༢༠༡༤ ཟླ་ ༡ ཚེས་ ༡༦ རེས་གཟའ་ཕུར་བུ།

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཆ་ཏི་སི་གྷར་མངའ་སྡེ་གཞུང་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ་ཕྱི་ལོ་ ༢༠༡༤ ཟླ་ ༡ ཚེས་ ༡༥ ཉིན་གྱི་སླར་ཡང་རྒྱལ་ས་ཡེ་པུར་དུ་༸ཞབས་སོར་ཡོད་པ་མ་ཟད། སྔ་དྲོ་མངའ་སྡེའི་སྲིད་སྐྱོང་མཆོག་གིས་གདན་ཞུས་ལྟར་རྒྱ་གར་གྱི་སྲིད་བློན་ཟུར་པ་ར་ཇི་གྷན་ངྷི་དམ་པ་མཆོག་གི་དྲན་རྟེན་སྐྱེད་མོས་ཚལ་དུ་ཆིབས་སྒྱུར་བསྐྱངས་ཏེ་དེའི་ནང་བཟོ་སྐྲུན་བྱས་པའི་དམག་ཞབས་དམ་པ་རྣམས་ཀྱི་ཆེད་དྲན་རྟེན་རྡོ་བརྐོས་ཀྱི་མདུན་དུ་ཐུགས་སྨོན་མཛད་གྲུབ་མཚམས་མངའ་སྡེའི་སྲིད་སྐྱོང་མཆོག་དང་མཇལ་འཕྲད་མཛད་ཡོད།

ཕྱེད་ཡོལ་མགོན་པོ་གང་ཉིད་མཆོག་གིས་མངའ་སྡེ་དེའི་རྒྱལ་ས་ར་ཡེ་པུར་དུ་རྟེན་གཞི་བྱས་པའི་པན་ཌི་ཏ་ར་ཝི་ཤང་ཀར་ཤུཀ་ལ་གཙུག་ལག་སློབ་གཉེར་ཁང་གི་ (Pt Ravishankar Shukla University) དགེ་ལས་སློབ་ཕྲུག་དང་མང་ཚོགས་ཁག་གཅིག་ལ་བརྗོད་གཞི་ཤེས་རབ་དང་སྙིང་རྗེའི་སྐོར་བཀའ་སློབ་སྩལ་དོན། དེ་རིང་ངོས་རང་འདི་ག་གཙུག་ལག་སློབ་གཉེར་ཁང་དུ་ཡོང་ནས་ཁྱེད་རང་ཚོ་དང་ཐུག་རྒྱུ་བྱུང་བར་ཧ་ཅང་དགའ་པོ་བྱུང། སྤྱིར་བཏང་འཛམ་གླིང་འདིའི་ནང་མི་དུང་ཕྱུར་བདུན་ཅུ་ཙམ་ཞིག་འཚོ་སྡོད་བྱེད་བཞིན་ཡོད། དེ་དག་ནང་ཆོས་དད་ཡོད་མེད་སྣ་ཚོགས་ཤིག་ཡོང་གི་ཡོད་ཀྱང་ང་ཚོ་ཚང་མ་བདེ་བ་འདོད་པ་དང་སྡུག་བསྔལ་མི་འདོད་མཁན་ཤ་སྟག་རེད། དེར་བརྟེན་ང་ཚོས་ང་ཚོ་ཚང་མ་འགྲོ་བ་མི་གཅིག་གྱུར་ཡིན་པའི་འདུ་ཤེས་འཛིན་དགོས་རྒྱུ་ནི་ཧ་ཅང་གལ་ཆེན་པོ་རེད། ཅེས་སོགས་ཀྱི་བཀའ་སློབ་དང་དྲི་བར་བཀའ་ལན་སྩལ་ཡོད།

དེ་བཞིན་མངའ་སྡེ་དེའི་རིག་གཞུང་དང་ཡུལ་སྐོར་སྤྲོ་འཆམ་སྡེ་ཚན་གྱི་བློན་ཆེན་སོགས་གནད་ཡོད་མི་སྣ་ཁག་གཅིག་ཆེད་ཕེབས་གནང་འདུག ཕྱི་ཚེས་ ༡༦ ཉིན་མགོན་པོ་གང་ཉིད་མཆོག་ཁུལ་དེ་ནས་རྒྱ་གར་རྒྱལ་ས་ལྡི་ལིར་ཆིབས་ཞལ་བསྒྱུར་རྒྱུ་ཡིན་འདུག