༢༠༡༤ ཟླ་ ༡ ཚེས་ ༡༣ རེས་གཟའ་ཟླ་བ།
༄༅། །སྤྱི་ནོར་༸གོང་ས་༸སྐྱབས་མགོན་པོ་ཆེན་པོ་མཆོག་ལ་བྷན་ངྷ་ར་ནོར་རྒྱས་གླིང་གི་གཞིས་མི་ཡོངས་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ་ཕྱི་ལོ་ ༢༠༡༤ ཟླ་ ༡ ཚེས་ ༡༡ ཉིན་སྔ་དྲོ་མགོན་པོ་གང་ཉིད་མཆོག་གིས་བྷན་ངྷ་ར་ནོར་རྒྱས་གླིང་གཞིས་དགོན་ཐེག་ཆེན་གླིང་གི་མདུན་ཐང་དུ་གཞིས་འགོས་གཙོས་ས་གནས་གྲོས་ཚོགས་ཀྱི་ཚོགས་གཙོ་དང་གཞིས་ཁུལ་དེའི་བོད་མི་སེར་སྐྱ་མི་དམངས་གཙོ་བོ་གྱུར་བའི་རྒྱ་གར་ནང་པ། དེ་བཞིན་ཕྱི་རྒྱལ་ཡུལ་གྲུ་ཁག་ནས་ཕེབས་པའི་དད་ལྡན་པ་བཅས་ཁྱོན་མི་གྲངས་ ༢༠༠༠ བརྒལ་བར་འཕགས་པ་ཐུགས་རྗེ་ཆེན་པོའི་བཀའ་དབང་སྔོན་ལ་བཀའ་སློབ་ཕེབས་དོན། དེ་རིང་ངོས་རང་འདི་གར་ཡོང་སྟེ་ཁྱེད་རང་ཚོ་དང་ཐུག་རྒྱུ་བྱུང་བར་ཧ་ཅང་དགའ་པོ་བྱུང། ཕྱི་ལོ་ ༡༩༥༩ ལོར་ང་ཚོ་བཙན་བྱོལ་བ་ཆགས་པ་རེད། སྐབས་དེ་དུས་ལྷ་ས་དང་ལྷོ་ཁ་ཁུལ་ནས་མི་གང་ཙམ་དང་། ཆུ་བཞི་སྒང་དྲུག་ནས་མི་ཧྲེང་དེ་འདྲ་གང་ཙམ་ཞིག་སླེབས་ཡོད།
ཕྱི་ལོ་ ༡༩༦༠ ནང་སྟོད་མངའ་རིས་ཁུལ་ནས་མང་དག་ཅིག་སླེབས་ཡོད། གང་ལྟར་ང་ཚོ་བཙན་བྱོལ་བ་འགོ་སྟོད་ཕལ་ཆེར་ཁྲི་བརྒྱད་རེད། དེ་ནས་འབུམ་གཅིག་ལྷག་ཆགས་ཡོད། དེང་སྐབས་ཁྱོན་བསྡོམས་འབུམ་གཅིག་དང་ཕྱེད་ཀ་ཙམ་རེད། ཕྱི་ལོ་ ༡༩༨༠ ནང་བོད་ནས་གསར་འབྱོར་མང་པོ་ཞིག་ཡོང་ཡོད་པ་མ་ཟད། གཞི་རྐང་གདན་ས་ཁག་ནང་དཔེ་ཆ་ལྟ་མཁན་སྟོང་ཕྲག་ཁ་ཤས་ཤིག་དང་། དེ་བཞིན་སློབ་ཕྲུག་སྟོང་ཕྲག་ཁ་ཤས་ཤིག་སླེབས་ཡོད། གང་ལྟར་ང་ཚོ་ལོ་ཡུན་དེའི་རིང་ལ་མི་རབས་བརྗེ་འགྲོ་གི་ཡོད་ཀྱང་བོད་མི་རིགས་ཀྱི་བདེན་པའི་འཐབ་རྩོད་བྱེད་མཁན་ཚང་མས་སེམས་ཁུར་བླངས་ཏེ་བསྡད་པ་རེད། ང་ཚོ་འདི་གར་བདེན་པའི་འཐབ་རྩོད་མུ་མཐུད་ནས་བྱེད་རྒྱུ་གཙོ་བོ་དེ་བོད་ནང་གི་གཞིས་ལུས་རྒྱ་ཆེའི་མི་དམངས་རྣམས་ཧ་ལས་པའི་སེམས་ཤུགས་དང་སྙིང་སྟོབས་རེད་འདུག
