༢༠༡༤ ཟླ་ ༡ ཚེས་ ༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༤ ཟླ་ ༡ ཚེས་ ༧ ཉིན་ཤེས་རིག་ལས་ཁུངས་ནས་གོ་སྒྲིག་འོག་རྡ་ཤོད་བོད་ཁྱིམ་ཚོགས་ཁང་ནང་རྒྱ་བལ་གཉིས་ཀྱི་སློབ་གྲྭ་ཁག་ ༧༦ ནས་སློབ་གྲྭའི་རེག་ཊར་དང་ངེས་སྟོན་པ། སློབ་སྤྱི། ཆོས་དགེ། དགེ་རྒན་སོགས་ཁྱོན་མི་གྲངས་ ༢༣༢ བརྒལ་བ་ལྷན་འཛོམས་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྤེན་པ་ཚེ་རིང་མཆོག་གིས་སྤྱི་འཐུས་ལྷན་ཚོགས་ཀྱི་གསུང་བཤད་གནང་དོན། བོད་ཁ་བ་གངས་ཅན་པའི་ལྷ་སྐལ་འཕགས་པ་སྤྱན་རས་གཟིགས་ཀྱི་རྣམ་སྤྲུལ་ཁམས་གསུམ་ཆོས་ཀྱི་རྒྱལ་པོ་འཇིག་རྟེན་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གུས་ཕྱག་སྔོན་དུ་བཏང་བའི་ཐོག་ནས་དེ་རིང་འདིར་ཤེས་རིག་གི་ཚོགས་ཆེན་ཐེངས་དྲུག་པའི་ཐོག་ཆེད་དུ་བཅར་བའི་སྐྱབས་གནས་དགེ་འདུན་གྱི་སྡེ། དཔལ་ལྡན་ཁྲིམས་ཞིབ་པ་ཆེ་བས་དབུས་ཁྲིམས་དཔོན་རྣམ་པ་དང་། ཁྲིམས་དཔོན་ལས་ཁུངས་ཀྱི་འབྲེལ་ཡོད། ཤེས་རིག་ཚོགས་ཆེན་ཐེངས་དྲུག་པའི་སྐུ་མགྲོན་གཙོ་བོ་ཤེས་རིག་བཀའ་བློན་དང་སྲིད་སྐྱོང་གཅིག་ལྕོགས་འབུམ་རམས་པ་བློ་བཟང་སེང་གེ་མཆོག བཀའ་བློན་རྣམ་པ། བཀའ་བློན་ལས་ཟུར་རྣམ་པ། དེ་བཞིན་འཛིན་སྐྱོང་གི་ལས་ཀྱི་སྣེ་མོ་བ་ཚང་མ། དཔལ་ལྡན་ཚོགས་གཙོ་གཞོན་པ། བོད་མི་མང་སྤྱི་འཐུས་རྣམ་པ། རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། ལས་ཀྱི་སྣེ་མོར་གཏོགས་པ་དེ་རིང་འདིར་ཆེད་མངགས་གདན་ཞུ་གནང་བ་བཞིན་ཕེབས་པ་དང་།
ལྷག་པར་ཚོགས་ཆེན་འདིའི་ནང་མཉམ་ཞུགས་གནང་མཁན་སློབ་གྲྭ་ཁག་གི་འགན་བཞེས་མཁན་འགན་འཛིན་རྣམ་པ་དང་དགེ་རྒན་རྣམ་པར། ངས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། དུས་རྒྱུན་དུ་ནས་བོད་མི་མང་སྤྱི་འཐུས་ལྷན་ཚོགས་དང་ང་རང་སྒེར་གྱི་ངོས་ནས་ཡིན་ནའང་རེད། དེང་སང་ང་ཚོའི་སྤྱི་ཚོགས་ནང་སློབ་གསོའི་འགན་བཞེས་མཁན་མ་འོངས་པའི་མི་རབས་གསར་པ་གསོ་སྐྱོང་དང་བཟོ་ལྟ་བཟོ་མཁན་དགེ་རྒན་ཚང་མར་གུས་བཀུར་ཧ་ཅང་ཆེན་པོ་ཞུ་བཞིན་ཡོད། དེ་རིང་གོ་སྐབས་འདི་བརྒྱུད་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་རྣམ་པ་ཚོས་ད་བར་ཕྱག་ལས་གང་གནང་བ་དང་། མ་འོངས་པར་ད་དུང་འདི་ལས་ལྷག་འགན་བཞེས་དགོས་ཀྱི་ཡོད་པའི་ཐོག་ནས་གནང་བར་བསྔགས་བརྗོད་དང་རྗེས་སུ་ཡི་རང་ཞུ་རྒྱུ་ཡིན། མ་འོངས་པར་ཡང་རེ་བ་ཆེན་པོའི་ཐོག་ནས་བསྡད་ཡོད། ཅེས་ཞུ་འདོད་བྱུང་། དེ་རིང་ཚོགས་ཆེན་འདིའི་ཐོག་མཛད་རིམ་ནང་ཡོད་པ་བཞིན་བོད་མི་མང་སྤྱི་འཐུས་ལྷན་ཚོགས་ཀྱིས་གཏམ་བཤད་བྱེད་དགོས་རེད། ཅེས་བཀའ་ཕེབས་ཡོད། འོན་ཀྱང་ཐེངས་འདིར་ཡིག་ཐོག་ཏུ་གཏམ་བཤད་གོ་སྒྲིག་ཞུས་ཐུབ་མ་སོང་། སྤྱི་འཐུས་རྒྱུན་ལས་ཁག་དང་གོ་བསྡུར་ཞུས་ཏེ་དོན་ཚན་ཁག་གསུམ་དང་། དུས་རྒྱུན་དུ་ནས་ངས་ཤོད་རྒྱུའི་གནད་དོན་ཁ་ཤས་ཞུས་ན་བསམས་བྱུང་།
ད་ལྟ་ཤེས་རིག་དྲུང་ཆེས་ཤེས་རིག་ཚོགས་ཆེན་ཐེངས་ལྔ་པའི་ཐོག་གྲོས་ཆོས་བཞག་པ་རྣམས་ལག་ལེན་བསྟར་ཕྱོགས་སྐོར་དང་། དེ་རིང་གི་ཚོགས་འདུའི་གྲོས་གཞི་སྐོར་གསུངས་སོང་། གང་ལྟར་ང་ཚོའི་བོད་པའི་སྤྱི་ཚོགས་འདི་བཙན་བྱོལ་ལ་གྱར་བ་ནས་བཟུང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་འོད་ཟེར་དང་། ཁོང་གི་འཕྲལ་ཕུགས་རྒྱང་གསུམ་གྱི་རླབས་ཆེན་དགོངས་པའི་འོག་ནས་ང་ཚོའི་བཙན་བྱོལ་སྤྱི་ཚོགས་འདི་གཞན་དང་མི་འདྲ་བ་ཞིག་ཏུ་གྱུར་ཡོད། དེའི་ནང་ནས་ཤེས་ཡོན་སློབ་གསོའི་ཐོག་སྤྱི་ཚོགས་གཞན་དང་བསྡུར་ན་ང་ཚོ་ཚད་མཐོན་པོར་བསླེབས་ཡོད་པ་ཚང་མས་ངོས་འཛིན་ཞུ་བཞིན་ཡོད། དེར་བརྟེན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་འོག་ནས་ཤེས་ཡོན་གྱི་སྡེ་ཚན་ཁག་མི་འདྲ་བ་མང་པོའི་ཐོག་འགན་འཁྱེར་མཁན་ཚང་མར་ད་བར་མི་རབས་མང་པོས་སྐུ་ལས་བསྐྱོན་པ། དཔེར་ན། ངར་ཆ་བཞག་ན་དེ་རིང་འདིར་ལངས་ཏེ་སྐད་ཆ་ཤོད་རྒྱུའི་སྤོབས་པ་དེ་དག་ཚང་མ་ང་ཚོའི་སྔོན་