༢༠༡༣ ཟླ་ ༡༢ ཚེས་ ༢༧ རེས་གཟའ་པ་སངས།
༄༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། ཕྱི་ལོ་ ༢༠༠༨ ལོར་བོད་ས་ཁྱོན་ཡོངས་སུ་བོད་མི་ཚོས་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་ཞི་རྒོལ་བྱེད་སྐབས་ཀན་ལྷོ་ཅོ་ནེ་མ་རྩ་སྡེ་བའི་རིན་ཆེན་ཚེ་རིང་ལགས་ཀྱིས་བོད་པའི་རྒྱལ་དར་བསྒྲེངས་ཏེ་ཞི་རྒོལ་ནང་མཉམ་ཞུགས་བྱས་པའི་ཉེས་མིང་འོག་རྒྱ་ནག་གཞུང་གིས་འཛིན་བཟུང་བྱས་ཏེ་ལོ་ ༨ ཁྲིམས་ཐག་བཅད་ཡོད་ཀྱང་། ཕྱི་ལོ་ ༢༠༡༣ ཟླ་ ༡༢ ཚེས་ ༢༥ ཉིན་གྱི་སྔ་དྲོ་ཆུ་ཚོད་ ༨།༣༠ ཐོག་ལན་ཀྲུའུ་གྲོང་ཁྱེར་གྱི་ཏཱ་ཧྲ་པཱེ་ཞེས་པའི་བཙོན་ཁང་ཞིག་ནས་ཁོང་གློད་བགྲོལ་གྱིས་ཕྱིར་རང་ཁྱིམ་དུ་ལོག་ཡོད། སྐབས་དེར་ས་གནས་མི་མང་གིས་ཁ་བཏགས་དང་གོས་བཏགས་ཀྱིས་གཡོགས་ཏེ་ཁོང་ལ་ཕེབས་བསུ་གཟབ་རྒྱས་ཞུས་འདུག ཕྱོགས་མཚུངས་ཅོ་ནེ་རྫོང་མདོ་ཁོག་ཞང་དུ་ཡོད་པའི་ཆོས་དཔལ་ཞིང་བཀྲ་ཤིས་ཆོས་འཁོར་དགོན་པའི་མཚན་ཉིད་གྲྭ་ཚང་གི་རང་ལོ་ ༤༠ ཡིན་པའི་གྲྭ་བསྟན་འཛིན་རྒྱ་མཚོ་ལགས་ཀྱིས་ཞི་རྒོལ་ནང་མཉམ་ཞུགས་བྱས་པའི་ཉེས་མིང་འོག་ལོ་ ༡༥ ཡི་དུས་བཀག་བཙོན་འཇུག་གི་ཁྲིམས་ཐག་བཅད་དེ་ལན་ཀྲུའུ་གྲོང་ཁྱེར་ཏ་ཧྲ་པེ་ཞེས་པའི་བཙོན་ཁང་དུ་བཙོན་འཇུག་དང་། རྒྱུད་པ་གྲྭ་ཚང་གི་རང་ལོ་ ༢༨ ཡིན་པའི་གྲྭ་བསྟན་འཛིན་རྒྱ་མཚོ་ལགས་སུ་ལོ་ ༡༣ གྱི་ཁྲིམས་ཐག་བཅད་དེ་ཀན་སུའུ་ཏེན་ཞི་གྲོང་ཁྱེར་གྱི་བཙོན་ཁང་ཞིག་ཏུ་བཙོན་འཇུག་བྱས་ཡོད།
སྤྱིར་རྒྱ་ནག་གཞུང་གིས་ས་བྱི་ཞི་རྒོལ་ཆེན་མོའི་སྐབས་མི་མང་སྣེ་ཁྲིད་བྱས་པའི་ཉེས་མིང་འོག མདོ་ཁོག་ཞང་མར་ཙ་སྡེ་བའི་རང་ལོ་ ༣༨ ཡིན་པའི་རིན་ཆེན་ཚེ་རིང་ལགས་དང་རང་ལོ་ ༢༥ ཡིན་པའི་བསྟན་འཛིན་བཀྲ་ཤིས་ལགས། ཉིན་པ་ཞང་ཉིན་པ་སྡེ་བའི་རང་ལོ་ ༣༠ ཡིན་པའི་བློ་བཟང་རྡོ་རྗེ་ལགས་གསུམ་ལ་ལོ་ ༨ རེ་ཁྲིམས་ཐག་བཅད་དེ། བློ་བཟང་རྡོ་རྗེ་ཀན་སུའུ་པེ་ཡི་གྲོང་ཁྱེར་གྱི་བཙོན་ཁང་ཞིག་ཏུ་བཙོན་འཇུག་བྱས་ཡོད་པ་དང་། གཞན་གཉིས་ཏ་ཧྲ་བཙོན་ཁང་དང་ཏེན་ཞི་གྲོང་ཁྱེར་གྱི་བཙོན་ཁང་བཅས་སུ་བཙོན་འཇུག་བྱས་ཏེ། ཁོང་ཚོའི་ནང་མི་གཉེན་འབྲེལ་ཚོར་ཟླ་རེར་ཐེངས་རེར་ཐུག་འཕྲད་དང་རྒྱ་སྒོར་ ༡༠༠ ཡན་སྤྲད་མི་ཆོག་པའི་སྒྲིག་གཞི་བཟོས་ཡོད་འདུག
