༢༠༡༤ ཟླ་ ༣ ཚེས་ ༡༨ རེས་གཟའ་ལྷག་པ།
༄༅། །སུད་སིའི་གྲོང་ཁྱེར་ཇི་ནི་ཝའི་ནང་འཛམ་གླིང་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༢༥ སྐབས་ཨ་རི་དང་དབྱིན་གཞུང་སྐུ་ཚབ་འཐུས་མིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཛ་དྲག་ཡོད་པའི་ཐོག་སེམས་འཚབ་ཡོད་སྐོར་གསུངས་ཡོད། དེ་ཡང་དབྱིན་གཞུང་གིས་སྐབས་དེར་གསུང་དོན། རྒྱ་ནག་ནང་སྨྲ་བརྗོད་དང་འདུ་འཛོམས་རང་དབང་། དེ་བཞིན་ཚོགས་པ་འཛུགས་རྒྱུ་སོགས་ཀྱི་རང་དབང་ཐོག་རྒྱ་ནག་གཞུང་གིས་དམ་བསྒྲགས་བྱེད་བཞིན་པ་དང་། ལྷག་པར་ཤིང་ཅང་དང་བོད་རིགས་གནས་སྡོད་ཀྱི་ས་ཁུལ་ཁག་ཏུ་ཆོས་དད་རང་དབང་དང་རིག་གཞུང་། སྐད་ཡིག་སྲུང་སྐྱོབ་ཀྱི་ཐོབ་ཐང་སོགས་ལ་དམ་བསྒྲགས་བྱེད་བཞིན་པ་དེར་ཧ་ཅང་སེམས་འཚབ་ཡོད། ཅེས་གསུངས་པ་མ་ཟད། རྒྱ་ནག་གཞུང་གིས་གྲངས་ཉུང་མི་རིགས་ཀྱི་དཀའ་ངལ་དེ་དག་གྲོས་མོལ་གྱི་ལམ་ནས་སེལ་ཐབས་དགོས་པ་དང་། གྲངས་ཉུང་མི་རིགས་ཀྱི་རང་དབང་ཐོབ་ཐང་ཆེད་ཞི་བའི་ལམ་ནས་འཐབ་རྩོད་གནང་མཁན་ཚོ་འཕྲལ་མར་གློད་བཀྲོལ་གཏོང་དགོས། ཞེས་རྒྱ་ནག་གཞུང་ལ་རེ་འདུན་ཤུགས་ཆེ་འདོན་བཞིན་ཡོད། ཅེས་གསུངས།
དེ་བཞིན་ཨ་རིའི་སྐུ་ཚབ་སྐུ་ཞབས་པི་ཊར་མུལ་རེན་ Mr. Peter Mulrean མཆོག་གིས་གསུང་དོན། རྒྱ་ནག་གཞུང་གིས་དྲ་རྒྱ་དང་། གསར་འགྱུར་བརྒྱུད་ལམ། ཆོས་དད་རང་དབང་སོགས་ལ་དམ་བསྒྲགས་བྱེད་ཤུགས་ཆེ་རུ་བཏང་བ་མ་ཟད། ལྷག་པར་ཤིང་ཅང་དང་བོད་ཀྱི་ས་ཁུལ་ཁག་དུ་དམ་བསྒྲགས་དེ་བས་ཤུགས་ཆེ་རུ་བཏང་ཡོད། ཉེ་ལམ་རྒྱ་ནག་གཞུང་གི་སྲིད་བྱུས་ལ་ཞི་རྒོལ་བྱེད་མཁན་རྣམས་གང་བྱུང་འཛིན་བཟུང་བཙོན་འཇུག་བྱས་པ་དང་། གར་སོང་ཆ་མེད་བཟོས་པ། ཁྲིམས་འགལ་ཐོག་བཀག་ཉར་བྱས་པ་སོགས་དམ་བསྒྲགས་སྔར་ལས་ཤུགས་ཆེ་རུ་བཏང་ཡོད། ཅེས་སྐྱོན་བརྗོད་བྱས་འདུག ཕྱོགས་མཚུངས་ཇར་མན་དང་ཁེ་ན་ཌ། དེ་བཞིན་ཅེཀ་སྤྱི་མཐུན་རྒྱལ་ཁབ་སོགས་ཀྱིས་རྒྱ་ནག་ནང་གི་གྲངས་ཉུང་མི་རིགས་ཀྱི་ཐོབ་ཐང་ཐོག་སེམས་འཚབ་ཡོད་སྐོར་གསུངས་འདུག
