༢༠༡༤ ཟླ་ ༣ ཚེས་ ༡༣ རེས་གཟའ་ཕུར་བུ།
༄༅། །བོད་རྒྱལ་ལོ་ ༢༡༤༡ ཕྱི་ལོ་ ༢༠༡༤ ཟླ་ ༣ ཚེས་ ༡༠ ཉིན་འདས་ལོ་ ༡༩༥༩ ལོར་བོད་ཀྱི་རྒྱལ་ས་ལྷ་སར་བོད་མི་སེར་སྐྱ་ཁྲི་སྟོང་མང་པོས་བོད་བསྟན་པ་ཆབ་སྲིད་ཀྱི་དོན་དུ་རྒྱ་ནག་བཙན་འཛུལ་བར་ཞི་བའི་སྒེར་ལངས་བྱས་ཏེ་མི་ལོ་ཧྲིལ་པོ་ ༥༥ འཁོར་བའི་དུས་དྲན་སྲུང་བརྩི་དང་སྟབས་བསྟུན་ཇར་མ་ནིའི་མོ་བྷུག་མངའ་སྡེའི་རྒྱལ་ས་པཀ་སི་ཐང་གྲོང་ཁྱེར་ནང་བོད་ཀྱི་རྒྱལ་དར་སྒྲེང་འཛུགས་གནང་འདུག
དེ་ཉིན་ཕྱེད་ཡོལ་ཆུ་ཚོད་ ༡ པོའི་ཐོག་གྲོང་སྡེ་སྤྱི་ཁྱབ་ཁང་གི་རིག་གཞུང་སྡེ་ཚན་གྱི་དྲུང་ཆེས་ཐོག་མར་བོད་ཀྱི་རྒྱལ་དར་སྒྲེང་འཛུགས་གནང་སྟེ་གསུང་དོན། བོད་མི་མང་གི་རང་དབང་སྒེར་ལངས་དྲན་གསོ་དང་བོད་མི་རིགས་ལ་གདུང་སེམས་མཉམ་སྐྱེ་མཚོན་ཆེད་བོད་ཀྱི་རྒྱལ་དར་སྒྲེང་འཛུགས་ཀྱི་ལས་འགུལ་སྤེལ་གྱི་ཡོད། སྤྱིར་བཏང་བོད་ནང་བོད་ཀྱི་རྒྱལ་དར་སྒྲེང་འཛུགས་བྱེད་རྒྱུར་བཀག་སྡོམ་ཤུགས་ཆེ་བྱེད་བཞིན་ཡོད། ང་ཚོའི་གྲོང་ཁྱེར་འདིས་འདི་གར་གནས་སྡོད་མི་མང་ཚང་མར་གོ་སྐབས་འདྲ་མཉམ་དང་། འགྲོ་བ་མིའི་ཐོབ་ཐང་སྲུང་སྐྱོབ་བྱེད་རྒྱུ་སོགས་ནི་ང་ཚོའི་གྲོང་ཁྱེར་འདིའི་ལངས་ཕྱོགས་ཆགས་ཡོད། དེ་རིང་ང་ཚོས་བོད་ཀྱི་རྒྱལ་དར་སྒྲེང་འཛུགས་བྱེད་རྒྱུ་དེ་ནི་བོད་མིར་རྒྱབ་སྐྱོར་དང་བོད་ནང་གི་འགྲོ་བ་མིིའི་ཐོབ་ཐང་ལ་རྩིས་མེད་རྡོག་རོལ་གཏོང་མཁན་ཚོར་ངོ་རྒོལ་གྱི་རྣམ་འགྱུར་སྟོན་ཆེད་ཡིན། ཁྱེད་རྣམ་པས་དེ་རིང་ལས་འགུལ་འདིའི་ཐོག་ཆེད་ཕེབས་གནང་སྟེ་བོད་མིར་རྒྱབ་སྐྱོར་གནང་བར་ངས་ཐུགས་ཆེ་རྗེ་ཞུ་རྒྱུ་ཡིན། ང་རང་སྒེར་གྱི་སེམས་ནང་ཇར་མན་དང་ཡུ་རོབ་ཡུལ་གྲུ་གཞན་ནང་བོད་ཀྱི་རྒྱལ་དར་གཅིག་ལས་སྒྲེང་འཛུགས་མ་བྱས་ཀྱང་བོད་མིར་རྒྱབ་སྐྱོར་ཡོང་བའི་རེ་འདུན་བྱེད་བཞིན་ཡོད། ཅེས་སོགས་ཀྱི་གསུང་བཤད་གནང། ལྷག་པར་དེ་ཉིན་བོད་མིར་རྒྱབ་སྐྱོར་མཚོན་སླད་ཇར་མན་གྱི་གྲོང་ཁྱེར་དང་། གྲོང་སྡེ། རྫོང་སོགས་ས་གནས་ཁག་ ༡༠༠༠ བརྒལ་བར་བོད་ཀྱི་རྒྱལ་དར་སྒྲེང་འཛུགས་གནང་འདུག་པ་བཅས། །
