༢༠༡༤ ཟླ་ ༢ ཚེས ༢༦ རེས་གཟའ་ལྷག་པ།
༄༅། །འདི་གར་ཨོ་སི་ཊོ་ལི་ཡའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟླ་སྒྲོན་ལགས་ཀྱི་བཏང་གནས་ནང་འཁོད་དོན། ཕྱི་ལོ་  ༢༠༡༤  ཟླ་  ༢   ཚེས་  ༢༣   ཉིན་ཨོ་སི་ཊོ་ལི་ཡའི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་དང་།     ཨོ་སི་ཌོ་ལི་ཡའི་རྒྱལ་ཡོངས་བོད་རིགས་མཐུན་ཚོགས་ཀྱི་ཚོགས་གཙོ།     སི་ཌི་ནིའི་བོད་རྒྱ་མཛའ་འབྲེལ་ཚོགས་པའི་ཚོགས་གཙོ་ལྕམ་སྐུ་ Mellech ལགས་དང་།    དྲུང་ཆེ་ Devid Nie    ལགས།   བོད་རིགས་མཐུན་ཚོགས་ཀྱི་ཚོགས་གཙོ་དང་རྒྱུན་ལས་བཅས་སི་ཌི་ནི་ Dee Why ཁུལ་དུ་ལྷན་འཛོམས་གནང་ཐོག    བོད་རྒྱ་མཛའ་འབྲེལ་ཚོགས་པའི་ངོས་ནས་མ་འོངས་ལས་དོན་བྱེད་ཕྱོགས་ཐོག་བཞུགས་མོལ་ཚོགས་འདུ་ཞིག་ཚོགས་ཡོད།
སྐབས་དེར་རྒྱ་བོད་མཛའ་འབྲེལ་ཚོགས་པའི་རྒྱ་རིགས་ཚོགས་གཙོ་ Mellech ལགས་ཀྱིས་གསུང་བཤད་གནང་དོན།     ང་རང་དེ་སྔོན་རྒྱ་ནག་ནང་སྡོད་སྐབས་བོད་ནི་རྒྱ་གཞུང་གི་འགྲེམས་སྟོན་ཁང་ནང་བཤམས་པ་དང་ངོ་སྤྲོད་བྱས་པ་བཞིན།    བོད་ཀྱི་སྤྱི་ཚོགས་རྙིང་པ་དེ་ཆེས་ཀླ་ཀློ་དང་།     ཆེས་མུན་ནག     ཆེས་གདུག་རྩུབ་ཡིན་པ་དང་།    རྒྱ་ནག་གཞུང་གི་བོད་ལ་ཡར་རྒྱས་དང་འཛུགས་སྐྲུན།    བོད་མིར་བདེ་སྐྱིད་སྤྲོད་ལུགས་སོགས་བརྗོད་པར་ཡིད་ཆེས་བྱེད་མྱོང་།    འོན་ཀྱང་རང་ཉིད་བསོད་ནམས་དང་ལས་དབང་གིས་རྐྱེན་པའི་ཨོ་སི་ཊོ་ལི་ཡར་༧གོང་ས་ཏཱ་ལའི་བླ་མ་མཆོག་ཞལ་མཇལ་རྒྱུའི་གོ་སྐབས་ཐོབ་བྱུང་ལ་ཁུལ་དེར་བོད་མི་མང་པོ་གྲོགས་འབྲེལ་རྗེས་རང་ཉིད་རྨོངས་གཉིད་ལས་སད་པ་ལྟར་གྱི་དགའ་ཚོར་སྐྱེས་བྱུང་།    ད་ལྟ་དངོས་ཡོད་གནས་སྟངས་གང་ཡིན་གསལ་པོ་ཤེས་ཀྱི་ཡོད་།     དེར་བརྟེན་ང་ཚོའི་ལས་འགན་དང་ཁ་ཚ་དགོས་གཏུགས་ཀྱིས་བྱེད་འདོད་པ་གཙོ་བོ་ནི་རྒྱ་ནག་གཞུང་གི་ལོ་རྒྱུས་ཀྱི་སློབ་གསོ་བཏང་དང་གཏོང་མུས་ཡིན་པའི་རྒྱ་མི་རིགས་རྣམས་ལ་བོད་ཀྱི་དངོས་ཡོད་གནས་སྟངས་གང་ཡིན་པ་གསལ་པོ་ཤོད་རྒྱུ་དེ་གལ་ཆེན་ཆགས་ཡོད་ཅེས་གསུངས།
ཨོ་སི་ཊོ་ལི་ཡའི་རྒྱལ་ཡོངས་བོད་རིགས་མཐུན་ཚོགས་ཀྱི་ཚོགས་གཙོ་ནེ་རྒན་ལགས་ཀྱིས་རྒྱ་རིགས་གྲོགས་པོ་ཚོས་ད་བར་བོད་ཀྱི་རྩ་དོན་ཆེད་དུ་ལྷག་བསམ་རྣམ་བདག་གིས་རྒྱབ་སྐྱོར་གནང་བ་ཐུགས་རྗེ་ཆེ་ཞུས་པ་དང་།   སི་ཌི་ནི་ས་གནས་བོད་རིགས་མཐུན་ཚོགས་ཀྱི་ཚོགས་གཙོ་ཕུར་བུ་ལགས་ཀྱིས་མ་འོངས་བོད་རྒྱ་མཛའ་འབྲེལ་མཐུན་ཚོགས་ངོས་ནས་ལས་དོན་སྤེལ་ཕྱོགས་དང་རྒྱ་མི་རིགས་ཚོས་བོད་ཀྱི་དངོས་ཡོད་གནས་སྟངས་ཤེས་རྟོགས་ཐུབ་རྒྱུར་ཚོགས་པའི་ངོས་ནས་མུ་མཐུད་འབད་བརྩོན་དང་ཤུགས་སྣོན་རྒྱག་རྒྱུ་ཡིན། ཞེས་གསུངས་ཡོད།
ཐེངས་འདིའི་ཚོགས་འདུའི་ནང་ད་དུང་ལོ་གསར་པའི་ནང་བོད་རྒྱ་མཛའ་འབྲེལ་མཐུན་ཚོགས་ཀྱི་ངོས་ནས་བོད་རྒྱ་དབྱིན་གསུམ་གྱི་སྐད་ཡིག་ལྡན་པའི་དྲ་རྒྱ་ཞིག་གསར་བཟོ་གནང་རྒྱུ་དང་།     དྲ་རྒྱ་དེ་བརྒྱུད་རྒྱ་རིགས་རྣམས་ལ་བོད་ཀྱི་ཆོས་དང་རིག་གཞུང་སོགས་ངོ་སྤྲོད་གནང་རྒྱུར་ཚོགས་བཅར་བ་རྣམས་ནས་མང་མོས་ཀྱི་ཐག་གཅོད་གནང་ཡོད་འདུག