༢༠༡༤ ཟླ་ ༡ ཚེས་ ༡༠ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༡ ཚེས་ ༩ ཉིན་གྱི་ཕྱི་དྲོ་ཆུ་ཚོད་ ༥ པའི་ཐོག་ཤེས་རིག་ལས་ཁུངས་ནས་གོ་སྒྲིག་འོག་རྡ་ཤོད་བོད་ཁྱིམ་ཚོགས་ཁང་ནང་རྒྱ་བལ་གཉིས་ཀྱི་སློབ་གྲྭ་ཁག་ ༧༦ ནས་སློབ་གྲྭའི་རེག་ཊར་དང་ངེས་སྟོན་པ། སློབ་སྤྱི། ཆོས་དགེ། དགེ་རྒན་སོགས་ཁྱོན་མི་གྲངས་ ༢༡༥ བརྒལ་བ་ལྷན་འཛོམས་ཐོག་བཙན་བྱོལ་བོད་མིའི་ཤེས་རིག་ཚོགས་ཆེན་ཐེངས་དྲུག་པའི་མཇུག་བསྡོམས་མཛད་སྒོར་སྲིད་སྐྱོང་དང་ཤེས་རིག་བཀའ་བློན་གཅིག་ལྕོགས་མཁས་དབང་བློ་བཟང་སེང་གེ་མཆོག་གིས་གསུང་བཤད་གནང་དོན། ང་རང་སློབ་ཕྲུག་སྒེར་པ་ཞིག་ཡིན་པའི་ཆ་ནས་དགེ་རྒན་རྣམ་པ་ཚོས་གྲོས་ཆོད་དོ་དབྱིངས་ཆེན་པོའི་ཐོག་ནས་ཀློག་གནང་སྐབས་ཡིད་ལ་སྤྲོ་བོ་དང་སེམས་ལ་ཉར་དགོས་རྒྱུ། དེ་བཞིན་མའོངས་པའི་བྱེད་ཕྱོགས་ཐོག་ལའང་ཤེས་རིག་ལས་ཁུངས་ནས་གནང་དགོས་རྒྱུ་མང་པོ་ཞིག་འདུག་བསམས་པ་བྱུང་། དེ་སྔ་ཚོགས་ཆེན་སྐབས་གྲོས་ཆོད་བཞག་པ་ལྟར། ཁ་སང་ཤེས་རིག་དྲུང་ཆེས་གསལ་བཤད་གནང་བ་བཞིན་གྲོས་ཆོད་མང་ཆེ་བ་ཤེས་རིག་ལས་ཁུངས་ནས་གནང་དགོས་རྒྱུ་དེ་དག་གནང་ཟིན་འདུག ད་ཐེངས་ཡིན་ནའང་འདྲ་རྣམ་པ་ཚོས་རེ་འདུན་བཏོན་པ་མང་ཆེ་བ་སྒྲུབ་ཐུབ་རྒྱུར་འབད་བརྩོན་བྱེད་ཀྱི་ཡིན། མང་ཆེ་བའི་ཁོངས་སུ་འགའ་ཤས་ཕོགས་སྤར་རྒྱུ་དང་ཐོབ་ཐང་ཡག་ཏུ་གཏོང་རྒྱུ་སོགས་འདུག བོད་སློབ་འཛིན་ཚོགས་ཀྱི་སློབ་གྲྭ་ཁག་ཕུད་པའི་སློབ་གྲྭ་ཁག་གཞན་ནང་ཕལ་ཆེར་དགེ་རྒན་དང་ལས་བྱེད་ཀྱི་ཕོགས་བརྒྱ་ཆ་ ༣༠ ཡས་མས་ཤིག་སྤར་ཟིན་ཙམ་ཡིན། གླ་ཕོགས་སྤར་ཟིན་ཙམ་ནས་ད་དུང་ཕོགས་སྤར་དགོས་འདུག་ཅེས་གསུངས་སྐབས། དངུལ་དེ་ག་ནས་ཐབས་ཤེས་བྱེད་དུ་འགྲོ་དགོས་ཡོད་ན་བསམས་ཀྱི་འདུག