༢༠༡༣ ཟླ་ ༡༢ ཚེས་ ༦ རེས་གཟའ་པ་སངས།
༄༅། །ཁེ་ན་ཌ་གཞུང་གི་གྲོས་ཚོགས་འཐུས་མི་ཁག་གཅིག་གིས་རྒྱ་ནག་གཞུང་ནས་༸གོང་ས་༸སྐྱབས་མགོན་ཆེན་པོ་མཆོག་ལ་བཟང་ཕྱོགས་ནས་གཟིགས་དགོས་སྐོར་གྱི་འབོད་སྐུལ་ཞུས་འདུག
དེ་ཡང་བརྒྱུད་ལམ་ཁག་གཅིག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༣ ཟླ་ ༡༢ ཚེས་ ༤ ཉིན་ཁེ་ན་ཌ་གྲོས་ཚོགས་འོག་མའི་འཐུས་མི་ཁག་གཅིག་གིས་གྲོས་ཚོགས་ཀྱི་ཚོགས་གཙོ་དབུ་བཞུགས་ཐོག་འཐུས་མི་རྣམ་པར་བོད་དོན་སྙན་སེང་དང་འབྲེལ་གསུང་དོན། རྒྱ་ནག་གཞུང་ཕྱོགས་ནས་བོད་ཀྱི་ཐུན་མོང་མ་ཡིིན་པའི་ཆོས་དང་རིག་གཞུང་ལ་དམ་བསྒྲགས་དང་བཙན་གནོན་བྱས་དང་བྱེད་བཞིན་ཡོད་སྐོར་གྱི་བོད་ནང་གི་ཛ་དྲག་གནས་སྟངས་གླེང་སློང་གནང་འདུག
ལྷག་པར་གྲོས་ཚོགས་ཀྱི་གུ་ཡངས་ཚོགས་པའི་འཐུས་མི་སྐུ་ཞབས་ཨིར་ཝིན་ཀོ་ཊི་ལར་ (Irwin Cotler) ལགས་ཀྱིས་གྲོས་ཚོགས་ནང་གསུང་དོན། དུས་ད་ལྟ་བར་བོད་ནང་གི་བོད་མི་བརྒྱ་དང་ཉི་ཤུ་བརྒལ་བ་ཞིག་ནས་བོད་ཀྱི་བདེན་དོན་ཆེད་རང་ལུས་མེར་སྲེག་བཏང་ཡོད། རྒྱ་ནག་གཞུང་གི་འགོ་ཁྲིད་ཚོས་ཁྲིམས་ལུགས་ལ་ངེས་པར་དུ་རྩི་འཇོག་བྱེད་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ནི་བོད་རྒྱ་གཉིས་དབར་ཞི་མཐུན་ཡོང་རྒྱུའི་གཞི་རྩ་ལྟ་བུ་ཆགས་ཡོད་པར་བརྟེན། རྒྱ་ནག་གཞུང་གི་འགོ་ཁྲིད་ཚོས་༸གོང་ས་ཏཱ་ལའི་བླ་མ་མཆོག་ལ་བཟང་ཕྱོགས་ནས་གཟིགས་དགོས་རྒྱུ་གལ་འགངས་ཆེན་པོ་ཆགས་ཡོད། བོད་མི་རྣམས་ནས་འཚེ་བ་མེད་པའི་ལམ་ནས་རྒྱ་ནག་གཞུང་གི་རྩ་ཁྲིམས་གཞིར་བཟུང་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་རྩོད་བཞིན་ཡོད། འོན་ཀྱང་རྒྱ་ནག་གཞུང་ནས་བོད་མི་ཞི་རྒོལ་བ་ཚོར་དྲག་གནོན་བྱས་པ་མ་ཟད། བོད་མི་ཁག་གཅིག་ལ་ཉེས་མེད་ཉེས་འཛུགས་བྱེད་བཞིན་ཡོད།
དེ་བཞིན་རང་དབང་ཅན་གྱི་གསར་འགོད་པ་ཚོ་བོད་ནང་འགྲོ་བསྐྱོད་བྱེད་རྒྱུ་བཀག་བསྡོམས་བྱས་དང་བྱེད་མུས་རེད། དེར་བརྟེན་བྱེད་ཐབས་དེ་དག་ནི་ལོ་རྒྱུས་ནང་དཔལ་ཡོན་ལྡན་པའི་སྟོ༞བས་ཆེན་རྒྱལ་ཁབ་ཅིག་གི་ཞབས་འདྲེན་རེད། ཅེས་སོགས་ཀྱི་གསུང་བཤད་གནང་འདུག དེ་བཞིན་གྲོས་ཚོས་འཐུས་མི་གཉིས་ནས་ཀྱང་བོད་དོན་ལ་གདུང་སེམས་སྐྱེ་ཡོད་སྐོར་གྱི་གསུང་བཤད་གནང་འདུག
