༢༠༡༣ ཟླ་ ༡༢ ཚེས་ ༢༥ རེས་གཟའ་ལྷག་པ།
༄༅། །འདི་གར་ཕྱི་དྲིལ་བོད་ཡིག་ཚན་པའི་སྤྱི་ཁྱབ་རྩོམ་སྒྲིག་པས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༣ ཟླ་ ༡༢ ཚེས་ ༢༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྐྱབས་རྗེ་གླིང་མཆོག་སྤྲུལ་རིན་པོ་ཆེ་མཆོག་དང་གདན་ས་ཆེན་པོ་གསུམ་ནང་ཡོད་པའི་གྲྭ་ཚང་དྲུག དེ་བཞིན་ཆོས་སྡེ་བཀྲ་ཤིས་ལྷུན་པོ། རྒྱུད་གྲྭ་སྟོད་སྨད། ར་སྟོད་གྲྭ་ཚང་། འབྲས་བླ་སྤྱི། བླ་མ་བཟོད་པ་རིན་པོ་ཆེའི་ཆོས་ཚོགས་དང་། བྲག་རི་བླ་བྲང་སོགས་ཆོས་སྡེ་ཁག་དང་གྲྭ་ཚང་ཁག ཌོཀ་ཊར་སྦེ་རི་ལ་སོགས་པས་ཇི་ལྟར་གསོལ་བ་ཕུར་ཚུགས་སུ་བཏབ་པ་བཞིན་བཀའ་བཞེས་བཟང་པོ་སྨིན་སྩལ་ཐོབ་སྟེ་སེ་ར་ཐེག་ཆེན་གླིང་གི་ཆོས་ར་ཆེན་མོའི་ནང་བྱང་ཆུབ་ལམ་རིམ་ཆེན་མོའི་གསུང་ཆོས་དབུ་འཛུགས་མཛད་ཡོད།
དེ་ཉིན་སྔ་དྲོ་ ༨།༤༥ པའི་ཐོག་དགའ་ལྡན་ཁྲི་རིན་པོ་ཆེ་མཆོག་དང་ཤར་བྱང་ཆོས་རྗེ་རྣམ་གཉིས་ཀྱིས་དབུས་རིས་མེད་གདན་ས་ཁག་གི་མཁན་བླ་སྤྲུལ་ལས་ཟུར་འདུས་མང་རྣམ་པ་དང་རྒྱུད་སྟོད་དང་རྒྱུད་སྨད། ར་སྟོད་གྲྭ་ཚང་སོགས་ཀྱི་མཁན་ལས་ཟུར་འདུས་མང་རྣམ་པ། སྐུ་བཅར་རྣམ་རྒྱལ་ཕན་བདེ་ལེགས་བཤད་གླིང་གི་མཁན་པོ་དགེ་འདུན་རྣམ་པ། རྒྱ་བལ་ནང་གི་དགོན་སྡེ་གྲྭ་ཚང་ཁག་གི་དགེ་བཙུན་རྣམ་པ་བཅས་ཁྱོན་གྲྭ་བཙུན་ ༢༠༠༠༠ མ་ཟིན་ཙམ་དང་། ཕྱི་རྒྱལ་ཡུལ་གྲུ་ཁག་མི་འདྲ་བ་ ༦༠ བརྒལ་བ་ནས་མི་གྲངས་ ༤༠༠༠ དེ་བཞིན་རྒྱ་བལ་འབྲུག་གསུམ་དང་བོད་སོགས་ནས་མི་དམངས་གྲངས་ ༦༠༠༠ བརྒལ་བ་བཅས་ཁྱོན་མི་གྲངས་ ༣༠༠༠༠ བརྒལ་བ་ལྷན་འཛོམས་ཐོག་མཆོག་སྤྲུལ་གླིང་རིན་པོ་ཆེ་མཆོག་གི་སྐུ་ཚབ་དགེ་བཤེས་ཐུབ་བསྟན་རབ་རྒྱས་ལགས་དང་། དགའ་ལྡན་ཤར་རྩེའི་མཁན་པོ་དགེ་བཤེས་བྱང་ཆུབ་ཆོས་ལྡན་མཆོག་བཅས་ཀྱིས་སྤོས་སྣེས་སྔོན་བསུས་ཏེ་སེར་བྱེས་གྲྭ་ཚང་གི་ཆོས་ར་ཆེན་མོའི་བཞུགས་ཁྲི་རིན་པོ་ཆེར་༸ཞབས་སོར་འཁོད་རྗེས་མཆོག་སྤྲུལ་གླིང་རིན་པོ་ཆེ་མཆོག་གིས་མཎྜལ་རྟེན་གསུམ་འདེགས་འབུལ་ཞུས། དེ་རྗེས་༸གོང་ས་མཆོག