འཛམ་གླིང་སྤྱི་ཡོངས་ཀྱི་དཔལ་འབྱོར་ཉམས་ཡོད། ཁ་སྔོན་ང་ཨ་རིར་འགྲོ་སྐབས་ཁོང་ཚོས་འདི་ལྟར་བརྗོད་ཀྱི་འདུག ཨ་རིའི་དཔལ་འབྱོར་ཉམས་ཏེ་གཞི་རྩའི་ཨ་རིའི་ནང་བགྲོ་གླེང་ཤུགས་ཆེན་པོ་འགྲོ་བཞིན་ཡོད། སྤྱི་མཐུན་ཚོགས་པའི་གྲོས་ཆོད་བཞག་སྟེ་ལས་ཁུངས་ཁག་ཡོངས་རྫོགས་ཀྱི་འགྲོ་གྲོན་བརྒྱ་ཆ་བཅུ་བཅག་དགོས་བྱུང་ཡོད་པ་མ་ཟད། ཁ་སྔོན་ངས་ཕྱི་སྲིད་ལས་ཁུངས་ཀྱི་ལས་བྱེད་ཐུག་སྐབས་ཨ་རིའི་ལས་བྱེད་ཡིན་ནའང་ལོ་གསུམ་ནང་ཕོགས་བརྒྱ་ཆ་གཅིག་མ་གཏོགས་སྤར་གྱི་མེད། ཅེས་གསུངས་ཀྱི་འདུག
འོན་ཀྱང་བོད་མིའི་སྒྲིག་འཛུགས་ལ་ལོ་ལྟར་རོགས་དངུལ་ས་ཡ་གཉིས་ཙམ་གནང་གི་ཡོད། ང་རང་སྲིད་སྐྱོང་དང་ཤེས་རིག་བཀའ་བློན་གཅིག་ལྕོགས་ཡིན་པར་བརྟེན། ཐེངས་འདིའི་དངུལ་ས་ཡ་གཉིས་དེ་ཤེས་ཡོན་ཐོག་ག་སྒྱུར་བྱས་ཏེ་ཐོག་བཏང་བ་ཡིན། དེ་བཞིན་དྲ་རྒྱའི་བདེ་འཇགས་ཆེད་ས་ཡ་གཉིས་གསུམ་ཙམ་རག་གི་ཡོད། འཛམ་གླིང་སྤྱི་ཡོངས་ལ་རོགས་དངུལ་སྤྲོད་རྒྱུ་དེ་མར་བཅག་ཡོད་ཀྱང་བོད་མིའི་སྒྲིག་འཛུགས་ལ་ལྡབ་ཀྱི་འཕར་སོང་ཞེས་སྐུ་རྩེད་དང་སྦྲགས་གསུངས་ཀྱི་འདུག ཕྱི་རྒྱལ་ཡུལ་གྲུ་ཁག་གཞན་ནས་རོགས་སྐྱོར་གནང་དང་གནང་མུས་ཡིན་པར་བརྟེན་འདིའི་ཐོག་མུ་མཐུད་འབད་བརྩོན་ཞུ་རྒྱུ་ཡིན། འོན་ཀྱང་བརྒྱ་ཆ་ ༣༠ སྤར་བ་དེ་གང་ཙམ་སྤར་ཡོད་བསམ་བཞིན་ཡོད། ཤེས་ཡོན་སྲིད་བྱུས་ཀྱི་དགོངས་དོན་ཕོགས་རིམ་འགྲོ་དགོས་རེད། ཅེས་གསུངས་སྐབས་ཡར་བསྐྱར་བལྟས་ནས་དེ་ཚད་གཞི་གང་འདྲ་ཞིག་ལ་འཛིན་དགོས་མིན་ལྟ་དགོས་བསམས་བྱུང་། དེ་བཞིན་ཟབ་སྦྱོང་གནང་དགོས་སྐོར་སོགས་མང་པོ་གསུངས་སོང་། ཤེས་རིག་དྲུང་ཆེས་ཁ་སང་གསུངས་པ་བཞིན་རེད། ང་ཚོར་རོགས་དངུལ་རག་པ་དེ་དག་བཏང་མ་ཐུབ་པའི་དཀའ་ངལ་ཆགས་ཀྱི་འདུག