མ་དགེ་རྒན་ཚོའི་ཐུགས་རྗེ་བཀའ་དྲིན་ལ་བརྟེན་ནས་ད་ལྟ་འདིར་ལངས་རྒྱུའི་གོ་སྐབས་བྱུང་ཡོད། མ་འོངས་པའི་མི་རབས་ནང་ནས་བོད་མིའི་སྒྲིག་འཛུགས་སམ་སྤྱི་ཚོགས་ནང་འགན་འཁྱེར་མཁན་ཚང་མ་ད་ལྟ་ཁྱེད་རང་ཚོས་སྐུ་ལས་བསྐྱོན་ནས་སློབ་གསོའི་ལས་དོན་ཐོག་ཧུར་བརྩོན་གནང་བའི་འབྲས་བུ་ཡིན་པར་བརྟེན། དེ་རིང་གོ་སྐབས་འདི་བརྒྱུད་དཔེར་ན། ང་རང་སྒེར་གྱི་ངོས་ནས་ཆ་བཞག་ན་ང་བཟོ་ལྟ་བཟོ་མཁན་གྱི་རྒན་ལགས་རྣམ་པར་རྗེས་སུ་དྲན་པའི་ཐོག་ནས་དགེ་རྒན་མི་རབས་པོ་ཞིག་གིས་སྐུ་ལས་བསྐྱོན་པ་ཚང་མར་སྙིང་ཐག་པ་ནས་ཐུགས་རྗེ་ཆེ་ཞུ་འདོད་བྱུང་། ད་ལྟའི་བཀའ་ཤག་འདི་དཔལ་ལྡན་སྲིད་སྐྱོང་ཤེས་རིག་བཀའ་བློན་གཅིག་ལྕོགས་རེད། ལས་དོན་གྱི་ཆ་ནས་ཤེས་རིག་གི་ལས་དོན་རྩ་ཆེན་བརྩིས་ཏེ་གང་ལྟར་ཤེས་རིག་གི་ཚོགས་འདུ་འཚོགས་རྒྱུ་དང་། ཟབ་སྦྱོང་སྤྲོད་རྒྱུ། དཔལ་འབྱོར་འདུ་འགོད་གནང་རྒྱུའི་ཐོག་སྐུ་ལས་མང་པོ་ཞིག་བསྐྱོན་ཡོད། དེ་དག་ད་ལྟ་ཙམ་མིན་པར་ལོ་མང་པོ་བསྟུད་མར་སྐུ་ལས་བསྐྱོན་དགོས་རྒྱུའི་གནས་སྟངས་ཤིག་ཆགས་ཡོད། ད་བར་གྲུབ་འབྲས་ཐོན་པ་དེ་དག་ལ་ལེགས་སོ་ཞུ་རྒྱུ་ཡིན། འོན་ཀྱང་ད་བར་གྲུབ་འབྲས་སོན་པ་དེར་འདོད་པ་ཚིམ་སྟེ་བཞུགས་ཀྱི་མ་རེད་ལ། ད་ལྟ་ལས་བསྡོམས་ནང་གསལ་བ་བཞིན་མ་འོངས་པར་ཡང་སྐུ་ལས་བསྐྱོན་ཏེ་འབད་བརྩོན་གནང་རྒྱུའི་དགོངས་གཞི་ཡོད་པ་བཞིན་ཧུར་ཐག་འབད་ཐག་གནང་རོགས་ཞུ་འདོད་བྱུང་། སྤྱི་འཐུས་རྒྱུན་ལས་ནང་བཀའ་བསྡུར་བྱུང་བའི་དོན་ཚན་གལ་ཆེ་ཤོས་གཅིག་ནི། བཀའ་ཤག་སྐབས་བཅུ་གཉིས་པ་དང་བཅུ་གསུམ་པས་གཏན་ལ་ཕབ་པའི་ཤེས་ཡོན་སྲིད་བྱུས་རེད། ཤེས་ཡོན་སྲིད་བྱུས་འདི་ང་ཚོའི་སྤྱི་ཚོགས་དང་། དེང་སང་གི་གོ་ལ་གཅིག་གྱུར་གྱི་འཛམ་གླིང་ངམ་གཅིག་ལ་གཅིག་བརྟེན་གྱི་འཛམ་གླིང་འདིའི་ནང་འགྱུར་འགྲོས་ཆེན་པོ་ཞིག་འགྲོ་བཞིན་ཡོད་པར་བརྟེན། འདིའི་འཕྲལ་ཕུགས་རྒྱང་གསུམ་གྱི་དགོས་མཁོ་ལ་བསྟུན་ནས་ཤེས་ཡོན་སྲིད་བྱུས་འདི་གཏན་འབེབས་བྱས་པ་ཞིག་རེད།
