༢༠༡༤ ཟླ་ ༢ ཚེས་ ༢༧ རེས་གཟའ་ཕུར་བུ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་ཁལ་ལི་ཕོར་ནི་ཡའི་མངའ་སྡེའི་ལོ་སི་ཨན་ཇི་ལི་སིའི་ (Los Angeles) གྲོང་ཁྱེར་ནང་རྟེན་གཞི་བྱས་པའི་ལོར་ཌེ་སི་ཐེབས་རྩ་ཚོགས་
པས་(Lourdes Foundation) ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་ཟབ་མོ་ཐོབ་སྟེ་མགོན་པོ་གང་ཉིད་མཆོག་གིས་ཕྱི་ལོ་ ༢༠༡༤ ཟླ་ ༢ ཚེས་ ༢༥ ཉིན་གྱི་ཕྱེད་ཡོལ་ཆུ་ཚོད་ ༢ པའི་ཐོག་ལོ་སི་ཨན་ཇི་ལི་སིར་མི་དམངས་ཁྲི་བརྒལ་བར་འཚེ་མེད་ཞི་བ་དང་དུས་རབས་ཉེར་གཅིག་པའི་སྙིང་རྗེའི་ནུས་ཤུགས་ཀྱི་བརྗོད་གཞིའི་ཐོག་ལམ་སྟོན་བཀའ་སློབ་སྩལ་ཡོད།
དེ་ཡང་ཐོག་མར་གྲོང་སྡེའི་སྤྱི་ཁྱབ་པ་མཆོག་གིས་ཕེབས་བསུའི་གསུང་བཤད་གྲུབ་མཚམས་ལྕམ་སྐུ་མ་རི་ཡ་ཤ་ཝེར་ལགས་ཀྱིས་ (Maria Shriver) མགོན་པོ་གང་ཉིད་མཆོག་ལ་ཆེ་བསྟོད་ཞུས་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་བྱམས་སྙིང་རྗེ་དང་ཞི་བདེའི་སྐོར་བཀའ་སློབ་སྩལ་དང་སྕོལ་མུས་རྣམས་འཛམ་གླིང་འདིར་ཧ་ཅང་གལ་ཆེན་པོ་ཆགས་ཡོད། ལྷག་པར་སྐུ་ཉིད་མཆོག་གིས་མི་སྒེར་པ་སོ་སོའི་སེམས་ཀྱི་ཞི་བདེ་དང་བདེ་སྐྱིད་ཀྱི་འཚོ་བས་ཐད་ཀར་ལུས་པོའི་འཕྲོད་བསྟེན་དང་སྤྱི་ཚོགས་ལ་ཤུགས་རྐྱེན་ཐེབས་ཀྱི་ཡོད་སྐོར་བཀའ་སློབ་ཕེབས་ཀྱི་ཡོད། དེར་བརྟེན་སྐུ་ཉིད་མཆོག་ནི་འཛམ་གླིང་འདིའི་སྟེང་གི་ཉི་མོ་ཡིན་པ་མ་ཟད། གང་ཉིད་མཆོག་གིས་སྩལ་བའི་བཀའ་སློབ་རྣམས་ཚང་མས་ལག་བསྟར་བྱས་ན་ཨ་རི་ནི་བྱམས་བརྩེ་ལྡན་པའི་གྲོང་ཁྱེར་ཞིག་ཆགས་ཀྱི་རེད། ཅེས་ཞུས་ཡོད།