རྣམ་པ་ཚོས་ཟབ་སྦྱོང་དགོས་ཀྱི་འདུག་ཅེས་གསུངས་པ་ལྟར་ང་ཚོས་འབད་བརྩོན་བྱེད་ཀྱི་ཡིན། འོན་ཀྱང་རྣམ་པ་ཚོའི་ངོས་ནས་དེར་འཛུལ་ཞུགས་དང་འགན་འཁུར་གནང་རྒྱུ་ཧ་ཅང་གལ་ཆེན་པོ་རེད། ཤེས་ཡོན་སྲིད་བྱུས་དང་འབྲེལ་བའི་ཐོག་ནས་ང་ཚོར་རོགས་དངུལ་རག་འཆར་ཡོད། དེ་དོན་སྨིན་བྱུང་ན་འཛིན་གྲྭ་དང་པོ་དང་གཉིས་པ། གསུམ་པའི་དགེ་རྒན་ཡོངས་རྫོགས་ཟབ་སྦྱོང་དུ་ཡོང་དགོས་རེད། ཅེས་བཀོད་ཁྱབ་བྱུང་ན་རྣམ་པ་ཚོ་ཕེབས་རྐྱང་གནང་དགོས་པ་མ་གཏོགས། ལས་དོན་གཞན་ཞིག་ལ་ཁག་དཀྲིས་ཏེ་མ་ཕེབས་ན། ང་ཚོའི་འཆར་གཞི་བཞིན་འགྲོ་སོང་ཆེན་པོ་ཞིག་བཏང་བ་ལྟར་ཐུགས་ཕན་གསོ་བ་ཞིག་ཡོང་གི་མི་འདུག མཐུན་འགྱུར་བསྐྲུན་རྒྱུ་དེ་ང་ཚོའི་འགན་རེད། ང་ཚོས་གང་ཐུབ་ཅི་ཐུབ་ཞུ་གི་ཡིན། གྲོས་ཆོད་མང་ཆེ་བ་ཞིག་ཤེས་རིག་ལས་ཁུངས་ནས་གནང་དགོས་རྒྱུ་ཞིག་རེད་འདུག དགེ་རྒན་ངོས་ནས་གནང་དགོས་རྒྱུ་དེ་དག་ངེས་པར་དུ་ཐུགས་ལ་ཉར་རོགས། ཞེས་ཞུ་རྒྱུ་ཡིན། མ་གཞི་ཤེས་རིག་ཚོགས་ཆེན་དང་འཛིན་གྲྭ་བཅུ་པའི་སློབ་ཕྲུག་ ༣༡༡ ཙམ་ལ་ཟབ་སྦྱོང་སྤྲད་པ་རེད། དེ་བཞིན་ན་ནིང་འཛིན་གྲྭ་བཅུ་གཉིས་ཀྱི་གྲུབ་འབྲས་ཡག་པོ་བྱུང་བ་དེ་དག་ཆ་ཚང་༸གོང་ས་མཆོག་ལ་སྙན་སེང་ཞུ་སྐབས། མགོན་པོ་གང་ཉིད་མཆོག་གིས་ཧ་ཅང་ཡག་པོ་བྱས་འདུག་ཅེས་ཐུགས་མཉེས་པོ་མཛད་སོང་།
