༢༠༡༤ ཟླ་ ༡ ཚེས་ ༣༡ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༡ ཚེས་ ༡༤ ཉིན་ལྷ་སར་གནས་སྡོད་བོད་རིགས་གཞོན་སྐྱེས་ནོར་རྒྱས་ལགས་ཀྱི་ལག་ཐོགས་ཁ་པར་གྱི་༼ཝི་ཅེ ཌི༽(we chat)སྐད་འཕྲིན་ནང་༸གོང་ས་མཆོག་གི་གསུང་ཆོས་དང་སྐུ་པར་སོགས་ཐོན་རྐྱེན་གྱིས་རྒྱ་གཞུང་ས་གནས་ཉེན་རྟོག་པས་འཛིན་བཟུང་བྱས་པའི་གནས་ཚུལ་ཐོན་འདུག
ཨེ་ཤི་ཡ་རང་དབང་རླུང་འཕྲིན་ཁང་གིས་གནས་ཚུལ་སྤེལ་གསལ་ལྟར་ན། བོད་ཕྱི་ནང་གཉིས་ཀྱི་བོད་མིའི་དབར་༼ཝི་ཅེ་ཌི་༽ཞེས་པའི་སྐད་འཕྲིན་བརྒྱུད་འབྲེལ་མཐུད་གནང་གི་ཡོད་པ་ལྟར། ཉེ་ཆར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་སྦེལ་ཀོབ་ཏུ་སྩལ་བའི་བཀའ་ཆོས་དང་སྐུ་པར་ཁག་གཅིག་བོད་ནང་གི་བོད་མི་ཚོས་༼ཝི་ཅེ་ཌི་༽ཞེས་པའི་སྐད་འཕྲིན་བརྙན་ཆས་ཐོག་གསང་ཐབས་ཀྱི་སྒོ་ནས་ལྟ་ཉན་བྱེད་མཁན་བྱུང་ཡོད་འདུག ལྷ་སར་རྒྱ་གཞུང་གི་ཉེན་རྟོག་པས་བོད་མིའི་ལག་ཐོགས་ཁ་པར་ལ་གློ་བུར་སྔོག་བཤེར་བྱེད་པའི་སྐབས་ཤིག་ལ་བོད་རིགས་ནོར་རྒྱས་ལགས་ཀྱི་ལག་ཐོགས་ཁ་པར་ནང་༸གོང་ས་མཆོག་གི་སྐུ་པར་དང་། བཀའ་ཆོས་དུམ་བུ་ཁག་གཅིག་བཞག་ཡོད་པ་རྣམས་རང་གི་ཉེ་གྲོགས་ཁག་གཅིག་དང་ལྷན་ལྟ་ཀློག་བྱས་པ་མ་ཟད། གཞན་ཁག་གཅིག་ལ་མཉམ་སྤྱོད་བྱས་པའི་ཉེས་མིང་འོག་ལྷ་སའི་རྭ་མོ་ཆེ་ཁུལ་ནས་རྒྱ་གཞུང་གི་ཉེན་རྟོག་པས་འཛིན་བཟུང་བཀག་ཉར་དང་། ཉེས་རྡུང་བཏང་ཡོད་འདུག
ནོར་རྒྱས་ལགས་ནི་བོད་ནུབ་རྒྱུད་ལ་སྟོད་དིང་རི་རྫོང་ཁོངས་མཚོ་སྒོ་ཞེས་པའི་གྲོང་ཚོ་ནས་ཡིན་པ་དང་། རྒྱུན་ལྡན་ལྷ་སར་ཨར་ལས་ཀྱི་ལས་དོན་གཉེར་ཏེ་འཚོ་བ་སྐྱེལ་མཁན་ཞིག་ཡིན་འདུག འདི་ལོའི་ཕྱི་ཚེས་ ༡༤ ཉིན་ཁོང་འཛིན་བཟུང་བྱས་རྗེས་ཕྱི་ཚེས་ ༢༡ བར་ཉིན་གྲངས་བརྒྱད་རིང་གར་སོང་ཆ་མེད་གྱུར་ཡོད་པ་དང་། ཕྱི་ཚེས་ ༢༢ ཉིན་ཁོང་རྭ་མོ་ཆེའི་ཉེ་འདབས་སུ་ཡོད་པའི་བཀག་ཉར་ཁང་ཞིག་གི་ནང་ཡོད་པ་ཤེས་རྟོགས་བྱུང་ཡོད་འདུག་པ་བཅས།།
