༢༠༡༣ ཟླ་ ༡༢ ཚེས་ ༡༡ རེས་གཟའ་ལྷག་པ།
༄༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། ཁམས་ནགས་ཤོད་འབྲི་རུ་རྫོང་ལྟར་མོས་དགོན་པའི་དགེ་འདུན་པ་གསུམ་དགོན་པའི་གུང་སེང་སྐབས་ལྷ་སར་ཕྱིན་པའི་རིང་། ཕྱི་ཟླ་ ༡༡ ཚེས་ ༢༣ ཉིན་རྒྱ་གཞུང་གིས་འཛིན་བཟུང་བཀག་ཉར་བྱས་རྗེས་གར་ཡོད་ཆ་མེད་གྱུར་པའི་གནས་ཚུལ་ཐོན་འདུག ད་ཆ་ལྟར་མོས་དགོན་དང་ཉེ་སྐོར་གྲོང་ཁ་ཤས་དམག་གིས་བསྐོར་བ་དང་། དགོན་པའི་ནང་དགེ་འདུན་པ་མེད་པར་སྒོ་བརྒྱབ་ཡོད་འདུག
དེ་བཞིན་ནགས་ཤོད་འབྲི་རུ་རྫོང་རབ་བརྟན་དགོན་པ་དང་འབྲོང་སྣ་དགོན་པའང་རྒྱ་དམག་གིས་བསྐོར་བ་དང་། ཁམས་སྨད་སྡེ་དགེ་དཔལ་ཡུལ་དང་། སེར་ཤུལ། གསེར་རྟ་ནང་བསྟན་སློབ་གླིང་བཅས་སློབ་གཉེར་ལ་སོང་བའི་རབ་བརྟན་དགོན་པའི་དགེ་འདུན་པ་བརྒྱད་རྫོང་སྲིད་གཞུང་གིས་འཛིན་བཟུང་བཀག་ཉར་བྱེད་བཞིན་ཡོད་འདུག
འདི་ལོ་ཕྱི་ཟླ་དགུ་པ་ནས་བཟུང་བོད་རང་སྐྱོང་ལྗོངས་སྲིད་གཞུང་ཟེར་བས་ཁམས་ནགས་ཤོད་འབྲི་རུ་རྫོང་དུ་༼ ཞི་མཐུན་གྱི་འབྲི་རུ་གཏོད་༽དགོས་ཞེས་པའི་གཙོ་དོན་སློབ་གསོའི་ལས་འགུལ་ཟེར་བ་ཞིག་སྤེལ་ནས། ས་གནས་མི་དམངས་གཏན་ནས་གནས་བཟོད་མི་བདེ་བ་བཟོ་བཞིན་པའི་ཁར་ཟླ་བ་སྔོན་མར་ལྗོངས་དང་ས་གནས་རྫོང་སོགས་ནས་གཤམ་སྐྱོད་ལས་དོན་ལས་བྱེད་སྔར་བས་མང་དུ་བཏང་སྟེ་དམ་བསྒྲགས་ཧ་ཅང་ཆེན་པོ་བྱེད་བཞིན་ཡོད་འདུག
རྒྱ་ནག་སྲིད་གཞུང་ནས་འབྲི་རུ་རྫོང་ནི་ཆབ་སྲིད་ཐོག་བདེ་འཇགས་མེད་པའི་ས་ཁུལ་ཞིག་ཡིན་པ་དང་། རྫོང་འདི་ཞི་བདེ་ལྷིང་འཇགས་གཏང་མ་ཐུབ་ན་དེའི་རྐྱེན་པས་ས་གནས་དང་། རང་སྐྱོང་ལྗོངས་ས་ཁུལ་གཞན་དུ་ཤུགས་རྐྱེན་ངན་པ་ཐེབས་སྲིད་པས། འབྲི་རུ་རྫོང་གི་ཡུལ་མི་རྣམས་བསམ་བློའི་སློབ་གསོ་མཐར་ཕྱིན་པ་རྒྱག་དགོས་ཟེར་བ་ལྟར། ཉིན་མཚན་མེད་པར་སྡེ་དགོན་ཡོངས་ལ་བསམ་བློའི་སློབ་གསོ་ཟེར་ནས་ཚོགས་འདུ་འཚོགས་ཀྱི་ཡོད་པ་དང་། མཚོ་སྔོན་དང་སི་ཁྲོན་སོགས་ལྗོངས་ཕྱིར་སློབ་གཉེར་ལ་སོང་བའི་འབྲི་རུ་རྫོང་དགོན་པ་ག་གེ་མོའི་ཁོངས་གཏོགས་སུ་ཡོད་བཞིན་པའི་གྲ་བཙུན་རྣམས་ཕ་ཡུལ་དུ་འབོད་འགུག་བྱེད་བཞིན་པ་མ་ཟད། དེ་སྔོན་རྒྱ་གར་ལ་སོང་བའི་རིགས་དང་། མཚོ་སྔོན་དང་སི་ཁྲོན་བོད་ཁུལ་སོགས་ལ་སོང་བའི་རིགས་རྣམས་ལོགས་སུ་བསམ་བློའི་སློབ་གསོ་གཏོང་བཞིན་འདུག
