༢༠༡༤ ཟླ་ ༣ ཚེས་ ༦ རེས་གཟའ་ཕུར་བུ།
༄༅། །བོད་རྒྱལ་ལོ་ ༢༡༤༡ བོད་ཟླ་ ༡ ཚེས་ ༡ དང་ཕྱི་ལོ་ ༢༠༡༤ ཟླ་ ༣ ཚེས་ ༢ བོད་ཀྱི་ལོ་གསར་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བྱང་ཨ་རིའི་ཁུལ་མི་ནི་སོ་ ཊའི་བོད་རིགས་སྤྱི་མཐུན་ཚོགས་པས་གོ་སྒྲིག་ཞུས་པའི་བོད་ཀྱི་ལོ་གསར་དགྱེས་སྟོན་གྱི་མཛད་སྒོར་དབུ་བཞུགས་ཐོག་མི་ནི་སོ་ཊ་ས་གནས་བོད་རིགས་སྤྱི་མཐུན་ཚོགས་པས་༸གོང་ས་༸སྐྱབས་མགོན་ཆེན་པོ་མཆོག་ལ་ལོ་གསར་མཛད་སྒོའི་ཐོག་གསོལ་འདེབས་སྙན་སྒྲོན་ཞུས་ཡོད་པ་དང་སྦྲགས་དེའི་ནང་དོན་རྣམས་སྙིང་བསྡུས་ཡོངས་སུ་རྫོགས་པ་ཚང་བའི་སྨོན་ཚིག་ཤོ་ལོ་ཀ་གསུམ་ཅན་པར་སྒྲོམ་སྤུས་ལེགས་ཤིག་ནང་རག་རྡུལ་གྱི་ཡི་གེར་བཀོད་ནས་འབུལ་ལམ་ཞུས་པ་གཤམ་གསལ།
སྨོན་ཚིག
༄༅། གང་གི་གདུལ་བྱ་སྐལ་ལྡན་གངས་ཅན་པར།
སྔོན་མེད་མང་གཙོའི་བདག་དབང་དགྱེས་བཞིན་སྩལ།
བྱམས་བརྩེའི་ཐུགས་ཀྱིས་སྲིད་གསུམ་དབང་བསྒྱུར་མགོན།
མཚུངས་པ་མེད་པའི་སྡེ་ལ་གསོལ་བ་འདེབས།
མགོན་ཁྱོད་གསང་གསུམ་རྟག་བརྟན་རྡོ་རྗེའི་ཁྲིར།
ཉམ་ཐག་སྙིགས་འགྲོའི་མགོན་དུ་འཚོ་གཞེས་ཏེ།
ཟབ་རྒྱས་ཆོས་འཁོར་རྒྱུན་མི་ཆད་པ་ཡིས།
འགྲོ་ཀུན་གཏན་བདེའི་ས་ལ་དབུགས་འབྱུང་གསོལ།
གངས་རི་ར་བས་བསྐོར་བའི་ཞིང་ཁམས་སུ།
ཕན་དང་བདེ་བ་མ་ལུས་འབྱུང་བའི་གནས།
སྤྱན་རས་གཟིགས་དབང་བསྟན་འཛིན་རྒྱ་མཚོ་ཡི།
ཞབས་པད་སྲིད་མཐའི་བར་དུ་བརྟན་གྱུར་ཅིག།
ཞེས་བོད་རྒྱལ་ལོ་ ༢༡༤༡ ཕྱི་ལོ་ ༢༠༡༤ ཟླ་ ༣ ཚེས་ ༢ རབ་གནས་ཤིང་རྟ་གནམ་ལོའི་རང་ཞལ་གསར་དུ་བཞད་པའི་རྟེན་འབྱུང་དགའ་སྟོན་ཉིན་མི་ནི་སོ་ཊར་གནས་འཁོད་བོད་འབངས་ཡོངས་ནས།
གུས་ཕྱག་དང་བཅས་
ཕུལ། ། །།
