༢༠༡༣ ཟླ་ ༡༢ ཚེས་ ༢༤ རེས་གཟའ་མིག་དམར།
༄༅། །འདི་གར་ཆེས་མཐོའི་ཁྲིམས་ཞིབ་ཁང་ནས་ཕྱི་ལོ་ ༢༠༡༣ ཟླ་ ༡༢ ཚེས་ ༢༤ ཉིན་བཏང་གནས་ནང་འཁོད་དོན། ཤར་ཕྱོགས་བོད་མིའི་ས་གནས་ཁྲིམས་ཞིབ་ཁང་གི་ས་གནས་ཁྲིམས་ཞིབ་པ་ལྷ་འབྲུག་ལགས་ཀྱིས་ཕྱི་ལོ་ ༢༠༡༣ ཟླ་ ༡༢ ཚེས་ ༡༤ རེས་གཟའ་སྤེན་པའི་ཉིན་བསྟན་འཛིན་སྒང་ས་གནས་འཐུས་ཚོགས་སྐབས་བརྒྱད་པའི་འདེམས་ཐོན་ཚོགས་མི་རྣམ་པ་དང་། ཚོགས་གཙོ། ཚོགས་གཞོན་བཅས་ཀྱི་དམ་བཅའ་འབུལ་བཞེས་ཀྱི་གནང་སྒོ་ཁག་གནང་སྟེ། ཉིན་རྒྱབ་ཆུ་ཚོད་ ༣ པ་ནས་ཆུ་ཚོད་ ༥ བར་བསྟན་འཛིན་སྒང་སེར་སྐྱ་མི་མང་དང་།
ཕྱི་ཚེས་ ༡༦ ཉིན་འབུམ་སྡེ་ལ་སེར་སྐྱ་མི་མང་བཅས་སོ་སོར་ས་གནས་ཁྲིམས་ཞིབ་པ་གསར་པའི་ངོ་སྤྲོད་དང་། བཙན་བྱོལ་བོད་མིའི་ཁྲིམས་ལུགས་དབང་འཛིན་ངོ་སྤྲོད། སྤྱི་མང་གཏུག་བཤེར་གྱི་དོན་ཚན་གལ་ཆེ་ཁག དམིགས་བསལ་ཁྲིམས་ཁོངས་ཁྱབ་ཚད། ས་གནས་ཁྲིམས་ཞིབ་ཁང་སོ་སོའི་ས་ཁོངས་ཁྱབ་ཚད་སྒྱུར་བཅོས། འཕྲལ་སེལ་ཁ་མཆུ་ཞུ་གཏུག་བྱ་ཡུལ་བཅས་ཀྱི་སྐོར་གསུང་བཤད་དང་མང་ཚོགས་ཀྱི་དྲི་བ་ཁག་ལ་ལན་འདེབས་གནང་ཡོད། ཤར་ཕྱོགས་ས་གནས་ཁྲིམས་ཞིབ་པ་ལྷ་འབྲུག་ལགས་ནི་འདི་ལོ་ཕྱི་ཟླ་ ༡༡ ནང་ཆེས་མཐོའི་ཁྲིམས་ཞིབ་ཁང་གིས་རྒྱ་ཁྱབ་གསལ་བསྒྲགས་བརྒྱུད་འདེམས་རྒྱུགས་གྱི་ལམ་ནས་ཐད་བསྐོད་གནང་བ་ཞིག་ཡིན་པ་དང་། ས་གནས་ཁྲིམས་ཞིབ་པའི་ལས་ཁུར་བླངས་རྗེས་ཁྱབ་ཁོངས་ས་གནས་སུ་ཕྱོགས་བསྐྱོད་གནང་བ་ཐོག་མ་དེ་ཡིན།