་གིས་ཆོས་ཞུ་བ་རྣམས་ལ་འཚམས་འདྲི་དང་འབྲེལ་ཐོག་མར་ནང་ཆོས་ངོ་སྤྲོད་ཀྱི་བཀའ་སློབ་ཕེབས་དོན། དེ་རིང་འདི་ག་བྱེས་ཀྱི་གདན་ས་ལོ་རྒྱུས་ཡུན་རིང་ལྡན་པའི་སེ་ར་ཆོས་སྒར་གྱི་ཆོས་རའི་ནང་ཆོས་འབྲེལ་ཉན་པར་ཕྱོགས་མཐའ་ཁག་ནས་སྐྱ་སེར་མང་པོ་ཞིག་འདུས་པ་ཁྱེད་རང་ཚོ་ཐག་རིང་པོ་ནས་ཡོང་བ་རྣམས་འགྲོ་སོང་ཡང་ཆེན་པོ་རེད། དེ་མིན་དཀའ་ངལ་མང་པོ་ཞིག་ཡོད་པ་རྣམས་ཁྱད་བསད་བྱས་ཏེ་རང་གི་འདོད་པས་དང་དུ་བླངས་ཏེ་འདིར་ཡོང་བ་རེད། ཚང་མར་འཚམས་འདྲི་ཞུ་གི་ཡོད། དད་པ་དང་དམ་ཚིག་གཡོ་བ་མེད་པའི་ཐོག་ནས་དོན་གཉེར་ཆེན་པོས་ཡོང་བར་དགའ་པོ་བྱུང་།
ཐེངས་འདི་སེ་ར་ཆོས་སྒར་ལ་ཡོང་རྒྱུའི་དམིགས་ཡུལ་དེ་སྔ་ལོ་ལམ་རིམ་ཡོངས་གྲགས་ལ་ཁྲིད་ཆེན་བརྒྱད་དང་དེའི་སྟེང་ཁྲིད་ཁག་གཅིག་ཁ་སྣོན་བྱས་ཏེ་ཁྲིད་ཆེན་བཅུ་གཅིག་ཙམ་ཞིག་ངོས་ལ་ཁྲིད་ཐོབ་ཡོད་པ་དེ་དག་ཁྲིད་རྒྱུ་ཡིན། ལམ་རིམ་ཆེ་ཆུང་གཉིས་དང་འདུས་དོན་དེ་དག་སྔ་ལོར་གྲུབ་ཟིན་པ་རེད། དེ་རིང་ལམ་རིམ་གསེར་ཞུན་མ་ནས་བཟུང་གང་ཚར་ཚར་འདོན་གྱི་ཡིན། ཕལ་ཆེར་ཉིན་བཅུའི་ནང་ཚར་ཨེ་ཐུབ་མི་ཐུབ་རེད། ཨུ་ཚུགས་བརྒྱབ་ན་མིག་ལ་དཀའ་ངལ་འཕྲད་སྲིད་པ་རེད། དེར་བརྟེན་ངོས་ཀྱིས་ག་ཚོད་ཚར་ཚར་འདོན་རྒྱུ་ཡིན། ང་ཚོ་ཚང་མ་འདིར་ཡོང་ནས་རང་གི་མི་ཚེ་འདིའི་ནང་ཕན་ཐོགས་ཡོང་རྒྱུ་ཞིག་དང་བསམ་བློ་གཏོང་སྟངས། ཚེ་འདིར་ཕན་ཐོགས་ཡོད་པ་ཞིག་བྱུང་བ་ཡིན་ན། ཚེ་ཕྱི་མ་ཡང་ཡག་པོ་ཞིག་ཡོང་རྒྱུའི་འགན་ལེན་ཐུབ་ཀྱི་ཡོད། མི་ཚེ་སྡུག་ལ་བསྐྱལ་ན་རང་ཉིད་ཤི་ཁར་ཕྱག་མཆོད་འབུལ་དང་སྐྱབས་འཇུག་སྨོན་ལམ་ག་རེ་ཞུས་ཀྱང་ཕྲན་བུ་ཕན་གྱི་རེད་མ་གཏོགས་ཧ་ཅང་ཁག་པོ་རེད། ཚེ་འདི་དོན་དང་ལྡན་པ་ཞིག་བྱེད་ཀྱི་ཡིན་ན་ཚེ་རབས་ཕྱི་མ་རྣམས་སུ་ཡང་ཕན་ཐོགས་ཡོང་རྒྱུ་ངེས་ཅན་རེད། དེར་བརྟེན་ང་ཚོ་འདིར་རུབ་རུབ་བྱས་ཏེ་ཆོས་འབྲེལ་ཞུ་རྒྱུ་དེ་འདྲ་ཡིན། ཞེས་དང་དེ་རྗེས་༸གོང་ས་མཆོག་གིས་ཆོས་ཉན་བཤད་ག་འདྲ་ཞིག་བྱས་ཀྱང་ཀུན་སློང་རྣམ་པར་དག་པ་ཞིག་དགོས་རྒྱུ་གལ་ཆེ་ཡིན་པ་དང་སྐྱབས་འགྲོའི་མཐར་ཐུག་གི་དམིགས་ཡུལ་དང་སེམས་སྐྱེད་སྐོར་ཆོས་འབྲེལ་སྩལ་བ་མ་ཟད། ད་རེས་འདིར་མི་གྲངས་ཁྲི་གསུམ་ཙམ་འདུས་ཡོད་པ་འདི་རྣམས་འཛམ་གླིང་འདིའི་སྟེང་ད་ཆ་མི་གྲངས་ཐེར་འབུམ་བདུན་ཡོད་པའི་ཆ་ཤས་ཙམ་ཆགས་ཀྱི་ཡོད། འདི་དག་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་པ་རེད། ཅེས་དང་ཡང་༸གོང་ས་མཆོག་གིས་ད་ཆ་ང་ཚོས་ཁ་ཡོད་ལག་ཡོད་ཐོག་འགྲོ་དགོས་པ་ལས་ལམ་དང་ལུགས་སྲོལ་ལྟ་བུའི་འགྲོ་རྒྱུའི་དུས་ཚོད་ཡོལ་ཟིན་པ་རེད། ང་ཚོས་བོད་ནང་འདྲ་ཆགས་པོ་བྱས་ཏེ་ལོ་བརྒྱ་ཕྲག་མང་པོ་བསྡད་པར་སོང་ཁ་ཐབས་འདི་མ་གཏོགས་བྱུང་མི་འདུག ད་ཆ་དངོས་གནས་ཁ་ཡོད་ལག་ཡོད་བྱས་ཏེ་འགྲོ་དགོས་རྒྱུ་ཧ་ཅང་གལ་ཆེན་པོ་རེད།དེ་བཞིན་བདེ་སྡུག་གི་གཙོ་བོ་དེ་ཡིད་བློར་བརྟེན་པའི་བདེ་སྡུག་རེད་འདུག
དེར་བརྟེན་འཛམ་གླིང་འདིའི་སྟེང་མི་དུང་ཕྱུར་བདུན་ཅུ་ཙམ་ཡོད་པ་ཚང་མ་སྡུག་བསྔལ་མི་འདོད་པ་དང་བདེ་བ་འདོད་པ་ཡིན་སྟབས་གཙོ་བོ་སེམས་ཀྱི་སྡུག་བསྔལ་དེ་སེལ་རྒྱུ་དང་ཉུང་དུ་འགྲོ་རྒྱུར་ང་ཚོས་ཐབས་ཤེས་བྱེད་དགོས་པ་དེ་མིར་རྣམ་དཔྱོད་ཡོད་པའི་འགན་ལྟ་བུ་རེད། དེར་བརྟེན་ཡ་རབས་དང་སེམས་བཟང་པོ་བྱེད་དགོས་ཀྱི་འདུག དེ་ནི་སོ་སོར་བདེ་སྐྱིད་ཡོང་རྒྱུའི་རྩ་བ་ལྟ་བུ་ཆགས་ཀྱི་ཡོད། དེ་ལྟར་རང་ཉིད་མི་ཞིག་ཡིན་པའི་ཆ་ནས་སེམས་པ་བཟང་པོ་བྱེད་དགོས་པ་རེད། རྒྱབ་མདུན་ངོ་ལྐོག་མེད་པར་དྲང་པོ་ཞིག་བྱེད་རྒྱུ་དེ་གལ་ཆེན་པོ་ཡིན། ཞེས་སོགས་ཀྱི་ནང་ཆོས་ངོ་སྤྲོད་མཛད་ནས་ད་རེས་ཆོས་འབྲེལ་ཀྱི་ཐོག་མ་ཐམས་ཅད་མཁྱེན་པ་༸རྒྱལ་བ་བསོད་ནམས་རྒྱ་མཚོ་མཆོག་གིས་མཛད་པའི་ལམ་རིམ་གསེར་ཞུན་མའི་ཆོས་འབྲེལ་དབུ་འཛུགས་ཀྱི་སྔ་དྲོ་ཆོས་ཐུན་གཅིག་དང་དེ་བཞིན་ཕྱི་དྲོ་ཆོས་ཐུན་གཅིག་བཅས་ཆོས་ཐུན་གཉིས་བཀའ་དྲིན་ཆེ་བ་སྩལ་རྗེས་ཉིན་འདི་ནི་སྐྱབས་རྗེ་ཡོངས་འཛིན་གླིང་རིན་པོ་ཆེ་མཆོག་གི་དགོངས་རྫོགས་ཉིན་མོར་སོང་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་འབུམ་ཚོགས་སམ་གསུང་ཚོགས་རྒྱས་པ་ཞིག་འབུལ་ཤོམ་གནང་ཡོད།།
