༢༠༡༤ ཟླ་ ༡ ཚེས་ ༢༣ རེས་གཟའ་ཕུར་བུ།
༄༅། །ཕྱི་ལོ་ ༢༠༡༤ ཟླ་ ༡ ཚེས་ ༢༡ ཉིན་ལུ་ཐི་ནི་ཡའི་ཡུ་རོབ་གྲོས་ཚོགས་ཀྱི་འཐུས་མི་སྐུ་ཞབས་ལི་ཨོ་ནི་ཌེས་ཌན་ཀི་སི་ Mr. Leonidas Donskis ལགས་ཀྱིས་གོ་སྒྲིག་གནང་ཐོག་ཡུ་རོབ་གྲོས་ཚོགས་ནང་དོན་གྲུབ་དབང་ཆེན་ལགས་ཀྱིས་བཟོ་སྐྲུན་གནང་བའི་འཇིགས་བྲལ་ཞེས་པའི་གློག་བརྙན་བསྟན་འདུག དེ་ཡང་ཡུ་རོབ་གྲོས་ཚོགས་ཀྱི་འཐུས་མི་རྣམ་པ་དང་། ཁོང་རྣམ་པའི་ཕྱག་རོགས། སྦར་སིལ་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། རྒྱལ་སྤྱིའི་བོད་དོན་ལས་འགུལ་ཁང་གི་སྐུ་ཚབ། བྷེལ་ཇམ་བོད་རིགས་ཚོགས་པའི་ཚོགས་མི་བཅས་གློག་བརྙན་སྟོན་སྐབས་ཕེབས་ཡོད་འདུག སྐབས་དེར་རྒྱལ་སྤྱིའི་བོད་དོན་ལས་འགུལ་ཁང་གི་འབྲེལ་མཐུད་འགན་འཛིན་ལྕམ་སྐུ་ཀེཊི་སོན་ཌར་སི་ Kate Saunders ལགས་དང་། ཆབ་སྲིད་བཙོན་ཟུར་རྒྱལ་མཚན་སྒྲོལ་དཀར་ལགས། ཁམས་འབྲི་རུ་ནས་ཡིན་པའི་ཁུལ་དེར་གནས་སྡོད་བོད་རིགས་ཁག་གཅིག་གསུང་བཤད་གནང་ཆེད་མགྲོན་འབོད་ཀྱང་གནང་འདུག
སྐབས་དེར་སྐུ་ཞབས་ཌན་སི་ཀི་ལགས་ཀྱིས་གསུང་བཤད་གནང་མཁན་དང་སྐུ་མགྲོན་རྣམ་པར་འཚམས་འདྲི་ཞུས་པ་དང་སྦྲགས། འཇིགས་བྲལ་དངོས་བྱུང་གློག་བརྙན་འདི་གྲོས་ཚོགས་ནང་སྟོན་རྒྱུའི་གོ་སྒྲིག་བྱེད་དགོས་པའི་དགོས་དམིགས་གཙོ་བོ་ནི་ཡུ་རོབ་སྤྱི་མཐུན་ཚོགས་པས་བོད་མི་རྣམས་ཀྱི་དཀའ་སྡུག་ཐོག་དོ་སྣང་མང་ཙམ་སླེབས་ཆེད་དང་། མུ་མཐུད་བོད་དོན་དང་བོད་མི་རྣམས་ཀྱི་ཆེ་མཐོང་སླད་རྒྱབ་སྐྱོར་ཐོབ་ཆེད་ཡིན་སྐོར་སོགས་གསུངས་པ་མ་ཟད། ཁོང་གིས་ཡུ་རོབ་སྤྱི་མཐུན་གྱིས་རྒྱ་ནག་དང་འབྲེལ་ལམ་ཡར་རྒྱས་གཏོང་ཆེད་རང་དབང་དང་། དམངས་གཙོ། དྲང་བདེན། འདྲ་མཉམ་བཅས་ལྟ་གྲུབ་དེ་དག་ལ་གཞི་བཅོལ་བའི་རིན་ཐང་རྣམས་བློས་གཏོང་མ་གནང་རོགས་ཞེས་འབོད་སྐུལ་ཡང་ཞུས་འདུག གློག་བརྙན་བསྟན་གྲུབ་མཚམས་ལྕམ་ཀེ་ཊི་སོན་ཌར་སི་ལགས་ཀྱིས་གློག་བརྙན་གྱི་རྒྱབ་ལྗོངས་ངོ་སྤྲོད་གནང་བ་མ་ཟད། དོན་གྲུབ་དབང་ཆེན་ལགས་ཀྱིས་ཉེན་ཁར་མ་འཛེམ་པར་བོད་ནང་གི་བོད་མི་རྣམས་ཀྱི་མངོན་འདོད་དང་དཀའ་སྡུག་དེ་དག་འཛམ་གླིང་ཕྱི་ལ་དྲིལ་བསྒྲགས་གནང་ཐབས་བྱས་ཡོད་སྐོར་གསུངས་ཡོད། ཕྱོགས་མཚུངས་ཆབ་སྲིད་བཙོན་ཟུར་རྒྱལ་མཚན་སྒྲོལ་དཀར་ལགས་ཀྱིས་ཁོ་མོས་བོད་ཀྱི་རང་དབང་དང་བོད་མི་རྣམས་ཀྱི་ཆེད་ཞི་རྒོལ་བྱས་རྐྱེན་ལོ་ངོ་ ༡༢ རིང་རྒྱའི་བཙོན་ཁང་ནང་དཀའ་སྡུག་གི་མྱོང་ཚོར་སྐོར་གསུང་བཤད་གནང་བ་མ་ཟད། བྷེལ་ཇམ་དུ་གནས་སྡོད་ཁམས་འབྲི་རུ་ནས་ཡིན་པའི་སྐལ་བཟང་ཆོས་གྲགས་ལགས་ཀྱིས་ད་ལྟའི་འབྲི་རུ་དང་དེའི་ཉེ་འགྲམ་དུ་ཡོད་པའི་ས་ཁུལ་ཁག་ནང་གི་གནས་སྟངས་སྐོར་ངོ་སྤྲོད་གནང་བ་དང་ཆབས་ཅིག ཉེ་ལམ་འབྲི་རུ་ཁུལ་དུ་བོད་མི་འཛིན་བཟུང་བྱས་པ་དང་། བཙོན་ཁང་ནང་དྲག་རྡུང་དང་འདས་གྲོངས་སུ་གྱུར་བ་སོགས་ཀྱི་སྐོར་འཁོད་པའི་ཡིག་ཆ་ཞིག་ཀྱང་འགྲེམས་སྤེལ་གནང་ཡོད། དེ་ནས་སྐུ་ཞབས་ཌན་ཀི་སི་ལགས་ཀྱིས་སྐབས་དེར་མཉམ་ཞུགས་གནང་མཁན་ཡོངས་ལ་ཐུགས་རྗེ་ཆེ་ཞུས་པ་དང་སྦྲགས་ཁོ་བོས་ལས་དོན་འདི་ལམ་ལྷོང་ལྡན་པའི་ཐོག་གོ་སྒྲིག་ཞུས་ཐུབ་པར་འདོད་བློ་ཚིམས་པོ་བྱུང་ཡོད་སྐོར་གསུངས་ཡོད་པ་བཅས།།