དེ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བརྗོད་གཞིའི་ཐོག་བཀའ་སློབ་སྩལ་དོན། དེ་རིང་འདི་གར་མི་མང་པོ་འདི་ལྟ་བུའི་ཁྲོད་གཏམ་བཤད་བྱེད་རྒྱུ་བྱུང་བར་ཧ་ཅང་དགའ་པོ་བྱུང། ལྷག་པར་སློབ་ཕྲུག་སྟོང་ཕྲག་ལྷག་འདི་གར་སླེབས་འདུག སྤྱིར་བཏང་ང་ཚོ་ཚང་མ་འགྲོ་བ་མི་བདེ་སྡུག་གི་ཚོར་བ་ཡོད་མཁན་གཅིག་གྱུར་ཆགས་ཡོད་པ་མ་ཟད་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་གྱུར་ཡིན། དེང་སྐབས་ང་ཚོ་དུས་རབས་ཉེར་གཅིག་གི་འགོ་སྟོད་ལ་ཡོད། འདས་པའི་དུས་རབས་ཉི་ཤུར་ཕྱིར་མིག་བལྟས་ན། ཚན་རིག་འཕེལ་རྒྱས་ཕྱིན་པ་དང་ཆབས་ཅིག་འཚོ་བའི་མཐུན་རྐྱེན་ཡང་ཡར་རྒྱས་ཕྱིན་ཡོད། དེ་དང་དུས་མཚུངས་གནོད་འཚེའི་རང་བཞིན་གྱིས་གནས་ཚུལ་མང་པོ་ཐོན་ཡོད། ལོ་རྒྱུས་ཉམས་ཞིབ་པ་ཁག་གཅིག་གིས་དུས་རབས་ཉི་ཤུའི་ནང་མི་ས་ཡ་ཉིས་བརྒྱ་དམར་གསོད་བཏང་ཡོད་སྐོར་བརྗོད་ཀྱི་འདུག ཐ་ན། དུས་རབས་འདི་འགོ་འཛུགས་སྐབས་ཀྱང་དཀའ་རྙོག་མང་དག་ཅིག་ཐོན་ཡོད། དེ་དག་ནི་འགྲོ་བ་མིའི་བསམ་བློ་གཏོང་སྟངས་ནོར་འཁྲུལ་དབང་གིས་བྱུང་བ་ཤ་སྟག་ཆགས་ཡོད། དེ་བཞིན་ཁོར་ཡུག་སྲུང་སྐྱོབ་བྱེད་རྒྱུ་ང་ཚོ་ཚང་མར་འགན་འཁྲི་ཆེན་པོ་ཡོད། དེ་སྔ་ངོས་རང་ལ་བོད་ནང་སྡོད་སྐབས་ཆུ་གང་འདྲ་ཞིག་ཡིན་རུང་འཐུང་ཆོག་གི་རེད། རྒྱ་གར་དུ་བཙན་བྱོལ་ལ་བསླེབས་རྗེས་ཆུ་འདི་འཐུང་ཉན་གྱི་མ་རེད། ཅེས་བརྗོད་སྐབས་ཡ་མཚན་སྐྱེས་བྱུང་། སྤྱིར་བཏང་དེང་སྐབས་འཐུང་ཆུར་དཀའ་ངལ་འཕྲད་བཞིན་ཡོད་ལ་ཁལ་ལི་ཕོར་ནི་ཡར་དཀའ་ངལ་དེ་ལྟར་འཕྲད་ཀྱི་ཡོད། ལྷག་པར་རང་ལོ་ཉེར་ལྔ་མན་གྱི་སློབ་ཕྲུག་རྣམས་དུས་རབས་ཉེར་གཅིག་གི་མི་རབས་ཆགས་ཀྱི་ཡོད། མ་འོངས་པར་དུས་རབས་འདི་གང་འདྲ་ཆགས་མིན་ཁྱེད་རང་ཚོའི་ལག་པར་ཡོད། འདས་པའི་དུས་ཚོད་ལ་ང་ཚོས་བསྒྱུར་བ་གཏོང་ཐབས་མེད། འོན་ཀྱང་མ་འོངས་པར་ཁ་ཕྱོགས་ཏེ་བྱམས་བརྩེ་ལྡན་པའི་སྤྱི་ཚོགས་ཤིག་འཛུགས་སྐྲུན་བྱེད་རྒྱུ་གཞོན་སྐྱེས་ཁྱེད་རང་ཚོར་འགན་འཁྲི་ཡོད། ཅེས་བཀའ་སློབ་ཕེབས་ཡོད།
ལྷག་པར་མགོན་པོ་གང་ཉིད་མཆོག་གིས་ཁུལ་དེའི་གསར་འགོད་པ་ཁག་གཅིག་གི་ཆེད་དོན་དྲི་བར་བཀའ་ལན་ཡང་སྩལ་ཡོད།
