༢༠༡༤ ཟླ་ ༡ ཚེས་ ༢༠ རེས་གཟའ་ཟླ་བ།
༄༅། ། ཕྱི་ལོ་ ༢༠༡༤ ཟླ་ ༡ ཚེས་ ༡༩ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་ཨོ་སི་ཊོ་ལི་ཡའི་ཁུལ་དུ་བདུན་ཕྲག་གཅིག་ལྷག་གཞུང་འབྲེལ་ཕྱོགས་ཕེབས་གནང་ཡོད། དེ་ཡང་གོང་ཚེས་ཉིན་གྱི་དགོང་དྲོ་བཀའ་བློན་མཆོག་ Sydney སིད་ནི་རྒྱལ་སྤྱིའི་གནམ་ཐང་དུ་ཕེབས་འབྱོར་སྐབས་སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་ལགས་དང་། Australian Tibetan Community Association ཨོ་སི་ཊོ་ལི་ཡའི་རྒྱལ་ཡོངས་བོད་རིགས་མཐུན་ཚོགས་ཀྱི་ཚོགས་གཙོ་ནེ་རྒན་ལགས། Australia Tibet Council ཨོ་སི་ཊོ་ལི་ཡའི་བོད་དོན་རྒྱབ་སྐྱོར་ཚོགས་པའི་འཐུས་མི། Tibetan Community of NSW སིད་ནི་བོད་རིགས་མཐུན་ཚོགས་ཀྱི་ཚོགས་གཙོ་ཕུར་བུ་བཀྲིས་ལགས་ཀྱིས་གཙོས་ས་གནས་བོད་མི་ཁག་གཅིག་གིས་ཕེབས་བསུའི་སྣེ་ལེན་ཞུས་ཡོད་།
བཀའ་བློན་མཆོག་གིས་ཨོ་སི་ཊོ་ལི་ཡའི་རྒྱལ་ས་ Canberra ཀེན་བྷེ་ར་དང་Sydney སིད་ནི། Melbourne མེལ་བྷོན། Brisbane སྦེར་སེ་སྦན་བཅས་གྲོང་ཁྱེར་ཆེ་ཁག་ནང་ཕྱོགས་ཕེབས་གནང་སྐབས་མང་ཚོགས་ལ་གསུང་བཤད་དང་། བོད་དོན་རྒྱབ་སྐྱོར་ཚོགས་པའི་འཐུས་མི་དང་རྒྱ་རིགས་ལྷན་མཇལ་མོལ་ཐོག་བོད་ནང་གི་གནས་སྟངས་དང་། དབུ་མའི་ལམ་གྱི་སྲིད་བྱུས་བཅས་ཀྱི་སྐོར་གསུང་བཤད་གནང་རྒྱུ་ཡིན་པར་མ་ཟད། ས་གནས་ཁག་གི་གསར་འགོད་པའི་བཅར་འདྲིར་དང་ལེན་གནང་རྒྱུ་ཡིན་འདུག དེ་བཞིན་ཕྱོགས་ཕེབས་གནང་སའི་ས་གནས་ཁག་གི་བོད་རིགས་རྣམས་ལ་དབུ་མའི་ལམ་ཀྱི་སྲིད་བྱུས་དང་བོད་ཀྱི་རིག་གཞུང་སྲུང་སྐྱོབ་བྱེད་དགོས་སྐོར་གྱི་གསུང་བཤད་གནང་རྒྱུ་ཡིན་འདུག ད་ཐེངས་ཕྱི་དྲིལ་བཀའ་བློན་མཆོག་ཨོ་སི་ཊོ་ལི་ཡའི་ Queensland ཁོན་སེ་ལེན་ཌེ་ཁུལ་དུ་བདུན་ཕྲག་འདིའི་ནང་བོད་ཀྱི་དུས་སྟོན་ཞིག་ཚོགས་ཀྱི་ཡོད་པར་བརྟེན། གོ་སྒྲིག་ཚོགས་པའི་ངོས་ནས་དུས་སྟོན་དེའི་མཛད་སྒོར་ཕྱི་དྲིལ་བཀའ་བློན་མཆོག་སྐུ་མགྲོན་གཙོ་བོར་གདན་ཞུས་ལྟར་ཆེད་ཕེབས་གནང་བ་ཞིག་ཡིན་འདུག
