༢༠༡༤ ཟླ་ ༣ ཚེས་ ༡༡ རེས་གཟའ་མིག་དམར།
༄༅། ཕྱི་ལོ་ ༢༠༡༤ ཟླ་ ༣ ཚེས་ ༡༡ ཉིན་འདི་གར་ཐེ་ཝན་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ལོ་ ༥༥ སྔོན་བོད་ཀྱི་རྒྱལ་ས་ལྷ་སར་བོད་མི་ཚོས་མ་གྲོས་བསམ་པ་གཅིག་མཐུན་གྱིས་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཕྱྭ་དང་། བོད་བསྟན་སྲིད་མི་རིགས་ཀྱི་ཆེད་དུ་རྒྱ་གཞུང་ལ་ཞི་རྒོལ་གྱི་ལས་འགུལ་སྤེལ་བ་རྒྱལ་རབས་ལོ་རྒྱུས་ཐོག་བསུབ་ཐབས་བྲལ་བའི་ཉིན་མོ་དེ་བཞིན་འཛམ་གླིང་ཡུལ་གྲུ་གང་སར་གནས་པའི་བོད་མི་ཚོས་སྲུང་བརྩི་ཞུ་མུས་ཡིན་པ་ལྟར། ཐེ་ཝན་དུ་ཡང་ཐེ་སྡོད་བོད་རིགས་ཚོགས་པས་འགན་ཁུར་ཐོག་ས་གནས་གཞོན་ནུ་དང་། གཞུང་འབྲེལ་མིན་པའི་བོད་དོན་རྒྱབ་སྐྱོར་བྱེད་མཁན་གྱི་ཚོགས་སྡེ་ཁག་བཅུ་ཙམ་མཉམ་འབྲེལ་ཐོག ཕྱི་ཟླ་ ༣ ཚེས་ ༩ ཉིན་ཐེ་ཝན་རྒྱལ་ས་ཐེ་པེ་གྲོང་ཁྱེར་གྱི་མི་ཚོགས་མང་བའི་གཞུང་ལམ་ཐོག་རྔམ་སྟོན་ཁྲོམ་སྐོར་རྒྱ་ཆེ་ཞིག་སྤེལ་ཡོད།
ཐོག་མའི་མཛད་སྒོར་བོད་རྒྱལ་ཁབ་ཆེན་པོའི་རྒྱལ་གླུ་དང་། བོད་ཀྱི་རྒྱལ་གཅེས་པ་ཕོ་མོ་རྣམས་ལ་མྱ་ངན་གུས་འདུད་གྲུབ་རྗེས། གོ་སྒྲིག་གནང་མཁན་ཚོགས་སྡེ་ཁག་གི་སྐུ་ཚབ་ནས་གསུང་བཤད་དང་། སྐུ་མགྲོན་ཁོངས་སུ་ཐེ་ཝན་གྲོས་ཚོགས་འཐུས་མི་སྐུ་ཞབས་ཏོན་དབྱི་ཁང་ལགས་དང་། ལྕམ་གྲན་ཇེའི་རུའུ་ལགས། ལྕམ་ཐན་ཆིའུ་ཇིན་ལགས་སོགས་ནས་བོད་མིར་གདུང་སེམས་མཉམ་སྐྱེའི་གསུང་བཤད་གནང་བ་དང་
ཐེ་པེ་གྲོང་ཁྱེར་གྲོས་ཚོགས་འཐུས་མི་ལྕམ་ཇན་ཡུས་ཨན་ལགས་ལོ་ལྟར་གསུམ་བཅུའི་དུས་དྲན་དུ་ཕེབས་གནང་གི་ཡོད་པ་ལྟར་འདི་ལོ་ཡང་ཁྲོམ་སྐོར་ནང་མཉམ་ཞུགས་གནང་ཡོད།
ཐེངས་འདིའི་འབོད་ཚིག་གཙོ་བོ་བོད་ནང་གི་ཆབ་སྲིད་བཙོན་པ་ཁག་གློད་འགྲོལ་དགོས་གཏོང་དགོས་སྐོར་དང་ཁྲོམ་སྐོར་གྱི་བང་རིམ་ནང་ཐོག་མར་གསུམ་བཅུའི་དུས་དྲན་ཐེངས་ ༥༥ པའི་ཕྲེད་དར་དང་། བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ། བོད་མིའི་ཆབ་སྲིད་ཀྱི་དབུ་འཁྲིད་སྲིད་སྐྱོང་བློ་བཟང་སེངྒེ་ལགས་ཀྱི་འདྲ་པར། སྣུམ་འཁོར་ཆེ་བའི་གཡས་གཡོན་གཉིས་སུ་བོད་ཀྱི་ཆབ་སྲིད་བཙོན་པའི་འདྲ་པར་དང་ལོ་རྒྱུས། སྣུམ་འཁོར་ཆུང་བའི་གཡས་གཡོན་དུ་རྒྱ་ཡིག་གི་ཕྲེད་དར་ཐོག་ནང་དོན་དུ། ༧གོང་ས་མཆོག་གི་དབུ་མའི་ལམ་ནི་གཉིས་ཕན་དང་མི་རིགས་འདྲ་མཉམ་ཐོག་བོད་རང་བཙན་མ་རྩོད་པར། རྒྱ་ནག་གི་རྩ་ཁྲིམས་གཞི་བཟུང་བོད་མི་གཅིག་གྱུར་ཐོག་མིང་དོན་མཚུངས་པའི་མི་རིགས་ས་གནས་རང་སྐྱོང་དགོས་པ་དེ་ཡིན། ཞེས་གསལ་བ། དེ་བཞིན་ད་ལྟ་རྒྱ་ནག་རྒྱལ་ས་པེ་ཅིང་དུ་འཚོ་བཞུགས་གནང་བཞིན་ཡོད་པ་རི་མོའི་སྒྱུ་རྩལ་མཁས་ཅན་སྐུ་ཞབས་ལིའུ་དབྱི་ལགས་ཀྱིས་བྲིས་གནང་བའི་བོད་ཕྱི་ནང་གཉིས་ནང་བོད་བསྟན་པ་ཆབ་སྲིད་དོན་དུ་རང་ལུས་མེར་བསྲེག་གཏོང་མཁན་རྣམས་ཀྱི་འདྲ་རིས་བྲིས་པ་ཁག་གི་ཕྲེད་དར་རིང་པོ་སོགས་འཁྱེར་ཡོད་པ་རེད། ལམ་བར་ཐེ་ཝན་ནང་སྐད་གྲགས་ཡོད་པའི་རོལ་དབྱངས་ཚོགས་པ་ཁག་གསུམ་གྱི་གཞོན་སྐྱེས་གཞས་པ་གསུམ་ནས་བོད་དོན་རྒྱབ་སྐྱོར་གྱི་གསུང་བཤད་དང་རོལ་དབྱངས་བཅས་ལེན། ཁྲོམ་སྐོར་གྱི་ལམ་བར་དུ་རྒྱ་ནག་སྐམ་སའི་ཡུལ་སྐོར་སྤྲོ་འཆམ་མང་པོས་དོ་སྣང་ཆེན་པོ་བྱེད་པ་དང་། དེ་ཉིན་ཁྲོམ་སྐོར་ནང་ཐེ་སྡོད་བོད་མི་དང་། བོད་མིར་རྒྱབ་སྐྱོར་གནང་མཁན་མི་གྲངས་ལྔ་བརྒྱ་བརྒལ་བས་མཉམ་ཞུགས་གནང་ཡོད་པ་རེད།
གཞན་ཡང་ཐེ་ཝན་ས་གནས་བོད་ཀྱི་གཞོན་ནུ་ལྷན་ཚོགས་ཀྱིས་གཙོ་འགན་ཐོག་ས་གནས་བོད་རིགས་ཚོགས་པས་རོགས་འདེགས་ཀྱིས་བོད་ཀྱི་ཆེད་དུ་ལོ་གསར་གསར་གྱི་ལས་འགུལ་ཞིག་བོད་ཀྱི་ལོ་གསར་ཚེས་ ༡ ནས་གསུམ་བཅུའི་དུས་དྲན་བར་ཐེ་ཝན་རང་དབང་ཐང་ཆེན་མདུན་ལོ་རྒྱུས་ཐོག་བོད་ནི་རང་བཙན་རྒྱལ་ཁབ་གཅིག་ཡིན་པའི་ཁུངས་སྐྱེལ་འགྲེམས་སྟོན་གོ་སྒྲིག་བྱས་པ་མ་ཟད། གསུམ་བཅུའི་དུས་དྲན་ཉིན་གྱི་དགོང་དྲོར་འགྲེམས་སྟོན་བྱ་ཡུལ་དུ་འདུ་འཛོམས་དང་མར་མེའི་ཁྲོམ་སྐོར་གྱི་མཛད་སྒོའི་ཐོག་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་དཔལ་ལྡན་སྲིད་སྐྱོང་མཆོག་གི་གསུམ་དུས་ཡོངས་བསྒྲགས་གསུང་བཤད་སྒྲོགས་སྦྱང་དང་། གཞུང་འབྲེལ་མིན་པའི་ཚོགས་པའི་འགན་འཁུར་མི་སྣས་གསུང་བཤད་བཅས་གནང་ཡོད། དེ་ཉིན་དགོང་མོར་ཐེ་ཝན་གྱི་གཞས་པ་སྐད་གྲགས་ཅན་སོགས་ཁྱོན་མི་གྲངས་བརྒྱ་ཕྲག་བརྒལ་བས་མཉམ་ཞུགས་གནང་ཡོད།
གཞན་ཡང་དེ་ཉིན་ཧོང་ཀོང་ནང་དུ་ཡང་བོད་དོན་རྒྱབ་སྐྱོར་གནང་མཁན་ཁག་གཅིག་གིས་གསུམ་བཅུའི་དུས་དྲན་སྲུང་བརྩིའི་ལས་འགུལ་སྤེལ་ཡོད་པ་བཅས།
