༢༠༡༤ ཟླ་ ༡ ཚེས་ ༡༥ རེས་གཟའ་ལྷག་པ།
༄༅། །འདི་གར་སིམ་ལ་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། རྡ་ས་མེག་གྷན་ཁུལ་གྱི་བོད་མི་ཁྱིམ་ཚང་ ༢༡༠ ལ་ཤིང་ནགས་ས་ཆ་ཧམ་བཟོས་བྱས་ཡོད་ཚུལ་དང་གང་མགྱོགས་ཕྱིར་ཕུད་དགོས་པའི་ཤིང་ནགས་ལས་ཁུངས་ནས་བཀའ་རྒྱ་འབྱོར་ཡོད་པ་མ་ཟད། སིམ་ལའི་ (National Green Tribunal) (NGT) ཁྲིམས་ཁང་ནས་ཀྱང་ཕྱི་ལོ་ ༢༠༡༣ ཟླ་ ༧ ཚེས་ ༢༩ ཉིན་བཏང་བའི་བཀའ་རྒྱའི་ནང་ཚོགས་ཆུང་ཆེད་འཛུགས་ཀྱིས་ཞིབ་འཇུག་དགོས་པའི་བཀའ་ཕེབས་ལྟར་ཚོགས་ཆུང་ནས་རྡ་ས་ཆེད་ཕེབས་ཀྱིས་ཞིབ་འཇུག་ཞིབ་ཕྲ་གནང་ཡོད།
ཚོགས་ཆུང་གི་སྙན་ཐོའི་ནང་གོང་འཁོད་བོད་མི་རྣམས་ནས་ཤིང་ནགས་ས་ཆ་ཧམ་ཟས་བྱས་ཡོད་པ་མ་ཟད། ཤིང་ནགས་གཅོད་འབྲེག་དང་ཐོག་བརྩེགས་ཅན་གྱི་ཁང་པ་མང་པོ་རྒྱག་ཡོད་པ། དེ་བཞིན་བྲག་རྡོ་ཐོག་རི་མོ་འདྲ་མིན་བརྐོས་པ་དང་ཤིང་ནགས་ས་ཆའི་ཐོག་དར་ལྕོག་སོགས་བཙུགས་ཏེ་ཁོར་ཡུག་ལ་གནོད་ཚེ་ཆེན་པོ་བྱུང་འདུག ཅེས་བཀོད་ཡོད།
དེ་རྗེས་ (NGT) ནས་བཀའ་ཕེབས་དོན། གང་ལྟར་གོང་འཁོད་བྱེད་སྒོ་མཐའ་དག་མཚམས་འཇོག་དགོས་པ་མ་ཟད། ཤིང་ནགས་སྲུང་སྐྱོབ་ལས་ཁུངས་ནས་ཁང་པ་དེ་རིགས་ག་ཚོད་གཏོར་ཟིན་ཡོད་མེད་སོགས་ཀྱི་ལག་བསྟར་ཇི་བྱུང་གི་སྙན་ཐོ་ཁྲིམས་ཁང་དུ་འབུལ་དགོས། ཞེས་བཀའ་ཕེབས་ཡོད། ཤིང་ནགས་སྲུང་སྐྱོབ་ལས་ཁུངས་ཀྱི་སྙན་ཐོར་ཁང་པ་དེ་རིགས་གཏོར་རྒྱུ་དང་གཏོར་རྗེས་ཀྱིས་ཞིག་རོ་གཡུག་ས་སོགས་ཀྱི་འཆར་གཞི་གྲ་སྒྲིག་བྱེད་བཞིན་པའི་སྐོར་ལན་འདེབས་བྱས་ཡོད་སྟབས། ད་ཆ་བོད་མི་དེ་དག་གནས་དང་མ་གནས་ཧ་ཅང་ཛ་དྲག་གི་གནས་སུ་སླེབས་ཡོད།
དཔལ་ལྡན་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་དབུ་འཁྲིད་འོག་ནང་སྲིད་ལས་ཁུངས་དང་། རྡ་ས་ས་གནས་འགོ་འཛིན། དེ་བཞིན་སིམ་ལ་ས་གནས་འགོ་འཛིན་ལས་ཁུངས་ཀྱིས་ཟླ་ཤས་གོང་ནས་མངའ་སྡེའི་སྤྱི་ཁྱབ་བློན་ཆེན་གྱིས་གཙོས་དཔོན་རིགས་ཆེ་ཕྲ་ཁག་ལ་ཞུ་གཏུག་ལན་མང་གནང་ཡོད། འོན་ཀྱང་ད་ཆ་གནས་ཚུལ་ཛ་དྲག་ཆེ་རུ་གྱུར་སྟབས་བཀའ་བློན་མཆོག་འཕྲལ་དུ་ལྡི་ལིར་རྒྱ་གར་དབུས་གཞུང་ལ་ཞུ་གཏུག་དང་སིམ་ལར་ཡོད་པའི་ཁྲིམས་རྩོད་པ་དང་དངོས་སུ་མཇལ་འཕྲད་ཀྱིས་བཀའ་བསྡུར་ལྷུག་པོར་གནང་ཡོད། འདི་ག་ལས་ཁུངས་སུ་མ་འོངས་བྱེད་ཕྱོགས་དང་མངའ་སྡེའི་གཞུང་ལ་བསྐུལ་མ་གནང་ཕྱོགས་ཀྱི་ལམ་སྟོན་ཞིབ་ཕྲ་ཕེབས་ཡོད། སྤྱིར་༸གོང་ས་སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་། རྒྱ་གར་དབུས་གཞུང་དང་མངའ་སྡེའི་གཞུང། དེ་བཞིན་རྒྱ་གར་མི་མང་གིས་བོད་མིར་རྒྱབ་སྐྱོར་ལ་བརྟེན་ནས་དཀའ་སེལ་ཐུབ་པའི་རེ་བ་ཞུ་བཞིན་ཡོད། (NGT) ཁྲིམས་ཁང་ནས་རྗེས་མའི་ཉན་ཞིབ་ ༢༠༡༤།༣།༢༧ ཉིན་བར་འཕར་འགྱངས་གནང་ཡོད།
