༢༠༡༤ ཟླ་ ༢ ཚེས་ ༢༤ རེས་གཟའ་ཟླ་བ།

༄༅༎སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་ནུབ་ཕྱོགས་མངའ་སྡེ་ཁལ་ལི་ཕོར་ནི་ཡར་རྟེན་གཞི་བྱས་པའི་ (American Himalayan Foundation) ཧི་མ་ལ་ཡའི་ཐེབས་རྩས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ་ཕྱི་ལོ་ ༢༠༡༤ ཟླ་ ༢ ཚེས་ ༢༢ ཉིན་གྱི་ཕྱེད་ཡོལ་མགོན་པོ་གང་ཉིད་མཆོག་གིས་སན་ཕ་རན་སི་སི་ཁོ་ (San Francisco) སྒྱུ་རྩལ་འཁྲབ་སྟོན་ཚོགས་ཁང་ཆེན་མོའི་ནང་སེམས་ཀྱི་རང་བཞིན། ཞེས་པའི་བརྗོད་གཞིའི་ཐོག་མང་ཚོགས་ ༢༤༠༠ བརྒལ་བར་བཀའ་སློབ་སྩལ་ཡོད།
དེ་ཡང་ཐོག་མར་རོལ་དབྱངས་འབུལ་ལམ་ཞུས་ཏེ་༸གོང་ས་༸སྐྱབས་མགོན་ཆེན་པོ་མཆོག་སྡིངས་ཆའི་ཐོག་གདན་འདྲེན་ཞུས་གྲུབ་མཚམས་ཧི་མ་ལ་ཡའི་ཚོགས་པའི་འགན་འཛིན་སྐུ་ཞབས་(Richard Bloom) ལགས་ཀྱིས་ངོ་སྤྲོད་ཀྱི་གསུང་བཤད་གནང་དོན། དེ་རིང་མི་མང་པོ་ཞིག་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་བོད་ཀྱི་༸སྐྱབས་མགོན་ཏཱ་ལའི་བླ་མ་སྐུ་ཕྲེང་བཅུ་བཞི་པ་བསྟན་འཛིན་རྒྱ་མཚོ་མཆོག་གི་བཀའ་སློབ་ཞུ་བར་ཕེབས་པར་ཧ་ཅང་དགའ་པོ་བྱུང། སོགས་ཀྱི་གསུང་བཤད་གནང་ཡོད།
དེ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་བརྗོད་གཞི་དང་འབྲེལ་བའི་ལམ་སྟོན་བཀའ་སློབ་སྩལ་དོན། དེ་རིང་ངོས་རང་འདི་གར་ཡོང་སྟེ་ཁྱེད་རང་ཚོ་དང་ཐུག་རྒྱུ་བྱུང་བར་ཧ་ཅང་དགའ་སྤོབས་ཆེན་པོ་བྱུང། སྤྱིར་བཏང་ངོས་ཀྱིས་མི་དམངས་དང་ཐུག་འཕྲད་བྱ་རྒྱུ་དེ་ཧ་ཅང་གལ་ཆེན་པོ་རྩི་བཞིན་ཡོད། ངོས་རང་འཛམ་གླིང་འདིའི་སྟེང་མི་དུང་ཕྱུར་བདུན་ཅུ་ལྷག་ཡོད་ཁོངས་ནས་གཅིག་ཆགས་ཡོད། ང་ཚོ་འགྲོ་བ་མི་ཚང་མ་ཡོངས་རྫོགས་བདེ་བ་འདོད་པ་དང་སྡུག་བསྔལ་མི་འདོད་མཁན་ཤ་སྟག་ཡིན། འཛམ་གླིང་སྤྱི་དང་བྱེ་བྲག་རྒྱལ་ཁབ་ཀྱིས་གཙོས་ཁྱིམ་ཚང་། ཐ་ན་མི་སྒེར་ལའང་དཀའ་རྙོག་མང་དག་ཅིག་འཕྲད་དང་འཕྲད་མུས་རེད། འོན་ཀྱང་ང་ཚོས་དཀའ་ངལ་དེ་དག་ལ་གདོང་ལེན་གྱིས་རང་ཉིད་ཀྱི་སེམས་ལ་ཞི་བདེ་སྐྲུན་ཐབས་བྱེད་དགོས། ལྷག་པར་སློབ་གསོའི་ཁྱབ་ཁོངས་སུ་ཆོས་ལུགས་དང་མ་འདྲེས་པའི་ཡ་རབས་བཟང་སྤྱོད་གོང་སྤེལ་གཏོང་ཕྱོགས་སྐོར་སློབ་གྲྭ་ཁག་གི་ཤེས་ཡོན་ལམ་ལུགས་ནང་འཇུག་ཐབས་བྱེད་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། ངོས་སྒེར་གྱིས་ཉམས་མྱོང་ཐོག་ནས་བརྗོད་ན། སེམས་ཞི་དུལ་ངང་གནས་ཐུབ་ཚེ་ལུས་པོའི་འཕྲོད་བསྟེན་ལ་ཕན་ཐོགས་ཆེན་པོ་འདུག དེ་བཞིན་ཚན་རིག་པ་ཚོས་ཀྱང་ཁོང་ཁྲོ་ཤུགས་ཆེན་ལངས་ན་ལུས་པོར་གནོད་ཀྱི་ཡོད་སྐོར་བརྗོད་ཀྱི་འདུག སེམས་ནི་རི་མོ་ལྟ་བུ་རེད། རི་མོ་བརྟེན་ས་རྩིག་པ་ཞིག་དགོས་ཀྱི་ཡོད། རྩིག་པ་དང་འདྲ་བའི་ལུས་པོར་བརྟེན་ནས་རི་མོ་དང་འདྲ་བའི་སེམས་ཀྱི་ཆ་དེ་ཡོང་གི་ཡོད། ཅེས་སོགས་ཀྱི་བཀའ་སློབ་ཕེབས་ཡོད། དེ་ནས་ཚོགས་རྭའི་ནང་བོད་ཀྱི་རྒྱལ་དར་དང་ཨ་རིའི་རྒྱལ་དར་སྒྲེང་འཛུགས་བྱས་ཡོད་པར་གཟིགས་ཏེ་བཀའ་སློབ་ཕེབས་དོན། ངོས་རང་ཕྱི་ལོ་ ༡༩༥༤ ལོར་རྒྱ་ནག་ཏུ་ཕྱིན་ཏེ་མའོ་ཙེ་ཏུང་དང་ཐུག་འཕྲད་བྱུང་བ་རེད། སྐབས་དེ་དུས་མའོ་ཙེ་ཏུང་གིས་བོད་ལ་རྒྱལ་དར་ཡོད་དམ། ཅེས་དྲིས་བྱུང་། ངོས་ཀྱིས་བོད་ལ་རྒྱལ་དར་ཡོད། ཅེས་བརྗོད་པར། མའོ་ཙེ་ཏུང་གིས་བོད་ཀྱི་རྒྱལ་དར་སྒྲེང་འཛུགས་བྱེད་ཆོག་སྐོར་བརྗོད་བྱུང་། ཞེས་བཀའ་སློབ་སྩལ་ཡོད།