ད་ཐེངས་ཚོགས་འདུའི་ཐོག་བཞག་པའི་གྲོས་ཆོད་དེ་དག་ཉིན་ཤས་རྗེས་སྙན་སེང་ཞུ་རྒྱུ་ཡིན། ད་ལན་༸གོང་ས་མཆོག་ཐུགས་མཉེས་པོ་མཛད་ཀྱི་རེད་སྙམ་བཞིན་ཡོད། ༸གོང་ས་མཆོག་གིས་ཤེས་ཡོན་དེ་གལ་ཤོས་སུ་བརྩིས་ཏེ་དུས་རྟག་ཏུ་བཀའ་འདྲི་ཕེབས་ཀྱི་རེད། ད་ཐེངས་ང་ཚོས་གྲོས་ཆོད་གསུམ་བཞག་པའི་ཐོག་ནས་གཞི་རིམ་འོག་ཤེས་ཡོན་སྲ་བརྟན་གཏོང་ཕྱོགས་སྐོར་བཀའ་བསྡུར་ཧ་ཅང་བྱུང་ཡོད། མཁས་དབང་མང་པོ་ཞིག་གིས་གཞི་རིམ་འོག་མའི་འཛིན་གྲྭ་དེ་དག་གལ་ཆེ་ཤོས་རེད། འཛིན་གྲྭ་དང་པོ་གཉིས་པའི་ནང་ཡི་གེ་འབྲི་ཀློག་མ་ཤེས་ན་ཕུགས་ལ་འཐུས་ཤོར་འགྲོ་གི་རེད། ཅེས་གསུངས་ཡོད། དེར་བརྟེན་གཞི་རིམ་འོག་མའི་དགེ་ལས་རྣམས་ནས་སྤྱི་ཡོངས་ཐོག་འགན་འཁུར་གནང་རྒྱུ་དེ་ཧ་ཅང་གལ་ཆེན་པོ་ཆགས་ཀྱི་འདུག གྲོས་ཆོད་གཉིས་པ་དེ་དགེ་རྒན་མཁས་ལས་གོང་མཐོར་གཏོང་ཕྱོགས་ཐད་བཀའ་བསྡུར་དང་གྲོས་ཆོད་བཞག་ཡོད། གཙོ་ཆེ་ཤོས་དགེ་རྒན་གྱི་འགན་འཁྱེར་བའི་ཐོག་ནས་ཉིན་རེ་ཉིན་རེ་འཛིན་གྲྭར་བསླབ་དགོས་རྒྱུ་དེ་གལ་ཆེ་ཤོས་ཆགས་ཀྱི་ཡོད། འཛིན་གྲྭའི་ནང་སློབ་ཁྲིད་བྱེད་སྐབས་དོ་དབྱིངས་ལྡན་པའི་ཐོག་ནས་སློབ་ཕྲུག་ཚོར་སྤྲོ་གནང་ཡོད་པའི་ཐོག་ནས་བསླབ་རྒྱུ་ཧ་ཅང་གལ་ཆེན་པོ་རེད་མ་གཏོགས་ཚོགས་ཆེན་མང་པོ་ཞིག་ཚོགས་པ་དང་གྲོས་ཆོད་མང་པོ་ཞིག་བཞག་ནས་མཐར་འཛིན་གྲྭའི་ནང་ཉིན་རེ་ཉིན་རེ་སློབ་ཁྲིད་ཡག་པོ་མ་གནང་ན་དུས་ཚོད་འཕྲོ་བརླག་རེད། ལས་རྒྱུ་འབྲས་ལ་འགྲོ་གི་མ་རེད། མ་འོངས་སོན་རྩའམ་འགོ་ཁྲིད་ཚོ་འཕྲོ་བརླག་ཏུ་ཕྱིན་ན་ཧ་ཅང་ཐབས་སྐྱོ་པོ་རེད། ཅེས་སོགས་དང་། དེ་བཞིན་སྲིད་སྐྱོང་མཆོག་གིས་རིང་མིན་ཕྱི་ཟླ་གཉིས་པ་གསུམ་པའི་ནང་དབུ་མའི་ལམ་སྐོར་མང་ཚོགས་ཁྲོད་གོ་རྟོགས་སྤེལ་རྒྱུའི་ལས་འཆར་ཡོད་སྐོར་སོགས་ཀྱི་གསུང་བཤད་གནང་ཡོད།།
