས་ཀྱི་ཡོད། དཔལ་འབྱོར་མེད་ན་འགྲིག་ཐབས་མེད། བོད་ནང་ཡིན་ནའང་རེད། འདི་ག་ཚུར་ཡིན་ནའང་རེད། དཔའ་འབྱོར་ཕྲན་བུ་བྱུང་བ་ཡིན་ན། སོར་གདུབ་དང་རྒྱན་ཆ་འདྲ་མིན་གྱོན། སྡུག་ས་ནས་བཤད་པ་ཡིན་ན། ཆང་ཨ་རག་ཚོད་མེད་འཐུང་། ཤོ་སོགས་རྒྱན་རིགས་ཀྱི་རྩེད་མོ་ཚོད་མེད་རྩེ་བ་སོགས་བྱས་ན་ཕན་མེད་རེད། མཁྱེན་སོང་ངམ། དངུལ་བཟོ་དགོས་རེད། བར་སྐབས་སུད་སི་སོགས་ཕྱི་རྒྱལ་དུ་ཡོད་པའི་བོད་རིགས་ཁག་གཅིག་གིས་བོད་ནང་སོ་སོའི་གྲོང་གསེབ་ས་ཁུལ་དུ་སློབ་གྲྭ་ཆུང་ཆུང་དེ་འདྲ་འཛུགས་རྒྱུ་སོགས་ལས་ཀ་ཕྲན་བུ་བྱེད་ཀྱི་འདུག དེ་བཞིན་དགོན་པ་དེ་འདྲའི་ནང་སྨན་ཁང་བཙུགས་ནས་བོད་སྨན་དང་རྒྱ་སྨན་གཉིས་ཀ་ཡོད་པའི་ལས་ཀ་དེ་འདྲ་བྱེད་ཀྱི་འདུག དེ་དག་དཔེ་མི་སྲིད་པའི་གལ་ཆེན་པོ་རེད།ཅེསདང་དེ་བཞིན་བོད་མི་རྣམས་ཀྱིས་རང་གི་ཆོས་དང་རིག་གཞུང་ལ་དོ་སྣང་དགོས་པ་དང་། བོད་མི་རིགས་ཀྱི་འགན་དེ་ཚང་མ་འཁྱེར་དགོས་པའི་སྐོར་བཀའ་སློབ་སོགས་སྩལ།
