༢༠༡༤ ཟླ་ ༢ ཚེས་ ༧ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༢ ཚེས་ ༥ ཉིན་རྒྱ་གར་བྱང་ཕྱོགས་ཨ་སཱམ་གྱི་རྒྱལ་ས་གྷོ་ཧ་ཊིར་ (Guwahati) རྟེན་གཞི་བྱས་པའི་རྒྱལ་ཡོངས་ཁྲིམས་ཀྱི་གཙུག་ལག་སློབ་ཁང་དང་ཁྲིམས་ལུགས་རིག་པའི་ཤེས་ཡོན་བསྟི་གནས་ཁང་དུ་ (National Law University and Judicial Academy) བཙན་བྱོལ་བོད་མིའི་མང་གཙོའི་འཕེལ་རིམ་སྐོར་ལ་གསུང་བཤད་གནང་ཡོད། དེ་ཡང་ཐོག་མར་གཙུག་ལག་སློབ་གྲྭའི་འཛིན་སྐྱོང་འགན་འཛིན་མཆོག་གིས་ངོ་སྤྲོད་ཀྱི་གསུང་བཤད་གནང་སྐབས་གསུང་དོན། ཐེངས་འདིར་ང་ཚོའི་གཙུག་ལག་སློབ་ཁང་དུ་བོད་མིའི་ཆབ་སྲིད་ཀྱི་དབུ་ཁྲིད་སྲིད་སྐྱོང་བློ་བཟང་སེང་གེ་མཆོག་གདན་ཞུ་ཐུབ་པ་དེས་ང་ཚོར་ཆེ་མཐོང་ཧ་ཅང་ཐོབ་བྱུང་། དེར་བརྟེན་དེ་རིང་ནི་གཙུག་ལག་སློབ་གྲྭ་འདིའི་ལོ་རྒྱུས་ནང་དུས་སྐབས་གལ་ཆེ་ཤོས་ཤིག་ཆགས་ཡོད།
གཙུག་ལག་སློབ་ཁང་གི་སློབ་ཕྲུག་ཚོས་མཁས་དབང་བློ་བཟང་སེང་གེ་མཆོག་གིས་ལྡི་ལི་ཁྲིམས་ཀྱི་གཙུག་ལག་སློབ་གྲྭ་དང་ཨ་རིའི་ཧར་ཝར་ཌི་གཙུག་ལག་སློབ་གྲྭར་ཕེབས་པའི་ལོ་རྒྱུས་ལ་དཔེ་བླངས་ཏེ་མིག་དཔེ་ཡར་ལྟ་བྱེད་དགོས། ཞེས་གསུང་གྲུབ་བསྟུན། སྲིད་སྐྱོང་མཆོག་གིས་བཙན་བྱོལ་བོད་མི་ཚོས་མང་གཙོའི་ལམ་ལུགས་སྲ་བརྟན་ཡོང་ཆེད་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོན་འོག་ཤར་བསྐྱོད་བྱས་པའི་ཉེར་ལེན་ལ་བརྟེན་ད་ཆ་མང་གཙོའི་ཆ་ལག་ཡོངས་སུ་རྫོགས་པ་ཚང་བའི་སྤྱི་ཚོགས་ཤིག་བསྐྲུན་ཐུབ་ཡོད་སྐོར་དང་། གཞི་རྩའི་བཙན་བྱོལ་བོད་མིའི་མང་གཙོ་དེ་རྒྱ་གར་གྱི་མང་གཙོའི་ལམ་ལུགས་ལ་གཞི་བཅོལ་ནས་གཏན་འབེབས་གནང་བ་ཞིག་ཡིན་པ་མ་ཟད། མང་གཙོའི་ལམ་ལུགས་ཚད་ལོང་བ་ཞིག་ཆགས་ཡོད་པ་ནི་ཕྱི་ལོ་ ༢༠༡༡ ལོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་ཆབ་སྲིད་ཀྱི་སྐུ་དབང་ཡོངས་རྫོགས་མང་གཙོའི་ལམ་ནས་འོས་འདེམས་བྱས་པའི་ཆབ་སྲིད་ཀྱི་འགོ་ཁྲིད་ལ་ཆ་ཚང་རྩིས་སྤྲོད་མཛད་པ་ནས་ད་བར་ལོ་གཉིས་ལྷག་ཙམ་རིང་བཙན་བྱོལ་བོད་མིའི་སྤྱི་ཚོགས་ནང་ཞི་བདེ་ལྷིང་འཇགས་ཐོག་གནས་ཐུབ་པ་བྱུང་ཡོད་སྐོར་སོགས་ཀྱི་གསུང་བཤད་དང་།
