༢༠༡༤ ཟླ་ ༢ ཚེས་ ༡༠ རེས་གཟའ་ཟླ་བ།

༄༅། །འདི་གར་ཨོ་སི་ཊོ་ལི་ཡའི་སྐུ་ཚབ་དོན་གཅོད་ལས་ཁུངས་ཀྱི་རྒྱ་རིགས་འབྲེལ་མཐུད་པ་ཟླ་སྒྲོན་ལགས་ཀྱིས་ཕྱི་ལོ་ ༢༠༡༤ ཟླ་ ༢ ཚེས་ ༡༠ ཉིན་བཏང་གནས་ནང་འཁོད་དོན། ཨོ་སི་ཊོ་ལི་ཡའི་རྒྱལ་ས་ཀེན་བྷེ་རར་ལོ་ལྟར་（National Multicultural Festival）མི་རིགས་ཁག་གི་རིག་གཞུང་སྣ་འཛོམས་ཀྱི་དུས་སྟོན་ཚུགས་སྲོལ་ཡོད་པ་ལྟར། འདི་ལོ་ཟླ་ ༢ ཚེས་ ༧ ནས་ཚེས་ ༩ བར་ཉིན་གྲངས་གསུམ་རིང་གི་དུས་སྟོན་སྐབས་ས་ཕྱོགས་གང་ས་ནས་མི་གྲངས་འབུམ་ ༢ ལྷག་འདུ་འཛོམས་བྱུང་ཡོད་པ་དང་། འདི་ལོའི་དུས་སྟོན་སྐབས་སྔ་ལོ་ལྟར་སྐུ་ཚབ་དོན་གཅོད་ཀྱི་ཁྱབ་ཁོངས་རིག་གཞུང་བསྟི་གནས་ཁང་དང་ས་གནས་བོད་རིགས་མཐུན་ཚོགས་ནས་མཉམ་ཞུགས་གནང་བ་མ་ཟད། བསྟི་གནས་ཁང་ནས་བོད་ཀྱི་ཁྱད་ཆོས་ལྡན་པའི་མཆོད་པ་དང་། གྱང་ངོས་སུ་དར་གོས་ཆེན་པོ་བརྒྱན་པའི་ཞལ་ཐང་འགྲེམས་ཤོམ་ཐོག་མེལ་བྷོན་ནས་སྐུ་ཞབས་ཐུབ་བསྟན་མཁས་གྲུབ་ལགས་གདན་ཞུས་ལྟར། ཁོང་གིས་བོད་བརྒྱུད་ནང་བསྟན་གྱི་ཐུན་མོང་མ་ཡིན་པའི་རྡུལ་ཚོན་གྱི་དཀྱིལ་འཁོར་བཞེངས་སྐབས། མི་དམངས་མང་དག་ཅིག་གིས་དཀྱིལ་འཁོར་བཞེངས་སར་ཕེབས་ཏེ་བསྔགས་བརྗོད་ཀྱང་གནང་ཡོད། མཆོད་རྫས་དང་དཀྱིལ་འཁོར་བཞེངས་པ་བརྒྱུད་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་ངོ་སྤྲོད་གང་ལེགས་ཐུབ་པ་བྱུང་ཡོད།
ཐེངས་འདིའི་རིག་གཞུང་འདྲ་མིན་གྱི་དུས་སྟོན་སྐབས་སྐུ་ཚབ་དོན་གཅོད་ལས་ཁང་ནས་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་རྩོམ་ཕྱག་དེབ་ཁག་གི་མཚན་བྱང་དང་། བོད་དོན་དང་འབྲེལ་བའི་དྲ་རྒྱ་ཁག་གི་ཁ་བྱང་། དོན་གཅོད་ལས་ཁང་གི་ཟླ་གསུམ་གསར་འཕྲིན་དང་རིག་གཞུང་བསྟི་གནས་ཁང་གི་བརྡ་ཁྱབ་ཤོག་ལྷེ་སོགས་འགྲེམས་སྤེལ་རྒྱ་གང་ཆེ་ཞུས་ཡོད། ལྷག་པར་དུས་སྟོན་སྐབས་ཀེན་བྷེ་རའི་ས་གནས་བོད་རིགས་མཐུན་ཚོགས་ཀྱི་གོ་སྒྲིག་འོག་བོད་ཟས་ཤ་མོ་ཚོང་བ་དང་། བོད་ཀྱི་གཞས་སྣ་འཁྲབ་སྟོན་དང་སྐུ་ཞབས་མཁས་གྲུབ་ལགས་ནས་འཛེར་སྐད་ཐོག་ཞལ་འདོན་སྐྱོར་བ་སོགས་གནང་སྐབས་མང་ཚོགས་ནས་དོ་སྣང་དང་དགའ་མོས་ཆེན་པོ་གནང་ཡོད་། ཨོ་སི་ཊོ་ལི་ཡའི་རྒྱལ་ས་ཀེན་བྷེ་ར་ལོ་ལྟར་རིག་གཞུང་སྣ་འཛོམས་ཀྱི་དུས་སྟོན་སྐབས་རྒྱལ་ཁབ་འདིའི་ནང་གནས་སྡོད་མི་རིགས་འདྲ་མིན་རྣམས་ནས་རང་མི་རིགས་ཀྱི་ཁྱད་ཆོས་ལྡན་པའི་རིག་གཞུང་འགྲེམས་སྟོན་གནང་བ་དང་། ཞལ་ཟས་ཚོང་བ། གཞས་སྣ་འཁྲབ་སྟོན་སོགས་གནང་གི་ཡོད་པ་མ་ཟད། ཕྱི་ལོ་ ༢༠༡༡ ལོའི་དུས་སྟོན་སྐབས་སྐུ་ཚབ་དོན་ཁང་ནས་གོ་སྒྲིག་ཞུས་པའི་འགྲེམས་སྟོན་ཁང་ལ་སྒྲིག་གཤོམ་དང་། གོ་སྒྲིག་ལེགས་ཤོས་ཀྱི་བྱ་དགའ་ཨང་དང་པོ་ཐོབ་མྱོང་ཡོད་པ་བཅས། །