༢༠༡༤ ཟླ་ ༤ ཚེས་ ༡༧ རེས་གཟའ་ཟླ་བ།

༄༅། །བརྒྱུད་ལམ་ཁག་གཅིག་ནང་ཐོན་གསལ་ལྟར་ན། ཏཱ་ལའི་བླ་མའི་མཁྱེན་པའམ། དབྱིན་སྐད་ནང་ (Dalai Lama Awakening) ཞེས་པའི་གློག་བརྙན་གསར་པ་ཞིག་བཟོ་བསྐྲུན་ཞུས་ཡོད་པ་དེ། རྒྱ་ཁྱབ་ཏུ་འགྲེམས་སྤེལ་མ་ཞུས་གོང་ཕྱི་ལོ་ ༢༠༡༤ ཟླ་ ༢ ཚེས་ ༢༨ ཉིན་དམིགས་བསལ་མགྲོན་འབོད་ཀྱི་སྐུ་མགྲོན་དང་གསར་འགོད་པ་སོགས་ལ་སྟོན་རྒྱུ་ཡིན་འདུག

དེ་ཡང་གློག་བརྙན་འདི་ནི་ནུབ་ཕྱོགས་ཀྱི་གསར་གཏོད་རང་བཞིན་གྱི་བསམ་བློ་ཡོད་མཁན་ཤེས་ཡོན་ཅན་གྱི་མི་སྣ་ཁག་གཅིག་གིས་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་འཕྲད་ཞུས་རྗེས་ཁོང་ཚོའི་མི་ཚེའི་ནང་འགྱུར་བ་རླབས་ཆེན་ཕྱིན་པའི་དངོས་བྱུང་ལོ་རྒྱུས་གཞི་ལ་བཞག་སྟེ་བཟོས་པ་ཞིག་ཡིན་འདུག
གློག་བརྙན་བཟོ་མཁན་ཁ་ཤ་ཡར། རྡར་ཝིཅ་ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གི་མཚན་གནས་རྗེས་འབྲེལ་གྱི་གློག་བརྙན་ཏཱ་ལའི་བླ་མའི་དུས་སྐབས་སམ། (Dalai Lama Renaissance) ཞེས་པ་ཞིག་བཟོ་བསྐྲུན་ཞུས་པར་བྱ་དགའ་ཆེ་ཆུང་གྲངས་བཅུ་གཉིས་ཙམ་ཐོབ་ཡོད་འདུག
གློག་བརྙན་བཟོ་སྐྲུན་པས་གློག་བརྙན་འདི་བཟོས་པའི་གནས་སྐབས་སུ་ཡང་ཁོང་རང་གི་ སེམས་ཀྱི་གཏིང་ནས་མགུལ་བསྐྱོད་བྱུང་བ་ལྟར། གློག་བརྙན་ལྟ་བ་པོ་ཚོའི་སེམས་ཀྱི་ནང་ཡང་བག་ཆགས་དང་འགྱུར་བ་བཟང་པོ་ཞིག་འབྱུང་རྒྱུར་གདེང་སྤོབས་དང་ཡིད་ཆེས་ཡོད། ཅེས་གསུངས་འདུག