༢༠༡༤ ཟླ་ ༣ ཚེས་ ༥ རེས་གཟའ་ལྷག་པ།
༄༅། །བོད་རྒྱལ་ལོ་ ༢༡༤༡ བོད་ཟླ་ ༡ ཚེས་ ༡ དང་ཕྱི་ལོ་ ༢༠༡༤ ཟླ་ ༣ ཚེས་ ༢ བོད་ཀྱི་ལོ་གསར་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བྱང་ཨ་རིའི་ཁུལ་དུ་བོད་རིགས་གནས་སྡོད་བྱེད་ས་མང་ཤོས་ཨང་གཉིས་པ་ཡིན་པ་མི་ནོ་སོ་ཊའི་བོད་རིགས་སྤྱི་མཐུན་ཚོགས་པས་གོ་སྒྲིག་གནང་བའི་བོད་ཀྱི་ལོ་གསར་དགའ་སྟོན་གྱི་མཛད་སྒོར་དབུ་བཞུགས་དང་བཀའ་སློབ། ཆོས་འབྲེལ་སོགས་བཀའ་དྲིན་ཆེ་བ་སྩལ་ཡོད། དེ་ཡང་༸གོང་ས་༸སྐྱབས་མགོན་ཆེན་པོ་མཆོག་གི་ཨ་མི་རི་ཀའི་ནུབ་ཕྱོགས་ཁལ་ལི་ཕོར་ནི་ཡའི་ཁུལ་གྱི་མཛད་འཕྲིན་ཁག་ལེགས་པར་གྲུབ་སྟེ། ཕྱི་ཟླ་ ༢ ཚེས་ ༢༨ ཉིན་ཨ་རིའི་མངའ་སྡེ་མི་ནི་སོ་ཊའི་གྲོང་ཁྱེར་མི་ནི་ཡ་པོ་ལི་སི་ཁུལ་དུ་༸ཞབས་སོར་བདེ་བར་འཁོད་ཡོད་ཅིང་། སྐབས་དེར་ས་གནས་བོད་རིགས་སྤྱི་མཐུན་ཚོགས་པའི་རྒྱུན་ལས་རྣམ་པས་གཙོས་སེར་སྐྱ་མི་མང་རྣམས་ནས་དགའ་དད་སྤྲོ་གསུམ་གྱིས་ཕེབས་བསུ་གཟབ་རྒྱས་ཞུས་ཡོད།
བོད་ཀྱི་ལོ་གསར་ཚེས་གཅིག་ཉིན་ཏེ་ཕྱི་ཚེས་ ༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མི་ནི་སོ་ཊའི་ནང་རྟེན་གཞི་བྱས་པའི་ཨོག་སི་བུག་ Augsburg College ཞེས་པའི་མཐོ་སློབ་ཀྱི་ཚོགས་ཁང་ཆེན་མོའི་ནང་དུ་ས་གནས་བོད་རིགས་སྤྱི་མཐུན་ཚོགས་པས་གོ་སྒྲིག་ཞུས་པའི་ལོ་གསར་གྱི་དགྱེས་སྟོན་མཛད་སྒོའི་སྐུ་མགྲོན་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་དང་། མངའ་སྡེའི་གྲོས་ཚོགས་དང་ས་གནས་ཀྱི་འཐུས་མི་རྣམ་པ། སློབ་གྲྭ་ཁག་གི་སློབ་སྤྱི་རྣམ་པ། ཨཀྱཱ་རིན་པོ་ཆེ་མཆོག