དེ་ཡང་དངོས་གནས་བྱས་ན་ཤེས་ཡོན་སྲིད་བྱུས་དེ་དག་འཛིན་སྐྱོང་གི་ཐག་གཅོད་འོག་ནས་བྱེད་ཐུབ་རྒྱུའི་གནས་བབ་ཅིག་རེད། འོན་ཀྱང་དེའི་སྐབས་ཀྱི་བཀའ་ཤག་གིས་ཆེད་མངགས་སྒྲིག་གཞི་བོཟོས་ཏེ་བོད་མི་མང་སྤྱི་འཐུས་ལྷན་ཚོགས་སུ་བསྣམས་ཕེབས་ནས་དོན་ཚན་རེ་རེའི་ཐོག་གྲོས་བསྡུར་སྦྱངས་བཤད་གཏིང་ཟབ་བྱས་ཏེ་གཏན་ལ་ཕབ་པའི་གནས་སྟངས་ཤིག་རེད། ད་ལྟ་ཡིན་ནའང་ང་ཚོས་ཤེས་ཡོན་སྲིད་བྱུས་ཀྱི་དགོངས་དོན་གཞིར་བཟུང་འགྲོ་གི་ཡོད་པར་ཡིད་ཆེས་ཡོད། འོན་ཀྱང་སྐབས་རེ་མང་ཚོགས་དང་ལས་ཀྱི་སྣེ་མོ་བའི་ནང་བསམ་ཚུལ་ཕྲན་བུ་ཡོང་གི་ཡོད་པ་རང་བཞིན་རེད། རྣམ་པ་ཚོས་མཁྱེན་གསལ་རེད། ང་ཚོར་ཡང་ཡི་གེ་གཏོང་མཁན་གང་ཙམ་ཞིག་བྱུང་། དེར་བརྟེན་མིང་ཙམ་མིན་པར་དོན་དངོས་སུ་ང་ཚོས་ཤེས་ཡོན་སྲིད་བྱུས་ཐོག་འགྲོ་ཐུབ་དགོས་རྒྱུ་དེ་གནད་འགག་ཆེན་པོ་ཞིག་རྩི་བཞིན་ཡོད་ལ་ཧ་ཅང་གལ་ཆེན་པོ་རེད། དེའི་ཐོག་ཤེས་རིག་ལས་ཁུངས་གཙོ་བོར་བྱས་པའི་འབྲེལ་ཡོད་ཚང་མས་འགན་འཁྱེར་དགོས་རྒྱུ་ཧ་ཅང་གལ་ཆེན་པོ་འདུག དེའི་སྒང་མང་ཚོགས་ནང་བསམ་ཚུལ་ཕྲན་བུ་ཡོང་གི་ཡོད་པར་བརྟེན། བོད་མི་མང་སྤྱི་འཐུས་ལྷན་ཚོགས་ཀྱི་རྒྱུན་ལས་རྟོགས་ཞིབ་སྡེ་ཚན་གྱིས་ཤེས་ཡོན་སྲིད་བྱུས་གཏན་འབེབས་བྱས་པ་ནས་བཟུང་ད་བར་ཤེས་ཡོན་སྲིད་བྱུས་ཀྱི་དགོངས་དོན་འགྲོ་ཐུབ་ཡོད་མེད། ད་ལྟའི་གནས་སྟངས་གང་འདྲ་ཞིག་ཆགས་ཡོད་མེད་ཐོག་རྟོགས་ཞིབ་བྱེད་རྒྱུའི་ལས་རིམ་ཞིག་ཤེས་རིག་ཚོགས་ཆེན་གྲུབ་རྗེས་འགོ་འཛུགས་ཞུ་རྒྱུ་རེད། འཛིན་སྐྱོང་རྟོགས་ཞིབ་སྡེ་ཚན་ནས་དུས་རྒྱུན་དུ་ཕྱག་ལས་གནང་རྒྱུའི་ནང་ནས་འཆར་གཞི་གཅིག་རེད། དེ་རྒྱུན་ལས་ཀྱི་ཚོགས་ཆུང་ཡིན་པར་བརྟེན་སྙན་ཐོ་གང་བསླེབས་ཀྱང་གཅིག་བྱས་ན་གྲོས་ཚོགས་ནང་བསླེབས་ཏེ་བགྲོ་གླེང་བྱེད་དགོས་རྒྱུའི་གནས་སྟངས་ཤིག་ཆགས་མི་སྲིད་པ་མ་རེད། དེ་ཞོར་དུ་གཅིག་ཞུ་ན་དུས་རྒྱུན་དུ་ང་ཚོས་འགྲིག་པ་ཆ་ཚང་ཞིག་ཞུ་བཞིན་ཡོད། མ་འགྲིག་པ་རྣམས་མང་ཚོགས་ནང་བསམ་ཚུལ་ཡོད་ན་དེ་དག་གསལ་པོ་བཟོ་ཐུབ་རྒྱུའི་གནས་སྟངས་ཤིག་བསྐྲུན་དགོས་རྒྱུ་ང་ཚོའི་ལས་འགན་ཆགས་ཡོད།