ནགས་ཤོད་འབྲི་རུ་རྫོང་ལྟར་མོས་དགོན་རྒྱུན་དུ་གྲྭ་རྒྱུན་རྣམས་དགུན་ཁའི་གུང་སེང་ཟླ་བ་གཅིག་སོ་སོའི་ཁྱིམ་ཚང་ལ་གཏོང་བའི་ཆོས་ཕྱོགས་ཀྱི་ལམ་ལུགས་ཡོད་པ་བཞིན། དགེ་འདུན་པ་རང་ཁྱིམ་དུ་ལོག་ཡོད་པའི་སྐབས་ལས་དོན་ཚོགས་ཆུང་གི་མི་རྣམས་འབྱོར་ནས་སྐུ་གཉེར་སོགས་དགོན་པ་ལྟ་སྲུང་མཁན་ཉུང་ཤས་ལ་བཤད་དོན། གྲྭ་པ་ཚོ་ག་པར་ཡོད། ཚུར་བསྡུས་ཤོག་ཟེར་བ་དང་།མ་ཚད་རང་ལོ་བཅུ་བདུན་མ་ཟིན་པ་རྣམས་དགོན་ནང་སྡོད་མི་ཆོག་ཟེར་བ།དགོན་པའི་ནང་གི་གྲྭ་ཤག་གི་ལྡེ་མིག་ཁྱེར་ཤོག་ཟེར་བ་སོགས་རེད། གྲྭ་བ་ཉུང་ཤས་ཚོས་གྲྭ་ཤག་གི་ལྡེ་མིག་ང་ཚོའི་ལག་པར་ཡོད་པ་མ་རེད་ཅེས་དང་ལེན་མ་བྱས་པས། དགོན་པ་དམགས་མིས་བསྐོར་ནས་གྲྭ་ཤག་རྣམས་སྒོ་ལྕགས་གཏོར་ཏེ་གློག་ཀླད་སོགས་ཅ་དངོས་ཁག་གཅིག་བཙན་འཁྱེར་བྱས་འདུག
དེ་མཚུངས་གྲྭ་བ་དེ་ཚོའི་འབྲེལ་ཡོད་གྲོང་པ་དང་ཁྱིམ་ཚང་དམག་གིས་བསྐོར་ནས་ལས་གོས་ནག་པོ་ཅན་གྱིས་དྲག་ཆས་དམག་གིས་སྡོད་ཁྱིམ་ཡོངས་རྫོངས་བསྔོགས་ནས་ལག་ཐོགས་ཁ་པར། རླུང་འཕྲིན་ཉན་བྱེད། ཅ་དངོས་བླུགས་སྣོད་སྒམ་ཆུང་ཆུང་། འདྲ་པར། གྲི་རྙིང་པ་སོགས། གཞན་ཡང་ཅ་དངོས་ཙག་ཙིག་ཅི་རིགས་བཙན་འཁྱེར་བྱས་འདུག བཅའ་སྡོད་ལས་བྱེད་ཀྱིས་ས་གནས་མི་དམངས་ལ་གྲ་ཤག་ཁག་སྒོ་ཕྱེ་དགོས་ཞེས་བཙན་བཀའ་བཏང་སྐབས། སྡེ་དགོན་གཉིས་ནས་ད་སྔ་དོན་མེད་ངང་འཇུས་ཟིན་པའི་ས་གནས་མི་དམངས་རྣམས་གློད་ན་སྒོ་ཕྱེ་ཆོག་ཅེས་ལན་བཏབ་འདུག
ཉེ་དུས་ཟླ་བ་གསུམ་ཙམ་རིང་ཁམས་ནགས་ཤོད་འབྲི་རུའི་ཡུལ་མི་བརྒྱ་ཚོ་ཁ་ཤས་དོན་མེད་འཇུ་བཟུང་དང་བཙོན་འཇུག་མནར་གཅོད། ཆད་གཅོད། ཁྲིམས་ཆད། དེ་བཞིན་མང་པོ་གར་སོང་ཆ་མེད་ངང་གནས་ཡོད་པ་སོགས་དཀའ་ངལ་ཧ་ཅང་ཆེན་པོ་མྱངས་དང་མྱོང་བཞིན་པས་ས་གནས་ཀྱི་དམ་བསྒྲགས་གནས་སྟངས་ཇེ་ཞན་ཇེ་སྡུག་ལ་འགྲོ་བཞིན་པའི་གནས་སྟངས་འདི་ནི་གཅིག་དགུ་རེ་དགུ་ལོར་ནགས་ཤོད་འབྲི་རུ་དང་། ཁྱུང་པོ་སྟེང་ཆེན། ལྕང་ར་དཔལ་འབར་སོགས་སུ་རྒྱ་རྒོལ་འཐབ་འཛིག་དྲག་པོ་བྱས་ཏེ་ས་གནས་ཡུལ་མི་ཧ་ཅང་མང་པོ་ཞིག་འཐབ་རྒོལ་ཁྲོད་གྲོངས་པ་དང་། དམར་གསོད་སོགས་བྱས་པའི་ཁྲིམས་ཆད་ནན་པོ་བཏང་ཕྱིན། ད་ལོ་ཉིས་སྟོང་བཅུ་གསུམ་གྱི་ལོ་འདི་ནི་དཀའ་སྡུག་ཆེ་ཤོས་ཀྱི་ལོ་དེ་ཡིན་འདུག
