༢༠༡༤ ཟླ་ ༢ ཚེས་ ༢ རེས་གཟའ་ཟླ་བ།
༄༅། །ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཚོགས་ཆུང་ནས་ཕྱི་ལོ་ ༢༠༡༣ ལོའི་སྙན་ཐོ་འདོན་སྤེལ་གནང་བའི་ནང་རྒྱ་ནག་གཞུང་ཕྱོགས་ནས་གྲོས་མོལ་དང་ཞི་འགྲིག་གི་ཐབས་ལམ་ལ་དོ་སྣང་བྱེད་ཀྱི་མེད་པའི་སྐོར་འཁོད་དོན། སྤྱིར་བཏང་འདས་ལོར་རྒྱ་ནག་ནང་སྤྱི་དམངས་དང་། སྨྲ་བརྗོད། འདུ་འཛོམས་རང་དབང་ཐོག་ལ་ཡར་རྒྱས་ཀྱི་རྣམ་པ་གང་ཡང་མངོན་རྒྱུ་མེད་པ་མ་ཟད། དཔལ་འབྱོར་དེང་རབས་ཅན་དུ་སྐྱོད་བཞིན་ཡོད་ཀྱང་ཆབ་སྲིད་བཅོས་སྒྱུར་དང་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུར་གྲུབ་འབྲས་ཐོན་མེད། རྒྱ་ནག་དམར་ཤོག་ཚོགས་པས་སྤྱི་ཚོགས་ནང་མུ་མཐུད་སྟངས་འཛིན་དང་དབང་ཆ་སྲ་བརྟན་ཡོང་སླད་འགྲོ་བ་མིའི་ཐོབ་ཐང་དང་ཁྲིམས་ལུགས་དབང་འཛིན་ཐོག་ཕྱི་གསལ་ནང་གསལ་གྱི་ལས་དོན་གང་ཡང་བསྒྲུབས་མི་འདུག དེ་བཞིན་ཡུ་གུར་ནང་ཛ་དྲག་གནས་སྟངས་རྒྱུན་མཐུད་ཡོང་གི་ཡོད། ཕྱོགས་མཚུངས་བོད་ནང་རང་ལུས་མེར་སྲེག་གི་གནས་ཚུལ་གཅིག་མཇུག་གཉིས་མཐུད་ཡོང་བཞིན་ཡོད་ཀྱང་རྒྱ་ནག་གཞུང་གི་དཔོན་རིགས་ཚོས་སྔར་བཞིན་དམ་བསྒྲགས་དང་སྟངས་འཛིན་བྱེད་ཤུགས་ཆེ་རུ་བཏང་བ་ཡོད་པ་ལས་གྲོས་མོལ་དང་ཞི་འགྲིག་གི་ཐབས་ལམ་ལ་དོ་སྣང་བྱས་མི་འདུག རྒྱ་ནག་གཞུང་ནས་ཆ་རྐྱེན་གང་ཡང་མེད་པའི་ཐོག་བོད་ཀྱི་༸སྐྱབས་མགོན་ཏཱ་ལའི་བླ༌མ་མཆོག་གམ་ཁོང་གི་སྐུ་ཚབ་ལྷན་བོད་རྒྱའི་དཀའ་ངལ་སེལ་ཆེད་གྲོས་མོལ་གནང་དགོས་རྒྱུ་ཧ་ཅང་གལ་ཆེན་པོ་ཆགས་ཡོད།
ཕྱོགས་མཚུངས་ད་ལྟ་རྒྱ་ནག་གཞུང་གི་བཙོན་འོག་ཏུ་ཡོད་པའི་ཀུན་གཟིགས་པཎ་ཆེན་རིན་པོ་མཆོག་གི་གནས་སྟངས་ཡོངས་གྲགས་བྱེད་དགོས་པ་མ་ཟད། རྒྱལ་སྤྱིའི་སྤྱི་ཚོགས་ཀྱི་མི་སྣ་དང་མཇལ་འཕྲད་གནང་བཅུག་དགོས། དེ་བཞིན་བོད་མིའི་ཆོས་དད་རང་དབང་ལ་བརྩི་བཀུར་ཐོག་༸གོང་ས་ཏཱ་ལའི་བླ་མ་མཆོག་ལ་དད་མོས་ཞུ་རྒྱུའི་རང་དབང་སྤྲོད་དགོས་རྒྱུ་གལ་འགངས་ཆེན་པོ་ཆགས་ཡོད། ལྷག་པར་རྒྱ་ནག་གཞུང་ནས་བོད་མིའི་དགོས་འདུན་ལ་ཉན་འཇོག་དང་བོད་མིར་འཇིགས་སྐུལ་གྱི་ལས་འགུལ་མཚམས་འཇོག་བྱེད་དགོས། རྒྱ་ནག་གཞུང་གི་བཙན་འོག་ཏུ་ཡོད་པའི་ཆབ་སྲིད་བཙོན་པ་རྣམས་གློད་བཀྲོལ་གཏོང་དགོས་སྐོར། སོགས་འཁོད་འདུག་པ་བཅས། །