མི་རབས་བརྗེ་འགྲོ་གི་ཡོད་ཀྱང་བོད་མི་རིགས་ཀྱི་སོ་སོའི་ལྟ་བ་དང་མི་རིགས་ཀྱི་ཞེན་ཁོག་འགྱུར་བ་མེད་པར་གནས་འདུག ལོ་ཡུན་དེ་དག་རིང་རྒྱ་གུང་ཁྲན་ཏང་གིས་འཇམ་རྩུབ་ཐབས་ཤེས་ཡོད་རྒུ་རྩལ་སྤྲུག་བྱས་ཡོད་ཀྱང་ཐབས་ཤེས་ཐུབ་མེད། དེ་ལྟ་བུའི་བདེན་པའི་གནས་ཚུལ་གསལ་པོ་ཆགས་ཡོང་སྐབས། དེང་སང་རྒྱ་རིགས་ནང་ནས་མང་དག་ཅིག་གིས་བོད་དོན་ལ་ཤ་ཚ་དང་རྒྱབ་སྐྱོར་བྱེད་ཀྱི་འདུག འཛམ་གླིང་ཕྱི་ཕྱོགས་ནས་བོད་ཀྱི་དཀའ་ངལ་དེ་བདེན་དོན་དང་འབྲེལ་བ་ཞིག་ལ་ངོས་འཛིན་བྱས་ཏེ་བོད་དོན་ལ་དོ་སྣང་བྱེད་མཁན་ཤུགས་ཆེ་རུ་འགྲོ་གི་འདུག གང་ལྟར་བཀའ་འགྱུར་བསྟན་འགྱུར་པོ་ཏི་སུམ་བརྒྱ་ཙམ་ཡོད་པར་འཆད་ཉན་དང་སློབ་གཉེར་བྱེད་དགོས། སློབ་གཉེར་བྱས་པའི་དགོས་དོན་ཡང་ཐོས་བརྩོན་སྒྲུབ་ལ་གཞོལ་ཏེ་ཉམས་ལེན་བྱེད་རྒྱུ་གལ་ཆེན་པོ་རེད། གཉིས་ནས། བོད་ཀྱི་སངས་རྒྱས་པའི་ཆོས་དང་སྙིང་རྗེའི་རྩ་བར་གྱུར་བའི་རིག་གཞུང་དེར་འཛམ་གླིང་ནང་ནས་དོ་སྣང་བྱེད་མཁན་ཚོས་ངོས་འཛིན་དེ་ལྟར་བྱེད་བཞིན་འདུག
གསར་དུ་བཞེངས་པའི་མ་ཎི་ལྷ་ཁང་ལ་རབ་གནས་མཛད་བཞིན་པ།
དེ་བཞིན་བོད་བརྒྱུད་ནང་བསྟན་ས་སྐྱ་བཀའ་རྙིང་ཇོ་ནང་དང་བཅས་པ་ཡོངས་རྫོགས་ཀྱི་འབྱུང་ཁུངས་ནི་དཔལ་ན་ལེནྡྲའི་མཁན་ཆེན་ཞི་བ་འཚོ་ནས་ཡོང་བ་ཞིག་གཅིག་གྱུར་ཆགས་ཡོད། ང་ཚོ་བོད་ལ་ཡོད་པའི་སངས་རྒྱས་པའི་ཆོས་དེ་དཔལ་ན་ལེནྡྲའི་ཆོས་བརྒྱུད་དྲི་མ་མེད་པ་རེད། དེར་བརྟེན་ང་ཚོས་ན་ལེནྡྲའི་གཞུང་ལུགས་དེ་དག་བལྟས་ན་ང་ས་དགེ་དང་རྙིང་མ་སོགས་ཤོད་རྒྱུ་ཕལ་ཆེར་མེད། དེང་སྐབས་ང་ཚོ་ཆོས་བརྒྱུད་མང་པོ་ཡོད་པའི་ལུང་པ་ཞིག་ནང་བསྡད་ཡོད། བོད་ཀྱི་སངས་རྒྱས་པའི་ཆོས་འཛམ་གླིང་ལ་འབྲེལ་བ་ཡོད་པ་ཞིག་ཆགས་ཀྱི་ཡོད། དེ་ལྟ་བུའི་དུས་ཚོད་ཅིག་ལ་བསྟན་པ་སྤྱི་མཚན་ཐོག་ནས་འགྲོ་རྒྱུ་ཧ་ཅང་གལ་ཆེན་པོ་རེད།
མདོར་ན། དུས་རབས་ཉེར་གཅིག་ནང་སངས་རྒྱས་པའི་ཆོས་སྲ་བརྟན་ཞིག་ཡོང་དགོས་ན། ན་ལེནྡྲའི་མཁས་པའི་གཞུང་ལུགས་བདག་པོ་རྒྱག་རྒྱུ་ཧ་ཅང་གལ་ཆེན་པོ་རེད། ངོས་ཀྱིས་མང་ཚོགས་ཚོས་གཞུང་ཆེན་ལྟ་དགོས་བརྗོད་ཀྱི་ཡོད། ཅེས་སོགས་ཀྱི་བཀའ་སློབ་སྩལ་ཏེ་འཕགས་པ་ཐུགས་རྗེ་ཆེན་པོའི་བཀའ་དབང་སྩལ་འདུག
ཕྱེད་ཡོལ་མགོན་པོ་གང་ཉིད་མཆོག་གིས་ཁུལ་དེའི་སྔ་འགྱུར་སྒྲུབ་བརྒྱུད་ཆོས་འཕེལ་གླིང་དགོན་པར་གནས་གཟིགས་དང་འབྲེལ་དགེ་འདུན་པ་ཚོར་ཟབ་ཆོས་ཨོ་རྒྱན་རིན་པོ་ཆེའི་གསོལ་འདེབས་ལྗགས་ལུང་སྩལ་གྲུབ་བསྟུན་རྒས་གསོ་ཁང་དང་འཕྲོད་བསྟེན་སྨན་ཁང། སྨན་རྩིས་ཁང་། སློབ་གྲྭ་བཅས་སུ་གཟིགས་སྐོར་དུ་ཆིབས་སྒྱུར་བསྐྱངས་ཡོད།