སློབ་ཕྲུག་ཚོའི་དྲི་བར་ལན་འདེབས་གནང་ཡོད། སྐབས་དེར་སྲིད་སྐྱོང་མཆོག་གིས་དྲི་བ་ཞིག་ལ་ལན་གནང་དོན། ང་ཚོ་བོད་མི་ཚོས་རྒྱ་གར་གྱི་མེས་པོ་དམ་པ་གཱན་དྷི་མཆོག་གི་འཚེ་མེད་ཞི་བའི་ལམ་སྟོན་འོག་ཤར་བསྐྱོད་བྱ་རྒྱུ་དང་། བོད་མི་ཚོས་འཚེ་མེད་ཞི་བ་དང་གྲོས་མོལ་བརྒྱུད་ནས་རྒྱ་ནག་འགོ་ཁྲིད་དང་ལྷན་བོད་ཀྱི་གནད་དོན་སེལ་ཆེད་འབད་བརྩོན་མུ་མཐུད་བྱ་རྒྱུ་ཡིན། ཞེས་ལན་འདེབས་གནང་།
དེ་རྗེས་བོད་ནང་དུ་རང་ལུས་མེར་སྲེག་དང་འབྲེལ་བའི་དྲི་བར་ལན་འདེབས་གནང་དོན། བོད་ནང་དུ་བོད་མི་ཚོས་གཅིག་འཇུག་གཉིས་མཐུད་ཀྱིས་རང་ལུས་མེར་སྲེག་གཏོང་བཞིན་པ་འདིས་རྒྱ་ནག་གཞུང་གིས་བོད་ནང་དུ་དམ་བསྒྲགས་ཇི་ཙམ་བྱེད་བཞིན་ཡོད་པ་ཧ་ཅང་གསལ་པོ་མཚོན་ཐུབ། རྒྱ་ནག་གཞུང་གིས་རིག་གཞུང་རྩ་མེད་དང་ཁོར་ཡུག་གཏོར་ཤིག ཆོས་ལུགས། ཆབ་སྲིད། སྐད་ཡིག་སོགས་ལ་དམ་བསྒྲགས་བྱས་པ་མ་ཟད། བོད་མི་ཚོ་རྒྱ་མི་རིགས་ལས་དཔལ་འབྱོར་ཟུར་ཕུད་བྱས་པ་སོགས་ལ་བརྟེན་ནས་གཞིས་བཞུགས་བོད་མི་ཚོ་འ་ཆད་འུ་ཐུག་ནས་མཐར་རང་ལུས་མེར་སྲེག་གིས་མཚོན་ཚབས་ཆེའི་ལས་འགུལ་རིགས་སྤེལ་བཞིན་ཡོད། འོན་ཀྱང་རྡ་སར་རྟེན་གཞི་བྱས་པའི་བོད་མིའི་སྒྲིག་འཛུགས་ཀྱིས་གཞིས་བཞུགས་བོད་མི་ཚོར་རང་ལུས་མེར་སྲེག་གིས་མཚོན་ཚབས་ཆེའི་ལས་འགུལ་རིགས་ནམ་ཡང་མ་སྤེལ་རོགས་ཞེས་འབོད་སྐུ་བསྟུད་མར་ཞུས་དང་ཞུ་མུས་ཡིན། ཞེས་ལན་འདེབས་གནང་བ་མ་ཟད། སྲིད་སྐྱོང་མཆོག་གིས་སྐབས་དེར་བོད་དེ་བཞིན་རྒྱ་གར་གཙོ་བོར་གྱུར་བའི་ཨེ་ཤི་ཡའི་ས་ཁུལ་ནང་ས་བབ་ཆགས་སྟངས་ཀྱི་ཐོག་ནས་ཧ་ཅང་གནད་འགག་ཆེན་པོ་ཆགས་ཡོད་སྐོར་དང་།
ལྷག་པར་འཕགས་བོད་གཉིས་ས་བབ་དང་རིག་གཞུང་། ཁོར་ཡུག་སོགས་ལོ་རྒྱུས་ཐོག་ནས་འབྲེལ་བ་ཧ་ཅང་ཆེན་པོ་ཡོད་པར་བརྟེན། རྒྱ་གར་གཞུང་གིས་བོད་ཀྱི་གནད་དོན་སེལ་ཆེད་ཕན་ཐོགས་ཧ་ཅང་ཆེན་པོ་བསྒྲུབ་ཐུབ་ངེས་ཡིན་སྐོར་དང་། རྒྱ་གར་བྱང་ཤར་ཁུལ་དུ་གནས་སྡོད་ཡུལ་མི་ས་ཡ་མང་པོར་བོད་ནས་བྱུང་བའི་རྒྱུག་ཆུ་དེ་དག་ཧ་ཅང་གལ་ཆེན་པོ་ཆགས་ཡོད། དེང་སྐབས་རྒྱ་ནག་གཞུང་གིས་རྒྱུག་ཆུ་དེ་དག་ཁ་བསྒྱུར་བྱས་པ་དང་། ཆུ་མཛོད་རྒྱག་པ ཤིང་ནགས་གཅོད་འབྲེག་བྱས་པ་སོགས་ཀྱི་བྱ་སྤྱོད་ལ་བརྟེན་ནས་རྒྱུག་ཆུའི་གཤམ་འོག་ཏུ་གནས་པའི་ཡུལ་མི་ཚོའི་འཚོ་བའི་གནས་སྟངས་ཐོག་ཧ་ཅང་ཉེན་ཚབས་ཆེན་པོ་བཟོ་བཞིན་ཡོད། བོད་ནང་རྒྱ་ནག་གིས་བཙན་འཛུལ་མ་བྱས་གོང་བོད་མི་ཚོས་ཁྱིམ་མཚེས་རྒྱལ་ཁབ་དང་ལྷན་ཞི་བདེ་དང་འཆམ་མཐུན་ངང་འཚོ་གནས་བྱས་ཡོད། ཅེས་ལན་འདེབས་གནང་ཡོད།