ས་གནས་བོད་རིགས་སྤྱི་མཐུན་ཚོགས་པ་ཁག་སུམ་ཅུའི་ཚོགས་གཙོ་རྣམ་པ་སོགས་དང་དེ་བཞིན་བོད་རིགས་མི་མང་བཅས་ཁྱོན་མི་གྲངས་ ༢༥༠༠ བརྒལ་བ་ལྷན་འཛོམས་ཐོག་སྐུ་མགྲོན་གྱི་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸ཞབས་སོར་འཁོད་སྐབས་ཚོགས་ཁང་མདུན་དུ་རང་ལུགས་ན་བཟའ་གཟབ་མཆོར་སྤྲད་པའི་རང་རིགས་གཞོན་སྐྱེས་ཕོ་མོ་གཉིས་ནས་ཕྱེ་མར་དང་ཆང་ཕུད་འདེགས་འབུལ་དང་། ཕེབས་བསུའི་རྒྱལ་གཞས་དང་བཀྲ་ཤིས་ཞོལ་པ། གར་ཕྲུག་པའི་གར་བཅས་འཁྲབ་སྟོན་གྱི་ལམ་ནས་ཕེབས་བསུ་གཟབ་རྒྱས་ཞུས་ཏེ་ལོ་གསར་དགའ་སྟོན་གྱི་མཛད་སྒོའི་དབུ་བཞུགས་ཀྱི་བཞུགས་ཁྲི་རིན་པོ་ཆེར་འཁོད་རྗེས་བོད་རིགས་སྤྱི་མཐུན་ཚོགས་པའི་ཚོགས་གཙོ་རྣམ་རྒྱལ་རྡོ་རྗེ་ལགས་ཀྱིས་ཕེབས་བསུའི་གསུང་བཤད་དང་བཀའ་དྲིན་རྗེས་དྲན་མཚོན་སླད་གསོལ་འདེབས་ཤིག་གོ་སྒྲིག་ཞུས་ཡོད་པ་སྒྲོགས་སྦྱང་ཞུས་གྲུབ་རྗེས་སྤྱི་མཐུན་ཚོགས་པའི་རྒྱུན་ལས་རྣམ་པས་དཀར་གཙང་མཇལ་དར་འདེགས་འབུལ་དང་དེ་ནས་བྱང་ཨ་རིའི་སྤྱི་འཐུས་རྣམ་པ་གཉིས་ཀྱི་བཀའ་དྲིན་གཏང་རག་གི་མཎྜལ་འདེགས་འབུལ་ཞུས་ཡོད་པ་མ་ཟད། གྲོང་ཁྱེར་སྤྱི་ཁྱབ་པས་ཉིན་དེ་ནི་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་ཞི་བདེ་དང་བྱམས་བརྩེའི་ཉིན་མོར་སྲུང་བརྩི་ཞུ་རྒྱུའི་གཞུང་འབྲེལ་གྱི་གསལ་བསྒྲགས་སྤེལ་ཡོད།
ལོ་གསར་དགྱེས་སྟོན་དེའི་སྟེང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཕྱི་ནང་གཉིས་སུ་གནས་པའི་བོད་མི་ཡོངས་དང་བོད་དོན་ལ་ལྷག་བསམ་རྣམ་དག་གིས་རྒྱབ་སྐྱོར་གནང་མཁན་ཡོངས་ལ་རབ་བྱུང་ ༡༧ པའི་ཤིང་རྟ་ལོའི་གནམ་ལོ་གསར་ཚེས་ལ་བཀྲ་ཤིས་བདེ་ལེགས་ཀྱི་འཚམས་འདྲི་མཛད་དོན། དེ་རིང་འདི་གར་ང་ཚོ་བོད་རིགས་རྣམས་ཀྱིས་དམངས་གཙོའི་ལམ་ནས་འོས་བསྡུ་བྱས་ཏེ་སྤྱི་མོས་ཐོག་ནས་ཕེབས་པའི་སྲིད་སྐྱོང་བློ་བཟང་སེང་གེ་ལགས་ཀྱིས་དབུས་བོད་མི་སྤྱི་དང་ས་གནས་ཀྱི་འཐུས་མི་རྣམ་པ། དགེ་འདུན་རྣམ་པ། སེར་སྐྱ་མི་དམངས་རྒན་བྱིས་ལྷན་འཛོམས་བྱུང་བ་རྣམས། ད་རེས་དམིགས་བསལ་བོད་དོན་ལ་ཤ་ཚ་དང་བདེན་དོན་ལ་རྒྱབ་སྐྱོར་ཆེད་ལྷག་བསམ་དང་སྙིང་སྟོབས་ཀྱི་ཐོག་ནས་འདི་གར་ཆེད་མངགས་ཕེབས་པའི་ཨ་རིའི་གྲོས་ཚོགས་འཐུས་མི་རྣམ་པ་དང་གྲོང་ཁྱེར་སྤྱི་ཁྱབ་རྣམ་པ་ཕེབས་པ་ཙམ་དུ་མ་ཟད་གསུང་བཤད་གནང་བ་དང་།
དེ་རིང་ནི་གྲོང་ཁྱེར་འདིའི་ཞི་བདེའི་ཉིན་མོར་གསལ་བསྒྲགས་གནང་བ་བཅས་ལ་ཐུགས་རྗེ་ཆེ་ཞུ་རྒྱུ་ཡིན། ང་ཚོ་འདིར་འཛོམས་པའི་སེར་སྐྱ་ཕོ་མོ་ཙམ་མ་ཟད་འཛམ་གླིང་རང་དབང་ལུང་པའི་ནང་བོད་མི་རྣམས་བཙན་བྱོལ་བ་བྱས་ཏེ་ཁ་ཐོར་ཏེ་གནས་ཡོད། དེ་དག་ཚང་མར་ལོ་གསར་ལ་འཚམས་འདྲི་ཞུ་གི་ཡོད། དེ་བཞིན་བོད་ནང་གི་བོད་མི་ཚོ་བཅས་གང་ལྟར་བོད་མི་སྤྱི་བོ་གནམ་བསྟན་ཡོངས་ལ་ད་རེས་གོ་སྐབས་འདི་བཟུང་ནས་འཚམས་འདྲི་ཞུ་བཞིན་ཡོད། ཅེས་བཀའ་སློབ་ཕེབས་ཡོད་པ་མ་ཟད་བོད་མི་རིགས་ལ་འཛམ་གླིང་སྤྱི་ལ་ཞབས་ཞུ་ཐུབ་པའི་གཅེས་ནོར་ཞིག་ཡོད། ཅེས་བཀའ་སློབ་ཕེབས་དོན། ང་ཚོ་བོད་མིའམ་བོད་གངས་ཅན་པ་ཞེས་པ་འདི་གྲངས་ཀྱི་ཆ་ནས་མང་པོ་གང་ཡང་མ་རེད། ས་ཡ་དྲུག་བདུན་ཙམ་རེད།
འོན་ཀྱང་ང་ཚོར་ཟུར་གསལ་གྱི་ཡི་གེ་ཡོད་པ་དང་ཡི་གེ་འདིའི་ཐོག་དེ་རིང་ཁ་སང་དངོས་ཡོད་གནས་ཚུལ་ལ་སངས་རྒྱས་པའི་ཆོས་འདི་འཛམ་གླིང་འདིའི་སྟེང་གི་ཆོས་ལུགས་གཙོ་ཆེ་བ་ཞིག་ཆགས་ཡོད། འཛམ་གླིང་འདིའི་སྟེང་ཆོས་བརྒྱུད་ལྟ་གྲུབ་མི་འདྲ་བ་གང་ཙམ་ཡོད་པ་དེ་དག་ཚང་མས་བྱམས་པ་དང་བརྩེ་བ། བཟོད་པ། ཆོག་ཤེས། རང་ཁྲིམས་སྲུང་རྒྱུ། དེ་ལྟར་ཆོས་ལུགས་ཚང་མར་ལྟ་གྲུབ་མི་འདྲ་བ་ཡོད་ཀྱང་བསླབ་བྱ་གཅིག་པ་ཡོད། ལྟ་གྲུབ་ཀྱི་ཆ་ནས་སངས་རྒྱས་པའི་ཆོས་འདིས་གཙོ་བོ་རྒྱུ་མཚན་ལ་བསམ་བློ་གཏོང་རྒྱུ་དེ་གལ་ཆེན་པོ་རྩི་བཞིན་ཡོད། བཅོམ་ལྡན་འདས་རང་ཉིད་ཀྱིས་རྒྱུ་མཚན་ལ་བརྟེན་ནས་མངོན་མཐོ་དང་ངེས་ལེགས་ཀྱི་གོ་འཕང་ཞིག་ཡོད་པ་དང་། དེ་སྒྲུབ་རྒྱུར་སེམས་རྒྱུད་ཀྱིས་གནས་སྐབས་དང་མཐར་ཐུག་གི་རྨོངས་པ་དང་མ་རིག་པ། ཆོས་རབ་ཏུ་འབྱེད་པའི་རྣམ་དཔྱོད་ཀྱི་ཤེས་རབ་ཐོག་ནས་སེལ་རྒྱུའི་གནས་སྐབས་མངོན་མཐོ་དང་མཐར་ཐུག་ངེས་ལེགས་བསྒྲུབ་རྒྱུ་དེ་འདྲ་གསུངས་ཡོད།
དེར་བརྟེན་རྨོངས་པའི་མུན་པ་སེལ་བརྗོད་རྒྱུ་དེ་ཆོས་རབ་ཏུ་འབྱེད་པའི་རྣམ་དཔྱོད་ཀྱིས་སེལ་རྒྱུ་ཞིག་རེད་མ་གཏོགས་དད་པ་དང་འདུན་པ་གཅིག་པུས་སེལ་ཐུབ་རྒྱུ་ཞིག་མེད། དེ་འདྲའི་ཆོས་བརྒྱུད་གཅིག་ཆགས་ཡོད་པར་སོང་དེ་རིང་ཁ་སང་འཛམ་གླིང་འདིའི་སྟེང་སངས་རྒྱས་པའི་ཆོས་ལ་དོ་སྣང་བྱེད་མཁན་ཇེ་མང་ཇེ་མང་འགྲོ་བཞིན་ཡོད། དེ་ལྟ་བུའི་དུས་ཚོད་འདིར་ང་ཚོ་བོད་མིའི་ཡི་གེའི་ནང་སངས་རྒྱས་པའི་ལྟ་གྲུབ་སྐོར་འགྲེལ་བཤད་དཔལ་ནཱ་ལེནྡའི་མཁས་པ་ཚོའི་དགོངས་པར་ཡོད་པ་ཆ་ཚང་ཞིག་ང་ཚོ་བོད་པའི་སྐད་ནང་འགྲེལ་བརྗོད་རྒྱག་ཐུབ་རྒྱུ་ཞིག་འདུག དེ་རིང་ཁ་སང་འཛམ་གླིང་འདིའི་སྟེང་སྐད་ཡིག་བརྒྱ་ཕྲག་སྟོང་ཕྲག་ཡོད་པར་དཔལ་ནཱ་ ལེནྡའི་ཆོས་བརྒྱུད་སྤྱི་དང་ལྟ་གྲུབ་སྐོར་གོ་བ་དཔྱིས་ཕྱིན་པའི་ཐོག་ནས་འགྲེལ་བཤད་རྒྱག་ཐུབ་མཁན་དེ་བོད་ཀྱི་སྐད་ཡིག་གཅིག་པུ་མ་གཏོགས་གཞན་གཅིག་ཀྱང་མི་འདུག་པ་དེ་ནི་ང་ཚོ་བོད་མི་རིགས་ལ་སྤོབས་སེམས་སྐྱེ་འོས་པ་ཞིག་རེད་འདུག ང་ཚོའི་མི་རིགས་ཀྱི་བླ་སྲོག་ལྟ་བུ་དེ་ཡང་སངས་རྒྱས་པའི་ཆོས་ཀྱི་ཐོག་ནས་སེམས་པ་བཟང་པོ་དང་། དྲང་པོ། རྒྱུ་འབྲས་དཔང་འཕེར་བྱེད་དགོས་རྒྱུ་དེ་དག་སངས་རྒྱས་པའི་ཆོས་ཀྱི་བསླབ་བྱ་ང་ཚོའི་བོད་ལ་བསླེབས་རྗེས་བོད་པའི་སྤྱི་ཚོགས་ཀྱི་གོམས་གཤིས་དེ་སེམས་པ་བཟང་པོ་བྱེད་དགོས་རྒྱུ་དང་འབུ་སྲིན་ཚུན་ཆད་ཀྱི་སྲོག་ལ་འཚེ་བ་མི་བྱེད་རྒྱུ་དེ་ང་ཚོ་བོད་པའི་གོམས་གཤིས་ལ་ཡོད།
ཅེས་དང་ཡང་༸གོང་ས་མཆོག་གིས་བཀའ་སློབ་ཕེབས་པའི་ནང་། བོད་གཞིས་བྱེས་གཉིས་སུ་གནས་པའི་བོད་རིགས་ཤིག་ཡིན་ཕྱིན་ཆད་ང་ཚོར་སྐད་ཡིག་གཅིག་ལོགས་སུ་ཡོད་པ་དང་སྐད་ཡིག་དེའི་ནང་སངས་རྒྱས་པའི་ཆོས་སྤྱིི་དང་ལྷག་པར་ལྟ་གྲུབ་སྐོར་ལ་འགྲེལ་བརྗོད་ཆ་ཚང་བ་ཞིག་བྱེད་རྒྱུའི་སྐད་ཡིག་གཅིག་འཛམ་གླིང་འདིའི་སྟེང་ཡོད་པ་དེ་བོད་པའི་སྐད་ཡིག་འདི་ཁོ་ན་ཡིན་པ་ཤེས་པ་བྱས་ཏེ། དེ་ལྟ་བུའི་སྐད་ཡིག་ལོངས་སུ་སྤྱོད་མཁན་ང་ཚོ་བོད་རིགས་ཡིན་པ་སྤོབས་སེམས་བྱེད་རྒྱུ་ཞིག་དང་། དཀའ་ངལ་གང་འདྲ་ཞིག་འཕྲད་ཀྱང་ཞུམ་པ་མེད་པར་བདེན་པའི་ལམ་ནས་སེལ་ཐུབ་རྒྱུར་ང་ཚོར་རྒྱུ་མཚན་ཡོད་པར་སོང་སེམས་ཤུགས་མ་ཉམས་པ་བྱེད་རྒྱུ་ཧ་ཅང་གལ་ཆེན་པོ་ཡིན། ང་ཚོ་ཐོག་མར་བཙན་བྱོལ་བ་ཆགས་སྐབས་ངོ་ཤེས་པ་གནམ་དང་ས་ལྟ་བུ་རེད། ཐོག་མར་མི་མང་མང་པོ་ཞིག་མི་ས་མ་རིར་འབྱོར་བ་དང་ང་ཚོ་མ་སུ་རིར་འབྱོར་བ་རེད། དེ་དུས་ལོ་བཞི་བཅུ་ལྔ་བཅུ་ཕྱིན་རྗེས་གང་འདྲ་ཞིག་ཡོང་དང་མི་ཡོང་ལྐོག་འགྱུར་ཡིན་པར་སོང་ད་གང་འདྲ་ཞིག་བྱས་ཡོང་ངམ་སྙམ་ཏེ་དངངས་སྐྲག་བྱེད་དགོས་རྒྱུ་ཞིག་རེད།
