༢༠༡༤ ཟླ་ ༢ ཚེས་ ༦ རེས་གཟའ་ཕུར་བུ།
༄༅། །བཙན་བྱོལ་བོད་མིའི་བཅའ་ཁྲིམས་དོན་ཚན་བཞི་བཅུ་པའི་ནང་གསལ་ལྟར། སྐབས་ ༡༥ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པ་ཕྱི་ལོ་ ༢༠༡༤ ཟླ་ ༣ ཚེས་ ༡༨ རེས་གཟའ་མིག་དམར་ནས་ཚེས་ ༢༩ རེས་གཟའ་སྤེན་པའི་བར་ལས་དུན་ཉིན་གྲངས་བཅུ་གཅིག་རིང་བཞུགས་སྒར་གངས་ཅན་སྐྱིད་གཤོངས་སྤྱི་ལྷན་གྲོས་ཚོགས་ཀྱི་ཚོགས་ཁང་དུ་ཚུགས་གཏན་འཁེལ་སོང་ན། ཚོགས་མི་རྣམས་དུས་ཐོག་ཚོགས་བཅར་ཐོག སྤྱི་འཐུས་རྣམ་པས་ཕྱི་ལོ་ ༢༠༡༤ ཟླ་ ༣ ཚེས་ ༡༧ ཉིན་ཚོགས་དྲུང་ལས་ཁུངས་སུ་ངོ་བཅར་འབྱོར་ཐོག་འགོད་འབུལ་གནང་དགོས་བཅས་ཀྱི་ཚོགས་བརྡ་གསལ་བསྒྲགས་ཕྱི་ལོ་ ༢༠༡༣ ཟླ ༡༡ ཚེས་ ༢ འཁོད་པ་ཕུལ་ཟིན་ནའང་། བོད་མི་མང་སྤྱི་འཐུས་ལྷན་ཁང་གསར་བཞེངས་དང་། ཉམས་བཟོའི་ལས་དོན་མཇུག་བསྒྲིལ་བས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དབུ་འབྱེད་རབ་གནས་ཤིག་སྐྱབས་འཇུག་གསོལ་འདེབས་ཞུས་པ་བཞིན། བོད་རྒྱལ་ལོ་ ༢༡༤༡ ཟླ་ ༡ ཚེས་ ༡༠ དང་། ཕྱི་ལོ་ ༢༠༡༤ ཟླ་ ༣ ཚེས་ ༡༡ ཉིན་ཆིབས་སྒྱུར་བཀའ་དྲིན་ཆེ་རྒྱུའི་བཀའ་བཞེས་བཟང་པོ་འཐོབ་པ་དགའ་ལྡན་ཕོ་བྲང་ཡིག་ཚང་ནས་བཀའ་གསལ་ཕེབས་པས། གྲོས་ཚོགས་ཀྱི་ཚོགས་ཁང་སོགས་དབུ་འབྱེད་དང་སྟབས་བསྟུན་གྲོས་ཚོགས་ཚོགས་དུས་ ༧ པ་ཕྱི་ལོ་ ༢༠༡༤ ཟླ་ ༣ ཚེས་ ༡༡ ནས་ཚེས་ ༢༢ བར་སྔ་སྣུར་གྱིས་བསྐྱང་རྒྱུ་དང་། ཚོགས་མི་རྣམ་པ་ཕྱི་ཟླ་ ༣ ཚེས་ ༩ ཉིན་དྷ་སར་ཕེབས་འབྱོར་གནང་སྟེ་ཚོགས་དྲུང་ལས་ཁུངས་སུ་འབྱོར་ཐོ་གནང་རྒྱུ་དང་། ཚེས་ ༡༠ ཉིན་བོད་མིའི་རང་དབང་སྒེར་ལངས་ཀྱི་དུས་དྲན་མཛད་སྒོར་མཉམ་ཞུགས་གནང་རྒྱུ། ཕྱི་ཚེས་ ༡༡ ཉིན་ཚོགས་ཁང་དབུ་འབྱེད་དང་། དེ་ནས་མུ་མཐུད་གྲོས་ཚོགས་ཀྱི་ལས་རིམ་ཐོག་ཕེབས་རྒྱུ་བཅས་གནང་བའི་གསལ་བསྒྲགས་སུ། ཚོགས་དྲུང་ལས་ཁུངས་ནས་ཕྱི་ལོ་ ༢༠༡༤ ཟླ་ ༢ ཚེས་ ༤ ལ།།
