༢༠༡༤ ཟླ་ ༢ ཚེས་ ༧ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༢ ཚེས་ ༤ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཤི་ལོང་གི་པོ་ལོ་ཐང་ཆེན་ (Polo ground) དུ་བོད་རིགས་རྣམས་ལ་ཤེས་ཡོན་གལ་ཆེན་ཡིན་སྐོར་གསུང་བཤད་གནང་དོན། དེ་རིང་ང་རང་འདི་གར་ཡོང་སྟེ་ཁྱེད་རང་ཚོ་དང་ཐུག་པར་ཧ་ཅང་དགའ་པོ་བྱུང། སྤྱིར་བཏང་ང་ཚོ་བོད་མི་ས་ཡ་དྲུག་གིས་རྒྱ་ནག་མི་འབོར་ཐེར་འབུམ་གཅིག་དང་ས་ཡ་གསུམ་ལ་གདོང་ལེན་བྱེད་རྒྱུའི་ལག་ཆ་ནི་ཤེས་ཡོན་ཁོ་ན་ཆགས་ཡོད་པ་མ་ཟད། བོད་ནང་གི་བོད་མིའི་མངོན་འདོད་བསྒྲུབ་རྒྱུ་ཡང་ཤེས་ཡོན་ཆགས་ཡོད་སྟབས། ཕ་མ་ཚོས་ཕྲུ་གུའི་ཤེས་ཡོན་ཐོག་འགན་ཁུར་ཤུགས་ཆེ་ཙམ་ལེན་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། ཤེས་ཡོན་ལ་འབད་བརྩོན་བྱས་ཐོག་ང་ཚོ་བོད་མིའི་ནུས་པ་དེ་ཚད་ལྡན་ཞིག་འདོན་རྒྱུར་ཤེས་ཡོན་གྱི་ཐབས་ལམ་མ་གཏོགས་མེད་པ་ཧ་ཅང་གསལ་པོ་རེད།
དེར་བརྟེན་ཤེས་ཡོན་གལ་ཆེན་པོ་ཡིན་པས་སྤྱིར་བོད་རིགས་ཚོ་དང་དེ་མིན་མོན་པ་དང་འབྲུག་པས་གཙོས་ས་གནས་ཁག་ནས་ཕེབས་པ་ཚང་མར་ཞུ་འདོད་བྱུང། བོད་ནང་ཡོད་པའི་བོད་མི་ས་ཡ་དྲུག་གི་རེ་བ་བཅོལ་ས་གཙོ་བོ་དེ་བཙན་བྱོལ་དུ་ཡོད་པའི་བོད་མི་རྣམས་རེད། བོད་ནང་བོད་མི་ས་ཡ་དྲུག་དང་བཙན་བྱོལ་ནང་བོད་མི་འབུམ་གཅིག་དང་ཕྱེད་ཀ་ཡོད། བརྒྱ་ཆ་བགོས་ན་བརྒྱ་ཆ་དགུ་བཅུ་གོ་བདུན་དང་ཕྱེད་ཀ་བོད་ནང་ཡོད། བརྒྱ་ཆ་གཉིས་དང་ཕྱེད་ཀ་བཙན་བྱོལ་ནང་ཡོད། བཙན་བྱོལ་ནང་ཡོད་པའི་བོད་མིས་བོད་ནང་ཡོད་པའི་བོད་མིའི་རེ་བ་དང་མངོན་འདོད་བསྒྲུབ་རྒྱུའི་ནུས་པ་ཡོངས་རྫོགས་འདོན་རྒྱུར་ཤེས་ཡོན་གྱི་ཐབས་ལམ་མ་གཏོགས་མེད་པ་ཧ་ཅང་གསལ་པོ་རེད། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལོ་མང་རིང་ནས་ཤེས་ཡོན་གལ་ཆེན་སྐོར་བཀའ་སློབ་རབས་དང་རིམ་པ་ཕེབས་ཡོད། དེར་བརྟེན་ཕ་མ་ཚོས་ཕྲུ་གུར་ཤེས་ཡོན་སྤྲོད་རྒྱུ་དེ་གལ་ཆེན་ཡིན་སྐོར་འགན་ཁྱེར་ཏེ་དུས་རྟག་ཏུ་ལམ་སྟོན་གནང་དགོས། དེ་བཞིན་བོད་མི་གཞོན་སྐྱེས་ཚོས་༸གོང་ས་མཆོག་དང་མི་རབས་རྒན་པ་ཚོའི་བཀའ་དྲིན་ནམ་ཡང་བརྗེད་རྒྱུ་མེད། ཁོང་རྣམ་པའི་སྙིང་སྟོབས་དང་སེམས་ཤུགས་ལ་བརྟེན་ནས་ང་ཚོ་ད་ལྟ་སྤོབས་པ་ཆེན་པོའི་ཐོག་ནས་བསྐྱོད་ཐུབ་པ་དེ་ཁོང་རྣམ་པའི་བཀའ་དྲིན་ཆགས་ཡོད། ང་རང་སྲིད་སྐྱོང་དུ་སླེབས་ཏེ་ལོ་གཉིས་ལྷག་འགྲོ་གི་ཡོད། དུས་ཡུན་དེའི་རིང་བོད་མི་རྣམས་ལྷིང་འཇགས་ཐོག་གནས་པ་དེས་རྒྱ་ནག་གཞུང་དང་དམིགས་བསལ་མཁྲེགས་འཛིན་ཅན་གྱི་སྲིད་བྱུས་འཛིན་མཁན་ཚོའི་རེ་བ་བསྒྲུབས་ཐུབ་མེད། བཙན་བྱོལ་ནང་གི་བོད་མི་ཚོས་འགན་ཁུར་བ་མ་ཟད། རྡོག་རྩ་ཆིག་སྒྲིལ་ཡིན། ༸གོང་ས་མཆོག་གིས་ལམ་སྟོན་བཀའ་སློབ་གཞིར་བཟུང་ང་ཚོས་འགྲོ་བཞིན་ཡོད། ཅེས་པའི་བརྡ་ལན་གསལ་པོ་ཞིག་བཏང་ཐུབ་ཡོད། དེ་བཞིན་བོད་མིའི་སྒྲིག་འཛུགས་ཀྱིས་དབུ་མའི་ལམ་བརྒྱུད་ནས་བོད་རྒྱ་འབྲེལ་མོལ་ཡོང་ཐབས་བྱེད་བཞིན་པའི་སྲིད་བྱུས་ལ་ཨ་རིས་གཙོས་ཡུ་རོབ་དང་རྒྱ་གར་སོགས་ཀྱི་རྒྱལ་ཁབ་ཁག་ནས་རྒྱབ་སྐྱོར་གནང་བཞིན་ཡོད།
ལྷག་པར་ངས་དེ་རིང་དོལ་རྒྱལ་དང་འབྲེལ་བའི་སྐོར་ལ་ཚིག་ཁ་ཤས་ཤིག་བརྗོད་ན་བསམས་པ་དྲན་བྱུང། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དོལ་རྒྱལ་དང་འབྲེལ་བའི་ལམ་སྟོན་བཀའ་སློབ་ཕེབས་ཡོད། དེ་ལྟར་ཕེབས་དགོས་དོན་ནི། ནང་པ་སངས་རྒྱས་པའི་ཆོས་ཉམས་ལེན་ཡང་དག་གང་འདྲ་གནང་དགོས་མིན་དང་འབྲེལ་བའི་ཐོག་ནས་བཀའ་སློབ་ཕེབས་ཡོད། སྐྱོན་འཛུགས་བྱེད་མཁན་ཉུང་ཤས་ཤིག་ཡོད་པ་དེ་དག་གིས་སྤྱི་ཚོགས་ནང་ཆོས་དད་རང་དབང་མེད་སྐོར་བརྗོད་ཀྱི་ཡོད། དེ་དག་ནི་གཞི་རྩ་གང་མང་མེད། ཅེས་བརྗོད་རྒྱུ་ཡིན། ནང་པ་སངས་རྒྱས་པའི་ཆོས་ཡང་དག་ཉམས་ལེན་གནང་མཁན་ཞིག་ཡིན་ན། ༸གོང་ས་༸སྐྱབས་མགོན་ཆེན་པོ་མཆོག་གིས་ལམ་སྟོན་བཀའ་སློབ་ཕེབས་པ་ལྟར་བསྐྱོད་དགོས་རྒྱུ་ཧ་ཅང་གལ་ཆེན་པོ་རེད། དེ་མིན་ཆོས་དད་རང་དབང་ཁ་ལ་འཁྱེར་ཏེ་༸གོང་ས་མཆོག་ལ་མཚན་སྨད་ཞུ་རྒྱུ་དང་། ཉེ་ཆར་ཨ་རིར་ཕེབས་སྐབས་མི་ཉུང་ཤས་ཤིག་ལས་མེད་ཀྱང་དེ་དག་གིས་ངོ་རྒོལ་གྱི་རྣམ་པ་སྟོན་རྒྱུ་ནི་ཧ་ཅང་ཐབས་སྐྱོ་པོ་རེད། དེ་བཞིན་རྒྱ་གར་དང་ཨ་རིའི་སྙན་ཐོའི་ནང་དོལ་རྒྱལ་རྗེས་འབྲང་པ་ཚོས་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཕྱྭར་ཉེན་ཁ་ཡོད་སྐོར་བཀོད་ཡོད། གནས་ཚུལ་དེ་དག་ཐོག་བོད་མི་ཚང་མས་སྤྱང་གྲུང་དང་གཟབ་གཟབ་གནང་རྒྱུ་གལ་ཆེན་པོ་ཡིན་པ་ནན་ཏན་ཐོག་ནས་བརྗོད་རྒྱུ་ཡིན། སྤྱིར་བཏང་ཉུང་ཤས་ཤིག་གིས་སྐྱོན་འཛུགས་བྱས་ཀྱང་༸གོང་ས་མཆོག་གི་མཛད་འཕྲིན་འཛམ་གླིང་སྤྱི་ཡོངས་ནང་སྔར་ལྷག་རྒྱས་དང་རྒྱས་མུས་ཡིན་པ་ཧ་ཅང་གསལ་པོ་རེད། ཅེས་སོགས་ཀྱི་གསུང་བཤད་གནང་ཡོད།