འོན་ཀྱང་ང་ཚོར་བདེན་པ་ཡོད་པར་སོང་བདེན་པའི་ནུས་པ་ཞེས་པ་དེ་ལོ་མང་པོ་ཕྱིན་རྗེས་ཡལ་འགྲོ་རྒྱུ་དང་ཟུབ་འགྲོ་རྒྱུ་ཞིག་མེད། དྲག་སྤྱོད་ཐོག་ནས་ལས་འགུལ་གང་འདྲ་ཞིག་བྱུང་ཡང་དེར་འཕྲལ་སེལ་ནུས་པ་ཆེན་པོ་ཡོད་པ་རེད་མ་གཏོགས་ཕུགས་རྒྱང་རིང་པོའི་ཆ་ནས་དེར་ག་ལེར་མི་ཚང་མ་ཞེན་པ་ལོག་རྒྱུ་ཞིག་ཡོང་བཞིན་འདུག ཚུར་ཕྱོགས་འདིར་འཚེ་བ་མེད་པའི་ལམ་ལ་བརྟེན་པའི་བདེན་པའི་རྒྱུ་མཚན་ཐོག་ནས་འབད་བརྩོན་བྱེད་རྒྱུ་དེར་ལོ་ཇི་སོང་གི་དེའི་ནུས་པ་ཆེ་རུ་མ་སོང་ཡང་དེའི་ནུས་པ་ཡལ་རྒྱུ་མེད་པ་གསལ་པོ་རེད་འདུག ངོས་ལ་ཆ་བཞག་ན་ཐོག་མ་ང་ཚོ་བཙན་བྱོལ་ལ་ཡོང་སྐབས་ལོ་ཉེར་བཞི་ཡིན། ད་ཆ་ལོ་བདུན་ཅུ་དོན་དགུའི་མཚམས་ལ་སླེབས་ཡོད། ང་ཚོ་བཙན་བྱོལ་བ་ཆགས་ནས་ལོ་ལྔ་བཅུ་ང་ལྔ་ལ་ཉེ་བ་ཆགས་ཡོད། དེའི་རིང་གི་ཉམས་མྱོང་རྣམས་ཕྱོགས་བསྡོམས་བྱེད་སྐབས་བདེན་པ་ཟེར་བ་དེར་ནུས་པ་ཞིག་ཡོད་པ་རེད་འདུག ང་ཚོས་བདེན་པའི་འཐབ་རྩོད་བྱེད་རྒྱུའི་རྩ་བའི་སེམས་ཤུགས་དང་སྙིང་སྟོབས་དེ་དག་སངས་རྒྱས་པའི་ལྟ་གྲུབ་ཐོག་ནས་ཡོང་གི་ཡོད་པ་བསམ་བློ་འཁོར་སྐབས་ང་ཚོ་བོད་མི་རིགས་ཀྱིས་སོ་སོའི་བདེན་དོན་རྩོད་པ་ཙམ་དུ་མ་ཟད་འཛམ་གླིང་སྤྱི་ལའང་གང་ཙམ་གྱི་ཞབས་འདེགས་སྒྲུབ་ཐུབ་རྒྱུར་ང་ཚོར་ནུས་པ་ཡོད་པ་དང་སྤོབས་པ་ཡོད་པ་ཕལ་ཆེར་རེད།
འདས་པའི་ལོ་ལྔ་བཅུ་ང་གྲངས་ནང་གི་ཉམས་མྱོང་ཕྱོགས་བསྡོམས་བྱེད་སྐབས་འཛམ་གླིང་འདིར་དགོས་མཁོ་ཧ་ཅང་ཆེ་བའི་བྱམས་པ་དང་བརྩེ་བ། བཟོད་པ་ཞེས་པ་དེ་དག་སངས་རྒྱས་པའི་ཆོས་ཀྱི་ཐོག་ནས་འགྲེལ་བཤད་རྒྱག་སྐབས་དམིགས་བསལ་སྐྱེ་བ་སྔ་ཕྱི་དང་། མཐར་པ་དང་ཐམས་བཅད་མཁྱེན་པ། དཀོན་མཆོག་བཅས་ལ་ཡིད་ཆེད་མེད་མཁན་ཞིག་ཡིན་ནའང་དངོས་ཡོད་གནས་ཚུལ་གྱི་ནང་བསམ་བློའི་འཁྱེར་སོའི་ཐོག་ནས་སེམས་ཀྱི་བདེ་སྐྱིད་སྒྲུབ་སྟངས་དང་། སེམས་ཀྱི་བདེ་སྐྱིད་ལ་བརྟེན་ནས་ལུས་པོའི་བདེ་ཐང་དང་ཁྱིམ་ཚང་བདེ་ཐང་། སྤྱི་ཚོགས་བདེ་ཐང་། ཆེ་ས་འཛམ་གླིང་མི་མང་དུང་ཕྱུར་བདུན་ཅུ་ཙམ་ཡོད་པ་དེ་དག་གི་སེམས་ཀྱི་བདེ་སྐྱིད་དང་སྤྱི་ཚོགས་ཀྱི་བདེ་སྐྱིད་བསྒྲུབ་རྒྱུར་འབྲེལ་བ་ཡོད་པ་ཞིག་དང་ཐབས་ལམ་ལམ་སྟོན་བྱེད་རྒྱུའི་གནས་ཚུལ་ཞིག་ཆགས་ཡོད། ངོས་ལ་ཆ་བཞག་ན་གངས་ཅན་པ་ཞིག་རེད། བོད་གངས་ཅན་ལྗོངས་ཀྱི་དཔལ་ནཱ་ལེནྡ་ནས་བརྒྱུད་པའི་ཆོས་བརྒྱུད་དེ་དག་དཔྱིས་ཕྱིན་པ་ཞིག་ཤེས་ཀྱི་མེད་ཀྱང་གང་ལ་གང་ཙམ་སློབ་སྦྱོང་བྱས་ཡོད་པ་ཙམ་དུ་མ་ཟད་ཉིན་རེ་ཉིན་རེའི་བསམ་བློ་གཏོང་རྒྱུའི་ནང་དེ་དག་རྟག་ཏུ་བསླེབས་ཀྱི་ཡོད། དེས་རྐྱེན་པས་ངོས་རང་སྒེར་ལ་ཆ་བཞག་ནའང་རྐྱེན་ངན་རུ་འཛིངས་པའི་ཁྲོད་ནས་སོ་སོའི་སེམས་ཞི་བདེ་འཛིན་ཐུབ་རྒྱུ་ཞིག་དང་། ང་ཚོས་ངོ་ཤེས་ཆོས་དད་མེད་མཁན་དེ་དག་མང་པོ་ཞིག་དང་འཛམ་གླིང་སྤྱི་ལ་བློ་སྦྱོང་ཐབས་ཤིག་སངས་རྒྱས་པའི་གཞུང་ནང་ཡོད་པའི་བཟོ་འདུག བཅོམ་ལྡན་འདས་རང་ཉིད་ཀྱིས་ཀྱང་ཁམས་དང་མོས་པར་བསྟུན་ནས་གསུང་ཆོས་གནང་གི་ཡོད་པ་ལས་ཨུ་ཚུགས་བསྐྱོན་ཏེ་འདིར་ཡིད་ཆེས་བྱེད་དགོས་གསུང་གི་མི་འདུག