གཉིས་པ། བོད་སློབ་འཛིན་ཚོགས་ཀྱི་སློབ་གྲྭ་རྒྱ་ཆེན་པོ་རེད། བོད་སློབ་འཛིན་ཚོགས་རྩིས་ལེན་བྱེད་རྒྱུའི་རིམ་པ་ཞིག་འགྲོ་བཞིན་ཡོད་པར་བརྟེན། བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་ཤེས་རིག་ལས་ཁུངས་གཙོ་བོར་བཟུང་བའི་སློབ་གྲྭའི་འགན་འཁྱེར་མཁན་དང་དགེ་རྒན་རྣམ་པ་ཚང་མར་འབོད་སྐུལ་ཞུ་རྒྱུ་ནི། སྐབས་དེར་ང་ཚོར་དཀའ་ངལ་ཏན་ཏན་འཕྲད་སྲིད་པ་རེད། མིའི་ནུས་པ་དང་དཔལ་འབྱོར་གྱི་ཐོག སྤྱིར་བཏང་རྒྱ་གར་གཞུང་གི་རོགས་སྐྱོར་མུ་མཐུད་ཡོང་གི་རེད་ཀྱང་། ཞིབ་ཕྲ་བལྟས་ན་འདིའི་སྒང་མཐུན་རྐྱེན་སྦྱར་དགོས་རྒྱུའི་གནས་སྟངས་ཆགས་སྲིད་པར་བརྟེན། དཔལ་འབྱོར་གྱི་མཐུན་རྐྱེན་ཐོག་ནས་དཀའ་ངལ་མི་ཉུང་བ་ཞིག་འཕྲད་སྲིད་པ་རེད་བསམས་ཀྱི་འདུག གཙོ་བོ་མིའི་ནུས་པ་རེད། མིའི་ནུས་པའི་ཐོག་ནས་དཀའ་ངལ་གང་འཕྲད་པ་བྱུང་སྐབས་ང་ཚོའི་བོད་རིགས་དགེ་རྒན་རྣམས་ནས་དམིགས་བསལ་གྱི་ཐུགས་འགན་ཆེ་ཙམ་བཞེས་དགོས་རྒྱུའི་དུས་ལ་བབ་ཀྱི་རེད་བསམས་ཀྱི་ཡོད། དེ་བཞིན་དེ་རིང་འདི་བརྒྱུད་དགེ་རྒན་རྣམ་པ་ཚོར་སྐུ་ངལ་ཕྲན་བུ་འཕྲད་ཀྱང་དེའི་སྐབས་ཀྱི་འགྱུར་བ་དང་འབྲེལ་བའི་ཐོག་སྐུ་ངལ་འཛེམས་མེད་ཐོག་ནས་དུས་རྒྱུན་དང་མི་འདྲ་བར་ལས་འགན་འཕར་མ་བཞེས་དགོས་བྱུང་ན་བཞེས་རོགས་གནང་ཞེས་འབོད་སྐུལ་ཞུ་རྒྱུའི་སྤྱི་འཐུས་རྒྱུན་ལས་ནས་བཀའ་མོལ་བྱུང་བའི་གནས་སྟངས་ཤིག་ཆགས་ཡོད། དེ་བཞིན་འཛིན་སྐྱོང་གི་ངོས་ནས་ཀྱང་མཐུན་རྐྱེན་སྦྱར་གྱི་ཡོད་པ་བཞིན་དགེ་རྒན་རྣམ་པ་ཚོ་ལའང་གསོལ་ཕོགས་དང་བཞུགས་གནས། ཆེ་མཐོང་སོགས་གང་ཅིའི་ཐོག་གང་ཐུབ་པ་དང་གང་སྙབ་ཞིག་ཏན་ཏན་གནང་དགོས་པ་ཆགས་ཀྱི་ཡོད། དེ་ནི་འཛིན་སྐྱོང་ངོས་ནས་ཐུགས་འགན་བཞེས་ཀྱི་རེད་བསམས་ཀྱི་འདུག འདི་ལྟ་བུ་ཞིག་གནང་དགོས་ཀྱི་འདུག་ཅེས་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་འབོད་སྐུལ་ཞུ་རྒྱུ་ཡིན།
