༢༠༡༤ ཟླ་ ༡ ཚེས་ ༢༡ རེས་གཟའ་མིག་དམར།
༄༅། །བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་ཨོ་སི་ཊོ་ལི་ཡའི་ཁུལ་དུ་བདུན་ཕྲག་གཅིག་ལྷག་གཞུང་འབྲེལ་ཕྱོགས་ཕེབས་གནང་མུས་ལྟར། ཕྱི་ལོ་ ༢༠༡༤ ཟླ་ ༡ ཚེས་ ༢༠ ཉིན་བཀའ་བློན་མཆོག་གིས་ཨོ་སི་ཊོ་ལི་ཡར་ཕེབས་དགོས་དོན་སྐོར་བརྒྱུད་ལམ་ཁག་གཅིག་ནང་གསུང་དོན། ང་རང་ཨོ་སི་ཊོ་ལི་ཡའི་བོད་ཀྱི་དུས་ཆེན་གོ་སྒྲིག་གནང་མཁན་ཚོས་མགྲོན་འབོད་ལྟར་བཅར་བ་དང་ལྷན་གོ་སྐབས་འདི་བཟུང་ནས་ཨོ་སི་ཊོ་ལི་ཡའི་མི་དམངས་ཀྱིས་གཙོས་བོད་དོན་རྒྱབ་སྐྱོར་ཚོགས་པ་དང་རྒྱ་རིགས་ངོ་ཤེས་པ་ཚང་མར་བོད་དོན་སྐོར་སྔར་ལྷག་གོ་རྟོགས་སྤེལ་རྒྱུའི་གོ་སྐབས་ཤིག་ལ་ངོས་འཛིན་བྱེད་བཞིན་ཡོད། སྤྱིར་བཏང་ད་ལྟའི་དུས་ཚོད་ལ་ཨོ་སི་ཊོ་ལི་ཡའི་གྲོས་ཚོགས་ཚོགས་མེད་པའི་སྐབས་འཁེལ་ཡོད་སྟབས། གྲོས་ཚོགས་ཀྱི་ཚོགས་མི་མང་དག་ཅིག་མཇལ་རྒྱུ་ཧ་ཅང་ཁག་པོ་ཆགས་ཡོད། ཐེངས་འདིར་ང་རང་འདི་གར་ཡོང་དགོས་དོན་གཙོ་བོ་ནི་མི་དམངས་དང་གསར་འགྱུར་བརྒྱུད་ལམ་ཁག་ལ་བོད་དོན་ངོ་སྤྲོད་བྱེད་རྒྱུ་ཙམ་མ་ཟད། བོད་དོན་རྒྱབ་སྐྱོར་ཚོགས་པ་ཁག་ཐུག་ཆེད་ཡིན། ཨོ་སི་ཊོ་ལི་ཡའི་གཞུང་ཕྱོགས་དང་རྒྱ་ནག་གཞུང་དབར་དཔལ་འབྱོར་གྱི་འབྲེལ་བ་ཧ་ཅང་ཤུགས་ཆེན་པོ་ཡོད་ཀྱང་། ཨོ་སི་ཊོ་ལི་ཡའི་གཞུང་ནས་བོད་དོན་ལ་རྒྱབ་སྐྱོར་བྱེད་རྒྱུའི་རེ་བ་བྱེད་བཞིན་ཡོད། དེ་བཞིན་ཨོ་སི་ཊོ་ལི་ཡའི་མི་དམངས་ངོས་ནས་བོད་དོན་ལ་དོ་སྣང་དང་རྒྱབ་སྐྱོར་སྔར་ལྷག་བྱེད་ཐུབ་ཀྱི་རེད་སྙམ་གྱི་ཡོད། ལྷག་པར་ཨོ་སི་ཊོ་ལི་ཡར་རྒྱ་རིགས་འབུམ་བརྒྱད་ལྷག་ཙམ་ཡོད་སྟབས། རྒྱ་མི་རིགས་ནང་ཁུལ་ནས་བོད་དོན་སྐོར་ལ་གོ་རྟོགས་སྤེལ་རྒྱུའི་གོ་སྐབས་ཤིག་རྒྱལ་ཁབ་གཞན་ལ་མེད་པ་ཞིག་རྒྱལ་ཁབ་འདིའི་ནང་ཡོད། ཅེས་ངོ་སྤྲོད་གནང་འདུག་པ་བཅས། །
