༢༠༡༤ ཟླ་ ༢ ཚེས་ ༡༣ རེས་གཟའ་ཕུར་བུ།
༄༅། །ཕྱི་ལོ་ ༢༠༡༤ ཟླ་ ༢ ཚེས་ ༡༣ བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་བཟོ་ཚོགས་ཁག་གི་ཚོགས་གཙོ་དང་འགན་འཛིན་ལྷན་ཚོགས་ཐེངས་དང་པོ་གངས་སྐྱིད་གཉའ་ཁྲི་ཚོགས་ཁང་དུ་སྐོང་ཚོགས་གནང་སོང།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༡༠ ཐོག་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་གིས་དབུས་ནང་སྲིད་བཀའ་བློན་རྒྱ་རི་སྒྲོལ་མ་མཆོག་དང་ནང་སྲིད་དྲུང་ཆེ་དང་དྲུང་འཕར། དེ་བཞིན་རྒྱ་བལ་གཉིས་ནས་ས་གནས་ཁག་ ༡༦ ཕེབས་པའི་བཟོ་ཚོགས་ཀྱི་ཚོགས་གཙོ་དང་འགན་འཛིན་སོགས་ཁྱོན་མི་གྲངས ༢༨ ལྷན་འཛོམས་ཐོག་དཔལ་ལྡན་སྲིད་སྐྱོང་མཆོག་གིས་ཚོགས་འདུ་དབུ་འབྱེད་ཀྱི་སྣང་གསལ་ཞལ་ཕྱེ་དང་འབྲེལ་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་རྟེན་འབྱུང་གི་མཇལ་དར་སྒྲོན་འབུལ་ཞུས་གྲུབ་མཚམས་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས་བོད་བསྟན་སྲིད་མི་རིགས་ཆེད་རང་སྲོག་བློས་གཏོང་གནང་མཁན་སྤྱི་དང་ཡང་སྒོས་རང་ལུས་མེར་སྲེག་གཏོང་མཁན་རྒྱལ་གཅེས་པ་རྣམས་ལ་གདུང་སེམས་མཉམ་སྐྱེ་མཚོན་སླད་མྱ་ངན་གུས་འདུད་སྐར་མ་གཅིག་ཞུས་ཡོད།
དེ་ནས་ནང་སྲིད་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་ལགས་ཀྱིས་འཚམས་འདྲི་དང་འབྲེལ་ཚོགས་འདུ་ངོ་སྤྲོད་ཀྱི་གསུང་བཤད་གནང་དོན། དེ་རིང་ཚོགས་འདུ་འདི་གོ་སྒྲིག་ཞུ་དགོས་དོན་ནི། འདས་པའི་བཀའ་ཤག་ལ་རླབས་ཆེན་གྱི་དགོངས་གཞི་ཡོད་པ་གཞིར་བཟུང་བོད་མིའི་སྒྲིག་འཛུགས་ནང་ཡོད་པའི་སོ་ནམ་གཞིས་ཆགས་དང་མཉམ་འབྲེལ་ཁག དེ་བཞིན་བཟོ་གྲྭ་རྣམས་ཐོག་མར་གསར་དུ་འཛུགས་དགོས་པའི་དམིགས་ཡུལ་ནི། ང་ཚོ་བཙན་བྱོལ་དུ་སྡོད་རིང་ཁྱབ་ཁོངས་སོ་སོའི་མི་མང་ལ་ཁེ་ཕན་ཆ་ཚང་བ་ཞིག་བསྐྲུན་ཐུབ་ཆེད་རེད། གང་ལྟར་བཟོ་གཞིས་དང་མཉམ་འབྲེལ་གྱི་ལྟ་གྲུབ་མང་ཚོགས་ལ་གོ་རྟོགས་སྤེལ་བ་བརྒྱུད་མང་ཚོགས་ནས་བཟོ་གཞི་ཁག་འཛུགས་དགོས་དམིགས་རྣམས་ངོ་འཕྲོད་པའི་ཐོག་ནས་བཟོ་གྲྭ་དེ་དག་ང་ཚོའི་ཁེ་ཕན་ཆེད་དུ་བཙུགས་འདུག་བསམས་པའི་ཡིད་ཆེས་བརྟན་པོ་རྙེད་ཐུབ་པ་བྱེད་དགོས། ཕྱི་ལོ་ ༢༠༠༥།༢༠༠༦ ནང་མཉམ་འབྲེལ་ཁག་དང་ས་གནས་འགོ་འཛིན་ཟུར་དུ་འཛིན་སྐྱོང་ཁག་ཁག་བྱེད་རྒྱུའི་ལམ་ལུགས་ད་ལྟ་ཡང་འགྲོ་མུས་རེད། དེ་བཞིན་ཁྲིམས་མཐུན་དེབ་སྐྱེལ་ཡོད་པའི་བཟོ་གྲྭ་ཁག་དང་ས་གནས་འགོ་འཛིན་གཉིས་ཀྱི་ལས་དོན་དབྱེ་བ་འབྱེད་རྒྱུའི་དགོས་པ་རྒྱུ་མཚན་དུ་མ་གཟིགས་བཞིན་ཡོད། དེ་ལྟར་དབྱེ་དགོས་པའི་རྒྱབ་ལྗོངས་རྣམས་མང་ཚོགས་ནས་མ་གོ་མ་ཐོས་པའི་གསལ་བསྒྲགས་སྔ་ཕྱི་བཏང་ཡོད། བོད་མིའི་སྒྲིག་འཛུགས་རྩིས་ཞིབ་ལས་ཁུངས་ནས་རྩིས་ཞིབ་གནང་སའི་བཟོ་གཞིས་ཁག་གཅིག་ཡོད། ཁག་གཅིག་སོ་སོའི་ས་གནས་ལ་ཁྲིམས་མཐུན་ཐོག་ནས་རྩིས་ཞིབ་གནང་བ་མ་གཏོགས་སྤྱི་ཡོངས་ཀྱི་རྩིས་ཞིབ་དང་འཛིན་སྐྱོང་གནས་སྟངས་བོད་མིའི་སྒྲིག་འཛུགས་ཀྱིས་ཤེས་མ་ཐུབ་པའི་གནས་སྟངས་མང་དག་ཅིག་ཆགས་ཡོང་གི་ཡོད། དེར་བརྟེན་དེ་ཚོའི་རིགས་ང་ཚོ་དེ་རིང་གྲོས་གཞི་དོན་ཚན་བདུན་ཐོག་གོ་བསྡུར་ལྷུག་པོ་ཡོང་བའི་རེ་བ་ཞུ་བཞིན་ཡོད། ཅེས་་སོགས་ཀྱི་གསུང་བཤད་གནང་ཡོད།
དེ་ནས་སྲིད་སྐྱོང་མཆོག་གིས་ཚོགས་འདུ་དབུ་འབྱེད་ཀྱི་གསུང་བཤད་གནང་གྲུབ་མཚམས་ནང་སྲིད་དྲུང་འཕར་དོན་གྲུབ་རྡོ་རྗེ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་དངོས་གཞིའི་མཛད་སྒོ་གྲོལ།
དེ་ནས་ནང་སྲིད་བཀའ་བློན་མཆོག་གིས་གཙོ་སྐྱོང་འོག་ཚོགས་འདུ་དངོས་གཞི་དབུ་འཛུགས་དང་ལྷན་གྲོས་གཞི་དང་པོ། གཉིས་པ། གསུམ་པ། བཞི་པ་བཅས་ཀྱི་ཐོག་རིམ་བཞིན་གོ་བསྡུར་གནང་རྒྱུ་དང་། ཕྱི་ཚེས་ ༡༤ ཉིན་གྲོས་གཞི་ལྔ་པ། དྲུག་པ། བདུན་པའི་ཐོག་གོ་བསྡུར་གྲུབ་མཚམས་གྲོས་ཆོད་ཁག་ཕྱོགས་སྒྲིག་ཞུ་དག་དང་བཅས་གཏན་འབེབས་གནང་རྗེས་ནང་སྲིད་བཀའ་བློན་མཆོག་གིས་ཚོགས་འདུ་མཇུག་བསྡོམས་གནང་རྒྱུ་དང་། ལྷན་ཚོགས་དེ་བཞིན་ཉིན་གྲངས་གཉིས་རིང་ཚོགས་རྒྱུ་ཡིན་འདུག