གསུམ་པ། ང་ཚོའི་སྤྱི་ཚོགས་ནང་འགྱུར་བ་ཤུགས་ཆེན་ཞིག་འགྲོ་བཞིན་ཡོད་པ་དང་། སྤྱིར་འཛམ་གླིང་ནང་དེང་སང་འགྱུར་བ་འགྲོ་རྒྱུའི་མྱུར་ཚད་ཧ་ཅང་མཐོན་པོ་ཆགས་ཡོད། སྔོན་མ་ལོ་ཉིས་བརྒྱ་སུམ་བརྒྱའི་ནང་འགྲོ་རྒྱུ་དེ་དེང་སང་ལོ་ལྔ་བཅུའི་ནང་འགྲོ་གི་ཡོད་པའི་གནས་སྟངས་ཤིག་ཆགས་ཡོད། དེང་སང་བོད་ནང་ལའང་ང་ཚོར་འདོད་པ་མེད་བཞིན་དུ་རྒྱ་ནག་གི་འགོ་ཁྲིད་ཚོས་རྒྱ་ནག་གཞུང་གི་སྲིད་བྱུས་དང་མི་རིགས་མཉམ་བསྲེས་ཀྱི་སྲིད་བྱུས་འོག་མི་འབོར་སྤོ་ཤུགས་བྱེད་རྒྱུ་དང་། འཛུགས་སྐྲུན་གྱི་ལས་གཞི་རྒྱ་ཆེ་སྤེལ་བའི་ཐོག་ནས་བོད་མི་རིགས་རྩ་བརླག་གཏོང་རྒྱུའི་སྲིད་བྱུས་འགྲོ་མུས་རེད། ལྷག་པར་བོད་ཀྱི་སྐད་ཡིག་ཐོག་སྲིད་བྱུས་དམ་པོ་ཞིག་བཟུང་ནས་འགྲོ་བཞིན་ཡོད། ཁ་སང་ཉེ་ཆར་བོད་ནས་འབྱོར་བའི་བོད་པ་ཞིག་ཐུག་སྐབས་དེང་སང་རྒྱ་བལ་འབྲུག་གསུམ་ནང་བཙན་བྱོལ་བ་བོད་ནས་ཡོང་མཁན་ཉུང་དུ་འགྲོ་གི་ཡོད་པའི་གནས་སྟངས་གཅིག་ནི། འཛིན་གྲྭ་གསུམ་པ་ཡན་གྱི་སློབ་ཕྲུག་ཚང་མ་རྒྱ་ནག་གི་བཀོད་བྱུས་འོག་སློབ་གྲྭ་ནང་གཏོང་དགོས་པ་དང་། སློབ་ཕྲུག་དེ་དག་སློབ་གྲྭ་ནས་ཕྱིར་འཐེན་བྱེད་དགོས་བྱུང་ན་ཁག་པོ་ཡོད་སྐོར་ཤོད་ཀྱི་འདུག དེ་རྒྱུ་མཚན་དུ་མའི་ནང་ནས་གཅིག་ཆགས་ཀྱི་ཡོད། ང་ཚོ་བཙན་བྱོལ་ནང་ཡིན་ནའང་ང་རང་སྒེར་གྱི་ཉམས་མྱོང་གི་ཐོག་ནས་བཤད་ན་ཕྱི་ལོ་ ༢༠༠༠།༢༠༠༡ ལོ་ནས་བཟུང་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་འགན་འཁྱེར་སྐབས་བོད་མིའི་གཞིས་ཆགས་ཁག་མང་ཆེ་བའི་ནང་བཅར་རྒྱུའི་གོ་སྐབས་བྱུང་ཡོད་སྟབས་གནས་སྟངས་གང་ཙམ་ཞིག་ཤེས་ཀྱི་ཡོད། དེ་བཞིན་ཕྱི་རྒྱལ་ཡུལ་གྲུ་ཁག་མང་པོ་ཞིག་ནང་འགྲོ་རྒྱུའི་གོ་སྐབས་བྱུང་། ཉེ་ཆར་ཨ་རིའི་ས་ཁག་བདུན་ནང་ཕྱིན་ཏེ་ཚུར་འཁོར་ཟིན་ཙམ་ཡིན། ཤར་ཨེ་ཤི་ཡ་དང་ཨོ་སི་ཊོ་ལི་ཡའི་ནང་འགྲོ་རྒྱུའི་གོ་སྐབས་བྱུང་། སྤྱི་ཚོགས་ཀྱི་འགྱུར་འགྲོས་འདི་ཧ་ཅང་གི་ཤུགས་ཆེན་འགྲོ་བཞིན་འདུག
