༢༠༡༤ ཟླ་ ༡ ཚེས་ ༣ རེས་གཟའ་པ་སངས།
༄༅། །རྒྱ་གཞུང་གིས་གྲྭ་དགེ་འདུན་རྒྱ་མཚོ་ལགས་ལ་མི་གསོད་ཀྱི་ཉེས་མིང་བཀལ་ཏེ་ལོ་ ༦ བཙོན་འཇུག་གི་ཁྲིམས་ཐག་བཅད་འདུག འོན་ཀྱང་ཁོང་གིས་རྒྱ་གཞུང་གི་ནག་ཉེས་དེར་ངོས་ལེན་གནང་མེད། དེ་བཞིན་ད་ལྟའི་ཆར་རང་ལུས་མེར་སྲེག་གནང་མཁན་བོད་མི་གཟུངས་འདུས་སྐྱབས་ལགས་འཚོ་བཞུགས་ཡོད་མེད་ཀྱང་གསལ་པོ་ཤེས་རྟོགས་ཐུབ་མི་འདུག དེ་ཡང་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༣ ཟླ་ ༡༢ ཚེས་ ༡༡ ཉིན་བསང་ཆུ་རྫོང་མི་དམངས་ཁྲིམས་ཁང་གིས། བླ་བྲང་འབོ་ར་དགོན་པའི་གྲྭ་དགེ་འདུན་རྒྱ་མཚོ་ལགས་སུ། ༼བསམ་བཞིན་མི་བསད་པའི་༽ཉེས་མིང་འོག་ལོ་ ༦ གི་དུས་བཀག་བཙོན་འཇུག་གི་ཁྲིམས་ཐག་བཅད་འདུག
རྒྱ་གཞུང་གིས་འབོ་ར་ས་ཁུལ་གྱི་བོད་མི་གཟུངས་འདུས་སྐྱབས་ལགས་ཀྱིས་རང་ལུས་མེར་སྲེག་གཏོང་སྐབས། ཉེན་རྟོག་པས་མེ་གསོད་ཐབས་བྱེད་སྐབས་གྲྭ་དགེ་འདུན་རྒྱ་མཚོ་སོགས་ཀྱིས་མེ་གསོད་མ་བཅུག་པར་ཁ་གཡར་བའི་ཐོག་ནས། རྒྱ་གཞུང་གི་ཉེས་ཁྲིམས་དོན་ཚན་ ༢༣༢ པའི་འབྲུ་དོན་ལྟར། བསམ་བཞིན་མི་བསད་པའི་ནག་ཉེས་བཀལ་ཏེ་ཁྲིམས་ཐག་བཅད་འདུག ཁྲིམས་ཐག་གཅོད་པའི་ཉིན་མོ་དེར་རྒྱ་གཞུང་གིས་ཁོང་གི་འབྲེལ་ཡོད་ནང་མི་ ༤ སྐད་བཏང་ཡོད་འདུག་ལ། སྐབས་དེར་གྲྭ་དགེ་འདུན་རྒྱ་མཚོ་ལགས་ཀྱིས་རྒྱ་གཞུང་གི་ཉེས་འཛུགས་དེ་དག་ངོས་ལེན་བྱས་མེད། དེ་བཞིན་ཕྱི་ལོ་ ༢༠༡༢ ཟླ་ ༡༢ ཚེས་ ༢ ཉིན། རྒྱ་གཞུང་གིས་བོད་ས་བཅད་ཀྱི་དབང་སྒྱུར་ས་ཁོངས་ལྟར་བྱས་ན། ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་བསང་ཆུ་རྫོང་འབོ་ར་ཞང་། རྡར་མདོ་སྡེ་བའི་རང་ལོ་ ༡༧ ཡིན་པའི་གཟུངས་འདུས་སྐྱབས་ལགས་ཀྱི་འབོ་ར་ས་ཆའི་གཞུང་ལམ་གྱི་སྟེང་རང་ལུས་མེར་སྲེག་གནང་ཡོད་ལ། སྐབས་དེར་ས་གནས་མང་ཚོགས་དང་གྲྭ་བཙུན་དག་གིས་མཐོང་སྟེ། རང་སྲེག་གཏོང་ས་དེར་འདུ་འཛོམས་ཀྱིས་སྐུ་ཕུང་སྲུང་སྐྱོབ་ཆེད། རྒྱ་གཞུང་གི་ཉེན་རྟོག་དམག་མི་དང་མང་ཚོགས་བར་རྩོད་རྙོག་ཤོར་ཡོད་འདུག
