༄༅། །དེ་སྔ་བཀའ་ཤག་གིས་ཕྱི་ལོ་ ༢༠༠༧ ཕྱི་ཟླ་ ༠༣ ཚེས་ ༠༥ ལ་གཏན་འབེབས་གནང་བའི་ནང་སྲིད་ལས་ཁུངས་ཀྱི་ན་གཞོན་རོགས་སྐྱོར་ལས་གཞིའི་དངུལ་བུན་གཏོང་ཕྱོགས་ཀྱི་ལམ་སྟོན་སྒྲིག་གཞི་དགོངས་དོན་ད་ཕན་བུན་གཏོང་ལས་འཆར་ཁག་གང་ལེགས་འགྲོ་མུས་དེ་ལྟར་ཡང་། ན་གཞོན་མང་དག་ཞིག་ལ་ད་ལྟའི་སྒྲིག་གཞི་ཆ་རྐྱེན་འདིའི་འོག་ནས་བུ་ལོན་གྱི་ཁེ་ཕན་དེ་ཙམ་སྤྲོད་ལེན་ཐུབ་ཀྱི་མེད་པ་དང་།
སྐབས་རེ་བུ་ལོན་བཏང་ཟིན་པ་རྣམས་ཕྱིར་བསྡུ་མ་ཐུབ་པའི་གནས་ཚུལ་དེ་འདྲའང་མི་ཉུང་བ་ཞིག་ཡོང་གི་ཡོད་པ་དེ་དག་ཉམས་མྱོང་བླངས་ཏེ་བུ་ལོན་སྤྲོད་འཇལ་གན་ཡིག་བཟོ་འཇོག་ལ་སྐྱར་བཅོས་འཆར་ཟིན་ཕུལ་བ་ལྟར་དཔལ་ལྡན་བཀའ་ཤག་གིས་ཕྱི་ལོ་ ༢༠༡༣ ཟླ་ ༠༧ ཚེས་ ༡༩ དང་། ཕྱི་ལོ་ ༢༠༡༣ ཟླ་ ༡༢ ཚེས་ ༢༦ འཁོད་པ་ནང་སྲིད་ལས་ཁུངས་ཀྱི་ན་གཞོན་རོགས་སྐྱོར་ལས་གཞིའི་དངུལ་བུན་གཏོང་ཕྱོགས་ཀྱི་ལམ་སྟོན་གཏན་འབེབས་གནང་བའི་ཡིག་ཆ་ཁག་ས་གནས་སོ་སོར་ཕྱི་ལོ་ ༢༠༡༤ ཟླ་ ༡ ཚེས་ ༡༣ ཉིན་ཁུངས་གཏོང་ཟིན་པ་བཞིན།
ས་གནས་སོ་སོའི་མང་ཚོགས་ལ་གསལ་བསྒྲགས་མ་གོ་མ་ཐོས་མེད་པར་གནང་སྟེ་དོན་དུ་བུན་དངུལ་དགོས་ངེས་ཅན་གྱི་ན་གཞོན་ལས་འཕེར་གང་མང་ལ་བུན་དངུལ་འདིའི་བརྒྱུད་ནས་ཕན་ཐོགས་ནུས་པ་ཐོན་པ་ཞིག་ཡོང་ཐབས་སུ་ས་གནས་བུན་གཏོང་སྟངས་འཛིན་ཚོགས་ཆུང་དང་ས་གནས་ན་གཞོན་རོགས་སྐྱོར་འབྲེལ་མཐུད་པ་ (REPRO) བཅས་ནས་སྒྲིག་གསལ་ཆ་རྐྱེན་ལྡན་པའི་བུན་ལོན་ཞུ་འདོད་ཡོད་རིགས་ཀྱི་སྙན་ཞུ་ཕྱི་ལོ་ ༢༠༡༤ ཟླ་ ༡ ཚེས་ ༣༡ ནང་ཚུད་འདི་གར་ངེས་འབུལ་ཐུབ་པ་དམ་དོན་གནང་ཕྱོགས་ཡོང་བ་དང་། བུན་ལོན་གནང་ཕྱོགས་ཐད་བུན་ཞུ་བའི་ལས་འཆར་གྱི་ངོ་བོ་དང་འཆར་རྩིས། སྙན་ཞུ་འབྱོར་སྔ་རྗེས་བཅས་ལ་དབུས་བུན་གཏོང་སྟངས་འཛིན་ཚོགས་ཆུང་གིས་ཞིབ་འཇུག་གནང་སྟེ་ཐག་གཅོད་ཇི་བྱུང་ཁུངས་ལན་གནང་རྒྱུ་ཡིན་པ་བཅས་ཀྱི་གསལ་བསྒྲགས་སུ། ནང་སྲིད་ལས་ཁུངས་ནས་ཕྱི་ལོ་ ༢༠༡༤ ཟླ་ ༠༡ ཚེས་ ༡༣ ལ།།