དཔེར་ན། ང་ཕྱི་ལོ་ ༢༠༠༡ ལོར་བྷེལ་ཇམ་དུ་འགྲོ་སྐབས་བོད་པ་ ༦༧ མ་གཏོགས་མེད། དེང་སང་ལྟ་བུ་མཚོན་ན་བྷེལ་ཇམ་ནང་བོད་པ་སུམ་སྟོང་ཙམ་ཡོད། ང་ཚོས་སྤྱི་ཡོངས་ཀྱི་རྒྱ་བལ་འབྲུག་གསུམ་གྱི་སྤྱི་ཚོགས་ནང་བལྟས་ན། སྦེལ་ཀོབ་བདེ་སྐྱིད་སླར་གསོ་དང་མོན་གྷོ་འདོད་རྒུ་གླིང་ཕར་ཕུད་པའི་གཞན་གཞིས་ཆགས་དང་གཅིག་མཚུངས་ལྟ་བུ་ཆགས་ཡོད། བྱང་ཨ་རི་ཁོ་ནའི་ནང་བོད་རིགས་སྤྱི་མཐུན་ཚོགས་པ་སུམ་ཅུ་ཙམ་ཡོད། དེ་བཞིན་ཡུ་རོབ་རྒྱལ་ཁབ་ག་ཚོད་ནང་བོད་པ་ཡོད་པ་བཞིན་བོད་རིགས་ཚོགས་པ་བཙུགས་ནས་བསྡད་ཡོད། དེ་དག་ཚང་མ་ང་ཚོས་རང་དབང་གི་ཐོག་ནས་འགྱུར་བ་དེ་འགྲོ་བཞིན་ཡོད། འདི་བཟང་ངན་གྱི་གནས་སྟངས་གང་ཞིག་ཡིན་མིན་སོ་སོའི་ལྟ་སྟངས་ཐོག་ནས་དཔྱད་པ་བྱེད་རྒྱུ་ཞིག་རེད། ངས་འདི་བཟང་ངན་གྱི་གནས་སྟངས་གང་ཡིན་མིན་ཤེས་ཀྱི་མེད། གང་ལྟར་དངོས་ཡོད་གནས་སྟངས་ཐོག་ནས་ང་ཚོའི་སྤྱི་ཚོགས་ནང་འགྱུར་བ་ཤུགས་ཆེན་པོ་ཞིག་འགྲོ་གི་ཡོད་པར་བརྟེན། རྒྱ་བལ་འབྲུག་གསུམ་གྱི་ནང་ང་ཚོའི་མ་འོངས་པའི་གནས་སྟངས་ག་རེ་ཆགས་མིན་ཐོག་ད་ལྟ་ནས་ཐུགས་ཞིབ་གནང་དགོས་རྒྱུ་ཧ་ཅང་གལ་ཆེན་པོ་རེད། གང་ཡིན་ཞེ་ན། ད་ལྟའི་སྤྱི་ཚོགས་ཀྱི་འགྱུར་འགྲོས་འདི་ལ་བལྟས་ན་གཞིས་ཆགས་སོ་སོའི་ནང་ཕྲུ་གུ་སྐྱེ་རྒྱུ་ཡོད་པ་དང་། ལས་ཀ་བྱེད་ཐུབ་རྒྱུའི་ནུས་པ་ཡོད་མཁན་གྱི་གཞོན་སྐྱེས་མང་པོ་ཞིག་ཡང་ན་སོ་སོའི་མདུན་ལམ་ཆེད་རྒྱ་གར་གྱི་གྲོང་ཁྱེར་ནང་འཚོ་བ་སྐྱེལ་རྒྱུ་དང་། དེ་མིན་ན་ཕྱི་རྒྱལ་ཡུལ་གྲུ་ཁག་ནང་འགྲོ་བཞིན་ཡོད། ངས་དུས་རྒྱུན་དུ་ཁོང་ཚོར་རྩེད་མོ་རྩེས་ནས་བརྗོད་ཀྱི་ཡོད། བོད་པའི་སྤྱི་ཚོགས་ནང་གཞོན་སྐྱེས་མང་པོ་ཞིག་བརླག་འདུག་ཟེར་ནས་ང་ཚོར་འཚོལ་དུ་བཏང་བྱུང་། ཁྱེད་ཚོ་ཚང་མ་འདིར་བསླེབས་འདུག ཅེས་རྩེད་མོ་དང་སྦྲགས་ཏེ་བརྗོད་ཀྱི་ཡོད།