ཕྱི་ཚེས་ ༣ ཉིན་ཨ་མཆོག་ས་གནས་ཉེན་རྟོག་པ་དང་འབོ་ར་ཞང་སྲིད་གཞུང་གི་ལས་བྱེད་མཉམ་འབྲེལ་ཐོག་དགོན་པར་ཡོང་སྟེ། གྲྭ་དགེ་འདུན་རྒྱ་མཚོ་ལགས་དང་བློ་བཟང་འཕགས་པ་ལགས། འཇམ་དབྱངས་བཟོད་པ་ལགས། འཇམ་དབྱངས་བློ་གྲོས་ལགས། འཇམ་དབྱངས་རྒྱ་མཚོ་ལགས་བཅས་གྲྭ་པ་ ༥ རང་ཤག་ནས་འཛིན་བཟུང་གིས་འབོ་ར་ཞང་སྲིད་གཞུང་དུ་བཙན་ཁྲིད་བྱས་པའི་རྗེས་སུ། དུས་ཡུན་རིང་པོའི་ནང་གར་སོང་ཆ་མེད་དུ་གྱུར་ཏེ་ཁོང་ཚོའི་གནས་སྟངས་གང་ཡང་ཤེས་རྟོགས་མི་ཐུབ་པ་ཆགས་ཡོད་པ་རེད། ཉེ་ཆར་གྲྭ་དགེ་འདུན་རྒྱ་མཚོར་ལོ་ ༦ གི་ཁྲིམས་ཐག་བཅད་ཡོད་པ་ཤེས་རྟོགས་བྱུང་བ་ལས་གཞན། དེ་འཕྲོས་ཀྱི་གྲྭ་ ༤ ཁྲོད་ནས་གྲྭ་འཇམ་དབྱངས་བཟོད་པ་ལགས་ཟླ་ལྔ་ཙམ་རིང་བཀག་ཉར་རྗེས་གློད་ཡོད་འདུག ས་གནས་མང་ཚོགས་ཀྱིས་གནས་ཚུལ་བརྗོད་པ་ལྟར་ན། གཞན་པའི་གྲྭ་གསུམ་ཡང་ཡུན་རིང་བཀག་ཉར་མནར་གཅོད་བཏང་མཐར་སྔ་ཕྱིར་གློད་ཡོད་པར་བཤད། འོན་ཀྱང་རྒྱ་གཞུང་གིས་བོད་ནང་གི་བརྒྱུད་ལམ་ཁག་ལ་བཀག་སྡོམ་ནན་མོ་བྱས་ཡོད་སྟབས། ཞིབ་ཕྲའི་གནས་ཚུལ་ཤེས་རྟོགས་དཀའ་བའི་གནས་སུ་གྱུར་འདུག
བོད་མི་གཟུངས་འདུས་སྐྱབས་ལགས་ཀྱིས་རང་ལུས་མེར་སྲེག་གནང་སྟེ། རྒྱ་གཞུང་གིས་བོད་ཐོག་འཛིན་པའི་མི་སེར་སྤེལ་བའི་དྲག་གནོན་དབང་སྒྱུར་གྱི་སྲིད་བྱུས་ལ་ངོ་རྒོལ་གནང་རྗེས། རྒྱ་གཞུང་ཉེན་རྟོག་མི་སྣས་དང་ཐོག་ཁོང་ཀན་ལྷོ་གཙོའི་གྲོང་ཁྱེར་གྱི་སྨན་ཁང་ ཞིག་ནང་ཁྲིད་ཡོད་པ་དང་། དེ་རྗེས་ལན་ཀྲུའུ་གྲོང་ཁྱེར་གྱི་སྨན་ཁང་ཞིག་ནང་ཁྱེར་ཡོད་འདུག རྗེས་སུ་ཉེན་རྟོག་པས་ཁོང་གི་ཕ་མ་གཉིས་འབོད་འགུགས་བྱས་ཏེ། གཟུངས་འདུས་སྐྱབས་གསོན་པོར་འཚོ་ཆེད་ཁོང་གི་རྐང་པ་གཉིས་གཅོད་དགོས་ཀྱི་ཡོད་པ་ དང་། དེའི་ཐད་ཕ་མ་གཉིས་ཀྱིས་མིང་རྟགས་འགོད་དགོས་པར་བརྗོད་དེ་ཁྲིད་ཡོད་ཀྱང་། སྐབས་དེར་ཕ་མ་གཉིས་གཟུངས་འདུས་སྐྱབས་ལ་དངོས་སུ་ཐུག་འཕྲད་བྱེད་མ་བཅུག་པར། སྨན་ཁང་གི་ཤེལ་སྒོའི་ཕྱི་ལོགས་ནས་ལྟ་རུ་བཅུག་ཡོད་སྟབས། སྐབས་དེའི་ཁོང་གི་གཟུགས་པོའི་དངོས་ཡོད་གནས་སྟངས་གསལ་པོ་རྟོགས་ཐུབ་མེད་པ་རེད། གྲྭ་དགེ་འདུན་རྒྱ་མཚོ་ལགས་ནི་ད་ལྟ་རང་ལོ་ ༤༨ ཡིན་པ་དང་། རྒྱ་གཞུང་གིས་བོད་ས་བཅད་བགོས་ཀྱི་དབང་སྒྱུར་ས་ཁོངས་ལྟར་བྱས་ན། ཀན་སུའུ་ཞིིང་ཆེན་ཀན་ལྷོ་བོད་རིགས་རང་སྐྱོང་ཁུལ་བསང་ཆུ་རྫོང་འབོ་ར་ཞང་། ལྷ་འབུམ་ཐང་རི་འགབ་མ་ནས་ཡིན་པ་དང་། ཁོང་གི་ཨ་མའི་མིང་ལ་བསོད་ནམས་འཚོ་འབོད་ཀྱི་ཡོད་འདུག
