༢༠༡༤ ཟླ་ ༡ ཚེས་ ༣༠ རེས་གཟའ་ཕུར་བུ།
༄༅། །པེ་ཅིང་ནང་གི་ཨ་རིའི་གཞུང་ཚབ་གསར་པའི་འོས་མི་སྐུ་ཞབས་མེཀ་སི་བྷུ་ཀ་(Senator Max Baucus) མཆོག་གིས་བོད་རྒྱ་འབྲེལ་མོལ་བསྐྱར་གསོ་ཡོང་སླད་རྒྱ་ནག་གཞུང་གི་འགོ་ཁྲིད་ལ་འབོད་སྐུལ་ཞུ་རྒྱུ་ཡིན་སྐོར་གསུངས་འདུག
དེ་ཡང་ཕྱི་ལོ་ ༢༠༡༤ ཟླ་ ༡ ཚེས་ ༢༨ ཉིན་ཨ་རིའི་གྲོས་ཚོགས་གོང་མའི་ཕྱི་འབྲེལ་ཚན་པའི་ནང་པེ་ཅིང་གི་ཨ་རིའི་གཞུང་ཚབ་གསར་པའི་འོས་མི་སྐུ་ཞབས་མེཀ་སི་བྷུ་ཀ་མཆོག་དང་འབྲེལ་བའི་ཉན་ཞིབ་ཀྱི་ལས་རིམ་ཞིག་ཚོགས་པའི་ནང་ཁོང་གིས་གསུང་དོན། གལ་ཏེ་ང་རང་པེ་ཅིང་གི་ཨ་རིའི་གཞུང་ཚབ་ཏུ་བསྐོ་བཞག་བྱུང་ན། རྒྱ་ནག་གཞུང་དང་ལྷན་ཚོང་འབྲེལ་གྱི་དཔལ་འབྱོར་ཡར་རྒྱས་གོང་འཕེལ་གཏོང་ཐབས་བྱེད་རྒྱུ་དང་། ལྷག་པར་རྒྱ་ནག་དང་མཉམ་རུབ་ཐོག་ནས་རྒྱལ་སྤྱིའི་ནང་གི་དཀའ་ངལ་ཁག་སེལ་ཐབས་བྱེད་རྒྱུ་ཡིན་པ་མ་ཟད། འགྲོ་བ་མིའི་ཐོབ་ཐང་ལ་རྩིས་འཇོག དེ་བཞིན་ཁོར་ཡུག་སྲུང་སྐྱོབ་ཐོག་ལ་སྔར་ལྷག་དོ་སྣང་དང་བསྐུལ་འདེད་བྱ་རྒྱུ་ཡིན།
ཕྱོགས་མཚུངས་ངས་རྒྱ་ནག་གཞུང་གི་འགོ་ཁྲིད་ཚོར་ཆ་རྐྱེན་གང་ཡང་མེད་པའི་ཐོག་ནས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གམ་ཁོང་གི་སྐུ་ཚབ་དང་ལྷན་བོད་རྒྱ་འབྲེལ་མོལ་བསྐྱར་གསོ་ཡོང་བའི་འབོད་སྐུལ་ཞུ་རྒྱུ་ཡིན། རྒྱ་ནག་གཞུང་གིས་ཨ་རི་ལྟར་ཁས་ལེན་བྱས་པ་གཞིར་བཟུང་གྲངས་ཉུང་མི་རིགས་ཀྱི་ཆོས་དད་རང་དབང་དང་གཞི་རྩའི་འགྲོ་བ་མིའི་ཐོབ་ཐང་ལ་སྲུང་སྐྱོབ་བྱེད་དགོས་པའི་འབོད་སྐུལ་ཞུ་རྒྱུ་ཡིན། བོད་དང་ཡུ་གུར་མི་རིགས་ཀྱི་སྤྱི་ཚོགས་ནང་གི་དཀའ་ངལ་ཁག་སེལ་ཆེད་མི་དམངས་དཀྱུས་མ་ཚོར་རང་དབང་སྤྲོད་དགོས་རྒྱུ་གལ་ཆེན་པོ་ཆགས་ཡོད། དེ་བཞིན་རྒྱ་ནག་གཞུང་ནས་ཀྱང་རྒྱལ་སྤྱིའི་ཁྲིམས་དང་མཐུན་པའི་ཐོག་ནས་བསྐྱོད་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། ཅེས་སོགས་གསུངས་འདུག
སྤྱིར་བཏང་སྐུ་ཞབས་གྷལ་རི་ལོག་པེ་ཅིང་གི་ཨ་རིའི་གཞུང་ཚབ་ནས་དགོངས་ཞུ་གནང་རྗེས་ཨ་རིའི་སྲིད་འཛིན་བྷ་རཀ་ཨོ་བྷ་མཆོག་གིས་མེཀ་སི་བྷུ་ཀ་མཆོག་གཞུང་ཚབ་གསར་པའི་འོས་མིར་མིང་འདོན་གནང་བ་ཞིག་ཡིན་འདུག
