༢༠༡༣ ཟླ་ ༡༢ ཚེས་ ༢ རེས་གཟའ་ཟླ་བ།

༄༅། །རྒྱ་ནག་གཞུང་གིས་བོད་མིའི་ཐོག་སྡུག་སྦྱོང་མནར་གཅོད་གཏོང་རྒྱུའི་སྲིད་བྱུས་དེར་ཨ་ཡི་སི་ལེན་ཌིའི་ Icelandགྲོས་ཚོགས་འཐུས་མི་རྣམས་ཀྱིས་སྐྱོན་བརྗོད་ཤུགས་ཆེ་གནང་བ་མ་ཟད། རྒྱ་ནག་གཞུང་གིས་༸གོང་ས་མཆོག་གི་སྐུ་ཚབ་དང་ལྷན་བོད་རྒྱ་ཞི་མོལ་རྒྱུན་འཁྱོངས་དགོས་པའི་གྲོས་འཆར་བཏོན་ཡོད། དེ་ཡང་གྲོས་འཆར་དེའི་ནང་རྒྱ་ནག་གཞུང་གིས་བོད་མི་ཞི་རྒོལ་བ་རྣམས་ཀྱི་ཁྲོད་དམ་བསྒྲགས་དང་དྲག་གནོན་བྱེད་ཤུགས་ཆེ་རུ་བཏང་བ་དེར་ཨ་ཡི་སི་ལེན་ཌིའི་གྲོས་ཚོགས་འཐུས་མིས་སེམས་འཚབ་ཀྱི་རྣམ་པ་ཤུགས་ཆེ་འདོན་དགོས་པ་མ་ཟད། འཛམ་གླིང་མཉམ་འབྲེལ་རྒྱལ་ཚོགས་ཀྱིས་བོད་ནང་གི་བོད་མིའི་འགྲོ་བ་མིའི་ཐོབ་ཐང་སྲུང་སྐྱོབ་དང་དངོས་ཡོད་གནས་སྟངས་ལ་རྟོག་ཞིབ་ཆེད་སྐུ་ཚབ་མི་སྣ་ཆེད་གཏོང་དགོས་པའི་འབོད་སྐུལ་ཡང་ཞུས་འདུག སྐབས་དེར་གྲོས་ཚོགས་འཐུས་མི་རྣམས་ཀྱིས་རྒྱ་ནག་གཞུང་ལ་བོད་རྒྱ་ཞི་མོལ་བསྐྱར་གསོ་བྱ་རྒྱུའི་བློ་སྟོབས་སྤེལ་ཆེད་ཞི་མོལ་དེ་ཨ་ཡི་སི་ལེན་ཌིའི་ཡུལ་དུ་གནང་ཐུབ་རྒྱུའི་བསམ་ཚུལ་ཡང་བཏོན་ཡོད། ཐེངས་འདིར་གྲོས་ཚོགས་འཐུས་མི་རྣམས་ཀྱིས་གྲོས་འཆར་དང་ལྷན་བསྒྲགས་གཏམ་ཞིག་ཀྱང་སྤེལ་ཡོད་པ་དེའི་ནང་གསལ་ལྟར་ན། འཛམ་གླིང་ཁྱོན་ཡོངས་སུ་གྲོས་ཚོགས་མང་པོའི་ནང་བོད་ནང་གི་ཛ་དྲག་གནས་སྟངས་དང་འབྲེལ་བའི་གྲོས་ཆོད་མང་པོ་བཞག་ཡོད་པ་མ་ཟད། ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་གྱི་དབུ་ཁྲིད་བཅུ་གཉིས་ཀྱིས་རྒྱ་ནག་གཞུང་ལ་ཞུ་སྙན་ཕུལ་བ་བརྒྱུད་བོད་མིའི་སྐུ་ཚབ་དང་ལྷན་ཞི་མོལ་དགོས་པའི་རེ་འདུན་བཏོན་ཡོད། ཅེས་འཁོད་ཡོད། ཨི་ཡི་སི་ལེན་ཌི་དང་རྒྱ་ནག་དབར་ཕྱི་ལོ་ ༢༠༡༤ ཟླ་འགོ་ཙམ་ནས་ཚོང་འབྲེལ་འཛུགས་རྒྱུ་ཡིན་པར་བརྟེན་གྲོས་ཚོགས་འཐུས་མི་རྣམས་ཀྱིས་རྒྱ་ནག་དང་ཚོང་འབྲེལ་སྐབས་ཨ་ཡི་སི་ལེན་ཌིར་བཟང་སྤྱོད་ཀྱི་འགན་ཞིག་ཡོད་པ་དྲན་གསོ་བླངས་པ་བརྒྱུད། ཡུལ་གཉིས་པོའི་ཚོང་འབྲེལ་འཇོག་རྒྱུའི་གན་ཡིག་ནང་གསལ་འགྲོ་བ་མིའི་ཐོབ་ཐང་ཐོག་ཁས་ལེན་དོན་ཚན་ཁག་ལ་རྒྱ་ནག་གཞུང་གིས་བརྩི་བཀུར་ཞུ་དགོས་པའི་དགོས་འདུན་བཏོན་ཡོད། ཐེངས་འདིར་ཨ་ཡི་སི་ལེན་ཌིའི་གྲོས་ཚོགས་ནང་ཆབ་སྲིད་ཚོགས་པ་གཅིག་མ་གཏོགས་གཞན་ཚང་མས་གྲོས་འཆར་ལ་རྒྱབ་སྐྱོར་གནང་ཡོད་པ་དང་། ཆབ་སྲིད་ཚོགས་པ་གཅིག་པོ་ནི་ད་ལྟའི་ཡུལ་དེའི་སྲིད་བློན་ལས་ཐོག་པ་སྐུ་ཞབས་སིག་མུན་དུར་ཌ་ཝོ་གུན་ལུག་སན་ Sigmundur Davíð Gunnlaugsson མཆོག་གི་ཡར་རྒྱས་ཚོགས་པ་ Progressive Party ཞེས་པ་འདི་ཡིན་འདུག