ད་ལྟ་དངོས་ཡོད་གནས་སྟངས་ག་རེ་ཆགས་ཡོད་པ་རེད་ཅེ་ན། གཞིས་ཆགས་ཁག་ནང་ཕྲུ་གུ་སྐྱེ་རྒྱུ་ཡོད་པ་དང་། ལས་ཀ་བྱེད་ཐུབ་མཁན་གྱི་བོད་པའི་ལོ་ཚད་དེ་དག་ནང་ནས་ཕྱིར་འགྲོ་བཞིན་ཡོད་སྟབས། གཞིས་ཆགས་ཀྱི་གནས་སྟངས་གང་འདྲ་ཆགས་ཀྱི་ཡོད་དམ། ཕྲུ་གུ་མེད་ན་ཕྲུ་གུ་སྐྱེ་རྒྱུའི་ལོ་ཚད་བོད་པ་དེ་དག་གཞིས་ཆགས་ནང་མ་བསྡད་ན། སློབ་གྲྭ་སོ་སོའི་གནས་སྟངས་གང་ཞིག་ཆགས་ཀྱི་ཡོད་དམ། སློབ་གྲྭའི་ནང་ཕྲུ་གུ་ཚང་གི་ཡོད་མེད། སློབ་གྲྭ་ཁག་གཅིག་གི་ནང་རྒྱ་གར་དང་ཧི་མ་ལ་ཡའི་སློབ་ཕྲུག་བཅུག་དགོས་བྱུང་ཡོད། དེ་ལྟ་བུའི་གནས་སྟངས་མང་པོ་ཞིག་ལ་བརྟེན་ནས་གང་ལྟར་འདས་པའི་ལོ་ལྔ། བཅུ། བཅོ་ལྔའི་ཉམས་མྱོང་ལ་བལྟས་ནས་འབྱུང་འགྱུར་གྱི་ལོ་བཅུ་བཅོ་ལྔ་གང་འདྲ་ཆགས་ས་རེད། དེར་དཔག་པའི་འཆར་གཞི་བརྟན་པོ་བཟོ་མ་ཐུབ་ན་ཧ་ཅང་ཁག་པོ་ཆགས་རྒྱུའི་གནས་སྟངས་ཤིག་ཏུ་འགྱུར་འགྲོ་གི་ཡོད་པར་བརྟེན།འཛིན་སྐྱོང་བཀའ་ཤག་ཡོད་པའི་ཐོག་གཙོ་བོ་ཤེས་རིག་ལས་ཁུངས་ཀྱིས་འགན་འཁྱེར་བའི་སྒོ་ནས་དེ་ཚོའི་ཐོག་ཞིབ་འཇུག་གི་ཚན་པ་གཅིག་ཟུར་དུ་བཙུགས་ཏེ་སྲིད་བྱུས་གང་འདྲ་ཞིག་གཏིང་དགོས་སམ། ལས་གཞི་ལག་བསྟར་ཇི་ལྟར་བྱེད་དགོས་སམ། དཔེརན་། རྡ་སའི་ཁུལ་སློབ་གྲྭ་ག་ཚོད་ཡོད་དམ། སློབ་གྲྭ་ཟེར་དུས་སློབ་ཕྲུག་ཚོར་མཐུན་རྐྱེན་མང་པོ་ཞིག་དགོས་པའི་ནང་རྩེད་ཐང་གི་མཐུན་རྐྱེན་དགོས་པ་ལྟ་བུ་ཞིག་རེད། གངས་སྐྱིད་སློབ་གྲྭར་ཆ་བཞག་ན་སློབ་ཕྲུག་ཉིས་བརྒྱ་སུམ་བརྒྱ་ཙམ་ཡོད་པ་དེ་ཚོར་རྩེད་ཐང་གི་མཐུན་རྐྱེན་མེད། དེ་ལྟ་བུའི་གནས་བབ་ཐོག་ནས་རྡ་སར་འདི་ལྟར་སློབ་གྲྭ་མང་པོ་དགོས་ཀྱི་ཡོད་དམ་མེད། བོད་ཕྲུག་ཁྱིམ་སྡེ་སོ་སོའི་ནང་སློབ་ཕྲུག་ག་ཚོད་ཉུང་དུ་འགྲོ་གི་འདུག ཉིན་མོའི་སློབ་གྲྭ་དེ་ཚོའི་གནས་སྟངས་གང་འདྲ་ཆགས་ཡོད་མེད་ཞིབ་འཇུག་བྱས་པའི་ཐོག་ནས་རྡ་ས་སྤྱི་ཡོངས་ལ་ཁྱབ་པའི་ཤེས་ཡོན་གྱི་བསྟི་གནས་གང་འདྲ་འགྱུར་བ་གཏོང་དགོས་མིན་བསམ་བློ་གཏོང་དགོས། ཞེས་སོགས་ཀྱི་གསུང་བཤད་གནང་ཡོད། །