དེ་འདྲ་སོང་ཙང་འདི་ནི་ང་ཚོ་བོད་མི་རིགས་ཀྱི་བླ་སྲོག་ལྟ་བུ་རེད་ལ་སྤོབས་པ་སྐྱེ་རྒྱུ་ཞིག་ཀྱང་ཡིན། དེར་བརྟེན་དེ་རིང་འདི་གར་ལོ་གསར་གྱི་འཚམས་འདྲི་ཞུ་རྒྱུ་དེ་ཡང་གཙོ་བོ་ཆོས་ཕྱོགས་ཐོག་ནས་ཆོས་ཞེས་སྨོན་ལམ་འདེབས་རྒྱུ་དང་འདོན་པ་འདོན་རྒྱུ་གཅིག་པུའི་སྐད་ཆ་མིན། དེ་དག་མི་ལ་ཕན་གྱི་ཡོད་པས་ཡག་པོ་རེད། འོན་ཀྱང་སངས་རྒྱས་པའི་ཆོས་ཞེས་བརྗོད་སྐབས་གཙོ་བོ་དེ་སེམས་ལ་བསྒྱུར་བཅོས་གཏོང་རྒྱུའི་ལྟ་གྲུབ་དེ་ཧ་ཅང་གལ་ཆེན་པོ་རེད། དེ་འདྲ་ཡིན་ཙང་དེ་རིང་ང་ཚོའི་ལོ་གསར་པའི་རྟེན་འབྲེལ་བྱེད་རྒྱུར་ས་གནས་ཀྱི་བུ་དང་བུ་མོ་མང་པོ་ཞིག་གིས་ཆོལ་ཁ་གསུམ་གྱི་ངོ་བོ་མཚོན་ཐུབ་པའི་གཞས་ཞབས་བྲོ་འཁྲབ་སྟེ་ཧ་ཅང་ཡག་པོ་འཁྲབ་སོང་། ཧ་ཅང་ཡག་པོ་སྦྱོང་བརྡར་བྱས་འདུག་པར་ཐུགས་རྗེ་ཆེ་ཟེར་རྒྱུ་ཡིན། ད་ཆ་ལོ་ལྔ་བཅུ་ང་གྲངས་ནང་མི་རབས་བརྗེས་འགྲོ་གི་ཡོད། ང་ཚོ་རྒྱ་གར་ནས་ངོ་ཤེས་ཁྱེད་རང་ཚོ་མང་པོ་ཞིག་སྤོ་རྨོ་ཆགས་འདུག་ལ་ངོས་ཀྱང་སྤོ་ཆགས་ཡོད། སྔ་མོ་ང་ཚོ་ངོ་ཤེས་སྐབས་གཞོན་སྐྱེས་དེ་དག་དེ་རིང་ཁ་སང་སྤོ་ཕོ་རྨོ་མོ་ལག་པས་འཁྱོག་ཚད་ཆགས་ཏེ་ལོ་ཡུན་དེ་འདྲ་ཕྱིན་ཡོད། འོན་ཀྱང་ཁྱེད་རང་ཚོའི་ཕྲུ་གུ་དང་ཕྲུ་གུའི་ཕྲུ་གུ་དེ་དག་བོད་མི་གྲུང་གྲུང་ཞིག་ཉར་ཚགས་བྱས་ཏེ་བདག་པོ་བརྒྱབ་ཡོད་པ་ཧ་ཅང་ཡག་པོ་རེད། གཞོན་སྐྱེས་ཁྱེད་རང་ཚོ་ཚང་མས་བོད་པ་ཞིག་ཡིན་པའི་འདུ་ཤེས་ཐོག་ནས་རང་ཉིད་སྤོབས་སེམས་དང་ཡ་རབས། བསམ་པ་རྣམ་དག་བྱེད་རྒྱུ། མགོ་བདེ་དྲན་འཕྲུལ་སྐྱག་རྫུན་ཧམ་སེམས་དེ་འདྲ་མི་བྱེད་པ་དེ་ཧ་ཅང་གལ་ཆེན་པོ་ཡིན་པས་དེ་ཁྱེད་ཚོས་སེམས་ནང་འཇོག་དགོས། ཞེས་སོགས་ཀྱི་བཀའ་སློབ་བཀའ་དྲིན་ཆེ་བ་སྩལ་རྗེས་སེམས་སྐྱེད་ཀྱི་ཆོས་འབྲེལ་སྩལ་ཏེ་ལོ་གསར་མཛད་སྒོ་ལེགས་པར་གྲུབ་ཡོད།
